Laj Adan ut li xEva, xb’aan laj Douglas Fryer

5–11 febrero: “Kanabʼanbʼilebʼ chixsikʼbʼal ru li achʼabʼaak ut li junelik yuʼam, saʼ xkʼabʼaʼ li nimla aj bʼaanuhom uuchilej”

2 Nefi 1–2

Wi ta taanaw naq raqe’k re laa yu’am, k’a’ru li roso’jikil esil taawaj raj xwotzb’al rik’ineb’ li ani jwal raab’ileb’ aab’aan? Naq li profeet aj Lehi kireek’a naq raqe’k re lix yu’am, kixch’utub’ lix junkab’al jun sut chik. Kixwotz rik’ineb’ li kixk’utb’esi li qaChoxahil Yuwa’ chiru. Kixch’olob’ xyaalal li Mesias. Kixk’ut li na’leb’ re li evangelio jwal naxra chiruheb’ li kristiaan jwal naxra. A’an ki’aatinak chirix li ach’ab’aak, li paab’ank, lix t’anik laj Adan ut li xEva, li tojb’al-ix sa’ xk’ab’a’ li Jesukristo, ut li sahil ch’oolejil. Moko chixjunileb’ ta li ralal xk’ajol ke’xsik’ ru xyu’aminkil li kixk’ut—maajun qe naru naqasik’ ru k’a’ru te’xb’aanu li qakomon. A’b’an naru naqak’ut ut naqach’olob’ xyaalal laj Tojol-ix, li “nokoxkanab’ chixsikʼbʼal ru li achʼabʼaak ut li junelik yuʼam” (chiʼilmanq 2 Nefi 2:26–27).

Li na’leb’ re tzolok sa’ li ochoch ut sa’ li iglees

2 Nefi 1:13–29

Naru “ninʼajk ut ninwakli chaq saʼ li poqs.”

Sa’ 2 Nefi 1:13–29, k’e reetaleb’ li aatin kiroksi laj Lehi re xch’olob’ankil lix musiq’ejil wanjik laj Laman ut laj Lemuel. K’a’ru natenq’ank chi ajk chaq saʼ jun “nimla wara” re musiq’ej? K’a’ru natenq’ank aawe chixchiq’b’al chaq chawix li “bakʼlebʼ chʼiichʼ” re musiq’ej sa’ laa yu’am? K’oxla lix ch’olob’ahom laj Lehi sa’ li raqal 15 ut lix b’oqom sa’ li raqal 23. K’a’ru li na’leb’ naraj laa Choxahil Yuwa’ naq taatzol sa’eb’ li raqal a’in?

Oksiheb’ li k’anjeleb’aal. Roksinkileb’ li k’anjeleb’aal naru naxtenq’aheb’ li kristiaan chixtawb’aleb’ ru li na’leb’ re li evangelio ut chixjultikankileb’ chi us. Naq nakakawresi aawib’ re k’utuk sa’ li tusleb’ aatin a’in, k’oxlaheb’ li k’anjeleb’aal naru nakawoksi. Qayehaq, maare jun b’ak’leb’ ch’iich’ re hu naru naxtenq’aheb’ laj tzolonel chixtawb’al ru li raatin laj Lehi sa’ 2 Nefi 1:13 malaj 2 Nefi 2:27.

2 Nefi 2

B’antiox re li Jesukristo, “kanabʼanbʼilin chixsikʼbʼal ru li achʼabʼaak ut li junelik yuʼam.”

Lix junkab’al laj Lehi ak ke’wulak sa’ jun li ak’il ch’och’, k’a’jo’ li te’ruuq chixb’aanunkil. Li te’xsik’ ru xb’aanunkil sa’ li ak’il na’ajej a’in nim xwankil choq’ re li usaak ut li sahil ch’oolejil truuq raj te’xkul. Maare xb’aan a’in naq laj Lehi kixk’e xna’leb’ laj Jakob, li ralal, chirix li xtaql ch’oolej, malaj li wankilal re sik’ok-u, sa’ 2 Nefi 2. Naq yooqat chirilb’aleb’ li raqal 11–30, tz’iib’aheb’ lix sumenkil li patz’om a’in:

• K’a’ut naq aajel ru li xtaql ch’oolej sa’ rilob’aal li qaChoxahil Yuwa’, us ta wankeb’ li neke’oksink re a’an re rahob’tesink?

• Chan ru naxyal xq’e laj tza chixq’unob’resinkil malaj chixsachb’al lix taql aach’ool?

• Chan ru naq li Kolonel nakatxtenq’a “chixsik’b’al ru li ach’ab’aak ut li junelik yu’am” (raqal 27)?

Naru ajwi’ nakab’aanu a’in re tzolok chirix li xtaql ch’oolej sa’ 2 Nefi 2: K’e reetal li k’a’ru aajel ru choq’ qe re naq taawanq xtaql qach’ool ut re tooruuq chi wulak jo’ naraj li Dios. Qayehaq:

• 2 Nefi 2:5: Xnawb’al ru li us ut li ink’a’ us; jun chaq’rab’

• 2 Nefi 2:11, 16:

• 2 Nefi 2:16:

• 2 Nefi 2:21:

• 2 Nefi 2:6–9, 26–28:

K’a’ raj ru taak’ulmanq rik’in xtaql li qach’ool wi ta maak’a’ jun malaj xkomon chik reheb’ li k’a’aq re ru a’in?

Sa’ li junjunq reheb’ li waqib’ tasal re Choq’ re Xkawilaleb’ li Saaj: Jun tenq’ re xsik’b’al ru laa b’e wankeb’ li raqal “Li b’oqok” ut “Li osob’tesink yeechi’inb’ileb’.” Il jun malaj wiib’ oxib’ reheb’ li raqal a’in, ut sik’ ru jun yeechi’inb’il osob’tesink li nakawoyb’eni sa’ laa yu’am. K’a’ruheb’ li b’oqok tento taak’anjela re naq tat-osob’tesiiq chi jo’kan? K’oxla xyeeb’al re jun kristiaan chan ru naq kat-osob’tesiik rik’in xtaaqenkileb’ li b’oqok a’an.

Chi’ilmanq ajwi’ Temas del Evangelio, “Albedrío y responsabilidad,” Biblioteca del Evangelio; “Chanaw naq wan xwankil aawaam,” Eb’ li B’ich, 152.

2 Nefi 2:1–4, 6–25

Li Dios naru chixsutq’isinkileb’ lix yalb’al wix choq’ osob’tesink.

Laj Lehi kixnaw naq laj Jakob, li ralal, ak kixnumsi “ch’a’ajkilal” ut “naab’al li rahil ch’oolejil” sa’ xka’ch’inal (2 Nefi 2:1). Jo’ nakak’oxla laa’at, k’a’ut naq nim xloq’al lix ch’olob’ahom laj Lehi sa’ 2 Nefi 2:1–3, 6–25 choq’ re laj Jakob? K’a’ut naq nim xloq’al choq’ aawe? K’e reetaleb’ li aatin ut ch’ol aatin li ninqeb’ xwankil choq’ aawe. Chan ru naq li Dios ak xrosobʼtesi laa chʼaʼajkilal choqʼ re laa chaabʼilal? (Chi’ilmanq 2 Nefi 2:2.)

Chi’ilmanq ajwi’ Romanos 8:28; Dale G. Renlund, “Li k’a’ru moko tiik ta li nach’a’ajko’ wi’ qach’ool,” Jolomil ch’utub’aj-ib’ re abril 2021.

2 Nefi 2:15–29

Lix t’anik laj Adan ut lix tojb’al rix li maak xb’aan li Jesukristo a’aneb’ raqal aajel ru sa’ lix k’uub’anb’il na’leb’ li qaChoxahil Yuwa’.

Naab’aleb’ li kristiaan neke’xk’oxla naq ka’ajwi’ nimla sachk li t’ane’k, ut naq q’axal ink’a’ us li ke’xb’aanu laj Adan ut li xEva naq ke’xsik’ ru xyalb’al li ru li che’. Sa’ 2 Nefi 2:15–28, laj Lehi naxk’ut xkomon chik li na’leb’ chirix li t’ane’k—ut chirix li tojb’al-ix sa’ xk’ab’a’ li Kristo. Naq yooqat chirilb’aleb’ li raqal a’in, tz’iib’a li k’a’ru kik’ulman sa’ li Awimq Eden. Naru neke’k’anjelak li patz’om a’in:

• Kʼaʼut naq kiʼajman ru li t’ane’k?

• K’a’ru lix k’anjel li Jesukristo sa’ numtaak sa’ xb’een xtoch’om li t’ane’k?

• Chan ru naq rik’in xtawb’al ru chi us li t’ane’k naqataw wi’chik ru chan ru naq naqaj ru li Jesukristo?

Chi’ilmanq ajwi’ Dallin H. Oaks, “Gran Plan De Salvación,” Liahona, noviembre 1993, 72–75.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Misachk eech’ool chi k’oxlak, xb’aan laj Howard Lyon

Li na’leb’ re xtzolb’aleb’ li kok’al

2 Nefi 1:13, 15, 23

Li Jesukristo nikinixtenq’a chi numtaak sa’ xb’een lix toch’om li maak.

• Re xtenq’ankileb’ laa kok’al chixtawb’al ru lix b’oqom laj Lehi re “xchiq’b’al chaq chiqix lix b’ak’leb’ ch’iich’” li maak, naru nekeyiib’ jun b’ak’leb’ ch’iich’ rik’in kok’ hu. Chiruheb’ li kok’ hu, laa kok’al naru neke’xtz’iib’a k’a’ru nokoraale laj Satanas chixb’aanunkil. Chirix a’an naru nekeril 2 Nefi 1:13, 15, 23 naq yooqeb’ chixk’utb’esinkil junjunq reheb’ li ch’ol aatin sa’eb’ li raqal a’in—jo’ xchiq’b’al chaq chirixeb’ li b’ak’leb’ ch’iich’ re hu. Chan ru naq li maak chanchan jun b’ak’leb’ ch’iich’? Chan ru naq li Jesus nokoxtenq’a “chixchiqʼb’al chaq chiqix li bakʼlebʼ chʼiichʼ” re li maak?

2 Nefi 1:20

Osob’tesinb’ilin naq ninpaab’eb’ lix taqlahom li Dios.

• Maare te’xtaw xna’leb’ laa kok’al wi te’xjuntaq’eeta lix taqlahom li Dios rik’ineb’ li xaab’, li punit, li b’atb’a uq’, malaj jalan chik k’a’aq re ru neke’xkol qix. Naru nakakanab’eb’ chixk’eeb’al li k’a’aq re ru a’an chirixeb’ naq yooqat chixyeeb’al reheb’ chan ru naq eb’ li taqlahom neke’xkol qix. Chirix a’an naru nakawil 2 Nefi 1:20, ut taaka’jultika naq “noko’usaak” (noko’osob’tesiik malaj nakole’ qix) naq neke’qapaab’ li taqlahom. Wotz jun aanumsihom b’ar wi’ naq xat-osob’tesiik malaj xkole’ aawix xb’aaneb’ li taqlahom.

• Re xk’utb’al xjalanil li usaak rik’in li isiik chiru li Dios, (chi’ilmanq 2 Nefi 1:20), naru nekeril jun li che’ chaab’il xk’iijik ut jun lix xaq malaj ruq’ li che’ setb’il chaq. Chirix a’an laa kok’al naru neke’xtz’il rix k’a’ru ke’xsik’ ru xb’aanunkil laj Nefi ut eb’ li ras (chi’ilmanq 1 Nefi 2:11–16; 3:5–7; 18:9–11). K’a’ru kik’ulman rik’in li ke’xsik’ ru xb’aanunkil? K’a’ru naru naqasik’ ru li tooxtenq’a chi kanaak rik’in li Dios?

2 Nefi 2:11, 16, 27

Li Dios kixk’e in’ach’ab’ankil re sik’ok-u.

• Re xtenq’ankileb’ laa kok’al chixtawb’al ru li kixk’ut laj Lehi chirix li ka’pak’alil ut li sik’ok-u, naru nekeb’aanu jun li b’atz’unk b’ar wi’ laa’at taaye jun li aatin (jo’ saqen) ut eb’ laa kok’al te’xye lix ka’pak’alil (q’ojyin). Tenq’aheb’ chixtawb’al ru k’a’ut naq li ka’pak’aliik a’an xcha’al lix k’uub’anb’il na’leb’ li Dios naq nekeril 2 Nefi 2:11, 16. Chirix a’an naru nakaye reheb’ laa kok’al jun seraq’ chirix jun ch’ina al li na’aaleek chixsik’b’al ru li ink’a’ us. Laa kok’al naru te’xye lix ka’pak’alil li ink’a’ us xsik’ ru ut te’xk’utb’esi li us xb’aanu raj.

• Re xtzolb’al chan ru naq jalan li “achʼabʼaak” rik’in li “preexil” (2 Nefi 2:27), laa kok’al naru neke’xyiib’ xjalam-uuch jun xul tz’aptz’o sa’ jun korral ut jun xul sa’ k’iche’. B’arwan reheb’ li xul ach’ab’anb’il? Patz’ reheb’ laa kok’al naq te’xk’ut chi ru’uj ruq’ li jalam-uuch naq taaye li aatin “ach’ab’anb’il” li wan sa’ 2 Nefi 2:27. Ch’olob’ xyaalal naq li Jesukristo nokorach’ab’.

• B’ichahomaq jun li b’ich jo’ “Sik’ li us” (Eb’ li B’ich, 151). K’a’ru naqatzol sa’ li b’ich a’an chirix li sik’ok-u?

Re xtawb’al xkomon chik li na’leb’, chi’ilmanq li hu Amigos re li po a’in.

Laj Lehi ut lix tenamit neke’wulak sa’ li yeechi’inb’il ch’och’, xb’aan laj Clark Kelley Price