12–18 Febwari: “Mifala I Bin Laef Folem Fasin blong Stap Hapi”

2 Nifae 3–5

Taem yustap ridim 1 Nifae, maet yu gat filing ia se Nifae i wan bigfala man. “Strong mo i bigfala” tugeta long saed blong bodi mo long saed blong spirit (1 Nifae 2:16), i luk olsem hem i no seksek long ol tes blong laef we hem i bin fesem. O bae yumi talem se hemia nao i hao yumi tingting long hem. Taem we fet blong Nifae i strong, ol gudfala toktok blong hem long 2 Nifae 4 i soem se iven fetful pipol samtaem oli filim oli “no hapi tumas” mo kasem “isi trabol” tru ol temtesen. Long ples ia yumi luk wan we i stap traehad, we i wantem stap glad, be we “hat blong hem i mekem noes olsem we i harem i soa tumas from ol sin blong [hem].” Yumi save talem semmak long hemia mo wetem strong hop ia we i folem: “Be, mi save huia mi bin trastem” (luk long 2 Nifae 4:15–19).

Taem Nifae mo ol pipol blong hem i bin lanem blong laef “folem fasin blong stap hapi” (2 Nifae 5:27), oli bin lanem tu se fasin blong stap hapi i no kam isi nomo olsem o se i nogat ol taem blong sore. Long en, i kam taem yumi trastem Lod, “strong ston blong stret mo gud fasin [blong yumi] ” (2 Nifae 4:35).

Ol Tingting blong Stap Lan long Hom mo long Jos

2 Nifae 3:6–24

God i bin jusum Josef Smit bifo, blong hem i putumbak gospel ia.

Lihae i bin serem wetem boe blong hem Josef wan profesi we i bin kam long Josef blong Ijip. Profesi ia i bin abaot wan fiuja “sia we oli jusum,” Josef Smit. Wanem nao, ol ves 6–24 i talem we Josef Smit bae i mekem blong blesem ol pipol blong God? Tingting long olsem wanem wok blong Josef Smit i bin wan “wok we i gat bigfala valiu” long yu. Maet bae yu gat sam tingting aot long vidio we i abaot Josef Smit long “Prophets of the Restoration” koleksen i stap long Gospel Library. Tingbaot ol kwestin olsem olgeta ia, mo tingting blong rekodem ol ansa blong yu:

• ?Wanem nao yu save abaot Papa long Heven mo Jisas Kraes from wanem we Josef Smit i bin tijim?

• ?Olsem wanem laef blong yu i defren from wanem we Lod i putumbak tru Profet Josef Smit?

• ?Bae laef blong yu i olsem wanem sapos Restoresen i no bin hapen?

Wan impoten pat blong misin blong Josef Smit hem i bin blong karembak Buk blong Momon. ?Wanem nao yu lanem aot long japta ia se from wanem Buk blong Momon i impoten? Speseli, yu save lukaotem ol risen long ol ves 7, 11–13, 18–24.

Luk tu long Josef Smit Translesen, Jenesis 50:24–38 (long Baebol apendiks); Gospel Topics, “Joseph Smith,” Gospel Library; “Presem Man Ya,” STSP, no. 50.

Profet blong Lod, i kam long David Lindsley

2 Nifae 4:15–35

“O Lod, mi bin trastem yu.”

Nifae i talem se bae hem i “raetemdaon ol samting blong sol blong mi” (ves 15). Taem yu ridim wanem we hem i bin raetem long 2 Nifae 4:15–35, askem yuwan se, ?“Wanem ia ol samting long sol blong mi?” Tingting blong raetemdaon samting ia, olsem we Nifae i bin mekem, mo stap serem wetem ol pipol we yu lavem.

Stap luk hao Nifae i faenem kamfot taem hem i filim se i tumas mo i wari tumas i save helpem yu taem yu gat sem filing olsem. Luk long ol ves 15–35 long ol toktok we i givim kamfot long yu. ?Yu save wan we maet i nidim ol toktok ia blong givim kamfot long hem?

Luk tu long Ronald A. Rasband, “Ol Samting we Oli blong Sol blong Mi,” Liahona, Nov. 2021, 39–41.

2 Nifae 5

Mi save faenem fasin blong stap hapi taem mi stap laef folem gospel blong Jisas Kraes.

Long tingting blong yu, ?hem i minim wanem blong stap hapi? Nifae i bin raetem se ol pipol blong hem oli bin “laef folem fasin blong stap hapi” (2 Nifae 5:27). Maet yu lukaotem ol joes we Nifae mo ol pipol blong hem oli bin mekem we i bin helpem olgeta blong stap hapi (eksampol, luk 2 Nifae 5:6, 10–17). ?Wanem i save helpem yu bildim wan laef blong stap hapi olsem ol pipol blong Nifae?

2 Nifae 5:20–21

?Wanem strong nogud tok i bin foldaon long Ol Man blong Leman?

Long taem blong Nifae, strong nogud tok we i stap long Ol Man blong Leman, i we, Lod i bin “katemaot olgeta long fored blong Lod … from ol rabis fasin blong olgeta” (2 Nifae 5:20–21). Hemia i minim se Spirit blong Lod i nomo stap insaed long laef blong olgeta. Taem we Ol Man blong Leman oli bin akseptem mo folem gospel blong Jisas Kraes, “strong nogud tok blong God i nomo folem olgeta” (Alma 23:18).

Buk blong Momon i talem tu se wan mak, we i blong gat dak skin, i bin foldaon long Ol Man blong Leman afta we Ol Man blong Nifae oli seperetem olgeta long Ol Man blong Leman. Wanem i stap biaen long fasin blong mak ia, yumi no andastanem fulwan. Mak ia, long fas ples, i blong oli luksave huia Ol Man blong Leman mo huia Ol Man blong Nifae. Afta long hemia, taem we tufala, Ol Man blong Nifae mo Ol Man blong Leman oli bin gotru long ol taem blong nogud fasin mo fasin blong stap stret mo gud, mak ia, oli nomo bin save yusum blong talemaot se huia i wan Man blong Leman, long fored blong God.

Long taem blong yumi tedei, ol profet oli talem nomo se blong gat dak skin, i no minim se God i no laekem yu, o God i sakem wan nogud strong tok long yu. Presiden Russell M. Nelson i talem: “Mi save mekem tingting blong yu i kwaet se olsem wanem bae yu stanap long fes blong God bae i no dipen nating long kala blong skin blong yu. Se God i glad o no glad long yu, bae i dipen nomo long hamas hat mo tingting yu givim long Hem mo long ol komanmen blong Hem, be i no from kala blong skin blong yu.” (“Letem God I Win,” Liahona, Nov. 2020, 94).

Olsem we Nifae i bin tijim, se Lod “i no tanem baksaed blong hem long eniwan we i kam long hem, blak mo waet, slef mo fri, man mo woman; … long God evriwan i semmak” (2 Nephi 26:33).

Luk tu long “Till We All Come in the Unity of the Faith” (vidio), Gospel Library.

Blong moa tingting, luk long namba blong manis ia blong Liahona mo Blong Ol Yut Oli Kam Strong magasin.

Sam Tingting blong Tijim Ol Pikinini

2 Nifae 3:6–24

Josef Smit i bin wan profet.

• Tingting long hao yu save tijim ol pikinini blong yu abaot bigfala wok ia we God i komplitim tru long Josef Smit. Blong stat, yu save helpem ol pikinini blong yu blong faenem toktok ia “sia” long 2 Nifae 3:6 mo eksplenem se ol profet oli singaotem olgeta ol sia from Papa long Heven i helpem olgeta blong luk ol samting we yumi no save luk. Serem from wanem yu glad mo talem tangkyu blong gat wan sia we i stap lidim Jos.

• Gospel Art Book i gat sam pikja we yu save yusum blong tij abaot wok we God i bin mekem tru long Josef Smit (luk long ol pikja 89–95). Letem ol pikinini i serem wanem oli save abaot ol pikja ia. ?From wanem nao oli singaotem Josef Smit se hem i “wan sia we oli bin jusum”? ?Wanem nao Josef Smit i bin mekem we “i bigwan tumas”? (ves 7).

2 Nifae 4:15–35; 5

Mi laekem tumas “ol samting we i blong Lod.”

• ?Wanem nao i mekem yumi hapi? Tingting blong stap rid tugeta ol ves ia long 2 Nifae 4 blong faenemaot wanem i mekem Nifae i glad o mekem hem i hapi (luk long ol ves 15–16, 20–25, 34–35). Long mesej blong hem “Ol Samting we Oli blong Sol blong Mi,” Elda Ronald A. Rasband i bin serem seven “samting we i blong Lod” we oli spesel tumas long hem (Liahona, Nov. 2021, 39–41). Ating yu save riviu long lis blong hem tugeta mo tokbaot “ol samting we i blong Lod” we oli spesel tumas long yu.

• 2 Nifae 5 i tokbaot tu ol samting we i helpem ol pipol blong Nifae blong laef “folem fasin blong stap hapi” (ves 27). Yu save givim sam toktok o pikja we i ripresentem ol samting ia mo helpem ol pikinini blong yu blong majem olgeta wetem ol ves we i go wetem long japta 5. Sam eksampol olsem famli (ves 6), ol komanmen blong God (ves 10), ol skripja (ves 12), wok (ves 15 mo 17), ol tempol (ves 16), mo ol jos koling (ves 26). ?Olsem wanem ol samting ia oli mekem yumi hapi?

2 Nifae 5:15–16

Tempol hem i haos blong Lod.

• Taem yu ridim 2 Nifae 5:15–16 long ol pikinini blong yu, oli save priten se oli stap helpem Nifae blong bildim wan tempol. Yu save soem tu ol pikja long olgeta blong ol defdefren bilding, wetem hemia blong wan tempol. ?Olsem wanem nao ol tempol oli defren long ol narafala bilding? Serem wetem wanwan long yufala from wanem tempol i impoten long yu (luk tu long “I Love to See the Temple,” Children’s Songbook, 95).

Eni taem i save stap wan taem blong stap tij. Yu no tingting blong stap tijim famli blong yu olsem wan samting we yu mekem wan taem long wik long taem blong wan nomol lesen. Tingting long hem olsem wan samting we yu mekem evri dei.

Blong moa tingting, luk long namba blong manis ia long Fren magasin.

Tempol blong Nifae, i kam long Michael T. Malm