“ວັນທີ 12–18 ເດືອນກຸມພາ: ‘ພວກເຮົາມີຊີວິດຢູ່ຕາມທາງແຫ່ງຄວາມສຸກ.’ 2 ນີໄຟ 3–5,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)

“ວັນທີ 12–18 ເດືອນກຸມພາ. 2 ນີໄຟ 3–5,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)

ວັນທີ 12–18 ເດືອນກຸມພາ: “ພວກເຮົາມີຊີວິດຢູ່ຕາມທາງແຫ່ງຄວາມສຸກ”

2 ນີໄຟ 3–5

ເມື່ອອ່ານ 1 ນີໄຟ, ທ່ານອາດໄດ້ຮັບຄວາມປະທັບໃຈວ່າ ນີໄຟເປັນຄົນທີ່ໜ້າສົນໃຈ. ໂດຍທີ່ “ສູງໃຫຍ່” ທັງຮ່າງກາຍ ແລະ ວິນຍານ (1 ນີໄຟ 2:16), ເບິ່ງຄືວ່າເພິ່ນບໍ່ຫວັ່ນໄຫວກັບການທົດລອງທີ່ເພິ່ນປະເຊີນ. ຫລື ຢ່າງໜ້ອຍ, ນັ້ນແມ່ນສິ່ງທີ່ພວກເຮົາອາດສັນນິຖານໄວ້. ຂະນະທີ່ສັດທາຂອງນີໄຟຈະໜ້າອັດສະຈັນໃຈກໍຕາມ, ຖ້ອຍຄຳທີ່ອ່ອນໂຍນຂອງເພິ່ນໃນ 2 ນີໄຟ 4 ເປີດເຜີຍວ່າ ແມ່ນແຕ່ຜູ້ຄົນທີ່ຊື່ສັດ ບາງເທື່ອກໍຮູ້ສຶກ “ຕ່ຳຕ້ອຍ” ແລະ ຖືກ “ກີດກັນຢ່າງງ່າຍດາຍ” ໂດຍການລໍ້ລວງ. ຢູ່ບ່ອນນີ້ເຮົາເຫັນບາງຄົນທີ່ກຳລັງພະຍາຍາມ, ຜູ້ທີ່ຢາກມີຄວາມຊື່ນຊົມ, ແຕ່ “ໃຈຄວນຄາງເພາະບາບ [ຂອງລາວ].” ເຮົາກໍເຄີຍຮູ້ສຶກແບບນີ້ເຊັ່ນກັນ ແລະ ກໍມີຄວາມມຸ່ງໝັ້ນທີ່ມີຄວາມຫວັງທີ່ຕາມມາ: “ເຖິງຢ່າງໃດກໍຕາມ, ຂ້າພະເຈົ້າຍັງຮູ້ວ່າ, ຂ້າພະເຈົ້າໄວ້ວາງໃຈຜູ້ໃດ” (ເບິ່ງ 2 ນີໄຟ 4:15–19).

ຂະນະທີ່ນີໄຟ ແລະ ຜູ້ຄົນຂອງເພິ່ນໄດ້ຮຽນຮູ້ການດຳລົງຊີວິດ “ຕາມທາງແຫ່ງຄວາມສຸກ” (2 ນີໄຟ 5:27), ເຂົາເຈົ້າກໍຍັງໄດ້ຮຽນຮູ້ວ່າ ຄວາມສຸກບໍ່ໄດ້ມີມາຢ່າງງ່າຍດາຍ ຫລື ປາດສະຈາກຊ່ວງເວລາແຫ່ງຄວາມໂສກເສົ້າ. ໃນທີ່ສຸດມັນຈະມີມາຈາກການໄວ້ວາງໃຈໃນພຣະຜູ້ເປັນເຈົ້າ, “ສີລາແຫ່ງຄວາມຊອບທຳ [ຂອງເຮົາ]” (2 ນີໄຟ 4:35).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

2 ນີໄຟ 3:6–24

ໂຈເຊັບ ສະມິດ ໄດ້ຖືກເລືອກໂດຍພຣະເຈົ້າໃຫ້ຟື້ນຟູພຣະກິດຕິຄຸນ.

ລີໄຮໄດ້ແບ່ງປັນກັບລູກຊາຍຂອງເພິ່ນ ໂຈເຊັບ ກ່ຽວກັບຄຳທຳນາຍທີ່ໄດ້ຖືກມອບໃຫ້ໂດຍໂຢເຊັບແຫ່ງເອຢິບ. ຄຳທຳນາຍແມ່ນກ່ຽວກັບ “ຜູ້ພະຍາກອນທີ່ປະເສີດ” ໃນອະນາຄົດ, ຄືໂຈເຊັບ ສະມິດ. ຂໍ້ທີ 6–24 ກ່າວວ່າໂຈເຊັບ ສະມິດ ຈະເຮັດຫຍັງແດ່ເພື່ອໃຫ້ພອນແກ່ຜູ້ຄົນຂອງພຣະເຈົ້າ? ໃຫ້ພິຈາລະນາວ່າ ວຽກງານຂອງໂຈເຊັບ ສະມິດ “ມີຄຸນຄ່າໃຫຍ່ຫລວງ” ຕໍ່ທ່ານແນວໃດ? ທ່ານອາດໄດ້ແນວຄິດຈາກວິດີໂອກ່ຽວກັບໂຈເຊັບ ສະມິດ ໃນບ່ອນເກັບກຳ “Prophets of the Restoration” ໃນຫ້ອງສະໝຸດພຣະກິດຕິຄຸນ. ໃຫ້ຄິດກ່ຽວກັບຄຳຖາມເຫລົ່ານີ້, ແລະ ຄິດທີ່ຈະຈົດບັນທຶກຄຳຕອບຂອງທ່ານ:

ທ່ານຮູ້ຈັກຫຍັງແດ່ກ່ຽວກັບພຣະບິດາເທິງສະຫວັນ ແລະ ພຣະເຢຊູຄຣິດ ຍ້ອນສິ່ງທີ່ໂຈເຊັບ ສະມິດ ໄດ້ສິດສອນ?
ຊີວິດຂອງທ່ານແຕກຕ່າງໄປແນວໃດຍ້ອນສິ່ງທີ່ພຣະຜູ້ເປັນເຈົ້າໄດ້ຟື້ນຟູຜ່ານທາງໂຈເຊັບ ສະມິດ?
ຊີວິດຂອງທ່ານຈະເປັນແນວໃດ ຖ້າການຟື້ນຟູບໍ່ໄດ້ເກີດຂຶ້ນ?

ສ່ວນໜຶ່ງທີ່ສຳຄັນໃນພາລະກິດຂອງໂຈເຊັບ ສະມິດ ແມ່ນການນຳພຣະຄຳພີມໍມອນອອກມາ. ທ່ານຮຽນຮູ້ຫຍັງແດ່ຈາກບົດນີ້ ກ່ຽວກັບວ່າ ເປັນຫຍັງພຣະຄຳພີມໍມອນຈຶ່ງສຳຄັນ? ໂດຍສະເພາະແລ້ວ, ທ່ານສາມາດຊອກຫາເຫດຜົນໃນ ຂໍ້ທີ 7, 11–13, 18–24.

ເບິ່ງ ການແປຂອງໂຈເຊັບ ສະມິດ, ປະຖົມມະການ 50:24–38 (ໃນພາກຫ້ອຍທ້າຍຂອງພຣະຄຣິສຕະທຳຄຳພີ); Gospel Topics, “Joseph Smith,” ຫ້ອງສະໝຸດພຣະກິດຕິຄຸນ; “ສັນເສີນບຸຣຸຸດ,” ເພງສວດ ແລະ ເພງຂອງເດັກນ້ອຍ, 54.

ສາດສະດາໂຈເຊັບ ສະມິດ — Prophet of the Lord [ສາດສະດາຂອງພຣະຜູ້ເປັນເຈົ້າ], ໂດຍ ເດວິດ ລິນຊະລີ

2 ນີໄຟ 4:15–35

“ໂອ້ ພຣະຜູ້ເປັນເຈົ້າ, ຂ້ານ້ອຍໄວ້ວາງໃຈໃນພຣະອົງ.”

ນີໄຟໄດ້ກ່າວວ່າ ເພິ່ນຈະ “ບັນທຶກເລື່ອງຂອງຈິດວິນຍານຂອງຂ້າພະເຈົ້າ” (ຂໍ້ທີ 15). ຂະນະທີ່ທ່ານອ່ານສິ່ງທີ່ເພິ່ນຂຽນໃນ 2 ນີໄຟ 4:15–35, ໃຫ້ຖາມຕົວເອງວ່າ, “ແມ່ນຫຍັງຄືເລື່ອງຂອງຈິດວິນຍານຂອງ ຂ້າພະເຈົ້າ?” ໃຫ້ຄິດທີ່ຈະຂຽນມັນລົງໄວ້, ຄືກັນກັບນີໄຟໄດ້ເຮັດ, ແລະ ແບ່ງປັນມັນກັບຄົນທີ່ທ່ານຮັກ.

ເບິ່ງວ່າ ການທີ່ນີໄຟໄດ້ພົບຄວາມປອບໂຍນເມື່ອເພິ່ນຮູ້ສຶກໜັກໃຈ ແລະ ວິຕົກກັງວົນ ສາມາດຊ່ວຍທ່ານໃນຍາມທີ່ທ່ານມີຄວາມຮູ້ສຶກທີ່ຄ້າຍຄືກັນນີ້ແນວໃດ. ເບິ່ງໃນ ຂໍ້ທີ 15–35 ເພື່ອຊອກຫາຂໍ້ພຣະຄຳພີທີ່ນຳຄວາມປອບໂຍນມາໃຫ້ທ່ານ. ທ່ານຮູ້ຈັກໃຜທີ່ອາດພົບຄວາມປອບໂຍນໃນຂໍ້ຄວາມເຫລົ່ານີ້ບໍ່?

ເບິ່ງ Ronald A. Rasband, “The Things of My Soul,” Liahona, Nov. 2021, 39–41 ນຳອີກ.

2 ນີໄຟ 5

ເຮົາສາມາດພົບຄວາມສຸກຢູ່ໃນການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ.

ທ່ານຄິດວ່າການທີ່ມີຄວາມສຸກນັ້ນໝາຍຄວາມວ່າແນວໃດ? ນີໄຟໄດ້ຂຽນວ່າ ຜູ້ຄົນຂອງເພິ່ນດຳລົງຊີວິດ “ຕາມທາງແຫ່ງຄວາມສຸກ” (2 ນີໄຟ 5:27). ທ່ານອາດຊອກຫາການເລືອກຕ່າງໆທີ່ນີໄຟ ແລະ ຜູ້ຄົນຂອງເພິ່ນໄດ້ເຮັດ ທີ່ໄດ້ຊ່ວຍໃຫ້ເຂົາເຈົ້າມີຄວາມສຸກ (ເບິ່ງ, ຍົກຕົວຢ່າງ 2 ນີໄຟ 5:6, 10–17). ແມ່ນຫຍັງທີ່ສາມາດຊ່ວຍໃຫ້ທ່ານສ້າງຊີວິດຕາມທາງແຫ່ງຄວາມສຸກ ຄືກັນກັບຜູ້ຄົນຂອງນີໄຟ?

2 ນີໄຟ 5:20–21

ແມ່ນຫຍັງຄືການສາບແຊ່ງທີ່ມາສູ່ຊາວເລມັນ?

ໃນວັນເວລາຂອງນີໄຟ ການສາບແຊ່ງຂອງຊາວເລມັນແມ່ນວ່າ ພວກເຂົາ “ໄດ້ຖືກຕັດອອກຈາກທີ່ປະທັບ [ຂອງພຣະຜູ້ເປັນເຈົ້າ] … ເພາະຄວາມຊົ່ວຮ້າຍຂອງພວກເຂົາ” (2 ນີໄຟ 5:20–21). ນີ້ໝາຍຄວາມວ່າ ພຣະວິນຍານຂອງພຣະຜູ້ເປັນເຈົ້າໄດ້ຖືກຖອນຈາກຊີວິດຂອງພວກເຂົາແລ້ວ. ຕໍ່ມາ ເມື່ອຊາວເລມັນໄດ້ຮັບເອົາພຣະກິດຕິຄຸນຂອງພຣະເຢຊູຄຣິດ, “ການສາບແຊ່ງຂອງພຣະເຈົ້າຈຶ່ງບໍ່ໄດ້ຕິດຕາມພວກເຂົາອີກຕໍ່ໄປ” (ແອວມາ 23:18).

ພຣະຄຳພີມໍມອນກໍຍັງກ່າວອີກວ່າ ເຄື່ອງໝາຍຂອງຜິວຄ້ຳໄດ້ມາສູ່ຊາວເລມັນ ຫລັງຈາກທີ່ຊາວນີໄຟໄດ້ແຍກອອກຈາກພວກເຂົາ. ສະພາບ ແລະ ການປະກົດຂອງເຄື່ອງໝາຍນີ້ ຍັງບໍ່ເປັນທີ່ເຂົ້າໃຈຢ່າງສົມບູນ. ໃນຕອນຕົ້ນ ເຄື່ອງໝາຍໄດ້ເຮັດໃຫ້ຊາວເລມັນແຕກຕ່າງຈາກຊາວນີໄຟ. ຕໍ່ມາ, ເມື່ອທັງຊາວນີໄຟ ແລະ ຊາວເລມັນ ຕ່າງກໍໄດ້ຜ່ານໄລຍະຂອງຄວາມຊົ່ວຮ້າຍ ແລະ ຄວາມຊອບທຳ, ເຄື່ອງໝາຍກໍເລີຍກາຍເປັນສິ່ງທີ່ບໍ່ກ່ຽວຂ້ອງ.

ສາດສະດາຢືນຢັນໃນວັນເວລາຂອງເຮົາວ່າ ຜິວຄ້ຳນັ້ນບໍ່ໄດ້ເປັນເຄື່ອງໝາຍຂອງຄວາມບໍ່ໂປດປານແຫ່ງສະຫວັນ ຫລື ເປັນການສາບແຊ່ງ. ປະທານຣະໂຊ ເອັມ ແນວສັນ ໄດ້ປະກາດວ່າ: “ຂໍໃຫ້ທ່ານແນ່ໃຈໄດ້ວ່າ ຖານະຂອງທ່ານຕໍ່ພຣະເຈົ້າບໍ່ໄດ້ຂຶ້ນຢູ່ກັບສີຜິວຂອງທ່ານ. ຄວາມໂປດປານ ຫລື ບໍ່ໂປດປານຕໍ່ພຣະເຈົ້າແມ່ນຂຶ້ນກັບຄວາມອຸທິດຕົນຂອງທ່ານຕໍ່ພຣະເຈົ້າ ແລະ ຕໍ່ພຣະບັນຍັດຂອງພຣະອົງ ແລະ ບໍ່ແມ່ນຂຶ້ນກັບສີຜິວຂອງທ່ານ” (“Let God Prevail,” Liahona, Nov. 2020, 94).

ດັ່ງທີ່ນີໄຟໄດ້ສິດສອນ, ພຣະຜູ້ເປັນເຈົ້າ “ບໍ່ປະຕິເສດຜູ້ໃດທີ່ມາຫາພຣະອົງເລີຍ, ບໍ່ວ່າດຳ ແລະ ຂາວ, ຂ້າທາດ ແລະ ຜູ້ເປັນອິດສະລະ, ຊາຍ ແລະ ຍິງ; … ທຸກຄົນເທົ່າທຽມກັນໝົດສຳລັບພຣະເຈົ້າ” (2 ນີໄຟ 26:33).

ເບິ່ງ “Till We All Come in the Unity of the Faith” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

2 ນີໄຟ 3:6–24

ໂຈເຊັບ ສະມິດ ເປັນສາດສະດາ.

ໃຫ້ພິຈາລະນາເບິ່ງວ່າ ທ່ານຈະສາມາດສິດສອນລູກໆຂອງທ່ານກ່ຽວກັບວຽກງານອັນຍິ່ງໃຫຍ່ທີ່ພຣະເຈົ້າໄດ້ສຳເລັດຜ່ານທາງໂຈເຊັບ ສະມິດ ແນວໃດ? ເພື່ອເປັນການເລີ່ມຕົ້ນ, ທ່ານສາມາດຊ່ວຍລູກໆຂອງທ່ານຊອກຫາຄຳວ່າ “ຜູ້ພະຍາກອນ” ໃນ 2 ນີໄຟ 3:6 ແລະ ອະທິບາຍວ່າ ສາດສະດາທັງຫລາຍຖືກເອີ້ນໃຫ້ເປັນຜູ້ພະຍາກອນ ຍ້ອນວ່າພຣະບິດາເທິງສະຫວັນຊ່ວຍໃຫ້ພວກເພິ່ນເຫັນໃນສິ່ງທີ່ເຮົາບໍ່ເຫັນ. ແບ່ງປັນເຫດຜົນທີ່ທ່ານຮູ້ສຶກຂອບຄຸນທີ່ມີຜູ້ພະຍາກອນນຳພາສາດສະໜາຈັກ.
ປຶ້ມຮູບພຣະກິດຕິຄຸນ ມີຫລາຍຮູບທີ່ທ່ານສາມາດໃຊ້ເພື່ອສິດສອນກ່ຽວກັບວຽກງານທີ່ພຣະເຈົ້າໄດ້ກະທຳຜ່ານທາງໂຈເຊັບ ສະມິດ (ເບິ່ງ ຮູບ 89–95). ໃຫ້ລູກໆຂອງທ່ານແບ່ງປັນສິ່ງທີ່ພວກເຂົາຮູ້ກ່ຽວກັບຮູບເຫລົ່ານັ້ນ. ເປັນຫຍັງໂຈເຊັບ ສະມິດ ຈຶ່ງຖືກເອີ້ນໃຫ້ເປັນ “ຜູ້ພະຍາກອນທີ່ປະເສີດ”? ໂຈເຊັບ ສະມິດ ໄດ້ເຮັດສິ່ງໃດທີ່ “ມີຄຸນຄ່າໃຫຍ່ຫລວງ”? (ຂໍ້ທີ 7).

2 ນີໄຟ 4:15–35; 5

ເຮົາຮັກ “ເລື່ອງຂອງພຣະຜູ້ເປັນເຈົ້າ.”

ແມ່ນຫຍັງທີ່ເຮັດໃຫ້ເຮົາມີຄວາມສຸກ? ໃຫ້ຄິດທີ່ຈະອ່ານຂໍ້ພຣະຄຳພີຈາກ 2 ນີໄຟ 4 ນຳກັນ ເພື່ອຊອກຫາສິ່ງທີ່ເຮັດໃຫ້ນີໄຟເບີກບານ ຫລື ເຮັດໃຫ້ເພິ່ນມີຄວາມສຸກ (ເບິ່ງ ຂໍ້ທີ 15–16, 20–25, 34–35). ໃນຂ່າວສານຂອງເພິ່ນ “ເລື່ອງຂອງຈິດວິນຍານຂອງຂ້າພະເຈົ້າ,” ແອວເດີ ຣອນໂນ ເອ ແຣັສ໌ແບນ ໄດ້ແບ່ງປັນເຈັດ “ເລື່ອງຂອງພຣະຜູ້ເປັນເຈົ້າ” ທີ່ມີຄຸນຄ່າຕໍ່ເພິ່ນ (Liahona, Nov. 2021, 39–41). ບາງທີ ພວກທ່ານກໍສາມາດທົບທວນລາຍການຂອງເພິ່ນນຳກັນ ແລະ ເວົ້າລົມກ່ຽວກັບ “ເລື່ອງຂອງພຣະຜູ້ເປັນເຈົ້າ” ທີ່ມີຄຸນຄ່າຕໍ່ພວກທ່ານ.
2 ນີໄຟ 5 ຍັງໄດ້ບັນຍາຍເຖິງສິ່ງຕ່າງໆທີ່ໄດ້ຊ່ວຍໃຫ້ນີໄຟດຳລົງຊີວິດ “ຕາມທາງແຫ່ງຄວາມສຸກ” (ຂໍ້ທີ 27). ທ່ານສາມາດຈັດຫາຄຳສັບ ຫລື ຮູບພາບຕ່າງໆທີ່ເປັນຕົວແທນໃຫ້ແກ່ສິ່ງເຫລົ່ານີ້ ແລະ ຊ່ວຍລູກໆຂອງທ່ານຈັບຄູ່ມັນໃສ່ຂໍ້ພຣະຄຳພີໃນ ບົດທີ 5. ບາງຕົວຢ່າງແມ່ນລວມທັງ ຄອບຄົວ (ຂໍ້ທີ 6), ພຣະບັນຍັດຂອງພຣະເຈົ້າ (ຂໍ້ທີ 10), ພຣະຄຳພີ (ຂໍ້ທີ 12), ວຽກງານ (ຂໍ້ທີ 15 ແລະ 17), ພຣະວິຫານ (ຂໍ້ທີ 16), ແລະ ການເອີ້ນໃນສາດສະໜາຈັກ (ຂໍ້ທີ 26). ສິ່ງເຫລົ່ານີ້ຊ່ວຍນຳຄວາມສຸກມາໃຫ້ເຮົາແນວໃດ?

2 ນີໄຟ 5:15–16

ພຣະວິຫານແມ່ນບ້ານຂອງພຣະຜູ້ເປັນເຈົ້າ.

ຂະນະທີ່ທ່ານອ່ານ 2 ນີໄຟ 5:15–16 ໃຫ້ລູກໆຂອງທ່ານຟັງ, ພວກເຂົາສາມາດທຳທ່າວ່າ ພວກເຂົາກຳລັງຊ່ວຍນີໄຟສ້າງພຣະວິຫານ. ທ່ານກໍສາມາດເອົາຮູບພາບຂອງຕຶກທີ່ແຕກຕ່າງກັນໃຫ້ພວກເຂົາເບິ່ງ, ລວມເຖິງພຣະວິຫານ. ພຣະວິຫານແຕກຕ່າງຈາກຕຶກອື່ນໆແນວໃດ? ໃຫ້ແບ່ງປັນຕໍ່ກັນວ່າ ເປັນຫຍັງພຣະວິຫານຈຶ່ງສຳຄັນສຳລັບທ່ານ (ເບິ່ງ “ພຣະເຈົ້າມອບພຣະວິຫານແກ່ເຮົາ,” ເພງສວດ ແລະ ເພງຂອງເດັກນ້ອຍ, 68).

ທຸກຊ່ວງເວລາສາມາດເປັນເວລາສິດສອນໄດ້. ຢ່າຄິດວ່າການສິດສອນຄອບຄົວຂອງທ່ານເປັນບາງສິ່ງທີ່ທ່ານເຮັດອາທິດລະເທື່ອໃນລະຫວ່າງບົດຮຽນທີ່ເປັນທາງການເທົ່ານັ້ນ. ໃຫ້ຄິດວ່າ ມັນເປັນບາງສິ່ງທີ່ທ່ານເຮັດໃນທຸກເວລາ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຊາວນີໄຟກຳລັງສ້າງພຣະວິຫານ — The Temple of Nephi [ພຣະວິຫານຂອງນີໄຟ], ໂດຍ ໄມໂກ ທີ ມອມ

ໜ້າກິດຈະກຳ: ພຣະວິຫານແມ່ນບ້ານຂອງພຣະຜູ້ເປັນເຈົ້າ