Era Buluta na Nodra Yaragi ni Valu na Tawa-Nifai-Liai, mai vei Jody Livingston

Julai 8–14: “Era Sega Tu ni Lutu Tani”

Alama 23–29

O dau vakasamataka tu li ke rawa ni ra veisau vakaidina na tamata? De o rairai leqataka tu beka se o na rawa ni ulabaleta na digidigi cala eso o sa cakava se na itovo ca eso o vakarautaka, se so beka na lomaleqa me baleti ira na daulomani. Ke sa vakakina, sa rawa ni vukei iko na italanoa ni Tawa-Nifai-Liai. O ira oqo sa meca bubuluitaki ni Nifaiti. Ni ratou sa navuca na luvei Mosaia ni vunautaka na kosipeli vei ira, era a “dredrevaki ratou ena veivakalialiai” na Nifaiti. Sa vaka me iwali vinaka cake me ra vakamatei na Leimanaiti mai na nodra vakasaumakitaki. (Raica na Alama 26:23–25.)

Ia era sa veisau na Leimanaiti—ena kaukauwa ni veisaumakitaki i Jisu Karisito. Era a kilai tu ena dua na gauna me “tamata yalokaukauwa ka itovo vakarerevaki” (Alama 17:14), ia sa yaco mera “kilai tani ena nodra yalodina vua na Kalou” (Alama 27: 27). Vakaidina, era sa “sega ni lutu tani tale” (Alama 23:6).

De na tiko beka vei iko eso na vakasama se ka mo veisautaka se “yaragi ni … vakaduiduile” mo vakadavora (Alama 23:7). Se na rairai gadreva tu mo na gugumatua tiko kivua na Kalou. Veitalia na veisau cava o gadreva tu, na Alama 23–29 sa rawa ni nomu inuinui ni mai na kaukauwa ni veisorovaki i Jisu Karisito, sa rawa tu na veisau levu.

Vakasama eso ni Vuli ena iTikotiko kei na Lotu

Alama 23–25; 27

Noqu saumaki mai vei Jisu Karisito kei na Nona kosipeli ena veisautaka na noqu bula.

E vaka tu mera sega ni tamata ni saumaki mai na Leimanaiti, ia e vuqa vei ira a vakila na veisau veivakurabuitaki ena vuku i Jisu Karisito. Era vakatokai ira na Leimanaiti saumaki oqo me Tawa-Nifai-Liai.

Na wiliki ni Alama 23–25; 27 e rawa ni uqeti iko mo vakasamataka vagumatua na nomu saumaki mai. Vakaraica na sala era a veisau kina na Tawa-Nifai-Liai—na ivakarau ni nodra saumaki tu “kivua na Turaga” (Alama 23:6). Sa rawa ni o tekivu tu ena veitikina oqo.

• Alama 23:6–7

• Alama 23:17–18

• Alama 24:15–21

• Alama 25:13–16

• Alama 27:26–30

Na sala cava so esa veisautaki iko kina o Jisu Karisito kei na Nona kosipeli? Na gauna cava o sa vakilai Koya voleka kina? O na kila vakacava ni o sa saumaki tiko vei Jisu Karisito? Na cava esa vakauqeti iko tiko kina na Yalotabu mo cakava tarava?

Raici David A. Bednar talega, “Saumaki tu vua na Turaga,” Liaona, Nove. 2012, 106–9; Dale G. Renlund, “Yalayala Tawayalani vei Jisu Karisito,” Liaona, Nove. 2019, 22–25; Ulutaga ni Kosipeli: “Yaco mo vakataki Jisu Karisito,” Valenivola ni Kosipeli.

Alama 24:7–19; 26:17–22

Baleta ni sa yalololoma na Kalou, sa vosoti au tu niu veivutuni.

Na veisau era a sotava na Tawa-Nifai-Liai esa levu cake mai na veisau wale tu ni tovo—e sa veisau ni yalo e vure mai na vakabauti Jisu Karisito kei na veivutuni yalodina. O na rairai raica beka na dina ni veivutuni ena wase yadua ni Alama 24:7–19. Na cava era vakavulica na tikina oqo me baleta na yalololoma ni Kalou kivei ira na veivutuni? Na ikuri ni dina cava so o sa vulica mai na Alama 26:17–22?

Vakasamataka vagumatua na sala esa vakaraitaka kina na Nona loloma veivueti na Kalou ki na nomu bula. O rawa vakacava ni vakaraitaka na nomu vakavinavinaka ki Vua?

Alama 26; 29

Sa vu ni reki vei au na wasei ni kosipeli.

Na vosa reki e basika vaka 24 ena Alama 23–29, ka sa vanua vinaka na veiwase oqo meda vulica kina na sala ni kena ciqomi na reki ni bula voli—kei na wasei—ni kosipeli ni iVakabula. Navuca ni vulica na Alama 26:12–22, 35–37; kei na 29:1–17, ka vakaraica na vuna a reki vakalevu kina o Amoni, ratou na luvei Mosaia, kei Alama. Na cava o vulica rawa mai na veitikina oqo e rawa ni vakavure reki levu sara ki na nomu bula?

A vakatavulica o Elder Marcus B. Nash: Na wasei ni kosipeli sa vakavurea na reki kei na nuinui ki na yalo i koya e solia ka ciqoma. … Na wasei ni kosipeli e sa reki vakaoti, inuinui vakaoti” (“Dulaka Cake na Nomu Rarama; Liaona, Nove. 2021, 71). Na cava o sa bau vakila tu ena wasei ni kosipeli vei ira na tani? Na bolebole cava so o sotava ni sagai tu mo wasea na kosipeli? E rawa vakacava ni vukei iko na Tamada Vakalomalagi ni ulabaleta na bolebole eso oqo?

Me baleta na ivakasala vakaparofita ena ivakarau ni kena wasei na kosipeli—ka kune reki ni cakava tu—navuca ni vulica na itukutuku i Peresitedi Dallin H. Oak “Wasei ni Kosipeli Vakalesuimai,” (Liaona, Nove. 2016, 57–60). Na vakatutu cava so o raica rawa ena nona itukutuku?

Raica talega na “The Bush Family Story,” “Sharing Your Beliefs,” “Sharing the Gospel” (vidio), Gospel Library.

Vakasamataka mo cakava e dua na lisi ni veika o na wasea vua e dua na itokani me baleta na iVola i Momani. Tovolea mo wasea na iVola i Momani ena nomu vakayagataka na app ni iVola i Momani.

Vakaraica na ivakarau kei na itoko eso. Ni vulici tu na ivolanikalou, sa rawa ni da raica na dina vakamareqeti eso ena qarai ni vosa, malanivosa, se vakasama vakayagataki wasoma eso. Na vakasama vakayagataki wasoma eso oya sa rawa ni vakasotari-vata se semati ki na nomu ivolanikalou me vakarawarawataka na kena raici.

Alama 26:5–7

Au sa rawa ni vakarurugi vei Jisu Karisito kei na Nona kosipeli.

Ena gauna ni tatamusuki, era sa dau kumuni vata tu na sila ka vakatokai na ivau sila ka biu ki na vale ni mamaroroi, dau vakatokai tu na lololo Ena Alama 26:5–7 vakasamataka vagumatua na ka era na matataka ki na nomu bula na ivau sila, lololo, kei na cava. O sa vakarurugi vakacava tu vei Jisu Karisito?

Raici Russell M. Nelson talega, “Na Valetabu kei na Nomu Yavu Vakayalo; Liaona, Nove. 2021, 93–96; David A. Bednar, “Taura e Dua na Yaca Dokai ka Vakataudeitaki,” Liaona, Me 2009, 97–100; “Jesus, Lover of My Soul,” Hymns, no. 102.

Me baleta na vakasama tale eso, raica na ilavelave ni vula oqo ni Liaona kei na mekasini Me iSakisaki ni iTabagone .

Vakasama Eso ni Nodra Vakatavulici na Gonelalai

Alama 24:6–24

Sa vakalougatataki au na Turaga niu segata meu maroroya na noqu yalayala ki Vua.

• De ra na marautaka talega na luvemu ni buluta na nodra “yaragi” me vakataki ira na Tawa-Nifai-Liai. O rawa ni wilika e vica na tikina mai na Alama 24:6–24 mera vakavulici kina na gone ena yalayala era a cakava na Tawa-Nifai-Liai me ra muria na iVakabula. Sa rawa ni ra qai vakasamataka e dua na ka era na veisautaka mera muri Koya kina, vola ena tabana ni taviqaravi ni macawa oqo, ka vakalecava tu mo kelia e dua na qara ka buluta na nodra yaragi.

• Sa rawa ni ra wilika na luvemu na Alama 24:15–19, ka vakaraica na ka era cakava na Tawa-Nifai-Liai “me ivakadinadina kivua na Kalou.” Sa rawa ni o qai tukuna vei ira na sala e rawa tu ni “ivakadinadina kivua na Kalou” na noda veiyalayalati (tikina e 18). Me ra veivosakitaka na luvemu na sala era na vakaraitaka kina vua na Kalou ni ra sa via muri Koya. Na lagati ni sere vaka na “I Want to Live the Gospel” (Children’s Songbook, 148) sa rawa ni vakauqeti ira.

Alama 24:7–10; 26:23–34; 27:27–30

Au rawa ni veivutuni.

• Me vukea na nodra raica na luvemu na sala e rawa ni veisautaki keda kina o Jisu Karisito ni da veivutuni, rawa ni o vakatavulici ira me baleti ira na Tawa-Nifai-Liai. Me caka oqo, rawa ni o vakayacana e rua na baulu “ni bera” kei na “oti.” Rawa ni ra qai wilika na luvemu na Alama 17:14–15 kei na 27:27–30, vola na ka era a vaka tu kina na Leimanaiti ni bera ka oti nodra veivutuni, ka biuti ira ena baulu donu. Ena Alama 24:7–10, na cava a vukei ira ni veisau? Eda na vakaraitaka vakacava na noda vakavinavinaka vua na Kalou ena Nona loloma veivueti?

Alama 26; 29

Sa vakavu reki vei au o Jisu Karisito, ka rawa niu wasea na reki oqo.

• De o na marautaka li kei ira na luvemu ni droinitaka na yaloyalo eso ni veika ena kosipeli i Jisu Karisito e vakavu reki vei iko. Wasea na nomu yaloyalo vei ira na luvemu, ka vakayaloqaqataki ira ni wasea na nodra yaloyalo kivua e dua me vakavure reki talega kivua.

• Vukei ira na luvemu ni raica na vosa reki kei na marau ena Alama 26 kei na 29. Na cava a vakavu reki vei Amoni kei Alama se vakavuna me rau marau? Na taro oqo e rawa ni muataki ki na veivosakitaki ni reki e vu mai na bulataki se wasei ni kosipeli i Jisu Karisito.

Alama 27:20–30

Au rawa ni vukei ira na noqu itokani ni bulataka na kosipeli i Jisu Karisito.

• Rawa ni ra wilika na luvemu na Alama 27:22–23, ka vakaraica na ka era cakava na Nifaiti mera vukei kina na Tawa-Nifai-Liai ni maroroya na nodra yalayala mera kakua tale ni vala. Eda rawa ni vukei ira vakacava na noda itokani ni maroroya na nodra yalayala? Era rawa ni dramataka na luvemu na ituvaki eso. Me ivakaraitaki, na cava eda rawa ni kaya ki na dua na itokani ka via lasu se veivakacalai tu?

Me baleta na vakasama tale eso, raica na ilavelave ni vula oqo ni mekasini Friend .

Droini ni buluti ni nodra yaragi na Tawa-Nifai-Liai, mai vei Dan Burr