Vakayagataki ni Lako Mai, Mo Muri Au—Me Baleta na iTikotiko kei na Lotu

E Baleti Cei Na iVurevure Oqo?

Na ivurevure oqo e sa baleta e dua ga ka vinakata me vulica na Vunau kei na Veiyalayalati—vakaikoya, vakamatavuvale, kei na kalasi eso ena Lotu. Kevaka oa sega ni dau vulica vakawasoma na ivolanikalou ena veigauna sa oti, na ivurevure oqo e rawa ni vukei iko mo tekivu. Kevaka o sa matau tu ena vulici ni volanikalou, na ivurevure oqo e rawa ni vukei iko me vakaibalebale vakalevu sara na veika o sotava.

Tamata Yadua kei na Matavuvale e Vale

Na vanua vinaka duadua me vulici kina na kosipeli oya e vale. O ira na nomu qasenivuli ena lotu era rawa ni tokoni iko, ka rawa ni o vakayaloqaqataki mai vei ira na lewe ni tabanalevu tale eso. Ia mo bula tiko vakayalo, o keda vakayadua eda gadreva meda vakani e veisiga ena “vosa vinaka ni Kalou” (Moronai 6:4; raica talega na Russell M. Nelson, “Na iDola ni Vosa,” Liaona, Nove. 2018, 6–8).

Vakayagataka na ivurevure oqo ena sala cava ga e veivuke kina vei iko. Na ituvatuva oqo e vakatakilakilataki kina eso na dina tawamudu e kunei ena Vunau kei na Veiyalayalati. Era vakatututaki talega kina na vakasama kei na itaviqaravi me vukei iko mo vulica kina na ivolanikalou vakai iko, vakamatavuvale, se vakaveitokani. Ni ko vuli, muria na veituberi ni Yalo mo kunea kina na dina tawamudu eso e vakaibalebale vakalevu vei iko. Vakaraica na itukutuku mai vua na Kalou vei iko, ka muria na veivakauqeti o ciqoma.

Qasenivuli kei na Gonevuli ena Lotu

Kevaka o vakatavulica edua na kalasi ni Lalai, kalasi ni tabagone se uabula ena Matawilivola ni Sigatabu, edua na kuoramu ni Matabete i Eroni, se kalasi ni Goneyalewa, o sa vakauqeti mo vakayagataka na ituvatuva ena ivurevure oqo ni o vakavakarau mo veivakatavulici. NaLako Mai, Mo Muri Au—Me Baleta na iTikotiko kei na Lotu e lewenivuli ni nomu kalasi ni Sigatabu. Na vakasama ni vuli eso ena ivurevure oqo era vakarautaki me baleta na vuli e vale kei na lotu. Ni o vakavakarau mo veivakatavulici, tekivu mo kila vakai iko na ivolanikalou. Na nomu vakavakarau bibi duadua ena yaco ni ko vakasaqaqara ena ivolanikalou ka qara na veivakauqeti ni Yalo Tabu vei iko. Sa rawa talega mo vuli ni o nanuma tiko na nodra gagadre na tamata o vakavulica tiko. Vakasaqara na veidina tawamudu. Na Lako Mai, Mo Muri Au e rawa ni vukei iko mo kila eso na veidina oqo ka vulica na sala e rawa ni vakayagataki kina na ivolanikalou ena nomu bula.

Mo nanuma tiko ni vulici ni kosipeli, ena kena vinaka duadua, e yavutaki e vale ka tokoni mai na Lotu. Se, na nomu itavi bibi oya mo tokoni ira na tamata o vakatavulica ena nodra sasaga mera vulica ka bulataka na kosipeli e vale. Kakua ni leqataka me duatani na lewe ni veika o vakarautaka vei ira ena kalasi. Ia, solia vei ira na madigi mera wasea na veika era sotava, nodra nanuma, kei na taro me baleta na veitikina mai na ivolanikalou era wilika e vale. Sureti ira me ra wasea na dina tawamudu eso era sa kunea. Oqo e bibi cake mai na kena vakacavari edua na iwasewase ni lesoni.

Kalasi ni Matawilivola ni Sigatabu ni iTabagone kei na Uabula

Dua na vuna levu eda soqoni vata kina ena kalasi ni Matawilivola ni Sigatabu oya meda veitokoni ka veivakayaloqaqataki vakai keda nida segata me da muri Jisu Karisito. Dua na sala rawarawa me caka kina oqo oya mo taroga na taro vakaoqo “Na cava esa vakatavulica vei iko na Yalo Tabu ena macawa oqo ni o vulica na ivolanikalou ena Lako Mai, Mo Muri Au?” Na isau ni taro oqo e rawa ni vakavurea eso na veivosaki vakaibalebale cake e taracake na vakabauti Jisu Karisito kei na Nona kosipeli.

O rawa ni qai sureta na veivosaki e yavutaki mai na vakatutu ni vuli ena Lako Mai, Mo Muri Au. Me vakataka, na vakasama ni vuli e rawa ni vakatura na vakasaqaqara ena Vunau kei na Veiyalayalati 19:15–20, me kunei kina na sala e vakamacalataka kina na iVakabula na Nona vakararawataki. Sa rawa mo kerea na lewe ni kalasi mera wasea na veika era vakila ni ra wilika na Nona ivakamacala ka veivosakitaka na sala e vakayaco-ka kina ki na nodra nanuma baleti Koya. Se rawa ni o taura edua na gauna moni vulica vata vakalasi na veitikina oqo.

Kuoramu ni Matabete i Eroni kei na Kalasi ni Goneyalewa

Ni ra sota na kuoramu ni Matabete i Eroni kei na kalasi ni Goneyalewa ena Sigatabu, na nodra inaki ena duidui vakalailai mai na dua na kalasi ni Matawilivola ni Sigatabu. Me ikuri ni nodra veivukei vakai ira ni vulica na kosipeli i Jisu Karisito, o ira na veiilawalawa oqo era sota talega mera veivakasalataki vata ena kena rawati na cakacaka ni veivakabulai kei na bula vakacerecerei (raica na iVoladusidusi Raraba: Veiqaravi ena Na Lotu i Jisu Karisito ni Yalododonu Edaidai, 1.2), ni dusimaki mai na nodra mataveiliutaki ni kuoramu.

Ena vuku ni ka oqo, na soqoni yadua ni kuoramu se kalasi e dodonu me tekivu ena dua na veivosaki me baleta na nodra sasaga, ka liutaki maivua edua na lewe ni mataveiliutaki ni kuoramu se kalasi. Me ivakaraitaki, e rawa ni ra veivakasalataki vata me baleta na nodra sasaga me ra bulataka na kosipeli, veiqaravi vei ira na vakaleqai tu, wasea na kosipeli, se vakaitavi ena cakacaka ni valetabu kei na tuva kawa.

Ni oti na gauna ni veivakasalataki vata oqo, na qasenivuli ena liutaka na kalasi se kuoramu ena vulici vata ni kosipeli. Sa rawa ni lesi mera veivakatavulici na iliuliu uabula se lewe ni kalasi se kuoramu. Era na cakava na veilesi oqo na mataveiliutaki ni kalasi se kuoramu nira veivosaki kei ira na iliuliu uabula.

O ira na lesi me veivakatavulici sa dodonu mera vakavakarau ena nodra vakayagataka na vakatutu ni vuli ena ituvatuva vakamacawa ni Lako Mai, Mo Muri Au. Ena ituvatuva yadua, na ivakatakilakila oqo e vakaraitaka tiko e dua na itaviqaravi e ganiti ira na itabagone ka veidonui kei na veika era vulica tiko ena semineri. Ia, sa rawa ni vakayagataki edua ga na vakatutu ena ituvatuva me itaviqaravi ni vuli vei ira na itabagone.

Me sabolo ni tuvatuva ni soqoni ni kuoramu kei na kalasi, raica na ikuri ni vakamacala D.

Lalai

Na nomu vakavakarau ni vakavulica na Lalai e tekivu ena nomu vulica na ivolanikalou vakai iko kei na nomu matavuvale. Ni ko vakayacora, dolavi iko ki na veivakauqeti vakayalo kei na veivakararamataki ni Yalo Tabu me baleti ira na gone ena nomu kalasi ni Lalai. Mo daumasu. Na Yalo ena rawa ni vakauqeti iko ena veivakasama eso me vukei ira kina mera vulica na kosipeli i Jisu Karisito.

Ni ko vakavakarau mo veivakavulici, o rawa ni rawata na ikuri ni veivakauqeti ena dikevi ni vakasama ni veivakatavulici ena ivurevure oqo. Na ituvatuva yadua ena Lako Mai, Mo Muri Au—Me Baleta na iTikotiko kei na Lotu e dua tiko na kena wase ka vakatokai “Vakasama Eso ni Nodra Vakavulici na Gone.” Vakasamataka na nanuma eso oqo me vakatutu me vakacaudreva na nomu veivakauqeti. O kilai ira na gone ena nomu kalasi ni Lalai—ka ona kilai ira vakavinaka cake sara ni o veitaratara vata kei ira ena kalasi. Sa kilai ira talega na Kalou, ka na vakauqeti iko o Koya ena veisala vinaka duadua mo vakavulici ira ka vakalougatataki ira kina.

E rawa ni ra sa cakava oti na gone ena nomu kalasi eso na itaviqaravi ena Lako Mai, Mo Muri Au kei na nodra matavuvale. Sa daumaka oya. Sa vinaka ni caka wasoma. Sa rawa mo sureti ira na gone me ra veiwaseitaka vakai ira na veika era sa vulica mai vale. E dodonu talega mo tuvanaka na sala mera vakaitavi na gone kevaka mada ga era sega ni vuli tiko e vale. E dau mana cake nodra vulica na dina eso vakosipeli na gone ni vakavulici vakaveitaravi na dina oqo ena itaviqaravi duidui eso. Kevaka o raica ni sa mana vei ira na gone e dua na itaviqaravi vakavuli, navuca mo tokaruataka, vakauasivi ke o vakavulici ira tiko na gone sobu.

Ena vula e lima kina na Sigatabu, era vakauqeti na qasenivuli ni Lalai me ra sosomitaka na ituvatuva vakarautaki ni Lako Mai, Mo Muri Au enai kalima ni Sigatabu ki na dua se sivia na itaviqaravi ni vuli ena “iKuri ni iVakamacala B: Me Baleti Ira na Lalai—Nodra Vakarautaki na Gone ki na Bula Taucoko ena Salatu ni Veiyalayalati ni Kalou.”