Chan ru roksinkil Kim, Taaqehin—Choq’ re li ochoch ut li iglees

Ani aj-e li hu a’in?

Li hu a’in wan choq’ reheb’ chixjunileb’ li neke’raj tzolok sa’ li Tzol’leb’ ut Sumwank—sa’ junesal, jo’ junkab’al, ut sa’eb li tzoleb’aal re li Iglees. Wi ink’a’ ak nakatzoleb’ li loq’laj hu chi kok’ aj xsa’, li hu a’in tatxtenq’a chixtikib’ankil. Wi ak yookat chixtzolb’aleb’ li loq’laj hu, li hu a’in tatxtenq’a chixtawb’al xkomon chik aana’leb’ sa’ xb’aanunkil.

Eb’ li komon ut li junkab’al sa’ li ochoch

Li chaab’il na’ajej re xtzolb’al li evangelio a’an sa’ li ochoch. Eb’ laj k’utunel sa’ li iglees naru tate’xtenq’a, ut eb’ li komon sa’ li teep naru te’xwaklesi aach’ool. A’ut re xkolb’al rix li qamusiq’ejil wanjik, aajel ru naq taqach’oolani qib’ wulaj wulaj rik’in “lix chaabʼil aatin li Dios” (Moroni 6:4; chi’ilmanq ajwi’ Russell M. Nelson, “Aatin sa’ xtiklajik,” Jolomil ch’utub’aj-ib’ re octubre 2018).

Taawoksi li hu a’in yalaq chan ru nakak’oxla naq tatxtenq’a. Eb’ li tusleb’ aatin neke’xk’ut junjunq reheb’ li yaal neke’tawman sa’ li Tzol’leb’ ut Sumwank. Naru ajwi’ neke’tawman na’leb’ ut kok’ k’anjel aran li tate’xtenq’a chixtzolb’aleb’ li loq’laj hu aajunes, rik’ineb’ laa junkab’al malaj aawamiiw. Naq yooqat chi tzolok, taaqe xb’eresihom li Musiq’ej re xtawb’aleb’ li junelikil na’leb’ li loq’eb’ choq’ aawe. Sik’ li naxye li Dios aawe, ut taaqe li na’leb’ nakak’ul.

Eb’ laj k’utunel ut laj tzolonel sa’ li Iglees

Wi nakatk’utuk sa’ li Tzoleb’aal reheb’ li Kok’al, sa’ li tzoleb’aal reheb’ li saaj sa’ li Dominkil Tzoleb’aal, sa’ li molam sa’ li Tijonelil re Aaron, malaj sa’ li tzoleb’aal reheb’ li Saaj Ixq, waklesinb’il aach’ool chiroksinkileb’ li tusleb’ aatin sa’ li hu a’in naq nakakawresi aawib’ re k’utuk. Kim, Taaqehin—Choq’ re li ochoch ut li iglees a’an li taatzolmanq sa’ laa tzoleb’aal sa’ domingo. Eb’ li na’leb’ re tzolok sa’ li hu a’in xe’kawresiman choq’ re li tzolok sa’ li ochoch ut sa’ li iglees. Naq nakakawresi aawib’ re k’utuk, taatikib’ rik’in li k’a’ru nakak’ul laa’at rik’ineb’ li loq’laj hu. Li xkawresinkil aawib’ li q’axal aajel ru taak’ulmanq naq taatz’ileb’ rix li loq’laj hu ut taasik’ aamusiq’ankil rik’in li Santil Musiq’ej. Naru ajwi’ nakattzolok chi wanq li rajomeb’ ru li kristiaan nakatzoleb’ sa’ laa ch’ool. Sik’eb’ li junelikil yaal. Kim, Taaqehin naru nakatxtenq’a chixtawb’aleb’ junjunq reheb’ li yaal a’in ut chan ru naru nakawoksiheb’ li na’leb’ reheb’ li loq’laj hu sa’ laa yu’am.

Chijultiko’q aawe naq li xtzolb’al li evangelio, li tz’aqal chaab’il, a’an nab’aanuman sa’ li ochoch chi tenq’anb’il xb’aan li Iglees. Sa’ jalan chik aatin, xb’een wa teneb’anb’il sa’ aab’een xtenq’ankileb’ li kristiaan sa’ laa tzoleb’aal sa’ xyalb’aleb’ xq’e chixtzolb’al ut chixyu’aminkil li evangelio sa’ li ochoch. Mixik aach’ool chi aatinak chirix yal jun ajwi’ li na’leb’. Sa’ xna’aj a’an, k’eheb’ xhoonal chixwotzb’al xnumsihomeb’, xk’oxlahomeb’, ut xpatz’omeb’ chirixeb’ li raqal sa’eb’ li loq’laj hu xe’ril sa’ kab’l. Patz’ reheb’ naq te’xwotz li junelikil na’leb’ neke’xtaw. Jwal aajel ru a’in chiru xk’utb’al chixjunil li na’leb’ xakawresi.

Eb’ li tzoleb’aal reheb’ li saaj ut li ninq sa’ li Dominkil Tzoleb’aal

Jun xyaalal naq naqach’utub’ qib’ sa’ li Dominkil Tzoleb’aal a’an re xtenq’ankil qib’ ut xwaklesinkil qib’ chiqib’il qib’ sa’ xyalb’al qaq’e chixnawb’al ru ut chixtaaqenkil li Jesukristo. Naru xb’aanunkil a’in chi moko ch’a’aj ta rik’in jun patz’om jo’ “K’a’ru xk’ut li Santil Musiq’ej chawu chiru li xamaan a’in naq xattzolok sa’ li loq’laj hu rik’in Kim, Taaqehin?” Rik’ineb’ lix sumenkil naru nekex’aatinak chirixeb’ li na’leb’ li neke’xnimob’resi li paab’aal chirix li Jesukristo ut lix evangelio.

Chirix a’an naru nakatenq’aheb’ chi aatinak chirixeb’ li na’leb’ re tzolok sa’ Kim, Taaqehin. Qayehaq, jun na’leb’ re tzolok a’an xsik’b’al Tzol’leb’ ut Sumwank 19:15–20, re xnawb’al chan ru naq li Kolonel kixch’olob’ li rahilal kixnumsi. Naru nakapatz’ reheb’ li komon naq te’xwotz k’a’ru xe’reek’a naq xe’ril lix ch’olob’ahom ut te’xye chan ru naq li na’leb’ a’in naxjal lix k’a’uxleb’ chirix a’an. Malaj naru neketzoleb’ li raqal a’in sa’ komonil sa’ li tzoleb’aal.

Eb’ li molam sa’ li Tijonelil re Aaron ut lix tzoleb’aaleb’ li Saaj Ixq

Naq neke’ch’utla li molam sa’ li Tijonelil re Aaron ut lix tzoleb’aaleb’ li Saaj Ixq sa’ domingo, jalan b’ayaq li rajom a’an chiru li tzolok sa’ li Dominkil Tzoleb’aal. Jo’ xcha’al xtenq’ankileb’ rib’ chirib’ileb’ rib’ chixtzolb’al lix evangelio li Jesukristo, eb’ li ch’uut a’in neke’xk’uub’ ajwi’ xna’leb’ chirix chan ru xb’aanunkil li k’anjel re li kolb’a-ib’ ut li taqenaqil loq’al (chi’ilmanq Jolomil K’anjenel Hu: Li k’anjelak sa’ lix Iglees li Jesukristo reheb’ laj Santil Paab’anel sa’ Roso’jikeb’ li Kutan, 1.2), jo’ chanru te’xye li awa’b’ej re li tzoleb’aal malaj li molam.

Xb’aan a’in naq li junjunq chi molam malaj tzoleb’aal tento te’xtikib’ aatinak rik’in jun reheb’ li awa’b’ejil sa’ li molam malaj sa’ li tzoleb’aal ut te’aatinaq rik’in lix yalb’aleb’ xq’e. Qayehaq, naru neke’aatinak chirix lix yalb’aleb’ xq’e chixyu’aminkil li evangelio, chirilb’aleb’ li ras riitz’in, ut chixwotzb’al li evangelio malaj chi tz’aqonk sa’ li k’anjel re li santil ochoch ut resilaleb’ li junkab’al.

Chirix li hoonal a’in re k’uub’ank na’leb’, jun aj k’utunel naxb’eresi li tzoleb’aal malaj molam sa’ xtzolb’al li evangelio sa’ komonil. Naru nak’utuk jun laj k’utunel li ak nim malaj jun komon sa’ li tzoleb’aal malaj molam wi xk’eeman xtaqlankil Li awa’b’ejil re tzoleb’aal malaj molam, chi tenq’anb’il xb’aaneb’ laj b’eresinel ninq, neke’xk’e li taqlank.

Eb’ li te’k’utuq tento te’xkawresi rib’ rik’in roksinkileb’ li na’leb’ re tzolok sa’ li tusleb’ aatin re li junjunq xamaan sa’ Kim, Taaqehin. Sa’ li junjunq chi tusleb’ aatin, li eetalil a’in nareetali jun ch’ina k’anjel li aajel ru choq’ reheb’ li saaj ut jayalinb’il rik’in li k’a’ru neke’xtzol sa’ seminario. A’b’anan, chixjunileb’ li na’leb’ sa’ li tusleb’ aatin naru neke’oksiman re xtzolb’aleb’ li saaj.

Re rilb’al jun tusleb’ aatin re k’utuk li naru na’oksiman sa’eb’ li ch’uut reheb’ li molam malaj tzoleb’aal, chi’ilmanq xtiqb’al li aatin D.

Tzoleb’aal reheb’ li Kok’al

Lix kawresinkil aawib’ re k’utuk sa’ li Tzoleb’aal reheb’ li Kok’al natikla naq nakatzol li loq’laj hu aajunes ut rik’in laa junkab’al. Naq yookat chixtzolb’al, chak’uleb’ li musiq’ejil na’leb’ naxk’e li Santil Musiq’ej chirixeb’ li kok’al sa’ laa tzoleb’aal. Chattijoq. Li Musiq’ej naru tatxmusiq’a rik’ineb’ li na’leb’ li te’tenq’anq reheb’ chixtzolb’al lix evangelio li Jesukristo.

Naq nakakawresi aawib’ re k’utuk, naru taataw xkomon chik aana’leb’ rik’ineb’ li aatin chirix li k’utuk sa’ li hu a’in. Sa’ li junjunq chi tusleb’ aatin sa’ Kim, Taaqehin—Choq’ re li ochoch ut li iglees wan jun tasal li k’ab’a’inb’il “Li na’leb’ re xtzolb’aleb’ li kok’al.” K’oxlaheb’ li na’leb’ a’an jo’ tenq’anel na’leb’ li tate’xtenq’a chixk’ulb’al laa musiq’ankil. Laa’at nakanaweb’ ru li kok’al sa’ laa tzoleb’aal—ut naru taanaweb’ ru chi us naq nakat-aatinak rik’ineb’ sa’ li tzoleb’aal. Li Dios naxnaweb’ ajwi’ ru, ut a’an tatxmusiq’a rik’in tz’aqal li chaab’il na’leb’ re xtzolb’aleb’ ut rosob’tesinkileb’.

Eb’ li kok’al maare ak te’xb’aanu junjunq reheb’ li kok’ k’anjel wankeb’ sa’ Kim, Taaqehin rik’ineb’ lix junkab’al. Us ajwi’ a’an. Li ka’sutink a’an chaab’il. Naru taab’oqeb’ li kok’al chixwotzb’al chirib’ileb’ rib’ k’a’ru xe’xtzol sa’ kab’l. Naru ajwi’ nakak’uub’ chan ru te’tz’aqonq li kok’al us ta ink’a’ yookeb’ chi tzolok sa’ kab’l. Eb’ li kok’al neke’xtzol xyaalalil li evangelio chi chaab’il naq li yaal a’an k’utb’il chi naab’al sut rik’in k’iila kok’ k’anjel. Wi nakak’e reetal naq junaq li ch’ina k’anjel chaab’il choq’ reheb’ li kok’al, naru taaka’suti, mas wi’chik naq nakatzoleb’ li kok’al toj ka’ch’ineb’ xyu’am.

Chiruheb’ li po b’ar wi’ wan oob’ li domingo, us naq eb’ laj k’utunel sa’ xtzoleb’aaleb’ li kok’al te’xjal li tusleb’ aatin re Kim, Taaqehin re li ro’ domingo rik’in junaq reheb’ li k’anjel re tzolok li neke’tawman sa’ “Xtiqb’al li aatin B: Choq’ re li Tzoleb’aal reheb’ li Kok’al—Xkawresinkileb’ li kok’al re te’kanaaq chiru chixjunil li yu’am sa lix b’ehileb’ li sumwank re li Dios.”