Mga Ideya para Mas Panamion ang Pagtuon sa Puluy-an kag sa Simbahan

Samtang ginatun-an mo ang ebanghelyo sang Manluluwas sa balay kag sa simbahan, pamensara ining mga pamangkot:

• Paano mo imbitaron ang Espiritu sa imo pagtuon?

• Paano ka magtutok sa Manluluwas sa imo pagtuon?

• Paano mo panginpuslan ang tinion sa pagtuon adlaw-adlaw?

• Paano mo paisugon ang mga miyembro sang pamilya kag klase nga magtuon sang balaan nga mga kasulatan nga sila lang kag iistorya kon ano ang ila natun-an?

Ari ang pila ka simple nga pamaagi para panamion ang imo pagtuon sang pulong sang Dios.

Magpangamuyo para sa inspirasyon

Ang balaan nga mga kasulatan pulong sang Dios, gani magpangayo sa Iya sang bulig para maintiendihan ang mga ini.

Magpangita sang mga kamatuoran parte kay Jesucristo

Ang tanan nagapamatuod kay Cristo (tan-awa sa 2 Nefi 11:4; Moises 6:63), gani pamensara nga tandaan ukon markahan ang mga bersikulo nga nagapamatuod sa Manluluwas, nagapasangkad sang imo pagpalangga sa Iya, kag nagatudlo kon paano Sia sundon. Kon kaisa ang mga kamatuoran parte sa Manluluwas kag sa Iya ebanghelyo ginahambal sing direkta, kag kon kaisa ginapahangop paagi sa halimbawa ukon istorya. Pamangkuta ang imo kaugalingon, “Ano nga wala katapusan nga mga kamatuoran ang ginatudlo sa sining mga bersikulo? Ano ang ginatudlo sining mga kamatuoran sa akon parte sa Manluluwas?”

Pamatii ang Espiritu

Bantayi ang imo mga panghunahuna kag mga balatyagon, bisan pa nga wala ini sing koneksyon sa imo ginabasa. Basi ining mga pagpabatyag amo mismo ang gusto sang imo Amay nga Langitnon nga imo matun-an.

Isulat ang imo mga panghunahuna

Madamo sang paagi para isulat ang mga pagpabatyag nga nagaabot sa imo samtang nagatuon ka. Halimbawa, basi may makita ka nga mga tinaga kag dinalan sa balaan nga mga kasulatan nga nanamian mo; pwede mo ini markahan kag isulat ang imo panghunahuna bilang notasyon sa imo balaan nga mga kasulatan. Mahimo ka man magtipig sang sululatan sang mga ideya, mga balatyagon, kag mga impresyon nga imo mabaton.

Iistorya ang imo natun-an sa iban.

Ang paghambalanay parte sa mga ideya halin sa imo personal nga pagtuon maayo nga paagi para tudloan ang iban, kag nagabulig man ini pabakod sang imo pag-intiendi sang imo ginbasa. Iistorya ang imo natun-an sa mga miyembro sang pamilya kag mga abyan (sang personal ukon online), kag hagara sila nga himuon man ini.

I-angot ang balaan nga mga kasulatan sa imo kabuhi

Pamensara kon paano magamit ang mga istorya kag pinanudlo nga imo ginabasa sa imo kabuhi. Halimbawa, pwede mo pamangkuton ang imo kaugalingon, “Ano ang akon mga eksperiyensya nga pareho sa akon ginabasa?”

Magpamangkot samtang nagatuon

Sa imo pagtuon sang balaan nga mga kasulatan, mahimo nga may mapensaran ka nga mga pamangkot. Ining mga pamangkot mahimo nga may labot sa imo ginabasa ukon sa imo kabuhi sa kabilugan. Binag-binaga ining mga pamangkot kag pangitaa ang mga sabat samtang padayon ka nga nagatuon sang balaan nga mga kasulatan.

Maggamit sang mga bulig sa pagtuon sang balaan nga mga kasulatan

Para makaangkon sang dugang nga ideya parte sa mga bersikulo nga imo ginabasa, gamita ang mga footnote, ang Giya sa Balaan nga mga Kasulatan, kag iban pa nga mga bulig sa pagtuon.

Hunahunaa ang konteksto sang balaan nga mga kasulatan

Makakita ka sang makahulugan nga mga panan-aw parte sa dinalan sang balaan nga kasulatan samtang imo ginapamensar ang iya konteksto, pati na ang mga ginhalinan sini nga mga sirkumstansya ukon nagapalibot nga mga eksena. Halimbawa, ang paghibalo sang sirkumstansya kag pagpati sang mga tawo nga ginpakigsugilanon sang Dios makabulig sa imo nga mas maintiendihan ang katuyuan sang Iya mga pulong. Matun-an mo ini sa mga section heading sang Doktrina kag mga Kasugtanan, kag iban pa nga mga balasahon.

Tun-i ang mga pulong sang mga propeta kag mga apostoles sa ulihing-mga-adlaw

Basaha ang mga pinanudlo sang mga propeta kag mga apostoles sa ulihing mga adlaw parte sa mga prinsipyo nga imo makita sa balaan nga mga kasulatan.

Ipangabuhi ang imo natun-an

Ang pagtuon sang balaan nga mga kasulatan dapat wala lang nagainspirar sa aton kundi nagatulod man sa aton nga bag-uhon ang aton pagpangabuhi. Pamatii ang ginapabatyag sa imo sang Espiritu nga imo himuon samtang nagabasa, kag dayon aksyoni ining mga pagpabatyag.

Maggamit sang musika

Ang ginapanugyan nga mga himno kag kanta sang kabataan makita sa bilog nga Dali, Magsunod sa Akon. Gamita ang sagrado nga musika para imbitaron ang Espiritu kag padalumon ang imo pagtuo kag testimonya parte sa mga kamatuoran sang ebanghelyo.

Magsaulo sang balaan nga mga kasulatan

Magpili sang dinalan sa balaan nga kasulatan nga makahulugan sa imo, sa imo pamilya, ukon sa imo klase, kag sauloha ini paagi sa pagsulit-sulit sini adlaw-adlaw ukon magpakontes sa pagsaulo.

Magpaambit sang mga leksyon gamit ang isa ka bagay

Magpangita sang mga bagay nga may koneksyon sa mga kapitulo kag bersikulo nga imo ginabasa. Pamensara kon paano maangot ang kada bagay sa mga pinanudlo sa balaan nga mga kasulatan.

Magdrowing, magpangita, ukon magkuha sang litrato

Basaha ang pila ka bersikulo, kag dayon magdrowing sang butang nga may labot sa imo ginbasa. Ukon pwede sila magpangita sang litrato sa Libro sang mga Larawan nga Pang-Ebanghelyo ukon sa Librarya sang Ebanghelyo. Pwede ka man maglitrato sang nagapakita sang imo natun-an.

Drama-dramaha ang isa ka istorya

Pagkatapos basahon ang isa ka istorya, hagara ang mga miyembro sang pamilya ukon klase nga drama-dramahon ini. Pagkatapos, hambali kon paano maangot ang istorya sa inyo mga ginaeksperiyensya.

Makigbagay sa balay

Kon may mga miyembro sang pamilya nga indi gusto magpartisipar sa pagtuon sang balaan nga mga kasulatan sa pamilya, magpangita sang iban nga pamaagi nga magkonekta sa ila. Halimbawa, pwede ka bala mag-istorya sang isa ka wala katapusan nga kamatuoran nga natural lang sa inyo paghambalanay ukon mag-istorya sang makahulugan nga balaan nga kasulatan sa paagi nga wala nagasermon ukon nagadikta? Ang pagtuon sang balaan nga mga kasulatan indi kinahanglan nga palareho sa tagsa ka pamilya. May mga kabataan nga mas nagaresponder sa pagtuon sang balaan nga mga kasulatan nga tinag-isaisa. Mangin mainampuon kag sunda ang mga pagpabatyag sang Espiritu.

Mga miting sang teacher council para sa mga ginikanan. Kon gusto mo sang dugang nga bulig sa imo pagpaninguha nga tudloan ang imo kabataan, hibaloa kon ang inyo ward may mga miting sang teacher council para sa mga ginikanan (tan-awa sa Libro sang Pangkabilogan nga Pagsulundan, 17.5). Ini nga mga miting oportunidad para sa mga ginikanan nga ululupod nga hambalan kag tun-an kon paano mas mapanami ang ila pagtudlo. Pwede nila hambalan ang mga prinsipyo sa Pagtudlo sa Paagi sang Manluluwas, ang mga ideya sa sining mga pahina sa pagpanami sang pagtuon sang ebanghelyo sa pamilya, kag ang mga panugyan sa pagtuon kag pagtudlo nga makita sa bilog nga Dali, Magsunod sa Akon.