Apendiks C

Alang sa Primary—Mga Instruksiyon alang sa Panahon sa Pagpanganta ug sa Pasundayag sa mga Bata sa Panagtigom alang sa Sakramento

Ang sagrado nga musika usa ka gamhanan nga himan sa pagtabang sa mga bata nga makat-on mahitungod sa plano sa Langitnong Amahan sa kalipay ug sa sukaranang mga kamatuoran sa ebanghelyo ni Jesukristo. Samtang manganta ang mga bata mahitungod sa mga baroganan sa ebanghelyo, ang Espiritu Santo mopamatuod sa katinuod niini. Ang mga pulong ug musika magpabilin diha sa mga hunahuna ug mga kasingkasing sa mga bata sa tibuok nilang kinabuhi.

Pagtinguha sa tabang sa Espiritu samtang mangandam kamo sa pagtudlo sa ebanghelyo pinaagi sa musika. Ipakigbahin ang inyong pagpamatuod kalabot sa mga kamatuoran nga inyong gikanta. Tabangi ang mga bata nga makakita kon sa unsang paagi ang musika adunay kalabotan sa unsay ilang nakat-onan ug nasinati diha sa panimalay ug sa mga klase sa Primary.

Mga Lagda alang sa Pasundayag sa Panagtigom alang sa Sakramento

Uban sa direksiyon sa bishop, ang pasundayag sa mga bata sa panagtigom alang sa sakramento kasagaran ipahigayon atol sa kataposang tulo ka bulan [fourth quarter] sa tuig. Isip ang kapangulohan sa Primary ug lider sa musika, pakigtambayayong sa magtatambag sa bishopric kinsa nagdumala sa Primary aron sa pagplano sa pasundayag.

Ang pasundayag kinahanglang makahimo sa mga bata sa pagpresentar sa unsay nakat-onan nila ug sa ilang mga pamilya gikan sa Doktrina ug mga Pakigsaad diha sa panimalay ug sa Primary, lakip sa mga kanta sa Primary nga ilang gikanta sa tibuok tuig. Samtang inyong planohon ang pasundayag, paghunahuna og mga paagi nga makatabang kini sa kongregasyon nga motutok sa Manluluwas ug sa Iyang mga pagtulun-an.

Ang mga yunit nga diyotay ra og mga bata mahimong mokonsiderar og mga paagi diin ang mga sakop sa pamilya mahimong moapil uban sa ilang mga bata. Usa ka sakop sa bishopric mahimong motapos sa miting pinaagi sa mubo nga pakigpulong.

Samtang inyong andamon ang pasundayag, hinumdomi ang mosunod nga mga sumbanan:

• Ang mga pagbansay kinahanglang dili mogamit og dakong panahon gikan sa mga klase sa Primary o sa mga pamilya.

• Ang mga biswal, mga igsusul-ob [costume], ug mga pasundayag sa media dili angay sa panagtigom alang sa sakramento.

Tan -awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 12.2.1.2, Librarya sa Ebangehelyo.

Mga Instruksiyon alang sa Panahon sa Pagpanganta

5 minutos (kapangulohan sa Primary): Pangbukas nga pag-ampo, kasulatan o artikulo sa hugot nga pagtuo, ug usa ka pakigpulong

20 minutos (lider sa musika): Panahon sa pagpanganta

Ang kapangulohan sa Primary ug lider sa musika mopili og mga awit alang sa matag bulan aron sa pagpalig-on sa mga baroganan nga nakat-onan sa mga bata sa ilang mga klase ug sa panimalay. Usa ka lista sa mga awit nga naglig-on niini nga mga baroganan gilakip dinhi niini nga giya.

Samtang motudlo kamo og mga kanta sa mga bata, dapita sila sa pagpakigbahin sa unsay ila nang nakat-onan mahitungod sa mga istorya ug mga baroganan sa doktrina nga gitudlo sa mga awit. Dapita ang mga bata sa pagpakigbahin sa ilang mga hunahuna ug mga pagbati mahitungod sa mga kamatuoran nga makita diha sa mga awit.

Ang Songbook sa mga Bata mao ang sukaranan nga kapanguhaan sa musika sa Primary. Ang mga himno nga gikan sa hymnbook ug mga awit nga gikan sa Higala angay usab. Ang paggamit sa uban pa nga mga musika diha sa Primary kinahanglang aprobahan sa bishopric (tan-awa sa Kinatibuk-ang Tamdanan nga Basahon, 12.3.4).

Musika alang sa Panahon sa Pagpanganta

Enero

• “Sunda ang Propeta,” Songbook sa mga Bata, 58–59

• “Pagsiksik, Pamalandong, ug Pag-ampo,” Songbook sa mga Bata, 66

Pebrero

• “Buhata Gayod ang Matarong,” Songbook sa mga Bata, 80

• “Ampo sa Usa ka Bata,” Songbook sa mga Bata, 6–7

Marso

• “Every Star Is Different,” Children’s Songbook, 142

• “Kon Ako Bunyagan,” Songbook sa mga Bata, 53

Abril

• “Kon Siya Moanhi Pag-usab,” Songbook sa mga Bata, 46–47

• “Nabuhi ba Gayod Pag-usab si Jesus?,” Songbook sa mga Bata, 45

Mayo

• “Sulti sa Gamay nga Sapa ‘Hatag’,” Songbook sa mga Bata, 116

• “Dan-ag,” Songbook sa mga Bata, 96

Hunyo

• “Ang Espiritu Santo,” Songbook sa mga Bata, 56

• “Gusto Ko Karon nga Mamisyonaryo,” Songbook sa mga Bata, 90

Hulyo

• “Barogan ang Kamatuoran,” Songbook sa mga Bata, 81

• “Mipadala sa Bugtong Anak,” Songbook sa mga Bata, 20–21

Agosto

• “Maninguha Kong Mahimong Mahisama Kang Jesus,” Songbook sa mga Bata, 40–41

• “Gibati Ko ang Gugma sa Akong Manluluwas,” Songbook sa mga Bata, 42–43

Septiyembre

• “Gusto Ko nga Makita ang Templo,” Songbook sa mga Bata, 99

• “To Think about Jesus,” Children’s Songbook, 71

Oktubre

• “Family History—Naghimo Ko,” Songbook sa mga Bata, 100

• “Ang Simbahan ni Jesukristo,” Songbook sa mga Bata, 48

Nobiyembre

• “Sunda ang Kasugoan,” Songbook sa mga Bata, 68

• “Aron Mahimong Pioneer,” Songbook sa mga Bata, 138

Disyembre

• “Ako Anak sa Dios,” Songbook sa mga Bata, 2–3

• “Gamay nga Lungsod sa Betlehem,” Mga Himno, nu. 126

Ang Paggamit og Musika aron sa Pagtudlo sa Doktrina

Ang panahon sa pagpanganta gituyo aron sa pagtabang sa mga bata nga makakat-on sa mga kamatuoran sa ebanghelyo. Ang mosunod nga mga ideya makadasig kaninyo samtang magplano kamo og mga paagi sa pagtudlo sa mga baroganan sa ebanghelyo nga makita diha sa mga himno ug mga awit sa Primary.

Basaha ang may kalabotan nga mga kasulatan. Kadaghanan sa mga kanta diha sa Songbook sa mga Bata ug sa hymnbook, ang mga pakisayran sa may kalabotan nga mga kasulatan gilista. Tabangi ang mga bata sa pagbasa sa pipila niini nga mga tudling, ug hisgoti kon sa unsang paagi ang mga kasulatan adunay kalabotan sa awit. Mahimo usab ninyong ilista ang pipila ka pakisayran sa kasulatan diha sa pisara ug dapiton ang mga bata sa pagpares sa matag pakisayran ngadto sa usa ka awit o bersikulo gikan sa awit.

Sulati ang blangko. Pagsulat og usa ka bersikulo sa awit diha sa pisara nga giwala ang pipila ka importante nga mga pulong. Dayon hangyoa ang mga bata sa pagkanta sa awit, nga maminaw alang sa mga pulong nga ihulip sa mga blangko. Samtang ilang sulatan ang matag blangko, hisgoti kon unsa nga mga baroganan sa ebanghelyo ang inyong makat-onan gikan sa nawala nga mga pulong.

Pagpamatuod. Pagpakigbahin og mubo nga pagpamatuod ngadto sa mga bata mahitungod sa mga kamatuoran sa ebanghelyo nga makita diha sa awit sa Primary. Tabangi ang mga bata nga makasabot nga ang pagkanta maoy usa ka paagi nga makahatag sila og pagpamatuod ug mobati sa Espiritu.

Barog isip usa ka saksi. Dapita ang mga bata nga magpuli-puli sa pagbarog ug sa pagpakigbahin sa unsay ilang nakat-onan gikan sa awit nga ilang gikanta o unsay ilang gibati kabahin sa mga kamatuoran nga gitudlo diha sa kanta. Pangutan-a sila kon unsay ilang gibati samtang gikanta nila ang awit, ug tabangi sila sa pag-ila sa impluwensiya sa Espiritu Santo.

Gamita ang mga hulagway. Hangyoa ang mga bata sa pagtabang kaninyo sa pagpangita o paghimo og mga hulagway nga motakdo sa importanteng mga pulong o mga hugpong sa mga pulong diha sa awit. Dapita sila sa pagpakigbahin kon sa unsang paagi ang mga hulagway adunay kalabotan sa awit ug kon unsay gitudlo sa awit. Pananglitan, kon ikaw nagtudlo sa awit nga “Kon Siya Moanhi Pag-usab” (Songbook sa mga Bata, 46–47), mahimo nimong ibutang ang mga hulagway libot sa lawak nga nagpasabot sa importante nga mga pulong gikan sa awit (sama sa mga anghel, niyebe, ug bitoon). Hangyoa ang mga bata sa pagpundok sa mga hulagway ug sa pagpataas niini sa husto nga han-ay samtang dungan ninyo nga kantahon ang awit.

Pagpakigbahin og usa ka leksiyon nga naggamit og usa ka butang [object lesson]. Mahimo kamong mogamit og usa ka butang aron makadasig og panaghisgotan mahitungod sa usa ka awit. Pananglitan, kon kantahon ang awit nga “Sulti sa Gamay nga Sapa ‘Hatag’” (Songbook sa mga Bata, 116), mahimo ka nga mopakita sa mga bata og usa ka hulagway sa mga butang sama sa usa ka sapa, sagbot, ulan, ug mga bulak. Kini makagiya ngadto sa usa ka panaghisgotan mahitungod kon sa unsang paagi nga bisan ang ginagmay nga mga buhat sa pagserbisyo makapanalangin sa uban sa importante nga mga paagi.

Dapita ang pagpakigbahin og personal nga mga kasinatian. Tabangi ang mga bata nga makonektar ang mga baroganan nga gitudlo diha sa awit ngadto sa mga kasinatian nga ilang nasinati mahitungod niini nga mga baroganan. Sama pananglit, sa dili pa manganta sa “Gusto Ko nga Makita ang Templo” (Songbook sa mga Bata, 99), mahimo ninyong hangyoon ang mga bata sa pag-isa sa ilang mga kamot kon nakakita na ba sila og templo. Dapita sila, samtang manganta sila, sa paghunahuna kon unsa ang ilang bation kon makakita sila og templo.

Pangutana. Adunay daghan nga mahimo ninyong ipangutana samtang manganta kamo. Sama pananglit, mahimo ninyong pangutan-on ang mga bata kon unsay ilang nakat-onan gikan sa matag bersikulo sa awit. Mahimo usab ninyo silang hangyoon sa paghunahuna og mga pangutana nga gitubag sa awit. Moresulta kini ngadto sa usa ka panaghisgotan mahitungod sa mga kamatuoran nga gitudlo diha sa awit.

Gamit og yano nga mga aksiyon sa kamot. Dapita ang mga bata sa paghunahuna og yano nga mga aksiyon sa kamot aron sa pagtabang nila sa paghinumdom sa mga pulong ug sa mga mensahe sa usa ka awit. Pananglitan, kon kantahon ninyo ang “Pagsiksik, Pamalandong, ug Pag-ampo” (Songbook sa mga Bata, 66), mahimo nimong dapiton ang mga bata nga itudlo ang ilang mga mata samtang nagkanta sila mahitungod sa pagsiksik sa mga kasulatan, itudlo ang ilang mga ulo samtang nagkanta sila mahitungod sa pagpamalandong, ug ikyugpos ang ilang mga bukton samtang nagkanta sila mahitungod sa pag-ampo.