“Hulio 13–19. Alma 32–35: ‘Imulayo Daytoy a Balikas iti Puspusoyo,’” Umaykayo Sumurot Kaniak—Para kadagiti Indibidual ken Pamilia: Libro ni Mormon 2020 (2020)
“Hulio 13–19. Alma 32–35,” Umaykayo, Sumurot Kaniak—Para kadagiti Indibidual ken Pamilia: 2020
Hulio 13–19
Alma 32–35
“Imulayo Daytoy a Balikas iti Puspusoyo”
Isuratmo dagiti naespirituan a parikna a maawatmo bayat ti panagadalmo iti Alma 32–35. Ania ti mariknam a makaparegta nga aramiden gapu iti no ania ti masursurom?
Isuratmo dagiti Impresionmo
Para kadagiti Zoramite, ti kararag ket managimbubukod, gagangay nga aramid a mapasamak iti maminsan laeng iti makalawas. Daytoy ket panagtakder iti lugar a pakakitaan ti amin ken panangulit-ulit kadagiti awan kaes-eskanna, mapagpannakkel a balikas. Nalabit a dakdakes, agkurang dagiti Zoramite iti pammati ken ni Jesucristo—inlibakda pay a sibibiag Isuna—ken indadanesda dagiti marigrigat (kitaen iti Alma 31:9–25). No pagdasigen, situtured nga insuro da Alma ken Amulek a ti kararag ket nangnangruna pay nga adda pakainaiganna iti no ania ti adda iti puso wenno kaunggantayo ngem iti panagtakder iti maysa a plataporma tapno makita ti kaaduan. Ken no saan a maiturong iti kinaasi kadagiti makasapul, daytoy ket “awan kaes-eskan … ken awan ti maipaayna” (Alma 34:28). Ti kapatgan, daytoy ti panangipeksa iti pammati ken ni Jesucristo, a nangidiaya iti pannakasubbot babaen ti “awan patinggana ken agnanayon a datonna” (Alma 34:10). Ti kasta a pammati, inlawlawag ni Alma, ket nagtaud iti kinapakumbaba ken “tarigagay a mamati” (Alma 32:27). In-inut a dumakkel daytoy, kas iti maysa a kayo, ket kasapulanna ti agtultuloy a pannakataraon. Bayat ti panangbasam iti Alma 32–35, mabalinmo a panunoten ti bukodmo a pammati ken karkararag; mariknam kadi ti ania man a kasla maipada iti ugali a Zoramite a sumangbay? Kasano a mataraonamto ti pammatim ken ni Jesucristo tapno agbalinto a “maysa a kayo nga agsaringit kadakayo iti awan inggana a biag”? (A(lma 32:41).
Dagiti Kapanunotan para iti Bukod a Panagadal iti Nasantuan a Kasuratan
Mabalinko a pilien ti agbalin a napakumbaba.
Impapan ni Alma a napakumbaba dagiti nakurapay a Zoramite ken “sisasaganadan a dumngeg iti sao”(Alma 32:6). Bayat ti panangbasam iti Alma 32 :1–16, panunotem maipapan iti no kasano nga agsaganaka a dumngeg iti sao ti Dios.
Ania dagiti padas a namagpakumbaba kenka? Ania ti naaramidmo tapno agbalin a napakpakumbaba? Matulongannaka dagitoy a bersikulo iti no kasano a piliem ti napakumbaba ngem ti napilpilit nga agpakumbaba. Kas pagarigan, ania ti paggiddiatan ti panagbalin a “napanglaw iti nailubongan a bambanag” ken panagbalin a “napanglaw iti puso”? (bersikulo 3). Ania ti kayat a sawen ti “mangipakumbaba iti [bagim] gapu iti sao”? (bersikulo 14).
Kitaen met iti “Napakumbaba, Kinapakumbaba,” Pangiwanwan iti Nasantuan a Kasuratan, ChurchofJesusChrist.org.
Aramatek ti pammatik ken ni Jesucristo babaen iti panangimula ken panangtaraon iti balikasna iti pusok.
Apay iti panagkunam a nagsao ni Alma maipapan iti panagmula iti bukel kas sungbat kadagiti saludsod dagiti Zoramite maipapan iti panagdaydayaw? Ania ti bukel nga insao ni Alma? Alma 32:28; 33:22–23 Bayat ti panangbasam iti Alma 32:17–43, kitaem dagiti balikas ken ragup dagiti balikas a makatulong kenka a makaawat no kasano nga aramaten ti pammati ken ni Jesucristo ken ti balikasna. Ania ti masursurom maipanggep iti no ania ti pammati ken iti no ania ti saan? Kalpasanna, bayat ti panangbasam kadagiti kapitulo 33–34, sukisokem dagiti sungbat iti saludsod dagiti Zoramite “Kasano nga imula[tayo] ti bukel?” (Alma 33:1).
Adtoy ti sabali pay a wagas a panagadal iti Alma 32–34: Agdrowing kadagiti ladawan a mangibagbagi kadagiti nadumaduma a paset ti panagdakkel ti maysa a bukel. Kalpasanna markaan ti tunggal ladawan kadagiti balikas manipud iti Alma 32:28–43 a mangtulong kenka a makaawat no kasano ti mangimula ken mangtaraon iti balikas iti pusom.
Kitaen met iti Mateo 13:3–8, 18–23; Hebreo11; Neil L. Andersen, “Faith Is Not by Chance, but by Choice,” Ensign wenno Liahona, Nob. 2015, 65–68; “Faith in Jesus Christ,” Gospel Topics, topics.ChurchofJesusChrist.org.
Makapagdaydayawak iti Dios iti kararag, ania man nga oras ken sadino man a lugar.
Ti pammagbaga da Alma ken Amulek maipanggep iti panagdaydayaw ken kararag ket nairanta a mangatur kadagiti nalawag a saan a panagkikinnaawatan nga adda kadagiti Zoramite (kitaen iti Alma 31:13–23). Ngem dagiti insuroda a kinapudno ti makatulong iti asino man kadatayo a makaawat a nasaysayaat iti kararag ken panagdaydayaw. Mabalin a makaaramidka iti maysa a listaan dagiti kinapudno maipanggep iti kararag a masarakam iti Alma 33:2–11 ken 34:17–29. Iti abay dayta a listaan, agaramid iti listaan dagiti mabalin a palso a panangipapan maipanggep iti kararag nga aturen dagitoy a kinapudno (kitaen iti Alma 31:12–23). Kasano nga apektuan dagiti banag a masursurom manipud kadagitoy a bersikulo ti wagas a panagkararag ken panagdaydayawmo?
Siasino da Zenos ken Zenock?
Propeta da Zenos ken Zenock a nagpaneknek ken ni Jesucristo idi panawen ti Daan a Tulag, ngem saan a masarakan dagiti pannursuroda iti Daan a Tulag. Adda access dagiti Nephite kadagiti pannursuro dagitoy a propeta, nalabit a gapu ta nairamanda kadagiti pinanid a gambang a naala ni Nephi manipud ken ni Laban. Nadakamat met ida iti 1 Nephi 19:10–12; Jacob 5:1; ken Helaman 8:19–20.
“Daytoy a biag ti panawen … a panagsagana a sumabat iti Dios.”
Bayat ti panangbasam iti Alma 34:30–41, ibilangmo no kasano a mabalinmo a “pasayaaten ti panawen[moo] iti daytoy a biag” (bersikulo 33). Kasano a matulongannaka ti panagbabawi ken kinaanus nga agsagana a sumabat iti Dios? Adda kadi dagiti panagbalbaliw a kasapulam nga aramiden tapno agitantantanka? Siguraduen nga agtignayka kadagiti ania man a naespirituan nga impresion a maawatmo.
Kitaen met iti Alma 12:24; Larry R. Lawrence, “What Lack I Yet?” Ensign wenno Liahona, Nob. 2015, 33–35.
Dagiti Kapanunotan para iti Sangapamiliaan a Panagadal iti Nasantuan a Kasuratan ken Family Home Evening
Bayat ti panagbasayo a sangapamiliaan kadagiti nasantuan a kasuratan, makatulong kenka ti Espiritu a mangammo no ania dagiti pagbatayan a yunay-unay ken ilawlawag tapno mangipaay kadagiti kasapulan ti pamiliam. Dagitoy ti sumagmamano a kapanunotan.
Alma 32:9–11; 33:2–11; 34:38–39
Ania ngata ti kayariganna no maipalubos kadatayo nga agdaydayaw ken agkararag laeng iti Domingo? Kabayatan ti aggigiddan a panangbasayo kadagitoy a bersikulo, mabalin nga ilawlawag dagiti miembro ti pamilia no kasano a makapagdaydayawda iti inaldaw ken no apay nga agyamanda ta kabaelanda.
Alma 32:28–43
Maysa a ladawan ti kayo ti naipakuyog itoy a balabala; mabalinmo nga usaren a mangiladawan kadagiti sao ni Alma kadagitoy a bersikulo. Wenno mabalin a mapan magna ti pamiliam nga agbirok kadagiti mula iti nadumaduma a tukad ti panagdakkel ken basaen dagiti bersikulo manipud iti Alma 32 a mangidasig ti dumakdakkel a mula iti pammatitayo. Nalabit a makaimula iti bukel ti tunggal miembro ti pamilia ken mangilawlawag no ania ti nasken nga aramidentayo a mangtulong daytoy a dumakkel. Kabayatan dagiti umay a lawas mabalinmo nga amirisen dagiti bukelmo ket palagipan ti tunggal maysa maipapan iti panagkasapulan nga agtultuloy a mangtaraon kadagiti pammaneknektayo maipapan ken ni Jesucristo.
Alma 33:2–11; 17–29
Ania ti isingasing dagitoy a bersikulo maipapan iti no kasano a mapasayaattayo dagiti bukod ken sangapamiliaan a kararagtayo?
Alma 34:31
Ania dagiti padas a naipakita kadatayo a no agbabawitayo, mangrugitayo a “dagus” a mangpadas kadagiti bendision ti plano ti pannakasubbot?
Alma 34:33–35
Ammo kadi ti pamiliam ti kaipapanan ti mangitantan? Mabalin adda maysa a mangibinglay kadagiti pagarigan ti panangitantan ken dagiti negatibo a bungana. Ania ti kaipapanan ti “mangitantan ti aldaw ti panagbabawi[tayo]”?
Para iti ad-adu pay a kapanunotan para iti panagisuro kadagiti ubbing, kitaen iti balabala iti daytoy a lawas iti Umaykayo, Sumurot Kaniak—Para iti Primary.
Panangpadur-as iti Panangisurotayo
Agdrowing kadagiti ladawan. Mabalinmo a pagdrowingen dagiti miembro ti pamilia bayat ti panagsursuroda manipud kadagiti nasantuan a kasuratan. Kas pagarigan, mabalin a magustuanda nga idrowing ti maysa a bukel a dumakkel a maysa a kayo bayat ti panagadalda iti Alma 32.
Ket gapu iti kinaregta ken ti pammatiyo ken iti anusyo a nangtaraken iti balikas, … adtoy, iti saan a mabayag purosenyonto ti bungana, a kapatgan” (Alma 32:42).