tsev neeg uas kawm vaj lug kub

Tej lub Tswv Yim rau Tsev Neeg Kev Kawm Vaj Lug Kub

Tsev neeg kev kawm vaj lug kub yeej yog ib txoj kev tseem ceeb heev kom pab nej tsev neeg kawm txoj moo zoo. Qhov uas nej tsev neeg nyeem npaum li cas los sis nyeem ntev li cas los tsis tseem ceeb npaum li qhov uas nej sim nyeem tsis tu tsis tseg. Thaum koj ua kom kev kawm vaj lug kub ua ib qho tseem ceeb hauv koj tsev neeg lub neej, koj yuav pab koj tsev neeg ib leeg paub ib leeg thiab los nyob ze Yexus Khetos thiab txhawb lawv zaj lus tim khawv kom muaj lub hauv paus ntawm Nws txoj lus.

Cia li xav txog tej lus nug no:

• Koj yuav ua li cas kom yaum koj tsev neeg kawm vaj lug kub lawv tus kheej?

• Koj ua tau dab tsi kom yaum koj tsev neeg qhia txog tej yam uas lawv kawm?

• Koj yuav ua li cas kom qhia tias tej ntsiab cai uas koj kawm los ntawm phau Lus Qhuab Qhia thiab Kev Khi Lus tseem ceeb npaum li cas thaum muaj cib fim qhia txhua hnub?

Cia li nco ntsoov tias lub tsev yog qhov chaw zoo tshaj plaws rau kev kawm txog txoj moo zoo. Tej kev kawm thiab qhia txog txoj moo zoo hauv tsev yeej yog tej txoj kev uas siv tsis tau thaum kawm hauv lub Koom Txoos. Cia li siv tswv yim thaum koj xav txog tej yam uas yuav pab koj tsev neeg kawm los ntawm vaj lug kub.

Tswv Yim txog Yam Ntxim Saib Ntxim Ua

Cia li xav txog tej tswv yim no uas yuav pab txhawb nqa koj tsev neeg kev kawm vaj lug kub:

Siv cov nkauj

Hu tej zaj nkauj uas qhia txog tej ntsiab cai los ntawm cov vaj lug kub. Muaj ib zaj nkauj qhuas Vajtswv los sis ib zaj nkauj rau cov me nyuam hu nkauj nyob hauv tus txheej txheem qhia txhua lub lim tiam. Tej zaum koj yuav xav nug txog tej lus los sis tej kab lus hauv cov nkauj no. Koj tsev neeg hu nkauj los tau, es tsis tas li ntawd xwb, lawv txawj piav tes txog tej yam hauv cov nkauj los sis mloog cov nkauj thaum lawv ua lwm yam ntxim saib ntxim ua.

Qhia txog tej nqe vaj lug kub uas muaj nqi

Nrog koj tsev neeg siv sij hawm qhia txog tej nqe vaj lug kub uas muaj nqis rau lawv thaum lawv kawm ntawm lawv ib leeg.

Siv koj tej lus

Caw koj tsev neeg hais ntsiab lus txog tej yam uas lawv kawm los ntawm cov vaj lug kub.

Ua neej raws li cov vaj lug kub qhia

Tom qab nej nyeem ib nqe vaj lug kub, hais kom koj tsev neeg qhia tias lawv yuav ua neej li cas raws li tej yam uas vaj lug kub qhia li cas.

Hais tej lus nug

Caw koj tsev neeg nug txog txoj moo zoo, ces siv sij hawm nrhiav tej nqe uas pab tau kom teb tej lus nug ntawd.

Tso ib nqe vaj lug kub rau saib

Xaiv ib nqe vaj lug kub uas muaj nqis rau nej, thiab tso rau ib qho chaw uas koj tsev neeg yuav pheej saib. Hais kom txhua tus hauv koj tsev neeg ib leeg zuj zus xaiv ib nqe vaj lug kub kom tso rau saib.

Sau ntawv txog vaj lug kub

Nrog koj tsev neeg, xaiv ob peb nqe vaj lug kub uas koj xav sib tham txog hauv lub lim tiam tom ntej.

Cim ntsoov tej nqe vaj lug kub

Xaiv ib nqe vaj lug kub uas muaj nqis rau koj tsev neeg, thiab hais kom koj tsev neeg rov qab hais txhua hnub los sis ua txoj kev ua si kom pab lawv cim ntsoov.

Siv ib yam khoom qhia

Nrhiav tau tej yam khoom uas qhia txog lub ntsiab ntawm tej tshooj thiab tej nqe uas koj tsev neeg nyeem. Caw koj tsev neeg kom sib tham txog qhov uas yam khoom ntawd piv txog tej lus qhia hauv vaj lug kub.

Xaiv ib lub ntsiab lus

Cia koj tsev neeg ib leeg zuj zus xaiv ib lub ntsiab lus uas koj tsev neeg yuav kawm ua ke. Siv Topical Guide, phau Bible Dictionary, los sis Phau Qhia txog Vaj Lug Kub (scriptures.ChurchofJesusChrist.org) kom nrhiav tej nqe vaj lug kub txog ntsiab lus ntawd.

Kos duab

Nyeem ob peb nqe nrog koj tsev neeg, ces cia koj tsev neeg siv sij hawm kos duab txog tej yam uas nej nyeem. Siv sij hawm sib tham txog txhua tus daim duab.

Ua yeeb yam txog ib zaj dab neeg

Tom qab koj nyeem ib zaj dab neeg, hais kom koj tsev neeg ua yeeb yam txog zaj ntawd. Tom qab ntawd, sib tham txog qhov uas zaj ntawd qhia txog tej xwm txheej uas koj thiab koj tsev neeg raug hauv nej lub neej.

Kev Qhia cov Me Nyuam

Yog koj muaj cov me nyuam yaus hauv koj tsev neeg, nov yog tej yam ntxim saib ntxim ua uas yuav pab lawv kawm tau:

Hu nkauj

Cov nkauj qhuas Vajtswv thiab cov nkauj los ntawm Children’s Songbook txawj qhia cov lus qhuab qhia. Txhua tus txheej txheem nyob hauv phau no muaj ib zaj nkauj uas yog ib zaj zoo hu nkauj. Tej zaum koj yuav xav nrhiav hauv topics index nyob nram qab phau Children’s Songbookkom nrhiav tau tej zaj uas hais txog tej ntsiab cai ntawm txoj moo zoo uas koj qhia. Pab koj cov me nyuam siv tej zaj lus qhia hauv cov nkauj no hauv lawv lub neej.

Mloog los sis ua yeeb yam txog ib zaj dab neeg

Cov me nyuam yaus nyiam mloog dab neeg—los ntawm cov vaj lug kub, los ntawm koj lub neej, los ntawm lub Koom Txoos zaj keeb kwm, los sis hauv lub Koom Txoos tej phau ntawv xov xwm. Nrhiav kev kom lawv pab hais dab neeg. Lawv tuav tau cov duab los yog tej khoom, kos duab txog tej yam lawv mloog, ua yeeb yam txog dab neeg, los sis pab hais dab neeg los tau. Pab koj cov me nyuam paub tej yam tseeb ntawm txoj moo zoo hauv tej zaj uas koj hais.

Nyeem vaj lug kub

Tej zaum cov me nyuam yaus tsis txawj nyeem ntau, tiam sis koj tseem pab tau lawv ua sib koom kawm los ntawm cov vaj lug kub. Tej zaum koj yuav tsum tsom ntsoov rau ib nqe, ib kab lus, los sis ib lo lus xwb.

Saib ib daim duab los sis saib ib daim video

Nug tej yam txog ib daim duab los yog video uas hais txog lub ntsiab cai ntawm txoj moo zoo uas nej sib tham txog. Piv txwv hais tias, koj nug tau, “Muaj dab tsi hauv daim duab no los sis daim video? Ua rau koj xav li cas?” Qhov app Txoj Moo Zoo cov Ntawv, Gospel Media Library nyob ntawm ChurchofJesusChrist.org, thiab children.ChurchofJesusChrist.org yog tej qhov chaw zoo nrhiav cov duab thiab cov video.

Tsim khoom

Cov me nyuam tsim tau khoom, kos duab, los yog pleev xim txog zaj dab neeg los sis lub ntsiab cai uas lawv kawm.

Koom tes siv ib yam khoom qhia

Txoj kev siv ib yam khoom qhia yeej pab tau koj cov me nyuam to taub ib lub ntsiab cai txog txoj moo zoo uas nyuaj to taub. Thaum koj siv ib yam khoom qhia, nrhiav kev cia koj cov me nyuam koom tes ua. Lawv yuav kawm los ntawm ib yam uas lawv ua ntau dua li lawv yuav kawm los ntawm kev saib xwb.

Ua yeeb yam

Thaum cov me nyuam ua yeeb yam txog xwm txheej uas lawv yuav raug hauv lawv lub neej, ces lawv haj yam to taub tias lawv yuav siv lub ntsiab cai txog txoj moo zoo li cas hauv lawv lub neej.

Rov qab ua yam ntxim saib ntxim ua

Cov me nyuam yaus tej zaum yuav tsum hnov tej ntsiab lus ob peb zaug kom lawv thiaj to taub. Piv txwv hais tias, tej zaum koj yuav xav siv ob peb txoj kev kom qhia ib zaj dab neeg los ntawm vaj lug kub—nyeem los ntawm phau vaj lug kub, hais ntsiab lus, cia koj cov me nyuam pab koj hais dab neeg, caw lawv ua yeeb yam txog zaj ntawd, thiab li ntawd.

Qhia tias cov vaj lug kub thiab lawv tej lub hom phiaj koom ua ke li cas

Tsev neeg kev kawm vaj lug kub pab tau cov tub hluas ntxhais hluas thiab cov me nyuam txais kev tshoov siab kom cuab hom phiaj rau lawv loj hlob tuaj ntawm sab ntsuj plig, sab cev nqaij daim tawv, kev txawj ntse, thiab kev sib raug zoo (saib Lukas 2:52).

ib tsev neeg zoo siab ua ke

Kev Qhia cov Tub Hluas Ntxhais Hluas

Yog koj muaj cov tub hluas ntxhais hluas hauv koj tsev neeg, nov yog tej yam ntxim saib ntxim ua uas yuav pab lawv kawm tau:

Caw lawv qhia

Thaum peb qhia ib yam dab tsi peb yeej kawm ntau dua li thaum peb hnov txog yam ntawd xwb. Muab cib fim rau koj cov tub hluas ntxhais hluas coj koj tsev neeg txoj kev sib tham txog cov vaj lug kub.

Qhia tias cov vaj lug kub thiab tej uas lawv kawm hauv seminary koom ua ke li cas

Xyoo no cov tub ntxhais kawm ntawv hauv seminary kawm phau Lus Qhuab Qhia thiab Kev Khi Lus. Yog tias koj cov tub hluas ntxhais hluas koom seminary, caw lawv qhia tias lawv kawm dab tsi nyob haud.

Muab cov vaj lug kub piv rau nej tus kheej

Tej lub sij hawm nyuaj rau cov tub hluas ntxhais hluas pom tias cov lus qhuab qhia thiab cov ntsiab cai hauv cov vaj lug kub muaj nqi rau lawv lub neej. Pab lawv kawm tias tej dab neeg thiab tej lus qhia hauv cov vaj lug kub hais li cas txog tej xwm txheej uas lawv muaj hauv tsev, hauv tsev kawm ntawv, los yog thaum lawv nrog phooj ywg.

Nug tej lus uas ua rau lawv xav xav

Cov tub hluas ntxhais hluas yeej xav teb tej lus nug uas cia lawv hais txog lawv tej kev xav hauv siab txog cov vaj lug kub thiab tsis txhob rov qab hais tej yam uas cov vaj lug kub twb hais lawm. Piv txwv hais tias, tej zaum koj yuav xav nug, “Tus Tswv qhia dab tsi rau nej hauv tej nqe vaj lug kub no?” los sis “Vim li cas nej xav tias kev tshwm sim muaj nqis rau Haiv Neeg Ntseeg hauv tej xyoo 1830?”

Qhia tias cov vaj lug kub thiab lawv tej lub hom phiaj koom ua ke li cas

Tsev neeg kev kawm vaj lug kub pab tau cov tub hluas ntxhais hluas thiab cov me nyuam txais kev tshoov siab kom cuab hom phiaj rau lawv loj hlob tuaj ntawm sab ntsuj plig, sab cev nqaij daim tawv, kev txawj ntse, thiab kev sib raug zoo (saib Lukas 2:52).

Qhib siab rau lawv tej lus nug

Thaum cov tub hluas ntxhais hluas nug ib yam dab tsi ces yog ib lub cib fim zoo kawg rau koj qhia qhov tseeb thiab xav to taub txog ib lub ntsiab uas lawv xav paub tiag tiag. Tsis txhob ntshai lawv yuav nug dab tsi thiab tsis txhob tso tseg, txawm yog lawv nug ib yam uas tsis muaj feem nrog tej yam uas nej sib tham txog. Yeej tsis ua li cas yog koj tsis paub teb lawv. Koj lub tsev yog qhov chaw zoo tshaj plaws rau nej nrhiav tej lus teb ua ke.

Txhawb nqa lawv kom lawv qhia tias lawv xav li cas.

Cov tub hluas ntxhais hluas txawj xav thiab muaj kev xav txawv lwm tus uas pab tau nej tsev neeg kev kawm vaj lug kub. Hais rau lawv tias koj xav paub txog tej yam uas tus Ntsuj Plig qhia rau lawv txog cov vaj lug kub. Tej zaum koj yuav xav hais kom lawv qhia tias lawv kawm dab tsi thaum lawv kawm ntawm lawv ib leeg.

Cia li hloov yooj yim

Yog tias muaj ib tug tub hluas los sis ntxhais hluas uas tsis txaus siab koom nrog koj tsev neeg kawm vaj lug kub, cia li nrhiav lwm txoj kev kom sib raug zoo nrog nws. Piv txwv hais tias, tej zaum koj yuav hais txog txoj moo zoo thaum koj sib tham txog lwm yam los sis qhia txog ib nqe vaj lug kub uas muaj nqis rau koj uas tsis ua rau nws xav tias koj qhuab qhia nws los yog koj coj hwj chim. Txhua tsev neeg tsis tas kawm vaj lug kub zoo ib yam. Ib txhia me nyuam haj yam kawm tau zoo yog tias koj nrog nws kawm neb ob leeg xwb. Cia li thov Vajtswv thiab ua raws li tus Ntsuj Plig tej kev tshoov siab.

Thawj Tswj Hwm Russell M. Nelson hais tias: “Kuv cog lus hais tias thaum nej rau siab ntso kho nej lub tsev kom ua lub hauv paus rau txoj kev kawm txoj moo zoo, nyob nyob ces nej tej Hnub Caiv yuav ua rau nej zoo siab kawg. Nej cov me nyuam yuav zoo siab hlo kawm thiab ua raws li tus Cawm Seej tej kev qhia, thiab dab ntxwg nyoog lub hwj chim hauv nej lub neej thiab nej lub tsev yuav tsawg zuj zus mus. Yuav muaj tej kev pauv loj uas kav ntev mus hauv nej tsev neeg” (“Rais Los Ua Tsoom Haiv Neeg Ntseeg hauv Hnub Nyoog Kawg Ua Coj Yam Ntxwv Zoo,” Ensign los sis Liahona, Kaum Ib Hlis Ntuj 2018, 113)