Dagiti Kapanunotan tapno Mapadur-as ti Sangapamiliaan a Panagadalyo iti Nasantuan a Kasuratan

Ti masansan a sangapamiliaan a panagadal iti nasantuan a kasuratan ket nabileg a wagas a mangtulong iti pamiliam nga agsursuro iti ebanghelio. No kasano ti kaadu ken kasano ti kapaut ti panagbasayo a kas maysa a pamilia ket saan a kas iti kinapateg ti panagbalin a mainugot kadagiti panagkagumaanyo. Bayat ti panangaramidmo iti panagadal iti nasantuan a kasuratan a napateg a paset ti panagbiag iti pamiliam, matulongamto dagiti miembro ti pamiliam a naas-asideg iti tunggal maysa ken ni Jesucristo ken mapapigsam dagiti pammaneknekda maipapan iti pundasion ti balikasna.

Ibilang dagiti sumaganad a saludsod:

• Kasano a maallukoymo dagiti miembro ti pamiliam nga agadal kadagiti nasantuan a kasuratan iti bukodda?

• Ania ti mabalin nga aramidem tapno maallukoymo dagiti miembro ti pamiliam a mangibinglay no ania ti masursuroda?

• Kasano a mayunay-unaymo dagiti pagbatayan a sursuruem iti Doktrina ken Katulagan kadagiti kanito iti panangisuro iti inaldaw?

Laglagipen a ti pagtaengan ti kasayaatan a lugar a pagsursuruan iti ebanghelio. Mabalinmo a sursuruen ken isuro ti ebanghelio iti pagtaengan iti wagas a saan a mabalin nga aramiden iti maysa a klase iti Simbaan. Agbalinka a managpartuat bayat ti panangpanunotmo kadagiti wagas a makatulong iti pamiliam a makasursuro manipud kadagiti nasantuan a kasuratan.

Dagiti Kapanunotan para kadagiti Aktibidad

Ibilangmo ti sumagmamano kadagiti sumaganad a kapanunotan a mangpasayaat iti sangapamiliaan a panagadalyo iti nasantuan a kasuratan:

Agusar iti musika

Agkanta kadagiti kansion a mangpabileg kadagiti pagbatayan a naisuro kadagiti nasantuan a kasuratan. Maysa a naisingasing a himno wenno kanta dagiti ubbing ti nailista iti tunggal linawas a balabala. Mabalinmo ti agsaludsod maipapan kadagiti balikas wenno ragup ti balikas kadagiti liriko. Kas nayon iti panagkanta, mabalin a mangipabuya ti pamiliam kadagiti tignay a maigiddan kadagiti kanta wenno dumngeg kadagiti kanta kas background a musika bayat ti panangaramidda kadagiti dadduma pay nga aktibidad.

Mangibinglay kadagiti napnuan kaipapanan a nasantuan a kasuratan

Ikkam dagiti miembro ti pamiliam iti oras a mangibinglay kadagiti binatog iti nasantuan a kasuratan a nasarakanda a napnuan kaipapanan kabayatan ti bukodda a panagadal.

Usarem dagiti bukodmo a balikas

Awisem dagiti miembro ti pamilia tapno manggupgop iti bukodda a balikas no ania ti masursuroda manipud kadagiti nasantuan a kasuratan nga adalenyo.

Yaplikarmo dagiti nasantuan a kasuratan iti biagmo.

Kalpasan ti panangbasam iti maysa a binatog iti nasantuan a kasuratan, kiddawem kadagiti miembro ti pamilia a mangibinglay kadagiti wagas a pakayaplikaran iti binatog iti biagda.

Agdamag iti saludsod

Awisem dagiti miembro ti pamilia nga agdamag iti saludsod maipanggep iti ebanghelio, ket kalpasanna mangbubos iti oras a mangsapul kadagiti bersikulo a makatulong a mangsungbat iti saludsod.

I-display ti maysa a nasantuan a kasuratan

Pumilika iti maysa a bersikulo a makitam a napateg, ket i-display daytoy iti lugar a masansan a makitanto daytoy dagiti miembro ti pamilia. Awisem dagiti dadduma pay a miembro ti pamilia nga agsisinnublat a mangpili iti maysa a nasantuan a kasuratan a mai-display.

Agaramid iti listaan ti nasantuan a kasuratan

Kas maysa a pamilia, pumilikayo iti sumagmamano a bersikulo a kayatyo a paglilinnawagan kabayatan ti umay a lawas.

Mangyulo kadagiti nasantuan a kasuratan

Pumilika iti maysa a binatog iti nasantuan a kasuratan a napnuan kaipapanan iti pamiliam, ket awisem dagiti miembro ti pamilia a mangikabesa iti daytoy babaen ti inaldaw a panangulit iti daytoy wenno agay-ayam iti memorization game.

Ibinglay dagiti adalen a banag [object lesson]

Agsapul kadagiti banag nga adalen a mainaig kadagiti kapitulo ken bersikulo a basbasaenyo kas maysa a pamilia. Awisem dagiti miembro ti pamilia nga agsarita maipapan no kasano a mainaig iti tunggal banag kadagiti pannursuro iti nasantuan a kasuratan.

Mangpili iti maysa a topiko

Pagsisinnublaten dagiti miembro ti pamilia a mangpili iti maysa a topiko nga aggigiddan nga adalento ti pamilia. Usarem ti Topical Guide, ti Bible Dictionary, wenno ti Pangiwanwan iti Nasantuan a Kasuratan (scriptures.ChurchofJesusChrist,org) a mangsarak kadagiti binatog iti nasantuan a kasuratan maipapan iti topiko.

Agdrowing iti maysa a ladawan

Basaen ti sumagmamano a bersikulo kas maysa a pamilia, ket kalpasanna mangilatang iti oras para kadagiti miembro ti pamilia a mangidrowing iti maysa a banag a mainaig iti no ania ti nabasayo. Mangbubos iti panawen a panangilawlawag kadagiti drowing ti tunggal maysa.

Mangyakem iti maysa nga estoria

Kalpasan ti panangbasam iti estoria, mangawis kadagiti miembro ti pamilia a mangyakem iti daytoy. Kalpasanna, isaritam maipapan iti no kasano a mainaig ti estoria kadagiti banag a mapadpadasam a maymaysa ken kas maysa a pamilia.

Panangisuro kadagiti Ubbing

No addaanka kadagiti inaudi nga ubbing iti pamiliam, dagitoy ti sumagmamano nga aktibidad a makatulong kadakuada nga agsursuro:

Agkanta

Dagiti himno ken dagiti kanta manipud iti Children’s Songbook ket mangisuro iti doktrina a sibibileg. Iraman ti tunggal balabala iti daytoy a pagadawan ti maysa a naisingasing a kanta. Mabalinmo nga usaren ti topics index iti likud ti Children’s Songbook a mangsapul kadagiti kanta a mainaig kadagiti pagbatayan iti ebanghelio nga isursurom. Tulongam dagiti annakmo a manginaig kadagiti mensahe dagiti kanta iti biagda.

Dumngeg wenno mangyakem iti estoria

Magustuan dagiti inaudi nga ubbing dagiti estoria maipapan iti ayat—manipud kadagiti nasantuan a kasuratan, manipud iti biagmo, manipud iti pakasaritaan ti Simbaan, wenno manipud kadagiti magasin ti Simbaan. Mangsapul kadagiti wagas a mangiraman kadakuada iti panagisalaysay iti estoria [storytelling]. Mabalinda ti agiggem kadagiti ladawan wenno banag, mangidrowing kadagiti ladawan iti no ania dagiti mangngegda, mangyakem ti estoria, wenno uray pay mangtulong a mangisarita iti estoria. Tulongam dagiti annakmo a mangbigbig kadagiti kinapudno ti ebanghelio kadagiti estoria nga ibinglaymo.

Agbasa iti nasantuan a kasuratan

Mabalin a saan unay a kabaelan dagiti babassit nga ubbing ti agbasa, ngem mabalinmo latta nga iraman ida iti panagsursuro manipud kadagiti nasantuan a kasuratan. Mabalin a kasapulam ti agpokus iti maysa a bersikulo, ti kangrunaan a ragup dagiti balikas, wenno balikas.

Kumita iti maysa a ladawan wenno agbuya iti video.

Agdamag kadagiti saludsod maipapan iti ladawan wenno video a mainaig iti maysa a prinsipio ti ebanghelio a paglilinnawaganyo. Kas pagarigan, mabalinmo a saludsoden, “Ania ti mapaspasamak iti daytoy a ladawan? Kasano nga iparikna daytoy kenka?” Ti Gospel Library app, iti Gospel Media Library iti ChurchofJesusChrist.org, ken children.ChurchofJesusChrist.org ket nasayaat a lugar a pakasarakan kadagiti ladawan ken video.

Agparnuay

Mabalin dagiti ubbing ti agaramid, agdrowing, wenno agkolor iti maysa a banag a mainaig iti estoria wenno pagbatayan a sursuruenda.

Makiraman kadagiti adalen a banag [object lesson]

Makatulong ti simple a banag nga adalen [object lesson] kadagiti annakyo tapno maawatanda dagiti pagbatayan ti ebanghelio a narigat a maawatan. No agus-usarka kadagiti banag nga adalen [object lesson], mangsapulka kadagiti wagas a pakapagpartisiparan dagiti annakmo. Ad-adunto ti masursuroda manipud iti padas iti pannakipulapol ngem iti panangbuybuya laeng iti maysa a demonstrasion.

Yakem [role-play]

No yakem wenno i-role-play dagiti ubbing ti maysa a situasion nalabit a maenkuentrodanto iti pudno a biag, nasaysayaat ti pannakaawatda no kasano a mayaplikar dagiti pagbatayan ti ebanghelio iti biagda.

Uliten dagiti aktibidad

Mabalin a kasapulan dagiti babassit nga ubbing ti dumngeg kadagiti konsepto iti mamin-adu a gundaway tapno maawatan ida. Kas pagarigan, mabalinmo nga ibinglay ti maysa nga estoria iti nasantuan a kasuratan iti sumagmamano a daras iti nadumaduma a wagas—panagbasa manipud kadagiti nasantuan a kasuratan, pananggupgop iti bukodmo a balikas, panagpatulong kadagiti annakmo nga agisalaysay iti estoria, panangawis kadakuada a mangyakem iti estoria, ken dadduma pay.

Agaramid kadagiti koneksion kadagiti bukodda a panggep a tun-oyen

Mangted ti panagadal iti nasantuan a kasuratan iti pamilia iti inspirasion para kadagiti agtutubo ken ubbing a mangituding kadagiti panggep a tun-oyen para iti espiritual, intelektual, ken sosial a panagdakkelda (kitaen ti Lucas 2:52).

Panangisuro kadagiti Agtutubo

No adda agtutubo iti pamiliam, dagitoy ti sumagmamano nga aktibidad a makatulong kadakuada nga agsursuro:

Awisem ida a mangisuro

Gagangay nga ad-adu ti masursurotayo no mangisurotayo iti maysa a banag ngem no dumngegtayo lattan maipapan iti daytoy. Ikkam dagiti agtutubom kadagiti gundaway a mangidaulo ti panaglilinnawag iti pamilia maipapan kadagiti nasantuan a kasuratan.

Agaramid kadagiti koneksion iti seminary

Daytoy a tawen, ad-adalen dagiti estudiante ti seminary ti Doktrina ken Katulagan. No agat-atendar dagiti agtutubom iti seminary, awisem ida a mangibinglay no ania ti sursuruenda sadiay.

Yarig dagiti nasantuan a kasuratan

Marigatan no dadduma dagiti agtutubo a makita no kasano a maikonekta dagiti pagbatayan ken doktrina iti biagda. Tulongam ida a mangkita no kasano a mainaig dagiti estoria ken pannursuro kadagiti situasion a pakaipaspasanguanda iti pagtaengan, iti pagadalan, wenno iti gagayyemda.

Agdamag kadagiti saludsod a mangyallukoy iti panagutob

Sungbatan a nasayaat ti adu nga agtutubo dagiti saludsod a mangpalugod kadakuada a mangipeksa kadagiti kapanunotan ken riknada maipapan kadagiti nasantuan a kasuratan imbes a panangulit no ania ti ibagbaga dagiti nasantuan a kasuratan. Kas pagarigan, mabalinmo a saludsoden, “Ania koma ti mabalin nga isuro ti Apo kenka kadagitoy a bersikulo?” wenno “Apay iti panagkunam a napnuan kaipapanan daytoy a paltiing kadagiti Santo idi 1830?”

Agaramid kadagiti koneksion kadagiti bukodda a panggep a tun-oyen

Mangted ti panagadal iti nasantuan a kasuratan iti pamilia iti inspirasion para kadagiti agtutubo ken ubbing a mangituding kadagiti panggep a tun-oyen para iti espiritual, intelektual, ken sosial a panagdakkelda (kitaen ti Lucas 2:52).

Agbalin nga open kadagiti saludsodda

Maysa a saludsod manipud iti maysa nga agtutubo ket napateg a gundaway a panangibinglay iti kinapudno ken makagun-od iti pannakaawat iti maysa a topiko a sipupudno a paggugustona. Saanka nga agbuteng kadagiti saludsod wenno saanmo nga ikankano ida, uray no kasla awan pakainaiganda iti topiko a paglilinnawagan. OK lang no awan kenka ti amin a sungbat. Ti pagtaengan ket ti nasayaat a lugar a pagkakadduaan a pagsapulan kadagiti sungbat.

Allukoyem ida a mangibinglay kadagiti nalawag a pannakaawat ken pannakaammoda.

Adda naidumduma a pannirigan ken nalawag a pannakaammo ken pannakaawat dagiti agtutubo a mangpasayaat iti sangapamiliaan a panagadal iti nasantuan a kasuratan. Ipakaammom kadakuada a kaay-ayom no ania ti isursuro ti Espiritu kadakuada maipapan kadagiti nasantuan a kasuratan. Mabalinmo pay nga idawat kadakuada a mangibinglay kadagiti nalawag a pannakaammo ken pannakaawat [insights] manipud iti bukodda a panagadal iti nasantuan a kasuratan.

Agbalin a mannakibagay

No addaanka iti maysa nga agtutubo a saan a makiraman iti panagadal iti nasantuan a kasuratan, sapulem dagiti dadduma pay a wagas a mangikonekta kenkuana. Kas pagarigan, mabalinmo kadi a dakamaten ti ebanghelio kadagiti pannakisarsaritam wenno mangibinglayka iti maysa a napnuan kaipapanan a nasantuan a kasuratan iti wagas a saan a kaska la mangaskasaba wenno mangibabbaba? Saan a nasken nga agpapada ti wagas ti panagadal iti nasantuan a kasuratan iti tunggal pamilia. Mabalin a sumungbat a nasaysayaat ti sumagmamano nga ubbing iti panagadal a saggaysa iti nasantuan a kasuratan. Agbalin a managkararag ken tungpalem dagiti parikna ti Espiritu.

Kinuna ni Presidente Russell M. Nelson, “Ikarik a bayat ti napasnek a panagtrabahoyo a mangurnos iti pagtaenganyo nga agbalin a maysa a sentro a pagsursuruan ti ebanghelio, dumtengto kenka dagiti aldaw ti Sabbath a pudpudno a pagragsakan. Dagiti annakyo ket aggagarto nga agsursuro ken agbiag kadagiti pannursuro ti Mangisalakan, ket ti impluensia ti kabusor iti biagyo ken iti pagtaenganyo ket kumapsutto. Makasagid rikna ken agtultuloyto dagiti panagbalbaliw iti pamiliam” (“Becoming Exemplary Latter-day Saints,” Ensign wenno Liahona, Nob. 2018, 113).