jun li junkab’al yookeb’ chixtzolb’aleb’ li loq’laj hu

Li na’leb’ re xchaab’ilob’resinkil li tzolok sa’ junkab’al

Xtzolb’aleb’ li loq’laj hu jo’ junkab’al k’a’jo’ naq naru chixtenq’ankil laa junkab’al chixtzolb’al li evangelio. Maak’a’ naxye jo’ nimal ut jo’ najtil nekextzolok jo’ junkab’al, a’ut aajel ru naq teeb’aanu rajlal. Naq nakak’e x’aajelil ru xtzolb’aleb’ li loq’laj hu sa’ laa junkab’al, taatenq’a laa junkab’al chi nach’ok rik’in li Jesukristo, ut chixk’ojob’ankil lix nawomeb’ xch’ool sa’ xb’een li raatin a’an.

K’oxlaheb’ li patz’om a’in:

• Chan ru naru taawaklesiheb’ xch’ool li komon sa’ laa junkab’al re te’xtzoleb’ li loq’laj hu xjuneseb’ rib’?

• K’a’ru naru nakab’aanu re xtenq’ankileb’ li komon sa’ laa junkab’al chixwotzb’al li k’a’ru yookeb’ chixtzolb’al?

• Chan ru naru taak’e xwankileb’ li na’leb’ li yookex chixtzolb’al sa’ li Tzol’leb’ ut Sumwank sa’ li k’utuk nakab’aanu wulaj wulaj?

Chijultiko’q aawe naq li ochoch a’an li na’ajej q’axal chaab’il re taatzolmanq li evangelio. Naru taatzol ut taak’ut li evangelio sa’ laa wochoch jo’ ink’a’ naru xb’aanunkil sa’ jun tzoleb’aal re li Iglees. K’e aach’ool chixk’oxlankil chan ru xtenq’ankileb’ li wankeb’ sa’ laa junkab’al chi tzolok rik’ineb’ li loq’laj hu.

Eb’ li kok’ k’anjel li naru te’oksimanq

K’oxla roksinkil junjunq reheb’ li na’leb’ a’in re xchaab’ilob’resinkil li tzolok nekeb’aanu jo’ junkab’al:

Oksiheb’ li b’ich

B’ichahomaqeb’ li b’ich li neke’xka’jultikaheb’ li na’leb’ k’utb’ileb’ sa’eb’ li loq’laj hu. Wankeb’ li b’ich naru xb’ichankil sa’ li tusleb’ aatin rajlal xamaan. Naru tatpatz’oq chirix junaq li aatin malaj raqal re li b’ich. Rochb’een b’ichank, laa junkab’al neke’ru chireek’asinkil rib’ naq yookeb’ chi b’ichank, malaj naru neke’rab’i xyaab’ li b’ich naq yookeb’ chixb’aanunkil li k’a’aq chik re ru.

Wotzeb’ chaab’il raqal reheb’ li loq’laj hu

Kanab’eb’ li komon sa’ li junkab’al chixwotzb’aleb’ li raqal sa’ li loq’laj hu li xwulak chiruheb’ naq yookeb’ chi tzolok xjuneseb’.

Oksi tz’aqal aawaatin

Patz’ reheb’ li komon sa’ li junkab’al naq te’xye rik’in tz’aqal raatineb’ li k’a’ru xe’xtzol sa’eb’ li raqal reheb’ li loq’laj hu li yookex chixtzolb’al.

Junta’qeetaheb’ li loq’laj hu rik’in laa yu’am

Chirix rilb’al jun raqal sa’eb’ li loq’laj hu, patz’ re laa junkab’al chan ru naq nak’anjelak li aatin a’an sa’ xyu’ameb’.

Oksi jun li patz’om

K’e xch’ool laa junkab’al chixpatz’b’al jun li patz’om chirix li evangelio, ut sik’eb’ li raqal li te’tenq’anq chixsumenkil li patz’om.

K’ut jun raqal reheb’ li loq’laj hu

Sik’ ru jun raqal li xwulak chawu, ut k’ut chi tz’iib’anb’il b’ar wi’ eb’ li komon sa’ li junkab’al te’ril chi kok’ aj xsa’. Kanab’eb’ chixjunjunqaleb’ laa komon chixsik’b’al jun raqal reheb’ li loq’laj hu re xk’utb’al.

Tz’iib’a xtusulaleb’ li raqal

Jo’ junkab’al, sik’omaq ru junjunq raqal li teeraj aatinak wi’ chiru li xamaan.

Tzoleb’ raatinuleb’ li loq’laj hu

Sik’ ru jun raqal sa’eb’ li loq’laj hu li nawulak chiru laa junkab’al, ut k’e xb’oqb’aleb’ li komon sa’ li junkab’al naq te’xtzol sa’ xk’a’uxl rik’in xyeeb’al wulaj wulaj, malaj rik’in xb’atz’unkil jun b’atz’unk re tzolok.

K’uteb’ li k’anjeleb’aal

Taw k’a’aq re ru li naxk’ut xyaalalileb’ li ch’ol ut raqal yookex chixtzolb’al jo’ junkab’al. Kanab’eb’ li komon sa’ li junkab’al chi aatinak chirix chan ru naq li k’a’ru xak’ut naxk’ut xyaalal li k’utb’il sa’eb’ li raqal.

Sik’ ru jun na’leb’

Kanab’eb’ chixjunqaleb’ li komon sa’ li junkab’al chixsik’b’al ru jun na’leb’ li teetzol sa’ junkab’al. Oksi li K’utul Raqal reheb’ li Loq’laj Hu re xtawb’aleb’ li raqal sa’eb’ li loq’laj hu li neke’aatinak chirix li na’leb’ a’an.

Yiib’ jun jalam-uuch

Ilomaq ru jo’ junkab’al junjunq raqal, ut kanab’eb’ laa komon chixyiib’ankil jun jalam-uuch chirix li k’a’ru xeril ru. Naru tex’aatinaq sa’ komonil chirix lix jalam-uuch li junjunq.

K’utb’esihomaq li seraq’

Chirix rilb’al jun seraq’, naru taab’oqeb’ laa komon chixk’utb’esinkil li seraq’inb’il. Chirix a’an, naru tex’aatinaq chirix chan ru naq li seraq’ wan choq’ reetalil li k’a’ru yoo chixk’ulb’al li junjunq, jo’ ajwi’ li junkab’al.

Xtzolb’aleb’ li kok’al

Wi wankeb’ kok’al sa’ laa junkab’al, a’an a’in junjunq li na’leb’ naru xb’aanunkil re xtenq’ankileb’:

B’ichank

B’ichanqex. Eb’ li b’ich ut li B’ichleb’aal choq’ reheb’ li Kok’al neke’xk’ut li tzol’leb’ rik’in wankilal. Wankeb’ li b’ich naru xb’ichankil sa’ li junjunq tusleb’ aatin. Naru ajwi’ taawoksi li tusleb’aal na’leb’ li natawman sa’ xraqik li B’ichleb’aal choq’ reheb’ li Kok’al re xtawb’aleb’ li b’ich li neke’aatinak chirix li na’leb’ re li evangelio li yookat chixk’utb’al. Tenq’aheb’ li kok’al chixjuntaq’eetankil li esil sa’ li b’ich rik’in lix yu’ameb’ a’an.

Rab’inkil malaj xk’utb’esinkil jun seraq’

Eb’ li kok’al neke’wulak chiruheb’ li seraq’—chirix li aatin sa’eb’ li loq’laj hu, chirix laa yu’am, chirix li resilal li Iglees, malaj eb’ li seraq’ sa’eb’ lix huhil li Iglees. Sik’ chan ru te’ruuq chi tz’aqonk sa’ xk’utb’al li seraq’. Neke’ru chixchapb’al li k’anjeleb’aal malaj li jalam-uuch, naru te’xyiib’ jun li jalam-uuch chirix li yookeb’ chirab’inkil, neke’ru chixb’aanunkil li na’uxman sa’ li seraq’, ut te’ruuq ajwi’ chixyeeb’al li seraq’. Tenq’aheb’ laa kok’al chixtawb’aleb’ ru li yaalil na’leb’ chirix li evangelio sa’eb’ li seraq’ nakawotz rik’ineb’.

Xyaab’asinkil jun raqal sa’eb’ li loq’laj hu

Eb’ li kok’al maare ink’a’ neke’xnaw chi us ilok ru hu, a’ut naru taatenq’aheb’ chi tz’aqonk sa’ li tzolok rik’ineb’ li loq’laj hu. Maare taa’ajmanq ru naq teeril yal jun raqalaq, jun ch’uut chi aatin, malaj yal jun aatin.

Rilb’al jun jalam-uuch malaj jun video

Patz’on chirix jun jalam-uuch malaj video li wan rilom rik’in li na’leb’ re li evangelio yookat chixk’utb’al. Qayehaq, naru taapatz’, “K’a’ru yoo chi k’ulmank sa’ li jalam-uuch a’in? K’a’ru naxk’e chaweek’a?” Naru xtawb’aleb’ li jalam-uuch ut li video sa’ li aplicación Biblioteca del Evangelio, li Biblioteca Multimedia sa’ ChurchofJesusChrist.org, ut children.ChurchofJesusChrist.org

Li yiib’ank

Eb’ li kok’al naru neke’yiib’an, neke’xyiib’ jun jalam-uuch, malaj naru neke’xb’on reetalil li seraq’ malaj li na’leb’ li yookeb’ chixtzolb’al.

Roksinkil li k’anjeleb’aal

Jun ch’ina k’anjeleb’aal naru chixtenq’ankileb’ laa kok’al chixtawb’al ru jun na’leb’ chirix li evangelio li ch’a’aj xtawb’al ru. Naq nakawoksiheb’ li k’anjeleb’aal, k’oxla chan ru naq te’ruuq chi tz’aqonk li kok’al. Eb’ a’an mas wi’chik naq te’tzoloq rik’in xb’aanunkil k’a’ruhaq chiru yal rilb’al.

Xb’aanunkil li yeeb’il sa’ li seraq’

Naq eb’ li kok’al neke’xb’aanu li k’a’ru naru neke’xk’ul sa’ lix yu’ameb’, mas wi’chik naq te’ruuq chixtawb’al ru chan ru naq jun na’leb’ re li evangelio nak’anjelak sa’ xyu’ameb’.

Xb’aanunkil k’iila sut eb’ li kok’ k’anjel

Wan naq taa’ajmanq ru naq eb’ li kok’al te’rab’i k’iila sut jun li na’leb’ re te’ruuq chixtawb’al ru. Qayehaq, naru taawotz jun esilal sa’eb’ li loq’laj hu k’iila sut chi k’iila paay ru—rik’in rilb’al sa’eb’ li loq’laj hu, rik’in xyeeb’aal rik’in tz’aqal aawaatin, rik’in xkanab’ankileb’ li kok’al chatenq’ankil chixyeeb’al li seraq’, rik’in xb’aanunkil li k’a’ru na’uxman sa’ li seraq’, ut xkomoneb’ chik li na’leb’.

Xjunajinkil li k’a’ru neke’xtzol rik’in lix jayalihomeb’ a’an

Xtzolb’aleb’ li loq’laj hu sa’ junkab’al naru tixtenq’aheb’ li saaj ut li kok’al chixsik’b’al k’a’ru te’xb’aanu re k’iik sa’ musiq’ej, sa’ tib’elej, sa’ k’a’uxlej, ut sa’ komonil wank (chi’ilmanq Lukas 2:52).

yookeb’ chi se’ek jun li junkab’al

Xtzolb’aleb’ li saaj

Wi wankeb’ li saaj sa’ laa junkab’al, a’in junjunq li na’leb’ naru xb’aanunkil re xtenq’ankileb’ chi tzolok:

Xpatz’b’al reheb’ naq te’k’utuq

Kok’ aj xsa’ naab’al chik li naqatzol rik’in xk’utb’al k’a’ruhaq chiru yal rab’inkil. Kanab’eb’ li saaj chixb’eresinkil li aatinak sa’ junkab’al chirixeb’ li loq’laj hu.

Aatinak chirix li seminario

Chiru li chihab’ a’in, yookeb’ chixtzolb’al li Tzol’leb’ ut Sumwank sa’ li seminario. Wi neke’xik laa saaj sa’ seminario, patz’ reheb’ naq te’xwotz li yookeb’ chixtzolb’al.

Xjuntaq’eetankileb’ li loq’laj hu

Wan naq ch’a’aj chiruheb’ li saaj rilb’al chan ru naq neke’k’anjelak li tzol’leb’ ut li na’leb’ reheb’ li loq’laj hu sa’ lix yu’ameb’ a’an. Tenq’aheb’ chixk’eeb’al reetal naq eb’ li seraq’ ut li k’utum sa’eb’ li loq’laj hu wankeb’ rilom rik’in li k’a’ru neke’xk’ul sa’ li ochoch, sa’ li eskweel, ut rik’ineb’ li ramiiw.

Roksinkileb’ li patz’om re taa’uxq li tz’ilok-ix sa’ ch’oolej

Naab’aleb’ li saaj neke’raj xk’ulb’al li patz’om li neke’xkanab’eb’ chixyeeb’al li neke’xk’oxla ut li neke’reek’a chirixeb’ li loq’laj hu ruuchil yal xka’sutinkil li aatin tz’iib’anb’il sa’eb’ li loq’laj hu. Qayehaq, naru taapatz’, “K’a’ru yoo chixk’utb’al li Qaawa’ chawu sa’ li raqal a’in?” malaj “K’a’ut naq nim ru li k’utb’esinb’il na’leb’ a’in choq’ reheb’ laj santil paab’anel sa’ 1830?”

Aatinak chirix li neke’raj xb’aanunkil re k’iik

Xtzolb’aleb’ li loq’laj hu sa’ junkab’al naru tixtenq’aheb’ li saaj ut li kok’al chixsik’b’al k’a’ru te’xb’aanu re k’iik sa’ musiq’ej, sa’ tib’elej, sa’ k’a’uxlej, ut sa’ komonil wank (chi’ilmanq Lukas 2:52).

Xsumenkileb’ lix patz’omeb’

Lix patz’om jun li saaj naru tatxtenq’a chixwotzb’al li yaal ut chixtawb’al aana’leb’ chirix li na’leb’ te’raj xtzolb’al. Lix patz’om jun li saaj naru tatxtenq’a chixwotzb’al li yaal ut chixtawb’al aana’leb’ chirix li na’leb’ te’raj xtzolb’al. Maak’a’ reek’ wi ink’a’ nakanaw xsumenkil chixjunileb’ li patz’om. Li ochoch, a’an li na’ajej q’axal chaab’il re xsik’b’al li sumehom sa’ komonil.

Xwaklesinkileb’ xch’ool re te’xwotz xna’leb’

Wankeb’ li na’leb’ li ka’ajwi’ naru neke’xwotz li saaj rik’in li junkab’al naq neke’xtzoleb’ li loq’laj hu. Wankeb’ lix chaab’il na’leb’ li saaj li naru te’xwotz naq neke’xtzoleb’ li loq’laj hu sa’ junkab’al. Naru taapatz’ reheb’ naq te’xwotz li na’leb’ xe’xtzol naq xe’tzolok sa’ junesal.

Yo’on wanqat chi jalok

Wi wan jun li saaj li ink’a’ naraj xtzolb’aleb’ li loq’laj hu rik’in lix junkab’al, sik’ k’a’ruhaq chik naru taab’aanu re xtenq’ankil. Qayehaq, ma naru taaye jun na’leb’ chirix li evangelio naq yookex chi aatinak, malaj taawotz jun raqal sa’eb’ li loq’laj hu rik’ineb’? Naru naq jalan jalanq chan ru natzolman li loq’laj hu sa’ li junjunq junkab’al. Wankeb’ li kok’al li nawulak chiruheb’ xtzolb’aleb’ li loq’laj hu rik’in ka’ajwi’ jun chik li kristiaan. Chatwanq chi tijok ut chixtaaqenkil lix hasb’ li Musiq’ej.

Li Awa’b’ej Russell M. Nelson kixye, “Ninyeechi’i naq sa’ xyalb’al eeq’e chi anchal eemetz’ew chixchaab’ilob’resinkil eerochoch jo’ jun na’ajej re xtzolb’al li evangelio, rik’in xnumikeb’ li kutan, lee hilob’aal kutan te’ok choq’ sahil kutan eere. Lee kok’al te’raj raj xtzolb’al ut xyu’aminkileb’ lix k’utum li Kolonel, ut taak’osq lix wankil laj tza sa’ lee yu’am ut sa’ lee rochoch. Nimaq xwankil li jalaak teek’ul sa’ lee junkab’al” (“Li ok choq’ jun aj Santil Paab’anel sa’ Roso’jikeb’ li Kutan jwal chaab’il,” Jolomil ch’utub’aj-ib’ re octubre 2018).