babai nga agad-adal kadagiti nasantuan a kasuratan

Ti Kumbersion ti Panggeptayo a Tun-oyen

Panggep ti amin a panagsursuro ken panangisuro iti ebanghelio ti mangpapigsa iti kumbersiontayo ken ni Jesucristo ken tulongannatayo nga agbalin nga ad-adda a kas Kenkuana. Gapu iti daytoy a rason, no agadaltayo iti ebanghelio, saantayo laeng nga agsapsapul iti baro nga impormasion; kayattayo ti agbalin a “baro a parsua” (2 Taga-Corinto 5:17). Kayat a sawen daytoy ti panagpannuray iti Nailangitan nga Ama ken ni Jesucristo tapno tulongandatayo a mangbalbaliw dagiti puspusotayo, dagiti pannirigantayo, dagiti tignaytayo, ken dagiti mismo a kababalintayo.

Ngem ti kita ti panagsursuro iti ebanghelio a mangpapigsa iti pammatitayo ken mangiturong iti milagro ti pannakapasurot wenno kumbersion ket saan a mapasamak iti mamimpinsan. Agtultuloy daytoy iti labes ti maysa a siled ti klase iti puso ti tao ken pagtaenganna. Kasapulan daytoy ti agtultuloy, inaldaw a panagkagumaan tapno maawatan ken agbiag iti ebanghelio. Ngem saan a namnamaen ti Nailangitan nga Ama nga aramidentayo daytoy nga agmaymaysa—ibaonna ti Espiritu Santo a mangtulong kadatayo nga agbalin a napasurot [converted].

Tarabayennatayo ti Espiritu Santo iti kinapudno ken paneknekanna dayta a kinapudno (kitaen iti Juan 16:13). Lawlawaganna dagiti panunottayo, pasantakenna dagiti pannakaawattayo, ken sagidenna dagiti puspusotayo iti paltiing manipud iti Dios, ti paggapuan ti amin a kinapudno. Patarnawen ti Espiritu Santo dagiti puspusotayo. Paregtaenna kadatayo ti tarigagay nga agbiag babaen iti kinapudno, ket yarasaasna kadatayo dagiti wagas a mangaramid iti daytoy. Pudno, a “ti Espiritu Santo … isuronanto [kadatayo] dagiti amin a banag” (Juan 14:26).

Gapu kadagitoy a rason, kadagiti panagkagumaantayo nga agbiag, agsursuro, ken mangisuro iti ebanghelio, nasken nga umuna ken kangrunaan nga ikarigatantayo a gun-oden ti panangkadkadua ti Espiritu. Rumbeng a daytoy a panggep a tun-oyen ti mangituray kadagiti pilitayo ken mangtarabay kadagiti kapanunotan ken tignaytayo. Nasken nga ikarigatantayo a gun-oden dagiti ania man a pangawis ti impluensia ti Espiritu ket supringentayo dagiti ania man a mangpapanaw iti dayta nga impluensia—gapu ta ammotayo a no mabalin a maikaritayo iti panangkadkadua ti Espiritu Santo, mabalin a maikaritayo met nga agindeg iti sidong ti Nailangitan nga Ama ken ti Anakna, ni Jesucristo.