“Epereli 22-28. Maciu 18; Luke 10: ‘A Cava na Ka Me’u Kitaka, Me’u Rawata kina na Bula Tawamudu?’” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Epereli 22-28. Maciu 18; Luke 10,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Na Kai Samaria Dauloloma, mai vei Dan Burr
Epereli 22–28.
Maciu 18; Luke 10
“A Cava na Ka Me’u Kitaka, Me’u Rawata kina na Bula Tawamudu?”
Ni o wilika ena yalomasumasu ka vakasamataka vakatitobu na Maciu 18 kei na Luke 10, vakarogoca vakavinaka na veivakayarayarataki ni Yalo Tabu. O na kila vakacava ni baleti iko na ivakavuvuli kei na italanoa oqori. Vola na veivakasama o ciqoma
Vola na Nomu Veivakasama
Ni o taroga na Turaga e dua na taro, o na ciqoma beka e dua na saunitaro o a sega ni namaka. O cei na wekaqu? E dua ga e sa gadreva na nomu veivuke kei na loloma. Ko cei sa levu cake ena matanitu vakalomalagi? E dua na gonelailai. E sa rauta beka mo vosota e dua sa vakacudrui iko vaka vitu? E sega, mo na vosoti koya me vaka vitusagavulu na vitu. (Raica na Luke 10:29–37; Maciu 18:4, 21–22.) Kevaka o sa vakasaqara na lewa ni Turaga, mo kakua ni “vakadonui [iko]” kina (Luke 10:29), ia baleta ni o vinakata mo vuli mai vei Koya, ena vakavulici iko na Turaga na sala mo bula kina ka na veimuataki ki na bula tawamudu kei Koya.
Vakasama eso ni Vuli iVolanikalou Yadua
E dodonu me’u na vosoti ira na tani kevaka au vinakata me’u ciqoma na veivosoti mai vua na Turaga.
Na nona vakatutu o Pita me vosota vakavitu e dua beka na irogorogo ni loloma, ia e vakatavulica o Jisu e dua na lawa cecere cake. E sauma o Koya, “Au sa sega ni kaya vei iko, me vakavitu walega: me, vakavitusagavulu na vitu,” a sega ni vakatavuvulitaka na veika me baleta na fika ia e baleta na itovo va-Karisito ni veivosoti. Ni o wilika nai talanoa vakatautauvata ni italai e sega ni dauloloma, vakasamataka vakatitobu na veigauna o a vakila kina na loloma veivueti kei na loloma uasivi ni Kalou. E tiko beka e dua e gadreva me vakila na loloma veivueti kei na loloma uasivi mai vei iko?
E vakatavulica o Elder David E. Sorensen ena Vitusagavulu: “Au vinakata me’u vakamatatataka ni veivosoti ni valavala ca, e sega ni dodonu me veilecayakitaki kei na vakatarai ni caka ca. … E dina ni dodonu me da vosota e dua na wekada e tiko volekati keda ni vakamavoataki keda, e dodonu me da cakacaka vakagumatua me tarova na kena vakaruataki na veika e yaco oya” (“Ena Veisautaka na Rarawa ki na Loloma na Veivosoti,” Ensign se Liaona, Me 2003, 12).
Raica talega na “Veivosoti,” ena iUlutaga Vakosipeli, topics.lds.org.
O cei na Vitusagavulu?
Ni vakamuri e dua na ivakarau e tauyavutaki ena gauna ni Veiyalayalati Makawa (raica na Lako Yani 24:1; Tiko Mai na Lekutu 11:16), Ko Jisu Karisito e “lesia e vitusagavulu tale,” me ikuri ni Nona Tinikarua na iApositolo, me vakadinadinataki Koya, vunautaka Nona kosipeli, ka vukei Koya ena Nona cakacaka. Na iwalewale oqo e tomani tikoga ena Lotu vakalesuimai. Na Vitusagavulu era kacivi me ra veivuke kina Tinikarua ena nodra ilesilesi vaka ivakadinadina digitaki i Jisu Karisito ki vuravura raraba. Era tuvai vakakuoramu na Vitusagavulu. O ira na lewe ni matai ni rua na kuoramu era sa tabaki me ra Vakaitutu Raraba, ia o ira na lewe ni kuoramu tale eso era tabaki me Vakaitutu ni Wasewase. (Raica talega na VV 107:25-26, 33–34, 97.)
Me’u rawata na bula tawamudu, e dodonu me’u lomana na Kalou ka lomana na wekaqu me vakaga niu lomani au.
Ena veivuke me da nanuma ni talanoa vakatautauvata ni kai Samaria dauloloma e nona sala ni saumi taro kina o Jisu: “Ocei na wekaqu?” Ni o wilika na italanoa vakatautauvata oqo, nanuma tiko na taro oqori? Na cava na isau ni taro o kunea?
Ena gauna i Jisu, na nodra veicacati na Jiu kei na kai Samaria e sa yaco tiko mai ena dua na gauna balavu. O ira na kai Samaria era kawa ni Jiu era tiko mai Samaria era sa vakamau veiwaki kei ira na matanitu tani. Era vakila na Jiu ni ra sa vakadukadukalitaki na kai Samarai mai na nodra veimaliwai kei ira na Matanitu tani ka ra sa vuki tani. Era na cawiri vakabalavu na Jiu me ra levea na takosovi Samaria. (Raica talega na Luke 9:52–54; 17:11–18; Joni 4:9; 8:48.)
Na cava o nanuma e a digia kina na iVakabula e dua na kai Samaria, e dua e sevaki mai vei ira na Jiu, me ivakaraitaki ni loloma uasivi kei na lomana na wekana? Na cava e vakauqeti iko kina na vosavakatautauvata oqo me rawa ni o vakaraitaka na loloma veivueti vei ira na tani?
Raica talega na Mosaia 2:17; “Parable of the Good Samaritan” (video, LDS.org); “Lord, I Would Follow Thee,” Hymns, no. 220.
Eda digia na “tikina vinaka” mai na kena caka na veidigidigi ena veimuataki ki na bula tawamudu.
E vakatavulica o Sister Bonnie D. Parkin, Peresitedi Raraba ni Soqosoqo ni Veivukei: “O iko kei au o Meri kei Marica. … Erau lomana na Turaga ka via vakaraitaka nodrau loloma. Ena gauna oqo, e vaka vei au e vakaraitaka o Meri na nona loloma ena nona rogoca Nona vosa, ia o Marica e vakaraitaka ena nona qaravi Koya. … E sega ni vakalaiva na nona lomaleqa o Marica, o Jisu, ia e dusimaka vua me vakanamata tiko ena nona tukuna me digia na ‘tikina vinaka.’ Na cava o ya? … Na ka e gadrevi sai koya me digitaki na bula tawamudu [raica 2 Nifai 2:28]. Eda digitaka e veisiga” (“Digitaka na Loloma Cecere: na Tikina Vinaka Oya,” Ensign se Liaona, Nove. 2003, 104). O na rawa ni vakalekalekataka vakacava na ivakasala ni Turaga vei Marica ena nomu vosa ga o iko? Vakadikeva na nomu i tuvatuva ni cakacaka—e tiko beka e dua na ka “gadrevi bibi” ena gadreva vakalevu cake na nomu gauna?
Eso na Vakasama me baleta na Vuli iVolanikalou Vakavuvale kei na Lotu Vakavuvale ena Moniti
Ni o wilika na ivolanikalou kei na nomu vuvale, ena rawa ni vukei iko na Yalo mo kila na ivakavuvuli cava mo vakabibitaka ka veivosakitaka me rawa ni sotavi kina na gagadre ni nomu vuvale. Oqo eso na vakatutu:
Na serenilotu cava e rawa ni lagata na nomu vuvale e sala vata na dina e vakavulici ena veiwase? E rua na ivakaraitaki oqo “Turaga Me’u na Muri Kemuni” kei na Na Caka Vinaka?” Serenilotu, naba 129, 131, ia e levu tale e tiko. E vukea vakacava me kila vakavinaka cake na nomu matavuvale na ivakavuvuli ni Vakabula?
Na cava ena vinakata kina o Jisu me da vaka na gonelailai? Na cava eso na ivakarau ni bula ni gone lalai ena cakava me tiko vei keda na ivakarau va-Karisito kevaka eda veiuturitaka ena noda bula? (raica na Mosaia 3:19).
E vinakata o Jisu me vakataki ira na gone lalai o ira na Nona tisaipeli.
Na cava e rawa ni vakabulabulataka na vosavakaibalebale ni kai Samaria dauloloma ki na nomu matavuvale? Ena lasa beka ke daramaki na kena isulu ka vakatasuasuataki? Vakadeitaka mo vukei ira nomu vuvale me ra raica era na rawa ni vakataka na kai Samaria dauloloma. E dua beka e gagadre tu e koronivuli se valenilotu eda sega ni kauwaitaka tiko? Na cava beka e rawa ni da cakava vei koya na tamata oqo?
E dau dredre beka mo vakacuruma na veika vakayalo ena ituvatuva ni matavuvale? Nai talanoa i Meri kei Marica e rawa ni vakauqeta e dua na matabose vakavuvale se lotu vakamatavuvale me baleta na sala me na walia na veika oqo. Vakamatavuvale, e rawa ni o vakayacora e dua na ituvatuva ni sala eso mo digia kina na “tikina vinaka” (raica na Luke 10:42).
Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.
Vakatorocaketaki ni Noda Veivakavulici
Susuga e Dua na iTuvaki Veilomani. Na ivalavala ni nodra veimaliwai vakai ira kei na veika era veiqaravi kina vakai ira ena rawa ni vakayarayarataka vakatitobu na yalo ni loma ni vale. Vukea na lewe ni vuvale taucoko me ra tauyavutaka na vale veilomani, veirokorokovi ka mera rawa ni vakila ni ra taqomaki ni ra wasea na veika era sotava, na loma tarotaro, kei na ivakadinadina. (Raica na Veivakavulici ena iVakarau ni iVakabula, 15.)
O Karisito ena Vale nei Meri kei Marica, mai vei Walter Rane