“6–12 Mē. Luke 12–17; Sione 11: ‘Tau Fiefia mo Au; he Kuó u ʻIlo ʻa ʻEku Sipi ʻ a iaNaʻe Molé’” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Fuakava Foʻou 2019 (2019)
“6–12 Mē. Luke 12–17; Sione 11,” Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: 2019
Ko e Foha Maumau Koloá, tā ʻe Liz Lemon Swindle
6–12 Mē.
Luke 12–17; Sione 11
“Tau Fiefia mo Au; he Kuó u ʻIlo ʻa ʻEku Sipi ʻa ia Naʻe Molé”
ʻI hoʻo lau ʻa e Luke 12–17 mo e Sione 11, fekumi ʻi he faʻa lotu ki he meʻa ʻoku finangalo ʻa e Tamai Hēvaní ke ke ʻiloʻi mo fakahokó. ʻE lava ke hoko hoʻo ako ʻa e ngaahi vahe ko ʻení ke fakaava ai ho lotó ki he ngaahi pōpoaki naʻe fakataumuʻa pē ia kiate koe.
Lekooti e Ngaahi Ongo ʻOkú ke Maʻú
ʻI he ngaahi tūkunga lahi, ʻe meimei ke pehē ʻoku fisifisimuʻa kapau ʻe maʻu ha laumālie ʻe toko 99 mei he toko 100—ka ʻoku ʻikai pehē ia ʻi he taimi ʻoku fakafofongaʻi ai ʻe he fika peheé ʻa e fānau ʻofeina ʻa e ʻOtuá (vakai, T&F 18:10). ʻI he tuʻunga ko iá, naʻa mo e laumālie ʻe tahá ʻoku taau ia ke tau fekumi fakaʻauliliki “kae ʻoua ke [tau] ʻilo ia” (Luke 15:4), ʻi he founga ko ia ne akoʻi ʻe he Fakamoʻuí ʻi he talanoa fakatātā ki he sipi heé. Pea ʻe lava leva ke toki kamata ʻa e fakafiefiá, he ʻe “fiefia ʻi he langí ʻo lahi ʻi he fakatomala ʻa e angahala ʻe toko tahá, ʻi he angatonu ʻe toko hivangofulu mā toko hiva, ʻoku ʻikai ʻaonga ke nau fakatomalá” (Luke 15:7). Kapau ʻoku ngali taʻetotonu ia, ʻoku ʻaonga ke manatuʻi ko hono tuʻunga totonú ʻoku ʻikai ha taha ia ʻoku “ʻikai ʻaonga ke [ne] fakatomala.” ʻOku tau fie maʻu kotoa pē ke fakahaofi kitautolu. Pea ʻe lava leva ke tau kau kotoa ʻi he fakahaofí, ʻo fiefia fakataha ʻi he foʻi laumālie kotoa pē ʻoku fakahaofí (vakai, T&F 18:15–16).
Ngaahi Fakakaukau ki hono Ako Fakataautaha ʻo e Folofolá
ʻOku totonu ke u maʻu ha loto-holi ki he ngaahi meʻa ʻoku taʻengatá kae ʻikai ko e ngaahi meʻa ʻo e māmaní.
Ko e hā ka folofola ai e ʻOtuá ʻo pehē “Ko e vale koe” ki ha tangata faʻa ngāue, mo lavameʻa ʻa ia kuó ne langa ha ngaahi feleoko lalahi pea fakafonu ia ʻaki ʻa e ngaahi fua ʻo ʻene ngāué? (vakai, Luke 12:16–21). ʻI he ngaahi vahe ko ʻeni ʻi he tohi Luké, ʻoku akoʻi ʻe he Fakamoʻuí ha ngaahi talanoa fakatātā ʻe ala tokoni ke tau tokanga taha ki he ngaahi meʻa ʻoku taʻengatá. ʻOku hiki atu heni ha niʻihi ʻo e ngaahi talanoa fakatātā ko ʻení. Te ke fakamatala fakanounouʻi fēfē ʻa e ʻuhinga ʻo e tala-fakatātā takitaha? ʻOkú ke pehē ko e hā ʻoku finangalo ʻa e ʻEikí ke ke akó?
-
Ko e tangata vale naʻe koloaʻiá (Luke 12:13–21)
-
Ko e ʻohomohe lahí (Luke 14:12–24)
-
Ko e foha maumau koloá (Luke 15:11–32)
-
Ko e tauhi koloa taʻefaitotonú (Luke 16:1–12)
-
Ko e tangata koloaʻiá mo Lasalosi (Luke 16:19–31)
Vakai foki, Mātiu 6:19–34; 2 Nīfai 9:30; Tokāteline mo e Ngaahi Fuakava 25:10.
ʻOku fiefia ʻa e Tamai Hēvaní ʻi he taimi ʻoku maʻu ai ʻa kinautolu naʻe heé.
Kuó ke fifili nai ki he ongo ʻoku maʻu ʻe he Tamai Hēvaní kiate kinautolu kuo faiangahala pe “heé”? Naʻe fakaangaʻi ʻe he kau Fālesí mo e kau tangata tohí ʻa Sīsū ʻi Heʻene feohi mo e kakai peheé. Naʻe tali ange ʻe Sīsū ʻaki Haʻane talanoa ha talanoa fakatātā ʻe tolu, ʻa ia ʻoku hā ʻi he Luke 15—ko e talanoa fakatātā ʻo e sipi naʻe heé, paʻanga naʻe molé, mo e foha maumau koloá.
Lolotonga hoʻo lau ʻa e ngaahi talanoa fakatātā ko ʻení, fakakaukau ke ke lisi ʻa e ngaahi meʻa ʻoku nau faitatau mo faikehekehe aí. Hangē ko ʻení, te ke lava ʻo fekumi ki he meʻa naʻe molé mo hono ʻuhingá, founga naʻe maʻu ai iá, pea naʻe fēfē tali ʻa e kakaí ʻi he taimi naʻe maʻu ai iá. Ko e hā ha ngaahi pōpoaki ʻa Sīsū ki he niʻihi ko ia ʻoku “heé”—ʻo kau ai ʻa kinautolu ʻoku ʻikai ke nau ʻiloʻi ʻoku nau heé? Ko e hā ha ngaahi pōpoaki naʻá ne ʻoatu ki he kakai ko ia ʻoku nau fekumi ki he niʻihi ʻoku heé?
Ko hono moʻoní, ʻoku lelei maʻu pē ke ʻoua naʻá te hē. Naʻe tohi fekauʻaki mo e Luke 15:7, ʻa ʻEletā James E. Talmage ʻo pehē, “ʻOku ʻikai ha ʻuhinga lelei ki he fakamahamahalo ko ia ʻoku mahuʻinga ange ʻa e tokotaha faiangahala ne fakatomalá, ʻi he laumālie angatonu naʻá ne fakafisingaʻi e angahalá” (Jesus the Christ [1916], 461). Ka neongo iá, ʻoku tau faiangahala kotoa pē pea ʻoku tau fie maʻu ʻa e fakahaofí, pea ko e pōpoaki fakafiemālie ʻa e ngaahi talanoa fakatātā ʻa e Fakamoʻuí ko e malava ko ia ke tau fakatomala kotoa pē pea toe foki ki he māʻoniʻoní, he ʻoku finangalo ʻa e ʻOtuá ke ʻoua naʻa ʻauha ha laumālie ʻe taha.
Vakai foki, Tokāteline mo e Ngaahi Fuakava 18:10–16; Jeffrey R. Holland, “Ko e Maumau Koloa ʻe Tahá,” Liahona, Siulai 2002, 62–64.
Ko e Konga Siliva naʻe Molé, tā ʻe James Tissot
Ko e hā naʻe akoʻi ʻe Kalaisi ʻi he talanoa fakatātā ki he tauhi koloa taʻeangatonú?
Naʻe fakamatalaʻi ʻe ʻEletā James E. Talmage ha lēsoni te tau lava ʻo ako mei he talanoa fakatātaá: “Ke mou faivelenga; he ʻoku vave e mole atu ʻa e ʻaho te mou ngāueʻaki ai hoʻomou ngaahi koloa fakaemāmaní. Ako mei he taʻefaitotonú mo e koví; kapau ʻoku nau mātuʻaki tokanga ke teuteu ki he kahaʻu pē ʻoku nau fakakaukau ki aí, ʻe fēfē hono lahi ange hoʻo teuteu ki aí, ʻi hoʻo tui ki ha kahaʻu taʻengatá! Kapau kuo teʻeki ke ke poto mo anga-fakapotopoto ʻi hono fakaʻaongaʻi ʻo e ‘koloa taʻe māʻoniʻoní’, ʻe fēfē ai haʻo falalaʻanga ke tauhi e ngaahi koloa lahi ange ʻoku tolongá?” (Jesus the Christ, 464).
Te u ofi ange ki he ʻOtuá ʻi heʻeku houngaʻia ʻi hoku ngaahi tāpuakí.
Kapau naʻá ke kau ʻi he kau kilia ʻe toko hongofulú, ʻokú ke pehē te ke toe foki ʻo fakamālō ki he Fakamoʻuí? Ko e hā mo ha toe ngaahi tāpuaki kehe naʻe maʻu ʻe he tangata kilia houngaʻiá koeʻuhí ko ʻene fakahaaʻi ʻene fakamāloó? ʻOku tokoniʻi fakalaumālie fēfē koe ʻi hoʻo fakahaaʻi hoʻo houngaʻiá? Mahalo naʻa lelei kiate koe ke ke kamata hiki ʻi ha tohinoa ʻa e ngaahi meʻa ʻokú ke houngaʻia aí, hangē ko ia ne fakamatalaʻi ʻe Palesiteni Henry B. Eyring ʻi heʻene lea “ʻOiauē Manatu, Manatu” (Ensign pe Liahona, Nōvema 2007, 66–69).
Ko Sīsū Kalaisi ʻa e Toetuʻú mo e Moʻuí.
Ko e mana ko ia ʻo hono fokotuʻu hake ʻa Lasalosi mei he maté ko ha fakamoʻoni mālohi mo taʻe toe-fehuʻia ia ko Sīsū ko e ʻAlo moʻoni Ia ʻo e ʻOtuá mo e Mīsaia naʻe talaʻofa maí. Ko e hā ha ngaahi lea, kupuʻi lea pe fakamatala ʻi he Sione 11:1–46 ʻokú ne fakamālohia hoʻo tui ko Sīsū Kalaisi ʻa e “toetuʻú, mo e moʻuí”? ʻOku tākiekina fēfē ʻe he ʻilo ko ʻení hoʻo moʻuí mo hoʻo ngaahi filí?
Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí
ʻI hoʻo lau mo ho fāmilí e folofolá, ʻe lava ke tokoniʻi koe ʻe he Laumālié ke ke ʻiloʻi ʻa e ngaahi tefitoʻi moʻoni ke fakamamafaʻi mo aleaʻí, kae lava ke feau e ngaahi fie maʻu ho fāmilí. Ko ha ngaahi fokotuʻu fakakaukau ʻeni:
ʻOku mahino nai ki he kau mēmipa ho fāmilí ʻa e ongo ko ia ʻo e mole ha meʻa—pe ke te mole? ʻE lava ke kamataʻi ʻe he talanoa ki heʻenau ngaahi aʻusiá ha fealēleaʻaki fekauʻaki mo e ngaahi talanoa fakatātā ʻo e sipi heé mo e paʻanga naʻe molé. Pe te mou vaʻinga langatoi fakafāmili. ʻOku tokoni fēfē ʻa e ʻekitivitī ko ʻení ke mahino kiate kitautolu ʻa e ngaahi talanoa fakatātā ko ʻení?
Ko e hā ha founga ʻe lava ke tau hangē ai ko e tamai ʻi he talanoa ko ʻení ʻi he mole hatau ʻofaʻanga? Ko e hā te tau lava ʻo ako mei he aʻusia ʻa e foha lahí ʻe ala tokoni ke tau anga faka-Kalaisi ange? Ko e hā ha ngaahi founga ʻoku tatau ai ʻa e tamai ʻi he talanoa fakatātā ko ʻení mo ʻetau Tamai Hēvaní?
Ke tokoni ki ho fāmilí ke nau fakaʻaongaʻi ʻa e talanoa ki he kau kilia ʻe toko hongofulú, te ke lava ʻo fakaafeʻi ke nau fai ha fanga kiʻi tohi fakapulipuli ʻo fakahaaʻi ai ʻenau houngaʻiá pea tuku takai holo ia ʻi he loto falé. Te mou lava foki ʻo hivaʻi fakataha ʻa e “Tānaki Ho Ngaahi Tāpuakí,” Ngaahi Himí, fika 148, pea aleaʻi ʻa e ngaahi tāpuaki kuo maʻu ʻe homou fāmilí.
ʻE lava ke mamataʻi ʻe he kau mēmipa ʻo e fāmilí e vitiō “Lazarus Is Raised from the Dead” (LDS.org) pe vahevahe ʻenau ngaahi fakamoʻoni kia Sīsū Kalaisí.
Ki ha ngaahi fakakaukau lahi ange ki hono ako’i ‘o e fānaú, vakai ki he lesoni ʻo e uike ko ‘eni ʻi he Haʻu, ‘o Muimui ʻIate Au— Ki he Palaimeli.
Fakatupulaki ʻEtau Founga Akoʻí
Fakaʻaongaʻi e ngaahi talanoá mo e sīpingá ke akoʻi ʻaki e ngaahi tefitoʻi moʻoni ʻo e ongoongoleleí. Naʻe faʻa akoʻi ʻe he Fakamoʻuí ʻa e ngaahi tefitoʻi moʻoni ʻo e ongoongoleleí ʻaki hono fakaʻaongaʻi e ngaahi talanoá mo e talanoa fakatātaá. Fakakaukau ki ha ngaahi fakatātā mo ha talanoa mei hoʻo moʻuí te ke ala fakaʻaongaʻi ke akoʻi ʻaki ha tefitoʻi moʻoni ʻo e ongoongoleleí ki ho fāmilí (vakai, Ko e Faiako ʻi he Founga ʻa e Fakamoʻuí, 22).
Kofaʻā ʻa e Toko Hivá, tā ʻe Liz Lemon Swindle