9–15 Sepitema

2 Kolinitō 1–7

“Mou Fakalelei mo e ʻOtuá”

ʻI hoʻo ako ʻa e ngaahi tohi ʻa Paula ki he kakai Kolinitoó, hiki ha niʻihi ʻo e ngaahi tefitoʻi moʻoni ʻo e ongoongoleleí ʻokú ke ʻiloʻí pea fakalaulauloto ki he founga te ke lava ai ʻo moʻui ʻaki iá.

Lekooti e Ngaahi Ongo ʻOkú ke Maʻú

ʻI he taimi ʻe niʻihi, ko e hoko ko ia ko ha taki ʻo e Siasí kuo pau ke lea ʻaki ha ngaahi meʻa faingataʻa. Naʻe moʻoni ʻeni ʻi he kuonga ʻo Paulá ʻo hangē pē ko ʻene moʻoni ʻi he kuonga ní. Naʻe kau ʻi ha tohi ʻa Paula ki he Kāingalotu Kolinitoó ʻa e tautea ke fai pea naʻe fakatupunga ai ha ngaahi loto-mamahi. ʻI he tohi ko ia naʻe hoko ko e 2 Kolinitoó, naʻá ne feinga ai ke fakamatalaʻi ʻa e tupuʻanga ʻo ʻene ngaahi lea fefeká: “Ne u tohi atu kiate kimoutolu ʻi he mamahi lahi mo e feinga loto mo e loʻimata lahi; ʻo ʻikai pehē ia ke mou mamahi ai, ka koeʻuhí ke mou ʻilo ʻa e ʻofa ʻoku ou maʻu ʻo lahi ʻaupito kiate kimoutolú” (2 Kolinitō 2:4). ʻI he taimi ʻoku fakatonutonu ai koe ʻe ha takí, ʻoku tokoni moʻoni ke ʻiloʻi naʻe tuʻunga ia ʻi he ʻofa faka-Kalaisi. Pea naʻa mo e ngaahi tuʻunga ko ia ʻoku ʻikai ke peheé, kapau ʻoku tau fie vakai ki he niʻihi kehé ʻaki ʻa e faʻahinga ʻofa ne ongoʻi ʻe Paulá, ʻoku faingofua ange ke tau tali ʻi he founga totonu ha faʻahinga fehalaaki pē. Hangē ko ia naʻe faleʻi mai ʻe ʻEletā Jeffrey  R. Holland, “Mou angaʻofa fekauʻaki mo e vaivai ʻo e tangatá—ʻa homou ngaahi vaivaí pea pehē foki mo kinautolu ʻoku ngāue fakataha mo koe ʻi ha Siasi ʻoku fakahoko ʻe ha kau ngāue tokoni ko ha kau tangata mo ha kau fafine fakamatelie. Naʻe ngāue ʻa e ʻOtuá mo ha kakai taʻehaohaoa, talu mei he kamataʻanga ʻo taimí, tuku kehe pē Hono ʻAlo haohaoa ʻe Taha naʻe Fakatupú” (“ʻEiki, ʻOku ou Tui,” Ensign pe Liahona, Mē 2013, 94).

Ngaahi Fakakaukau ki hono Ako Fakataautaha ʻo e Folofolá

2 Kolinitō 1:3–7; 4:6–10, 17–18; 7:4–7

ʻE lava ke hoko hoku ngaahi ʻahiʻahí ko ha tāpuaki.

Koeʻuhí ko e faingataʻa naʻe fehangahangai mo Paula ʻi heʻene ngāue fakafaifekaú, ʻoku ʻikai ha ofo ʻi heʻene tohi ha meʻa lahi fekauʻaki mo e ngaahi taumuʻa mo e tāpuaki ʻo e faingataʻá. ʻI hoʻo lau ʻa e 2 Kolinitō 1:3–7; 4:6–10, 17–18; mo e 7:4–7, fakakaukau ki he ngaahi founga ʻe lava ke hoko ai ho ngaahi ʻahiʻahí ko ha tāpuaki. Hangē ko ʻení, mahalo te ke fifili ki he founga ʻoku hanga ai ʻe he ʻOtuá ʻo “fakafiemālieʻi [koe] ʻi he [hoʻo] mamahi kotoa pē” mo e founga te ke lava ai ʻo, “fakafiemālieʻi ʻa kinautolu ʻoku mamahiʻiá” (2 Kolinitō 1:4). Pe te ke tokanga taha ki he maama ʻa Sīsū Kalaisí ʻa ia ʻokú ne “fakaulo mai ki homau lotó,” ʻo aʻu ki he taimi ʻokú ke “fakaʻapiʻapi” mo “moʻua” aí (2 Kolinitō 4:6–10).

Vakai foki, Mōsaia 24:13–17.

2 Kolinitō 2:5–11

ʻOku ou maʻu ʻa e ngaahi tāpuaki mo faitāpuekina e niʻihi kehé ʻi heʻeku faʻa fakamolemolé.

ʻOku ʻikai ke lahi ʻetau ʻilo ki he tangata naʻe lave ki ai ʻa Paula ʻi he 2 Kolinitō 2:5–11—ko e ngata pē ʻi heʻene maumau-fonó (vakai, veesi 5 – 6) pea naʻe fie maʻu ʻe Paula ʻa e Kāingalotú ke nau fakamolemoleʻi ia (vakai, veesi 7–8). Ko e hā ʻoku tau faʻa tōnounou ai he taimi ʻe niʻihi ke “fakamoʻoni ʻa e ʻofá” ki ha tokotaha kuó ne fakaʻitaʻi kitautolu? (veesi 8). ʻOku hoko fēfē ʻa e taʻefakamolemoleʻí ke uesia ai ʻa e niʻihi kehé pea mo kitautolu? (vakai, veesi 7, 10–11). Ko e hā hono ʻuhinga kiate koe ʻa hono taʻefakamolemoleʻi ʻo e niʻihi kehé ʻoku “… kākaaʻi ʻa kitautolu ʻe Sētane”? (veesi 11).

Vakai foki, Tokāteline mo e Ngaahi Fuakava 64:9–11.

2 Kolinitō 5:14–21

ʻE lava ke u fakalelei mo e ʻOtuá ʻi he Fakalelei ʻa Sīsū Kalaisí.

ʻO hangē pē ko e tokotaha ko é naʻe ʻiloʻi ʻe Paula ʻa e ongo ʻo e hoko ko ha “fakatupu foʻoú.” Naʻá ne liliu mei heʻene hoko ko ha tokotaha fakatanga ki he kau Kalisitiané ke ne hoko ko ha taukapo lototoʻa ʻo Kalaisi. Naʻa ne ʻiloʻi ʻiate ia pē ʻa e founga ʻe lava ai ʻe Sīsū, ʻa ia ne “ʻikai haʻane angahalá,” ke toʻo ʻa ʻetau angahalá pea ʻomi ʻEne “māʻoniʻoní” maʻatautolu, ʻo toe fakafoki kitautolu ki he uouangataha mo e ʻOtuá. ʻI hoʻo lau ʻa e ngaahi veesi ko ʻení, fakakaukau ki he ʻuhinga ko ia ke fakalelei mo ha taha kehe. ʻOku tokoni fēfē ʻeni ke mahino kiate koe ʻa e ʻuhinga ʻo e fakalelei mo e ʻOtuá? Fakalaulauloto pe ko e hā e meʻa ʻokú ne fakamāvahevaheʻi koe mei he ʻOtuá. Ko e hā ʻoku fie maʻu ke ke fai ke fakalelei kakato ange mo Ia?

Vakai foki, 2 Nīfai 10:23–25.

2 Kolinitō 7:8–11

ʻOku tataki ʻe he mamahi faka-ʻOtuá ki he fakatomala.

ʻOku ʻikai ke tau faʻa fakakaukau ki he mamahí ko ha meʻa ʻoku lelei, ka naʻe lea ʻa Paula fekauʻaki mo e “mamahi ʻoku taau mo e ʻOtuá” ko ha konga ʻaonga ʻo e fakatomalá. Ko e hā ʻokú ke ako mei he ngaahi meʻá ni fekauʻaki mo e mamahi ʻoku taau mo e ʻOtuá? 2 Kolinitō 7:8–11; ʻAlamā 36:16–21; Molomona 2:11–15. Ko e fē nai ha taimi kuó ke ongoʻi ai ʻa e mamahi ʻoku taau mo e ʻOtuá, pea ko e hā haʻane lelei ki hoʻo moʻuí?

Ngaahi Fakakaukau ki he Ako Fakafāmili e Folofolá mo e Efiafi Fakafāmili ʻi ʻApí

ʻI hoʻo lau mo ho fāmilí e folofolá, ʻe lava ke tokoniʻi koe ʻe he Laumālié ke ke ʻiloʻi ʻa e ngaahi tefitoʻi moʻoni ke fakamamafaʻi mo aleaʻí kae lava ke feau e ngaahi fie maʻu ho fāmilí. Ko ha ngaahi fokotuʻu fakakaukau ʻeni:

2 Kolinitō 3:1–3

Kuo ʻi ai nai ha taimi ne kole ai ʻe he kau mēmipa ho fāmilí ki ha taha ke ne faʻu ha tohi fakaongoongolelei maʻanautolu, ʻo hangē ko ha tohi kole ngāue pe fakamoʻoni ako? Kole ange ke nau fakamatala fekauʻaki mo e aʻusia ko ʻení pea mo e meʻa naʻe hā ʻi he tohí fekauʻaki mo kinautolú. Naʻe akoʻi ʻe Paula naʻe hangē ʻa e moʻui ʻa e Kāingalotú ko ha ʻū tohi fakaongoongolelei ki he ongoongoleleí meia Kalaisi, “kuo tohi kae ʻikai ʻaki ʻa e vaitohi, ka ko e Laumālie ʻo e ʻOtua moʻui.” ʻI hoʻomou lau fakataha ʻa e 2 Kolinitō 3:1–3, aleaʻi e founga ʻoku hoko ai ʻetau ngaahi tā sīpingá ʻo tatau mo ha ʻū tohi fakaongoongolelei ki he ongoongoleleí ʻa ia ʻe lava ke “ʻilo pea lau ʻe he kakai kotoa pē.” Mahalo ʻe lava ke fai ʻe he mēmipa takitaha ʻo e fāmilí ha tohi pe “ʻipiseli” ʻo fakamatalaʻi e founga kuo hoko ai ha mēmipa kehe ʻo e fāmilí ko ha faʻifaʻitakiʻanga lelei ʻo ha ākonga ʻo Sīsū Kalaisi. Te nau lava ʻo lau ʻenau ʻū tohí ki he fāmilí pea foaki ia ki he tokotaha ʻi he fāmilí ne nau tohi ki aí. Ko e hā ʻoku mahuʻinga ai ke mahino ko ʻetau moʻuí ko ha “[ʻū] tohi ʻa Kalaisi”?

2 Kolinitō 5:6–7

ʻOku ʻuhinga ki he hā ʻa e “ʻaʻeva ʻi he tuí, kae ʻikai ʻi he mamata”? Ko e hā ʻoku tau fai ke fakahaaʻi ʻoku tau tui ki he ngaahi meʻa ʻoku ʻikai ke tau lava ʻo mamata ki aí?

2 Kolinitō 5:17

ʻE lava nai ke fakakaukau—pe fekumi—ʻe homou fāmilí ki ha sīpinga ʻo ha meʻa ʻi natula ʻokú ne foua ha ngaahi liliu fakaofo pea hoko ai ko ha fakatupu foʻou? (vakai ki he ʻū fakatātā ʻoku ʻomi fakataha mo e fokotuʻutuʻu ko ʻení). Ko e hā ʻoku akoʻi mai ʻe he ngaahi sīpinga ko ʻení fekauʻaki mo e founga ʻe lava ai ʻe he ongoongolelei ʻo Sīsū Kalaisí ʻo liliu kitautolú?

2 Kolinitō 6:1–10

Fakatatau ki he ngaahi veesi ko ʻení, ʻoku ʻuhinga ki he hā ke hoko ko e “kau faifekau ʻa e ʻOtuá”?

2 Kolinitō 6:14–18

ʻE lava fēfē ke tau muimui ki he faleʻi ʻa Paula ke, “Haʻu [mei he kau taʻemāʻoniʻoní], pea ke ʻataʻatā ʻa kimoutolu,” ka ʻi he taimi tatau ʻoku tau kei hoko pē ko ha tā sīpinga lelei kiate kinautolu ʻoku tau feohí?

Ki ha ngaahi fakakaukau lahi ange ki hono ako’i ‘o e fānaú, vakai ki he lesoni ʻo e uike ko ‘eni ʻi he Haʻu, ‘o Muimui ʻIate Au— Ki he Palaimeli.

Fakatupulaki ʻEtau Founga Akoʻí

Vahevahe ha lēsoni fakatātā ʻaki ha meʻa. ʻE lava ke faingataʻa ke mahino ha niʻihi ʻo e ngaahi fakakaukau ʻo e ongoongoleleí, hangē ko e Fakaleleí. Fakakaukau ke fakaʻaongaʻi ha ʻū fakatātā pe ngaahi meʻa ʻe ala tokoni ke mahino ki ho fāmilí ʻa e ngaahi tefitoʻi moʻoni ʻokú ke maʻu ʻi he folofolá.

ʻI he taimi ʻoku tau ului ai ki he ongoongolelei ʻa Kalaisí, ʻoku hulu fau ʻetau liliú ʻa ia naʻe fakamatalaʻi ai ʻe Paula ʻoku tau hoko ko ha “fakatupu foʻou” (2 Kolinitō 5:17).