“Vakayagataki ni Lako Mai, Mo Muri Au—Me Baleti Ira na Tamata Yadua kei na Matavuvale,” Lako Mai, Mo Muri Au—Me Baleti Ira na Tamata Yadua kei na Matavuvale: Veiyalayalati Vou 2019 (2019)
“Vakayagataki ni Lako Mai, Mo Muri Au—Me Baleti Ira na Tamata Yadua kei na Matavuvale,” Lako Mai, Mo Muri Au—Me Baleti Ira na Tamata Yadua kei na Matavuvale: 2019
Vakayagataki ni Lako Mai, Mo Muri Au—Me Baleti Ira na Tamata Yadua kei na Matavuvale
E Baleti Cei Na iVurevure Oqo?
Na ivurevure oqo e baleta na tamata yadua kei na matavuvale ena Lotu. E sa caka mai me vukei iko nomu vulica na kosipeli—ke o vulica duadua se kei na nomu matavuvale. Kevaka o sega ni se vulica wasoma na kosipeli ena gauna sa oti, na ivurevure oqo ena vukei iko mo tekivutaka. Kevaka e sa dua tiko na nomu ivakarau vinaka ni vulica na kosipeli, na ivurevure oqo ena rawa ni vukei iko me vakaibalebale vakalevu cake na veika o sotava.
Meu na Vakayagataka Vakacava na iVola Oqo?
Vakayagataka na ivola ena sala cava ga o nanuma ni veivuke vei iko. O na kunea ni veivuke vakalevu na idusidusi se ivukevuke ni vuli yadua se vakavuvale. E rawa talega ni o vakayagataka me baleta na lotu vakavuvale ena Moniti. Na idusidusi oqo e vakavotuya mai na ivakavuvuli bibi e kune ena Veiyalayalati Vou, vakatura na vakasama eso ni itaviqaravi ni tamata yadua kei na vuvale, ka vakarautaka na vanua me volai kina na nomu vakasama eso.
O iko kei na nomu vuvale dou sa na vulica wasoma tiko beka na kosipeli. E tiko beka na nomu lalawa mo wilika na i Vola i Momani. Se o sa wilika tale tiko e dua na ivolanikalou ena kalasi ni semineri se inisitute. Lako Mai, Mo Muri Au e sega ni nakiti me sosomitaka se veisisivi kei na veika vinaka o sa cakava rawa tiko. E tiko beka na sala mo vuli mai na Veiyalayalati Vou vakawasoma ka rawata talega na lalawa ni vulici ni dua tale na ivolanikalou. Me ivakaraitaki, o na vinakata beka mo wilika tikoga na iVola i Momani ena gauna ni nomu vuli vakataki iko ka qai wilika na Veiyalayalati Vou kei na nomu vuvale (se veisau). Se, ni o wilika na Veiyalayalati Vou, e rawa ni o vakasaqara na veitikina ena iVola i Momani e vakadeitaka na veika o vulica. Muria na veidusimaki ni Yalotabu mo kila kina na iwalewale ni nomu vulica na vosa ni Kalou.
E Veisemati Vakacava na iVurevure Oqo kina Veika e Yaco e Valenilotu?
Na idusidusi ni ivola oqo e tuvai ena ituvatuva ni wiliwili ena veimacawa. Na lesoni e vakatavulici ena kalasi ni Lalai kei na Matawilivola ni Sigatabu e vakamuria na ituvatuva vata ga. Me tokona na nomu igu mo vulica ka bulataka na kosipeli e vale, ena solia vei iko o nomu qasenivuli na gauna mo wasea na veika o sotava, vakanananu, kei na taro me baleta na ivolanikalou o sa vulica ena lomani macawa.
Lako Mai, Mo Muri Au—Me Baleti Ira na Lalai kei na Lako Mai, Mo Muri Au—Me Baleta na Matawilivola ni Sigatabu e wili talega kina na idusidusi ni veimacawa ena loma ni yabaki, vakavo ga na rua na Sigatabu ni vakayacori tiko na koniferedi raraba. Ni sega ni yaco na soqoni ni Lotu baleta na koniferedi ni iteki se dua tale na inaki, o sa sureti mo vulica na Veiyalayalati Vou e vale. Na nomu kalasi ena Lotu ena rawa ni calata na kalasi e tuvai tu me baleta na veisiga oya se rawa ni o semata vata e rua na lesoni me rawa ni vakamuri tikoga na ituvatuva.
Au Gadreva Beka Meu Vakamuria na iTuvatuva?
Ena vukei iko na ituvatuva mo vakamuria na veika e vakavulici tiko ena kalasi e vei Sigatabu, ka kua ni o vesuki sara kina; na ituvatuva e idusidusi me vukei iko mo tauri iko kina. Na ka e bibi ni o vulica na kosipeli ena nomu vuvale vakakina me vakataki iko.