Na Siti Tawamudu, mai vei Keith Larson

25–31 ni Tiseba

Ai Vakatakila 15–22

“O Koya sa Gumatua ena Rawata na Ka Kecega.”

Ena so na gauna na itatao levu duadua ni vuli sai koya na noda nanuma ni sega ni gadrevi meda vuli—ni da sa kila oti tu. Ni o wilika na ivolanikalou, dolavi iko ki na veivakararamataki vou e vinakata na Turaga me solia vei iko.

Vola na Veika o Vakauqeti kina

O na nanuma tiko, ni ivola ni i Vakatakila e tekivu ena nona tukuna na iVakabula ni o Koya na “ai vakatekivu kei na ivakataotioti” (Ai Vakatakila 1:8). E veirauti, ka tini ena vosa vata oqo: “O au … na kenai vakatekivu kei na kenai vakataotioti” (Ai Vakatakila 22:13). Ia na cava na kena ibalebale? Na ivakatekivu kei na ivakataotioti ni cava? Na ivola ni i Vakatakila e vakadinadinataka vakaukauwa ni o Jisu Karisito sa ivakatekivu ka itinitini ni ka kecega—ni veika cecere ni nodra bula sauni eke na tamata kei na veivakabulai. Sai Koya “na Lami sa vakamatei mai na vakatekivu kei vuravura” (Ai Vakatakila 13:8). Sai Koya na Nodra Tui na tui ka na mai vakaotia na caka ca, na yaluma, kei na mate sara mada ga vakai koya ka kauta mai “na lomalagi vou kei na vuravura vou” (Ai Vakatakila 21:1).

Ia ni se bera na lomalagi vou kei na vuravura vou oqo, sa vuqa na ka meda uabaleta yani: na mate veitauvi, ivalu, ivalavala ca vakaveitalia—ko kece oqo sa tukuni tu ena Ai Vakatakila vakamatata sara. Ia sa tiko vata kei keda o Jisu Karisito ena tikina oqo. Sai Koya na “kalokalo i vola siga sa serau tu” ka na cila yani ki na lomalagi butobuto me yalayala ni sa voleka mai na mataka (Ai Vakatakila 22:16). Ka sa roro tiko mai vakatotolo. Sa lako mai oKoya . Ni sa sureti keda o Koya, “Dou lako mai vei au” (Maciu 11:28), sa lako talega mai vei keda. “Au sa lako kusarawa mai,” e kaya o Koya. Ia ena inuinui kei na vakabauta sa vakasavasavataki ena bukawaqa ni ka dredre ni gauna oqo, eda na sauma, “Ni lako mai , Turaga Jisu” (Ai Vakatakila 22:20).

Vakasama Eso ni Vuli iVolanikalou ni Tamata Yadua

Ai Vakatakila 16–18; 21–22

E sureti au na Turaga meu dro mai Papiloni ka taukena “na koro tabu.”

Ni oti na kena vakadinadinataki na veivakarusai kei na veivakararawataki ena veisiga e muri, a raica o Joni e dua na siga mai muri ka na rawa ni umani vata ena ivakaro ni Turaga “Raica, au sa vakavouya na ka kecega” (Ai Vakatakila 21:5). E dua na sala me kilai vinaka kina na kena ibalebale oya me veidutaitaki na ivakamacala nei Joni me baleti Papiloni, na ivakatakarakara ni bula vakavuravura kei na ivalavala ca (raica na Ai Vakatakila 16–18), ena nona ivakamacala baleti Jerusalemi vou, na ivakatakilakila ni lagilagi vakasilesitieli ena iserau ni Kalou (raica na Ai Vakatakila 21–22). Na ituvatuva e ra oqo ena rawa ni vukei iko:

Papiloni	Jerusalemi Vou
Papiloni Ai Vakatakila 16:3–6	Jerusalemi Vou Ai Vakatakila 21:6; 22:1–2, 17
Papiloni Ai Vakatakila16:10; 18:23	Jerusalemi Vou Ai Vakatakila 21:23–24; 22:5
Papiloni Ai Vakatakila 17:1–5	Jerusalemi Vou Ai Vakatakila 21:2
Papiloni Ai Vakatakila 18:11, 15	Jerusalemi Vou Ai Vakatakila 21:4
Papiloni Ai Vakatakila 18:12–14	Jerusalemi Vou Ai Vakatakila 21:18–21; 22:1–2

Na duidui cava tale o sa raica?

Sa rawa talega mo vakasamataka vakatitobu na kena ibalebale vei iko mo “lako tani mai” Papiloni (Ai Vakatakila 18:4). Na cava o kunea ena Ai Vakatakila 21–22 e vakauqeti iko mo cakava vakakina?

Na iOtioti ni Siga ni Lewa, mai vei John Scott

Ai Vakatakila 20:12–15; 21:1–4

O ira kece na luveni Kalou era na lewai mai na ivola ni bula.

Vakasamataka mada ke a vinakata e dua na dauvola ivola me vola e dua na ivola me baleta nomu bula. Na itukutuku matailalai se na veika cava o sotava o vinakata me na volai kina? Kevaka o kila na veika o cakava ena nomu bula ena veisiga ni mataka ena volaitukutukutaki, na cava o na veisautaka ena iwalewale ni nomu bula? Vakasamataka na veika oqo ni ko wilika na Ai Vakatakila 20:12–15. Na cava o nuitaka me volai tu baleti iko ena ivola ni bula? O na vakamacalataka vakacava na itavi ni iVakabula ena nomu ivola ni bula? Ena nomu nanuma, na cava na vuna e bibi kina me vakatokai “na ivola ni bula ni Lami”? (Ai Vakatakila 21:27).

Kevaka e sega ni logaloga vinaka vei iko na vakasama mo tu ka lewai ena mata ni Kalou, navuca mo wilika na Ai Vakatakila 21:1–4. Ni tukuna tiko na veitikina oqo, e kaya kina o Elder Dieter F. Uchtdorf:

“Na Siga ni Veilewai ena siga ni loloma veivueti kei na loloma—na siga ena vauci kina na yalo sa kavoro, ena sosomitaki na tagi ni rarawa me tagi ni vakavinavinaka, ni na vakadodonutaki kina na ka kece. Io, eda na yalo luluqa sara vakatitobu ena vuku ni ivalavala ca. Io, eda na veivutuni ka mosi na yaloda baleta ni da caka cala, noda lecaika, kei na noda yalo kaukauwa ka a vakavuna meda calata na madigi ni dua na veisiga ni mataka e cecere sara.

“Ia au nuidei ni da na sega walega ni vakacegui ena veilewai ni Kalou; eda na kurabui ka uabaleti ena Nona loloma soliwale tawayalani, loloma veivueti, lomasoli, kei na Nona loloma vei keda na luvena.” (“A Ka Levu Vakaidina na Nona iNaki na Noda Kalou!,” Liaona, Nove. 2016, 21).

E tara vakacava na dina oqo na sala o raica kina na iOtioti ni Siga ni Lewa? Na cava e vakauqeti iko kina na dina oqo mo veisau ena nomu bula?

Raica talega na iDusidusi ki na iVolanikalou, “iVola ni Bula.”

Ai Vakatakila 22:18–19

E kena ibalebale beka na tikina oqo ni iVola Tabu ga e ivolanikalou ka na sega ni rawa ni vakuri mai na dua tale na ivolanikalou?

Eso era sa cavuta na Ai Vakatakila 22:18–19 me iulubale mera kua ni ciqoma kina na iVola i Momani kei na ivolanikalou tale eso ni gauna oqo. E rawa ni o kunea e dua na isaunitaro ki na veisaqati oqo ena itukutuku nei Elder Jeffrey R. Holland “Sa Sega ni Mudu … Na Noqu Vosa” (Liaona, Me 2008, 91–94).

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Ai Vakatakila 15:2–4.Ni veivosakitaka na nomu vuvale na veitikina oqo, ka dusi ki “na sere i Mosese” kei “na sere ni Lami,” sa rawa mo wilika na sere i Mosese ena Lako Yani 15:1–19, vata kei na sere tale eso e tukuni tiko ena ivolanikalou, me vaka na Vunau kei na Veiyalayalati 84:98–102. Na cava na vuna era vakila kina o ira sa “gumatua vua na manumanu” (Ai Vakatakila 15:2) mera via lagata na sere vaka oqo? Sa rawa ki na nomu matavuvale me lagata e dua na serenilotu se nodra sere ni vakacaucau na gonelalai.

Ai Vakatakila 19:7–9.Ena rawa beka ni o raica na iyaloyalo ni vakamau mai na nomu tuva kawa se veitalanoataka e dua na gauna a tiko kina na nomu matavuvale ena dua na soqo ni vakamau. Na cava na vuna e veivakatauvatani vinaka kina na vakamau ki na veiyalayalati ni Turaga kei na Nona Lotu? (Raica talega na Maciu 22:1–14.)

Ai Vakatakila 20:2–3.E vukei keda vakacava na 1 Nifai 22:26 meda kila vinaka na ibalebale ni nona “vesu tu”o Setani?

Ai Vakatakila 22:1–4.Na cava na kena ibalebale me laurai na yaca ni iVakabula “e [na] yadreda”? (Ai Vakatakila 22:4; raica talega na Lako Yani 28:36–38; Mosaia 5:7–9; Alama 5:14; Moronai 4:3; Vunau kei na Veiyalayalati 109:22.

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Me Baleta na Lalai.

Sere e vakaturi: “Ena Lesu Tale Beka Mai,” iVolanisere ni Gonelalai, 46.

Vakatorocaketaki Noda Veivakavulici

Vakamuria na veisureti me caka. “Ni ko sa vakamuria e dua na veisureti me caka, o sa vakaraitaka vei ira na [lewe ni nomu vuvale] ni ko kauwaitaki ira kei na sala sa vakalougatataki ira tiko kina na kosipeli. O sa solia talega vei ira na madigi mera wasea na veika era sa sotava” (Veivakavulici ena iVakarau ni iVakabula, 35).

E vakaisulu damudamu tu o Karisito ka dabe toka ena dua na ose vulavula.