lami e dabe tiko ena co

4–10 ni Tiseba

Ai Vakatakila 1–5

“Na iUkuuku, kei na Kaukauwa, Vei Koya … na Lami ka Sega ni Mudu”

Sa rawa mo vola eso na nomu taro me baleta na veika o wilika mai na Ai Vakatakila. Mo qai vakasaqara na nomu isaunitaro se veitalanoataka kei na dua na lewe ni matavuvale se kalasi ena Lotu.

Vola na Veika o Vakauqeti Kina

O sa bau saga dredre mo vakamacalataka vei ira eso na ka o vakila nomu sotava e dua na ka vakayalo kaukauwa sara? Na vosa ni veisiga ena rawa ni sega ni veiganiti me vakamacalataki kina na veika vakayalo e vakilai se vakasamataki. Oqo beka na vuna a vakayagataka kina o Joni na ivakatakilakila momona kei na raitayaloyalo me vakamacalataka na cecere ni nona vakatakila. A rawa ni tukuna ga ni a raici Jisu Karisito, ia me vukei keda meda kila na veika e sotava, a vakamacalataka na iVakabula ena nona vakayagataka na vosa vakaoqo: “Ka sa vaka na yameyame ni buka na matana,” “ka sa lako mai gusuna na iseleiwau gata ka batirua,” kei na “matana sa vaka na matanisiga ni sa cila vakaukauwa” (Ai Vakatakila 1:14–16). Ni o wilika na ivola ni Ai Vakatakila, tovolea mo raica na itukutuku a vinakata o Joni mo vulica ka vakila, kevaka madaga o sega ni kila nai balebale ni vakatakilakila kece. Na cava na vuna e vakatautauvatataki kina na vavakoso lewe ni Lotu kina itutu ni cina, o Setani ki na dua na gata levu, kei Jisu Karisito ki na lami? Na kena usutu, e sega sara ni gadrevi mo kila nai vakatakilakila kece sara ena Ai Vakatakila mo kila vinaka na kena iulutaga bibi, oka kina na kena iulutaga kilai levu: E na qaqa o Jisu Karisito kei ira na dau vakamuri Koya mai na matanitu ni tamata kei Setani.

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

Na raivotu nei Joni e vakavuvulitaka na ituvatuva nei Tamada Vakalomalagi me vakabulai ira na Luvena.

Na ivola ni Ai Vakatakila ena rawa ni dredre na kena kilai vinaka, ia, kua ni yalolailai. Ena rawa ni vakauqeti iko na yalayala i Joni mo tovolea tikoga: “Sa kalougata ko ira era sa wilika, kei ira era rogoca ka kila na vosa ni parofisai oqo, ka muria na veika esa volai, ni sa roro voleka mai na gauna ni lesu mai ni Turaga” (iVakadewa i Josefa Simici, Ai Vakatakila 1:3 [tiko ena iDusidusi ki na iVolanikalou], vakaikuritaki).

E dua na sala me vulici kina na Ai Vakatakila sai koya me vakasaqarai na isema ki na ituvatuva ni veivakabulai. Na rai raraba oqo ena rawa ni vukei iko:

• Na Wase e 5 kei na 12 e vakamacalataka na veika a yaco ena bula taumada.

• Wase e 6–11, 13–14, 16–19 e vakamacalataka na bula oqo kei na veika e yaco ena veigauna taumada ni vuravura oqo.

• Wase 2–3, 15, 20–22 e vakamacalataka na iOtioti ni Veilewai kei na lagilagi e waraki ira na yalodina.

Ni o wiliwili, tarogi iko, “Na cava e vakavulica vei au oqo me baleta na ituvatuva ni Kalou? Na cava sa cakava na Kalou me vukei au meu ulabaleta na ca ka lesu tale Vua? Na cava na Nona yalayala vei ira na yalodina?”

Ena rawa talega ni veivuke me kilai ni Vunau kei na Veiyalayalati 77 e vakamacalataka eso na ivakatakarakara e vakayagataki tiko ena Ai Vakatakila. Me kena ikuri, na iVakadewa i Josefa Simici e vakamatatataka e vica na malanivosa ena Ai Vakatakila, me laurai na ivakamacala e ra kei na iDusidusi ki na iVolanikalou.

Raica talega na iDusidusi ki na iVolanikalou, “Joni,Luvei Sepete,” “iVakatakila nei Joni.”

Ai Vakatakila 1

O Jisu Karisito na Luvena Bula na Kalou Bula.

Na imatai ni wase ni Ai Vakatakila e vakamacalataka na rairai nei Jisu Karisito vei Joni ena raivotu. E rawa beka ni o cakava e dua na lisi ni veika kece e tukuni ena wase oqo me baleti Jisu Karisito, oka kina o cei o Koya, na cava e cakava o Koya me baleti keda, kei na veika e vakaituvaki kina o Koya.

Eso na ka o sa vulica ena lako mai na ivakatakarakara. Vakasamataka vakatitobu na cava e tovolea tiko na Turaga me vakavulici iko kina me baleti Koya ena ivakatakarakara eso oqo. Me vakataka, raica ni sa vakatokai Koya na iVakabula me “ivakatekivu kei na ivakataotioti” kei “koya sa liu sara ena muri sara talega.” Na cava o nanuma ni ra sa ka bibi kina na itutu oqo? Na cava era vakavulica vei iko na itutu oqo me baleta na iVakabula?

Ai Vakatakila 2–3

E kilai au vakavinaka o Jisu Karisito ka na vukei au, meu vorata na veibolebole au sotava.

Na vosa ni iVakabula ena Ai Vakatakila 2–3 e vakaraitaka ni kila vinaka tu o Koya na rawa-ka kei na sasaga dredre e sotavi tu ena tabana yadua ni Lotu ena gauna i Joni. A vakacaucautaka na nodra sasaga na Yalododonu ka vakaroti ira talega ena veika e gadrevi me ra veisautaka. Na cava o vulica mai na nona veivakacaucautaki kei na veivakaroti na iVakabula?

E kila talega na iVakabula na nomu rawa-ka kei na sasaga dredre, ka vinakata o Koya me vukei iko. Raica na yalayala dau cavuti vakawasoma e solia o Koya kivei ira era sa vorata rawa. Na cava e vakavurea ki na nomu vakasama na vei yalayala oqo? Na cava ena vinakata beka vei iko na Turaga mo vorata rawa? Na cava e rawa ni o cakava mo ciqoma kina na Nona veivuke?

Ai Vakatakila 4–5

Ena rawata duadua ga o Jisu Karisito me vakayacori rawa na ituvatuva ni Tamada Vakalomalagi.

Na cava o vulica me baleta na Tamada Vakalomalagi mai na Ai Vakatakila 4 kei Jisu Karisito mai na Ai Vakatakila 5? Vakasamataka mada na veika a rairai yaco ni da sa kila taucoko ni o Jisu Karisito (na “Lami”) ena cakava me vakayacori rawa na ituvatuva nei Tamada Vakalomalagi (na iVakabula e rawa “me tevuka na ivola, ka … cecega talega na kena drega e vitu” [Ai Vakatakila 5:5.]). Na cava e a rawata duadua ga kina o Jisu Karisito me cakava oqo? Ena rawa vakacava mo vakaraitaka na nomu vakabauti Koya ni sa nomu iVakabula?

Raica talega na Jope 38:4–7; Vunau kei na Veiyalayalati 77:1-7.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

Ai Vakatakila 1:20.Na cava e vakatauvatana kina o Jisu na Nona Lotu ki na itutu ni cina? (raica na Maciu 5:14–16). Lagata e dua na sere me baleta na sala eda rawa ni vaka kina e dua na cina ena kena itutu, me vaka na “Cina, Cina” (iVolanisere niGonelalai, 98).

Ai Vakatakila 2–3.Kaya mada ni a kerei o Joni me solia na itukutuku me vaka ga na kena e solia ena lotu ena gauna oya, kina nomu matavuvale. Na cava ena kaya o koya ni toso vinaka tiko? O na torocake vakacava?

Ai Vakatakila 3:15-16.Ni wiliki oti na veitikina oqo, sa rawa ki na nomu matavuvale me gunuva e dua na ka tunumaka ka na gunu vinaka cake ke katakata sara se batabata sara. Na cava na kena ibalebale mo tunumaka vakayalo?

Ai Vakatakila 3:20.Vakaraitaka na iyaloyalo ni iVakabula ni tukituki tiko e katuba (raica na itinitini ni ituvatuva oqo) ni ra wilika na nomu matavuvale na Ai Vakatakila 3:20. Na cava na vuna e tukituki kina o Jisu ka sega ni curu ga mai ki loma? E rawa ni ra veivukevuke na lewe ni matavuvale ena tukituki ena dua na katuba. Sa rawa vua e dua tale ena matavuvale me vakatura e dua na sala meda “dolava kina na katuba” vua na iVakabula ka me curu mai o lewe ni matavuvale o ya. Ena vakacava beka na kena vakilai na iVakabula ena noda vuvale?

Ai Vakatakila 4:10–11.Na cava na kena ibalebale na sokalou vua na Tamada Vakalomalagi? Na cava eda kila me baleti Koya ka vakavuna me da via sokalou Vua?

Ai Vakatakila 5:6, 12–13.Na cava e vakatokai kina o Jisu Karisito me “Lami”? Na cava e vakatavulica vei keda na itutu oqo me baleti Koya?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Serenilotu vakaturi: “Nona Sucu ko Jisu,” Serenilotu, naba. 113.

Vakatorocaketaki Noda Veivakavulici

Vakauqeta na taro. Na taro e vakaraitaka ni ra sa vakarau tu na lewe ni matavuvale me ra vuli ka wasea eso na rai titobu ni nodra sa rawa ni saga na veika era sa vulica tiko. Vakavulica ki na nomu matavuvale na sala me ra rawa ni kunea kina nai saunitaro ena ivolanikalou. (Raica na Veivakavulici ena iVakarau ni iVakabula,, 25–26.)

E tukituki tiko e katuba o Karisito

Vakacurumi Koya Mai, mai vei Greg K. Olsen