4–10 ni Tiseba

Ai Vakatakila 1–5

“Na iUkuuku, kei na Kaukauwa, Vei Koya … na Lami ka Sega ni Mudu”

E rawa ni dredre me ra kila matua na gone na ivola ni Ai Vakatakila, ia e tiko talega kina na ivunau bibi e totoka ka rawarawa.

Sureta na Veiwasei

Sureti ira na gone me ra wasea na nodra nanuma ke ra a raici Jisu Karisito ena dua na raivotu. Kerei ira me ra wasea e dua ga na ka era kila me baleta na nona raivotutaki Jisu o Joni ena ivola ni Ai Vakatakila.

Vakavulica na iVunau: Gone Sobu

Ai Vakatakila 1:20

Au rawa ni vakacilava na rarama ni iVakabula.

Ena Ai Vakatakila 1:20, a vakatauvatana na iVakabula na Nona Lotu ki na itutu‑ni‑cina eso. Vukei ira na gone me ra kila matua ni rawa ni ra vakacilava na rarama ni iVakabula ena bulataki ni Nona i vakavuvuli.

iTaviqaravi e Rawa ni Caka

• Vakaraitaka vei ira na gone nai yaloyalo ni vurevure duidui ni rarama, vaka na matanicina, na kadrala, kei na matanisiga. Ni o wilika “Na itutu‑ni‑cina e vitu ko a raica, na isoqosoqo lewe ni lotu e vitu” (Ai Vakatakila 1:20), sureti ira na gone me ra dusia nai yaloyalo ni rarama e tukuni tu ena tikina oqo. Vukei ira na gone me ra veivosakitaka na sala eda, vaka lewe ni Lotu i Jisu, rawa ni vaka tu na rarama ni kadrala—me ivakaraitaki, ni da caka vinaka vei ira na tani.

• Lagata e dua na sere ni veivakararamataki vei ira na tani, vaka na “Meu Rarama i Jisu” (iVolanisere ni Gonelalai, 38). Wasea na sala o sa raici ira kina na gone ni bulataka tiko na kosipeli i Jisu Karisito ka dua na rarama vei ira era wavoliti ira tu. Wasea na sala e sa vukei iko kina ni toro volekata na Tamada Vakalomalagi kei Jisu Karisito na veivakararamataki vei ira na tani.

Ai Vakatakila 3:20

Au rawa ni sureti Jisu Karisito ki na noqu bula.

Na vosa vakatautauvata i Jisu ni tucake tu e katuba ka tukituki tiko sa rawa ni vukei ira na gone ni kila matua ni sa vinakata o Koya me volekati ira.

iTaviqaravi e Rawa ni Caka

• Ni o wilika na Ai Vakatakila 3:20, vakaraitaka nai yaloyalo ni iVakabula ena katuba mai na ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale. Sureti ira na gone me ra raitayaloyalotaka ni a tukituki tiko o Jisu ena katuba ni nodra vale. Me ra qai veitalanoataka na ka era na cakava.

• Sureti ira na gone me ra tukuna vei iko na gauna eso era a waraka tu kina e dua me sikova na nodra itikotiko ka ra nanamaki tu ni raica. E a vakacava tu na waraki ni tamata oya me tukituki ena katuba? E vakacava ke da a sega ni vakacuruma iloma na tamata oya? Wilika na Ai Vakatakila 3:20, ka me ra qai veivukevuke na gone ni taura nai yaloyalo kei Jisu ka vakataka tu ni ra tukituki ena dua na katuba. O ira na vo ni lewe ni kalasi e rawa ni vakatakarakarataka me ra dolava na katuba. Na cava eda rawa ni cakava me voleka mai kina vei keda o Jisu, dina ga ni da sega ni rawa ni raici Koya?

Ai Vakatakila 5:1–10

Sa kilikili duadua ga o Jisu Karisito me noqu iVakabula.

A vulica o Joni mai na nona raivotu ni o Jisu Karisito duadua ga (matataki tu ena dua na lami) sa rawa ni noda iVakabula ka vakataucokotaka na ituvatuva i Tamana (matataki tu ena ivola dregati).

iTaviqaravi e Rawa ni Caka

• Ni bera na kalasi, ologa e dua nai lavelave ni iVola ni Yaloyalo Vakosipeli ena vakayagataki ni pepa se wa. Ena vakayagataki ni vica na malanivosa bibi mai na Ai Vakatakila 5:1–10, vakamacalataka na raivotu a raica o Joni. Vakaraitaka na ivola vei ira na gone, ka tukuna vei ira ni sala duadua ga me dola kina na ivola oya me laurai nai yaloyalo kei Jisu o a vunitaka tu ena rumu. Ni ra sa raica nai yaloyalo, dolava na ivola ka wasea vei ira na gone eso nai yaloyalo ena ivola e matataka na veivakalougatataki era sa tiko ena vuku ni Veisorovaki i Jisu Karisito (me vaka na valetabu, papitaiso, kei na matavuvale). Vakadinadinataka ni sa rawa ni kitaka kece oqori na iVakabula duadua ga.

• Vakalekalekataka na raivotu e vakamacalataki ena Ai Vakatakila 5:1–10, ka sureti ira na gone me ra matanataka na veika a vakila o Joni kei na so tale ena veitikina duidui ni raivotu. Vakataka, nodra rawa ni lasutaki tagi ni sega ni dua e dolava rawa na ivola, se ra vakacaucau ni sa dolava na iVakabula.

Vakavulica na iVunau: Gone Qase Cake

Ai Vakatakila 3:5, 12–21

Kevaka au sa yalodina ki na kosipeli ni iVakabula, au na ciqoma na veivakalougatataki levu mai lomalagi.

Na cava na kena ibalebale vei iko mo “katakata vakalailai ga, ka sega ni batabata se katakata”? Vakasamataka na sala eso me vukei kina na gone me ra veibasai ni katakata vakalailai ga—me ra maqusa ni yalodina tu kivua na iVakabula kei na Nona kosipeli.

iTaviqaravi e Rawa ni Caka

• Wilika vata na Ai Vakatakila 3:5, 12, 21, ka vakamacalataka na vosa eso era na sega tu ni kila na gone. Na cava na kena ibalebale mo “gumatua sara”? Sureti ira na gone me ra droinitaka e dua vei ira na veivakalougatataki e yalataki tu ena veitikina oqo ka wasea ki na kalasi.

• Wilika vata na Ai Vakatakila 3:15–16. Kerei ira na gone me ra veivosakitaka na veika e yaga vakalevu se marautaki ni ra katakata tu (vaka na supu) se batabata (vaka na aisikirimu). E rawa vakacava ni vakuwai keda mai na veivakalougatataki e yalataki tu ena tikina e 5, 12, kei na 21 na katakata vakalailai ga kivua na iVakabula?

• Ena papa ni volavola, vola katakata vakalailai ga, vata na vosa tautauvata eso, vaka na yalobatabata, veivakawaleni, se vakailoa. Vakayagataka na veivosa oqo me vukei ira na gone ni kila matua na vuna e sega ni vinakata kina na Turaga me da katakata vakalailai ga. Na vosa cava so eda rawa ni vakasamataka me vakamacalataka na sala e vinakata o Koya meda vakataka? Wasea na vuna o via soli iko vakataucoko kina vua na iVakabula, ka sureti ira na gone me ra wasea talega na nodra nanuma.

Ai Vakatakila 3:20

Au rawa ni digitaka me mai tiki ni noqu bula o Jisu Karisito.

O na vukei ira vakacava na gone o vakavulica ni dolava na lomadra kei na bula ki na kaukauwa kei na veivakayarayarataki i Jisu Karisito?

iTaviqaravi e Rawa ni Caka

• Ni o wilika na Ai Vakatakila 3:20, vakaraitaka nai yaloyalo ni iVakabula ena katuba mai na ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale. Me vukea nodra vakaibalebaletaka nai yaloyalo na gone, sureti ira me ra veisa ka sauma na taro eso vakaoqo: Cava na vuna o nanuma kina ni tukituki tiko o Jisu ena katuba? Cava na vuna e sega kina na idoladola ni katuba e tautuba? Na cava na kena ibalebale me vakacurumi o Jisu ki na noda bula?

• Kerei ira na gone me ra vola ena papa ni volavola na sala duidui eso me “dolavi kina na katuba” vei Jisu. Eso nai vakaraitaki e rawa ni oka kina na nodra qaravi na tani, wiliki ni volanikalou, rokovi ni noda veiyalayalati ni papitaiso, kei na vakayagataki ni sakaramede.

Ai Vakatakila 5:1–10

Sa kilikili duadua ga o Jisu Karisito me noqu iVakabula.

Sa vakatavulica na raivotu e vakamacalataki ena Ai Vakatakila 5 ni sa kilikili duadua ga o Jisu Karisito ka rawa ni vakayacora na Veisorovaki ka vakabulai keda mai nai valavala ca.

iTaviqaravi e Rawa ni Caka

• Sureti ira na gone me ra tukuna e dua na gauna era a gadreva kina e dua me cakava e dua na ka era sega ni cakava rawa vakataki ira. Kerei ira me ra wilika na Ai Vakatakila 5:1–10 ka vakaraica na ka e gadrevi me caka ka rawa ni cakava duadua ga e dua na tamata (vakamacalataka ni sa Lami o Jisu Karisito ka sa matataka nai tuvatuva ni Kalou na ivola). Na cava sa cakava vei keda o Jisu ka sega tale ni dua e rawa ni cakava?

• Kerei ira na gone me ra vakaraica e dua na serenilotu se sere ni gonelalai e vakadinadinataki Jisu Karisito (vaka na “Beautiful Savior,” Children’s Songbook, 62). Na cava e vakavuvulitaka na qaqa ni sere me baleti Jisu Karisito? E rawa ni vakataka vakacava na sere ni vakacaucau e seretaki tu me baleti Jisu Karisito na sere oqo ena Ai Vakatakila 5:9–10?

Vakauqeta na Vuli e Vale

Sureti ira na gone me ra wasea ki na nodra matavuvale na sala eso era rawa ni sureta kina na veivakayarayarataki ni iVakabula ki na nodra itikotiko.

Vakatorocaketaki Noda Veivakavulici

Vakauqeta na vakarokoroko. E dua na tiki bibi ni vakarokoroko sai koya na vakasamataki ni Tamada Vakalomalagi kei Jisu Karisito. O rawa ni vakananumi ira na gone mera dau vakarokoroko ni lagati se vagugutaki malua e dua na sere se vakaraitaki e dua nai yaloyalo kei Jisu.