Loloma Uasivi, mai vei Del Parson

27 ni Noveba–3 ni Tiseba

1–3 Joni; Juta

“Sa Loloma na Kalou”

Sa vakatavulica na iVola i Joni kei Juta na loloma kei na rarama ni Tamada Vakalomalagi. Ni o vuli tiko ena macawa oqo, nanuma matua na vuna era gadreva kina na Nona rarama kei na loloma ena nodra bula na gone o vakavulica. Nanuma mo okata na itaviqaravi kece ena ituvatuva oqo, sega ni o ira ga e tuvai tu enai tabayabaki o vakavulica.

Sureta na Veiwasei

Sureti ira na gone me ra wasea na sala era sa vakila kina na loloma ni Tamada Vakalomalagi kei Jisu se na vuna era nanuma kina ni rau sa vaka e dua na rarama vei keda na Tamada Vakalomalagi kei Jisu.

Vakavulica na iVunau: Gone Sobu

1 Joni 1:5–7; 2:8–11

Na muri Jisu e kauta mai na rarama ki na noqu bula.

A vola tu na rarama o Joni me vakavulica na veivakayarayarataki ni Tamada Vakalomalagi kei Jisu ki na noda bula. Vakasamataka na sala o rawa ni vukei ira kina na gone ni vulica na rarama e Rau solia.

iTaviqaravi e Rawa ni Caka

• Kerei ira na gone me ra tukuna na veika e solia na rarama. Veivosakitaka kei ira na yaga ni rarama eso, vaka na vukei ni tubu ni tei, noda rawa tu ni rai, kei na veivakatakatari. Me kilai matua na sala e kauta mai kina vei keda o Jisu na rarama, era rawa ni veivukevuke ni vakacaudreva tu na rarama ena dua nai yaloyalo kei Jisu Karisito ni ra kaya, “sa rarama na Kalou” (1 Joni 1:5). Vakadinadinataka ni rawa ni vakararamataka na noda bula na Tamada Vakalomalagi kei Jisu Karisito ni da tovolea ni muria na ka e Rau kaya.

• Sureti ira na gone me ra veivukevuke ni taura tu e dua nai yaloyalo ni matanicina se kadrala. Ni taura tu na gone yadua nai yaloyalo, vukei koya me vakasamataka e dua na sala eda rawa ni kauta mai kina ki na noda bula na rarama i Jisu Karisito.

1 Joni 4:10–11, 20–21

Au vakaraitaka noqu lomana na Kalou ni’u vakaraitaka na loloma vei ira na tani.

Vukei ira na gone me ra raica na isema ni loloma era vakila tu baleta na Tamada Vakalomalagi kei na loloma era vakaraitaka vei ira na Luvena.

iTaviqaravi e Rawa ni Caka

• Wilika vei ira na gone na 1 Joni 4:11, ka lagata e dua na sere ni loloma ni Kalou, vaka na “Rogoca na Sere ni Manumanu” (iVolanisere ni Gonelalai, 16). Kerea e vica na gone me wasea na sala era kila kina ni lomani ira tu na Tamada Vakalomalagi. Ni oti na isaunitaro yadua, sureti ira na gone me ra mokoti ira ka kaya, “sa loloma na Kalou, ka sa lomani au ko Koya.”

• Wilika vei ira na gone na 1 Joni 4:21. Sureti ira me ra veitalanoataka se matanataka e vica na sala era rawa ni vakaraitaki loloma kina kivua e dua na itokani, me vaka na veimoko se caka ni dua na kadi. Na cava era nanuma tu na noda itokani ena veika oqo? Na cava e nanuma tu na Tamada Vakalomalagi ni da caka vinaka vei ira na tani?

1 Joni 2:3–5; 5:3

Au vakaraitaka na noqu lomana na Kalou ni’u muria na Nona vunau.

A vakavulica o Joni ni “sa sega ni ka bibi na Nona vunau” (1 Joni 5:3). Ia, na muri ni vunau e sa dua na sala eda vakaraitaka kina na noda lomani Koya.

iTaviqaravi e Rawa ni Caka

• Wilika na 1 Joni 5:3, ka kerei ira na gone me ra rogoca na ka e tukuna na tikina oqo ena sala eda rawa ni vakaraitaka kina ni da lomana na Kalou. Sureti ira na gone me ra cavuta na levu ga ni vunau era kila tu. Na cava eda vakila ni da talairawarawa tu ki na vunau ni Tamada Vakalomalagi?

• Sureti ira na gone me ra droinitaka e dua nai yaloyalo e vakaraitaka tu e dua na sala era rawa ni vakaraitaka kina vua na Tamada Vakalomalagi ni ra lomani Koya. Me ivakaraitaki, era rawa ni droinitaka e dua na kedra i yaloyalo ni muria tiko e dua na vunau.

• Lagata vata e dua na sere ni talairawarawa, vaka na “Digitaka na Dodonu” (iVolanisere ni Gonelalai, 82). Na cava eda vakila ni da talairawarawa?

Vakavulica na Vunau: Gone Qase Cake

1 Joni 2:8–11; 4:7–8, 20–21

Au vakaraitaka noqu lomana na Kalou ni’u vakaraitaka na loloma vei ira na tani.

O na vukei ira vakacava na gone me ra kila matua ni sa okati tu na nodra lomani na wavoliti keda ena lomani ni Kalou—o ira mada ga na tamata ka rairai duatani mai vei keda se dredre ni lomani?

iTaviqaravi e Rawa ni Caka

• Kerei ira na gone me ra raitayaloyalotaka ni se qai curu vou mai e dua ki na nodra koronivuli se tabanalevu ka sega tu ni kila e dua e kea. Ena vakaevei tu beka na nona nanuma? Sureta e dua na gone me wilika na 1 Joni 4:7–8. Na cava e vakatura na tikina oqo ena ivakarau e dodonu me da raica kina na tamata oqo? Wasea na veituvaki vakaoqo, se kerei ira na gone me ra vakasamataka na ituvaki eso ena rairai donumaki ira kina na madigi me ra vakaraitaka na loloma.

• Kerei ira na gone me ra wilika na 1 Joni 4:7–8, 20–21, ka sureti ira yadua ni vola e dua na yatuvosa me vakalekalekataka na ka era nanuma ni sa lesoni bibi duadua ena veitikina oqo. Ni ra wasea oti na nodra yatuvosa, wasea e dua nai talanoa mai na nomu bula se mai na dua na mekasini iTokani se Liaona o nanuma ni vakaraitaka na ka era vakavulica na veitikina oqo (raica, me ivakaraitaki, “Say Hello to Halim,” iTokani, June 2019, 8–9; se Liaona, June 2019, F18–F19). Sureti ira na gone mera wasea na nodra dui ivakaraitaki. Eda na vakaraitaka vakacava na loloma vei ira na wavoliti keda tu?

1 Joni 2:3–6; 4:17–18; 5:2–5

Au vakaraitaka na noqu lomana na Kalou ni’u muria na Nona vunau.

Sa rawa ni rawarawa cake na muri ni vunau ni da kila matua na vei dina e vakavulici tu ena 1 Joni 5:3. O na vukea vakacava na rai ni gone ni sa sega ni icolacola na vunau ia sa madigi ga me ra vakaraitaka kina na nodra loloma vua na Kalou?

iTaviqaravi e Rawa ni Caka

• Sureti ira na gone me ra vola ena papa ni volavola na sala eso era rawa ni vakaraitaka kina vua na Kalou ni ra lomani Koya. Qai wilika vata na 1 Joni 2:5–6; 5:2–5 me baleta na ikuri ni vakasama eso. E vakaraitaka vakacava ni da lomana na Tamada Vakalomalagi na talairawarawa ki na ivunau?

Na muria nai vunau ni Kalou e vukei keda me vorata na vuravura.

• Wilika na 1 Joni 4:17, ka vakamacalataka vei ira na gone ni “da doudou kina ena siga ni lewa” sa kena ibalebale na rawati ni yalodei kei na vakacegu ni ra duri tu ena mata ni Kalou me ra lewai. Na cava e vakavulica na tikina oqo ka gadrevi me da cakava me rawati kina na yalodei oqo? Na cava eso na ka eda rawa ni cakava oqo me da yalodei tu kina ena mata ni Kalou?

Juta 1:18–22

Au sa rawa ni yalodina ena gauna mada ga era veiwalitaki au kina na tamata.

Baleta ni da sa tisaipeli i Jisu Karisito, era sa veiwalitaki keda na tani ena so na gauna ena vuku ni noda vakabauta se ivakarau ni noda bula. E tiko ena veitikina oqo nai vakasala i Juta ena sala me da yalodina tikoga kina ena veigauna vakaoqori.

iTaviqaravi e Rawa ni Caka

• Kerei ira na gone me ra wasea na gauna eso era a veiwalitaki koya kina na tani se dua era kila baleta ni a cakava na ka dodonu. Sureti ira na gone me ra wilika na Juta 1:18–22 ka vakaraica na sala eda rawa ni yalodina tikoga kina ni ra vakalialiai se veiwalitaki keda na tani. Vola ena papa ni volavola na ka era raica, ka veivosakitaka na sala eso era rawa ni muria kina nai vakasala oqo.

• Tukuna vakalekaleka na tadra i Liai (raica na 1 Nifai 8:1–35), ka kerea e vica na gone me wilika na tikina eso mai na 1 Nifai 8:26–28, 33. Veivosakitaka na sala era a tautauvata kina na tamata ena vale vakaitamera kei ira na dauveivakalialiai a tukuna o Juta. Na cava e rawa ni caka me da kakua ni vakayarayarataki kina mai vei ira na veiwalitaki keda se sega ni duavata kei na ka eda vakabauta? (raica na 1 Nifai 8:30, 33).

Vakauqeta na Vuli e Vale

Vakauqeti ira na gone me ra tuvatuvakataka ni cakava e dua na ka me wasei kina na nodra rarama ki na nodra matavuvale.

Vakatorocaketaki Noda Veivakavulici

Era sa waribariba na gone. Eso na gauna o na rairai nanuma ni sa veivagolei tani mai na vuli na nodra igu na gone. Ia sa rawa ni o tautauri mai na nodra itovo waribariba ena nodra sureti me ra matanataka, droinitaka, se lagata e dua na ivakavuvuli ni kosipeli. (Raica na Veivakavulici ena iVakarau ni iVakabula, 25–26.)