“18–24 ni Tiseba. Siganisucu: ‘Nai Tukutuku Vinaka Mo Dou Reki Vakalevu Kina,’” Lako Mai, Mo Muri Au—Me Baleti Ira na Lalai: Veiyalayalati Vou 2023 (2021)
“18–24 ni Tiseba. Siganisucu,” Lako Mai, Mo Muri Au—Me Baleti Ira na Lalai: 2023
Lami Lailai, mai vei Jenedy Paige
18–24 ni Tiseba
Siganisucu
“Nai Tukutuku Vinaka Mo Dou Reki Vakalevu Kina”
Na lesoni oqo e dua na madigi me vakavulici vei ira na gone me ra marautaka na sucu ni iVakabula, nona bula, kei na nona ilesilesi ena gauna ni Siganisucu. Vakasamataka tiko oqo ena nomu vakavakarau mo veivakavulici.
Sureta na Veiwasei
Vakaraitaka na iyaloyalo mai na ituvatuva ni macawa oqo ena Lako Mai Mo Muri Au—Me Baleti Ira na Tamata Yadua kei na Matavuvale, ka sureti ira na gone me ra wasea na ka era kila me baleta na sucu ni iVakabula.
Vakavulica na iVunau: Gone Sobu
A lako mai ki vuravura o Jisu Karisito me vaka e dua na gonelailai.
Era dau taleitaka na gone na italanoa ni sucu i Jisu Karisito. Na dina vakaivunau cava o raica ena italanoa oqo o nanuma ni dodonu me ra kila na gone?
iTaviqaravi e Rawa ni Caka
-
Wilika na Luke 2:1–14 vei ira na gone, se vakamacalataka na veika e yaco ena veitikina oqo ena raici ni “Wase e 5: Sa Sucu o Jisu Karisito” (e Na iTukuni ena Veiyalayalati Vou, 13–15, se na kena vidio ena ChurchofJesusChrist.org). Sureti ira na gone me ra droinitaka na iyaloyalo ni veika oqo ka vakayagataka me ra tukuna kina na italanoa vakai ira. Cava na vuna eda marau kina ni a sucu mai o Jisu?
-
Kerei ira na gone me ra tukuna vei iko na italanoa ni nodratou muria na Tamata Vuku na kalokalo me kunei Jisu. Kevaka e gadrevi me ra vakananumi ena italanoa oqo, raica na Maciu 2:1–12 se na “Wase e 7: O Iratou na Tamata Vuku” (e Na iTukuni ena Veiyalayalati Vou, 18, se na kena vidio ena ChurchofJesusChrist.org). Vunia e dua na iyaloyalo kei Jisu ena loma ni rumu. Droinitaka se kotiva e dua na kalokalo pepa ka taura cake tu. Sureti ira na gone me ra vakatayaloyalotaka ni o ira na tamata vuku era kau ka ni loloma voli, ka kauti ira wavokita na rumu me ra vaqarai Jisu. Vukei ira na gone me ra vakasamataka eso na ka ni loloma e rawa ni da solia vei Jisu.
-
Lagata vata kei ira na gone e vica na sere ni Siganisucu se serenilotu (raica na Sere ni Lotu, naba 116–27; iVolanisere ni Gonelalai, 20–32). Kerei ira me ra wasea e dua na ka e vakavulica na sere yadua era nanuma ni bibi me da kila.
Kecisemani, mai vei J. Kirk Richards
Ena vuku i Jisu Karisito sa rawa kina meu laki bula vata tale kei na Tamada Vakalomalagi ena dua na siga.
Era kila beka na gone o vakavulica na vuna a lako mai kina o Jisu Karisito ki vuravura? Taura na gauna mo vakananuma kina na veika sa cakava ena vukumu na iVakabula kei na sala e rawa ni o vukei ira kina na gone me ra kila na veika sa cakava o Koya ena vukudra.
iTaviqaravi e Rawa ni Caka
-
Kauta mai ki na kalasi e dua na ioloolo ka ni loloma ka tiko e loma e dua na iyaloyalo kei Jisu Karisito. Biuta kina e dua na itokaniyaca ka volai toka kina na “Joni 3:16” ka tukuna vei ira na gone ni oqo e dua na ivakatakilakila ni iloloma e tiko e loma. Wilika na Joni 3:16 vata kei ira na gone, ka sureti ira me ra vakilakila se cava na iloloma oqori ka dolava sara. Cava na vuna a tala mai kina na Kalou vei keda na Luvena?
-
Vukei ira na gone me ra vakaotia na iyatuvosa oqo: “A lako mai vuravura o Jisu me .” Qai vakaraitaka na iyaloyalo e semati ki na nona isoro ni veivakaduavatataki na iVakabula, nona mate, kei na Tucaketale (raica na iVola ni Yaloyalo Vakosipeli, naba 56–59), ka tukuna vakalekaleka me baleta na veika oqo. E rawa talega ni o lagata e dua na sere me baleta na vuna a lako mai kina ki vuravura o Jisu, me vaka na “Tala Mai Na Luvena” (iVolanisere ni Gonelalai, 20). Wasea na nomu ivakadinadina baleti Jisu Karisito kei na veika sa cakava o Koya vei iko.
Vakavulica na iVunau: Gone Qase Cake
Maciu 1:18–25; 2:1–12; Luke 1:26–38; 2:1–20
A lako mai ki vuravura o Jisu Karisito me vaka e dua na gonelailai.
O na vukei ira beka vakacava na gone me ra vakanamata vei Jisu Karisito ena Siganisucu?
iTaviqaravi e Rawa ni Caka
-
Sureta e dua na gone me wilika na veika a yaco ena sucu ni iVakabula (raica na Maciu 1:18–25; 2:1–12; Luke 1:26–38; 2:1–20). Kerei ira na vo ni gone me ra veivukevuke ena droinitaka na iyaloyalo ena papa me baleta na veika e tukuni tiko ena ivolanikalou. Na cava e vakavulica vei keda na italanoa eso oqo me baleti Jisu Karisito?
-
Sureti ira na gone me ra vola ena so na tikinipepa na veika e rawa ni ra cakava me vukea nodra vakanamata vua na iVakabula ena gauna ni Siganisucu. (E rawa ni ra tauri vakasama eso mai na vidio “Good Tidings of Great Joy: The Birth of Jesus Christ” ena ChurchofJesusChrist.org.) Sureti ira me ra wasea na veika era sa vola. Vakayaloqaqataki ira na gone me ra kauta i vale na tikinipepa ka cakava vata kei na nodra matavuvale na vakatutu eso era vola tu kina.
-
Lagata na sere ni Siganisucu me baleta na iVakabula (raica na iVolanisere ni Gonelalai, 20–32; Sere ni Lotu, naba 120–27), ka sureti ira na gone me ra wasea e dua na qaqana se malanivosa taleitaki mai na sere.
Ena vuku i Jisu Karisito sa rawa kina meu laki bula vata tale kei na Tamada Vakalomalagi ena dua na siga.
O na vukei ira vakacava na gone me ra railesuva na veika era sa vulica ena yabaki oqo ka kila na vuna era gadrevi Jisu Karisito kina ena nodra bula?
iTaviqaravi e Rawa ni Caka
-
Vola ena rua na tikinipepa O cei o Jisu Karisito? kei na Cava na vuna e lako mai kina ki vuravura? ka vakabiri rau ena yasa duidui ni rumu ni vuli. Sureta na gone yadua me wilika e dua vei ira na ivolanikalou oqo: Maciu 16:15–16; Joni 3:16; 1 Nifai 10:4; Mosaia 3:8; Alama 7:10–13; 3 Nifai 27:14–15. Kerei ira na gone me ra vakaraica na isaunitaro, ena ivolanikalou era wilika, ki na rua na taro ena lalaga. Sureti ira me ra vola nodra isaunitaro ena tikinipepa ka vakabira e lalaga veitikivi kei na kena taro. Meda vakavinavinakataka vakacava na veika sa cakava o Jisu Karisito ena vukuda?
-
Sureti ira na gone me ra tuva ena papa na yaca se na itutu kece i Jisu e ra vakasamataka rawa (raica na iDusidusi ki na iVolanikalou, “Jisu Karisito”). Na cava era vakavulica vei keda na yaca eso oqo me baleti Jisu Karisito kei na Nona ilesilesi? Cava na vuna eda gadrevi Jisu Karisito kina ena noda bula? Me vukea na saumi ni taro oqo, vakaraitaka na vidio “Why We Need a Savior—A Christmas Message about Our Savior Jesus Christ” (ChurchofJesusChrist.org).
Vakauqeta na Vuli e Vale
Vakauqeti ira na gone me ra raica e dua mada ga na sala e rawa ni ra vukea kina e dua se me ra voleka yani vei Jisu Karisito ena Siganisucu oqo.
Vakatoroicaketaki Ni Noda Veivakavulici
Sureti ira na gone me ra wasea na veika era vulica tiko. E rawa ni ra veivakauqeti vakaukauwa sara na gone ki na vinaka ena nodra matavuvale. Vakauqeti ira na gone o vakavulica me ra wasea ki na nodra matavuvale e dua na ka era vulica ena Lalai. (Raica na Veivakavulici ena iVakarau ni iVakabula, 30.)