“20–26 ni Noveba. 1 kei na 2 ni Pita: ‘Reki ena Reki e Sega ni Cavuti Rawa ka Vinaka Sara,’” Lako Mai, Mo Muri Au—Me Baleti Ira na Lalai: Veiyalayalati Vou 2023 (2021)
“20–26 ni Noveba. 1 kei na 2 ni Pita,” Lako Mai, Mo Muri Au—Me Baleti Ira na Lalai: 2023
Karisito ni Vunau tiko ena Vuravura ni Yalo, mai vei Robert T. Barrett
20–26 ni Noveba
1 kei na 2 ni Pita
“Reki ena Reki e Sega ni Cavuti Rawa ka Vinaka Sara”
Tekivuna nomu vulica na 1 kei na 2 ni Pita ena masu. Nanuma tiko na nomu vakavakarau vinaka duadua ni veivakavulici ena lako mai na veika o vakila mai na nomu vuli vakai iko kei na vuli vakamatavuvale.
Sureta na Veiwasei
Vakaraitaka nai yaloyalo kei Pita ena ituvatuva ni macawa oqo ena Lako Mai, Mo Muri Au—Me Baleti Ira na Tamata Yadua kei na Matavuvale, ka sureti ira na gone me ra tukuna vei iko e dua na ka era kila me baleti Pita. Vakananuma vei ira ni o Pita a iliuliu ni Lotu ni oti nona tucake tale o Jisu, ka vakamacalataka ni 1 Pita kei na 2 ni Pita sa ikoya na nona ivola vei ira na lewe ni Lotu ena gauna oya.
Vakavulica na iVunau: Gone Sobu
Au rawa ni marau tu ena veigauna dredre sara mada ga.
Vakasamataka na sala e rawa mo vakavulica kina na veitikina oqo me vukei ira na gone ni goleva na iVakabula ni ra sotava na dredre.
iTaviqaravi e Rawa ni Caka
-
Vukei ira na gone me ra vakasamataka na ivakaraitaki eso ni veika dredre a lako curuma o Jisu, me vaka na vakalialiai se veiwalitaki. Vakamacalataka ni da na sotava na veigauna dredre ena noda bula. Wilika vata na 1 Pita 1:6–7; 3:14 ka wasea na ka o a sotava ni sa “vakatovolei na nomu vakabauta” ka sa vukei iko na iVakabula mo kune reki. Se rawa mo wasea na masu ni Parofita o Josefa Simici ena valeniveivesu mai Lipati kei na vakacegu a solia vua na Kalou (raica na Vunau kei na Veiyalayalati 121:1–8; 123:17).
O Josefa Simici ena Valeniveivesu e Lipati, mai vei Greg K. Olsen
-
Vakaraitaka e dua nai yaloyalo kei Jisu kei ira na tamata tale eso (na iVola ni Yaloyalo Vakosipeli e tu kina e levu; vakakina na Lako Mai, Mo Muri Au—Me Baleti Ira na Tamata Yadua kei na Matavuvale). Kerei ira na gone me ra kunei Jisu enai yaloyalo. Vakadinadinataka ni kevaka eda rai vua na iVakabula, sa rawa ni vukei keda o Koya meda kunea na reki ena noda bula.
Sa vinakata na Tamada Vakalomalagi meu ivakaraitaki vei ira na tani.
E vakavuvulitaka o Pita ni o keda “sa tamata ni Kalou” ka sa rawa ni “vakalagilagia na Kalou.” na noda caka vinaka.
iTaviqaravi e Rawa ni Caka
-
Vakamacalataka na veika e duatani mai na ka e wavoliti ira tu, se vakaraitaka nai yaloyalo ni veika oqori. Me ivakaraitaki, na valetabu sa duatani mai na veivale era wavolita tu se na ulunivanua e cecere cake mai na buca. Vakamacalataka ni gauna eda muria kina nai vunau, eda na duatani ka ra na raica na tamata na noda ivakaraitaki. Tukuna eso na “ivalavala vinaka” o sa raica ni ra cakava na gone. Vakamacalataka ni valavala vinaka vaqo e “vakalagilagia na Kalou”—e sa vukei ira na tani me ra lomana vakalevu cake na Kalou ka gadreva me ra qaravi Koya.
-
Vakacavara vata kei ira na gone na tabana ni itaviqaravi. Era vakalagilagia tiko vakacava na Kalou na tamata era raica enai yaloyalo?
Era sa vulica na kosipeli na yalo ena vuravura ni yalo.
Ni sa mate oti, a lako o Jisu ki na vuravura ni yalo ka talai ira na yalo buladodonu me ra vakavulici ira na yalo tale eso era se bera ni ciqoma na kosipeli.
iTaviqaravi e Rawa ni Caka
-
Tukuna vei ira na gone e dua o kila ka sa mate. Vakamacalataka ni sa mate na tamata, sa biuta na yagodra na yalo ka lako ki na vuravura ni yalo. Wilika na 1 Pita 3:19 ka vakamacalataka ni gauna sa mate kina o Jisu, a laki sikova o koya na vuravura ni yalo. E kea, a kerei ira kina na yalo buladodonu me ra vakavulica na kosipeli vei ira na yalo tale eso era se bera ni ciqoma na kosipeli (raica na Vunau kei na Veiyalayalati 138:30).
-
Vakaraitaka e dua nai yaloyalo ni valetabu. Vakamacalataka vei ira na gone ni gauna era sa qase cake kina, sa rawa ni ra lako ki na valetabu ka papitaiso ena vukudra na tubudra era a sega tu ni papitaiso e vuravura. Vukei ira na gone me ra vakalewena e dua na vunikau ni matavuvale rawarawa (raica e dua na ivakaraitaki ena “Family History Coloring Pages,” ChurchofJesusChrist.org).
Vakavulica na iVunau: Gone Qase Cake
Au rawa ni kune marau kei na vakacegu ena veigauna dredre sara mada ga.
Era sa sotava beka na gone o vakavulica eso na ivakarau ni veisagai se veivakalialiai ena vuku ni nodra vakabauta. Na veitikina oqo e rawa ni vukei ira ena veigauna vakaoqori.
iTaviqaravi e Rawa ni Caka
-
Vakalekalekataka e vica na italanoa kei Jisu ena nona vakacacani, se me ra wilika na gone—raica, me ivakaraitaki, na Maciu 12:9–14 se Luke 22:47–54. Tarogi ira na gone kevaka era sa bau vakasagai se vakalialiai baleta ni ra bulataka na ivakavuvuli i Jisu Karisito. Na cava beka era a vakila? Ni qai wilika vata na 1 Pita 3:12–14; 4:13–14, 16, ka kerei ira na gone me ra vaqara na ka a tukuna o Pita baleta na vakararawataki “ena vuku ni valavala dodonu.” Cava na vuna e se rawa tikoga kina ni da marau ni ra vakalialiai keda eso na tamata ni da cakava na ka dodonu?
-
Wasea e dua na gauna o a kunea kina na reki se na vakacegu ena dua na veivakatovolei, se wasea na nona a kunea na Parofita o Josefa Simici na vakacegu ena nona tiko e Valeniveivesu e Lipati (raica na Vunau kei na Veiyalayalati 121:1–8; 123:17). Eda na kunea vakacava na reki kei na vakacegu ena gauna ni noda vakatovolei?
Au sa rawa ni tuvakarau tu meu wasea na kosipeli.
O ira na gone o vakavulica ena levu na nodra madigi ena gauna ni nodra bula, me ra sauma na taro mai vei ira na tani me baleta nodra vakabauta. Vakasamataka na ka o rawa ni cakava mo vukei ira “ni vakavakarau tu ga ni sauma na taro”
iTaviqaravi e Rawa ni Caka
-
Tukuna e dua na gauna a tarogi iko kina e dua me baleta na Lotu, ka vakamacalataka ke o sa tuvakarau tu mo sauma. Kerei ira na gone me ra veivosakitaka na gauna eso a tarogi ira kina na tamata me baleta na Lotu. Wilika vata na 1 Pita 3:15. Me da na muria vakacava na ivakasala i Pita ena tikina oqo?
-
Vukei ira na gone me ra vakasamataka e vica na taro era na taroga beka na tamata me baleti Jisu Karisito se na Nona Lotu. Me ra veivukevuke na gone ni vakamacalataka me ra sauma vakacava na veitaro oqo me rawa ni ra “vakavakarau tu ga.” Na Yavu ni Vakabauta e vakarautaka na dina rawarawa eso ka rawa ni ra vakayagataka na gone me saumi kina na taro me baleta na Lotu.
Era sa vulica na kosipeli na yalo ena vuravura ni yalo.
Ni ra sa mate na yalododonu, era lako ki na vuravura ni yalo me ra vakavulica na kosipeli vei ira era a sega ni ciqoma ni ra tiko voli e vuravura.
iTaviqaravi e Rawa ni Caka
-
Droinitaka ena papa ni volavola e dua na iwirini ka dua na laini e lomadonu. Vola Parataisi ni Yalo ena dua na veimama kei na Valeniveivesu ni Yalo ena ikarua ni veimama. Sureta e dua vei ira na gone me wilika na 1 Pita 3:18–20; 4:6 (raica na 1 Pita 4:6, ivakamacala e ra a, me baleta na veivakadodonutaki mai na iVakadewa i Josefa Simici). Vakamacalataka ni gauna a mate kina o Jisu, a lako o Koya ki na parataisi ni yalo. A vakaroti ira na yalo buladodonu mai kea me ra vakavulica na kosipeli vei ira na yalo ena valeniveivesu.
-
Sureta e dua na itubutubu se tuakana e dua na gone me tukuna nona lako ki na valetabu ka ciqoma na cakacaka vakalotu ena vuku ni dua na tubuna.
-
Sureti ira na gone me ra vakalewena e dua na vunikau ni matavuvale rawarawa (raica e dua na ivakaraitaki ena “Family History Coloring Pages,” ChurchofJesusChrist.org).
Vakauqeta na Vuli e Vale
Sureti ira na gone me ra wasea nodra vunikau ni matavuvale vei ira nodra lewe ni matavuvale ka kerei ira me ra veivuke ni vakacuru yaca kina.
Vakatorocaketaki Noda Veivakavulici
Saga mo kilai ira vakavinaka na gone o vakavulica. Ni o kilai ira na gone o vakavulica, moica na vakasama eso ena ituvatuva oqo ke gadrevi me sotavi kina na nodra gagadre. O rawa ni vakayagataka e dua ga na itaviqaravi e vakatututaki ena ituvatuva oqo, sega ni o koya ga e volai me baleta na itabayabaki o vakavulica. (Raica na Veivakavulici ena iVakarau ni iVakabula, 7.)