E vunautaka tiko na kosipeli o Jisu Karisito ena vuravura ni yalo

E Vunau tiko o Karisito ena Vuravura ni Yalo, mai vei Robert T. Barrett

20–26 ni Noveba

1 kei na 2 Pita

“Reki ena Reki e Sega ni Cavuti Rawa ka Vinaka Sara”

Ni o wilika na iVola i Pita, ena rawa ni o ciqoma na veivakauqeti vakayalo. Vola sara vakatotolo ni ko sa “tiko ga kei na Yalo” (Vunau kei na Veiyalayalati 76:80) mo rawa ni ciqoma vakadodonu na veika e vakavulica vei iko na Kalou.

Vola na Veika o Vakauqeti Kina

Ni oti ga Nona Tucake tale, a vakayacora na iVakabula e dua na parofisai ka a rairai lomaleqataki Pita voli. A tukuna o koya ni na vakamatei o Pita ena vuku ni nona vakabauta, ka kauti koya e “na tikina [ena] sega ni vinakata … , me vakatakila na mate ena vakarokorokotaka kina na Kalou” (Joni 21:18–19). Veiyabaki e muri, ni sa vola o Pita na nona ivola, sa kila o koya ni sa voleka na nona vakamatei a parofisaitaki: “Ka’u sa voleka ni biuta tani na noqu vale vakacevaceva, me vaka sa tukuna mai vei au na noda Turaga ko Jisu Karisito” (2 Pita 1:14). Ia na vosa nei Pita a sega ni vakasinaiti ena rere se na vakasama luluqa. Ia, e a vakavulici ira na Yalododonu me ra “reki vakalevu kina,” e dina ga ni ra “vakararawataki ena dau vere e vuqa.” E a vakasalataki ira me ra nanuma ni “sa vakatovolei na [nodra] vakabauta” ena veimuataki ki na “vakavinavinaka, ka me dokai ka me vakacaucautaki, ni na rairai mai ko Jisu Karisito” kei na “bula [ni] yalomudou” (1 Pita 1:6–7, 9). E a veivakacegui beka vei ira na Yalododonu ena gauna oya na vakabauta nei Pita, me vaka ni sa veivakauqeti vei ira na Yalododonu edaidai, ka ra sa “vakaivotavota talega ena veivakararawataki i Karisito; [me] da reki talega kina ena reki vakaidina, ni na vakaraitaki ko koya enai ukuuku” (1 Pita 4:13).

ivakatakilakila ni vuli ni tamata yadua

Vakasama Eso ni Vuli iVolanikalou ni Tamata Yadua

1 Pita 1:3–9; 2:19–24; 3:14–17; 4:12–19

Au rawa ni kune reki ena gauna ni veivakatovolei kei na rarawa.

Na gauna ni oti na Nona Vakoti ena Kauveilatai na Karisito a sega ni gauna rawarawa meda lotu va-Karisito, ka sa vakadinadinataki ena imatai ni ivola nei Pita. Ena imatai ni va na wase, o na raica kina na vosa kei na malanivosa e vakamacalataka na veika dredre: vakararawataki, dauvere e vuqa, rarawa, rarawa katakata, kei na veivakararawataki (raica na 1 Pita 1:6; 2:19; 4:12–13). Ia o na raica talega na vosa e vaka me rekitaki—o na vinakata beka mo vola na veika o kunea. Me vakataka, ni o wilika na 1 Pita 1:3–9; 2:19–24; 3:14–17; kei na 4:12–19, na cava e rawa ni solia vei iko nai nuinui ni o rawa ni kunea na reki ena loma saraga ni veituvaki dredre?

Sa rawa talega mo wilika na itukutuku nei Peresitedi Russell M. Nelson “Reki kei na Bulabula Vakayalo” (Liaona, Nove. 2016, 81–84) ka vakaraica na veika e tautauvata kina na veika e vakavulica o Pita kei na veika a vakavulica o Peresitedi Nelson. Na cava beka e tiko ena yavu ni veivakabulai kei na kosipeli i Jisu Karisito e solia vei iko na reki?

Raica talega na Ricardo P. Giménez, “Kune iDrodro Mai na Cagilaba ni Bula,” Liaona, Me 2020, 101–3.

1 Pita 3:18–20; 4:1–6

Sa vunautaki yani na kosipeli vei ira sa mate tu me rawa ni ra lewai vakadodonu.

Ena dua na siga e na tu na tamata yadua ena itutu ni veilewai me ra “tukuni ira vua sa vakarau me lewai ira era sa bula kei ira talega na mate” (1 Pita 4:5). Ena rawa vakacava vua na Kalou me lewai ira vakadodonu kece na tamata baleta ni duidui sara vakalevu na madigi eso mera kila vinaka kina ka bulataka na kosipeli? Raica na ivunau e vakavuvulitaka o Pita ena 1 Pita 3:18–20; 4:6 e vukea na saumi ni taro oqo. E vaqaqacotaka vakacava na veitikina oqo na nomu vakabauta na Nona lewa dodonu ka vakatautauvata na Kalou?

Mo vulica vakavinaka cake nai vakavuvuli oqo, vakasaqara na Vunau kei na Veiyalayalati 138, e dua na raivotu e ciqoma o Peresitedi Josefa F. Simici ena nona vakasamataka tiko vakatitobu na veika e vola tu o Pita. Na ikuri ni dina cava a vulica o Peresitedi Smith?

Raica talega na Veiulutaga ni Kosipeli, “Papitaiso ena Vukudra na Mate,” topics.ChurchofJesusChrist.org

2 Pita 1:1–11

Ena kaukauwa i Jisu Karisito, au na rawa ni vakatorocaketaka kina na noqu bula vakalou.

O dau vakila beka ena so na gauna ni na sega ni rawa ni o vakataki Jisu Karisito ka na sega talega ni rawa ni o vakatorocaketaka na nomu vakamuria na Nona itovo? E solia na vakasama veivakayaloqaqataki oqo o Elder Robert D. Hales, ena noda na rawa ni vakatorocaketaka na itovo va-Karisito: “Na ivakarau ni Vakabula … era sai vakarau veicurumaki, e vakuri kina dua tale, e tubu tiko e lomada ena sala veisemati eso. Kena ibalebale, eda na sega ni rawa meda rawata e dua na ivakarau sa va-Karisito vakavo ke da rawata ka vakauqeti ira tale eso. Ni sa kaukauwa sara mai e dua nai tovo, ena vakatalega kina e vuqa tale” (“Yaco Mo Tisaipeli ni Noda Turaga o Jisu Karisito,” Liaona, Me 2017, 46).

e dua na talitali e caka vakamatau sara

Na ivakarau yadua Vakarisito eda vakatorocaketaka ena vukea meda talia e dua na isulu vakayalo ni bula vakatisaipeli.

Ni o wilika na 2 ni Pita 1:1–11, vakasamataka vakatitobu na ivakarau “ni ka sa vakalou” era tuvai tu kina na veitikina oqo. Ena veika o sa sotava, era sa “veitali vata,” me vaka e vakamacalataka o Elder Hales? Era dau veitarai vakacava vakai ira? Na cava tale o vulica mai na veitikina oqo me baleta na iwalewale ni nomu yaco mo va-Karisito vakalevu cake?

Sa rawa talega mo vakasamataka vakatitobu na “vosa ni yalayala e levu sara ka talei” sa solia na Kalou vei ira na Nona Yalododonu—oka kina o iko (2 ni Pita 1:4). Na itukutuku nei Elder David A. Bednar “Vosa ni Yalayala e Levu Sara ka Talei” (Liahona, Nov. 2017, 90–93) e rawa ni vukei iko mo kila vinaka na cava na yalayala oqori kei na sala mo ciqoma kina.

ivakatakilakila ni vuli vakamatavuvale

Na Vakasama Eso Me Baleta na Vuli iVolanikalou Vakamatavuvale kei na Lotu Vakamatavuvale

1 Pita 2:5–10.Ni o wilika na veitikina oqo kei na nomu matavuvale, sa rawa mo vakayagataka na vatu me vukei ira na lewe ni matavuvale me ra raitayalotaka na ivakavuvuli nei Pita ni noda iVakabula esa noda “vatu ivakadei.” Eda sa tautauvata vakacava kei na “veivatu bulabula” e vakayagataka tiko na Kalou me tara cake na Nona matanitu? Na cava eda vulica mai vei Pita me baleta nai Vakabula kei na noda itavi ena Nona matanitu? Na cava sa itukutuku nei Pita ki na nomu matavuvale?

1 Pita 3:8–17.Eda na tu “vakarau vakacava meda sauma na nodra vakatataro na tamata” me baleta na noda vakabauta? Ena rawa ni marautaka na nomu matavuvale me vakatasuasuataki ni dua e lako mai me taroga na taro baleta na kosipeli.

1 Pita 3:18–20; 4:6.Na cava e rawa ni cakava na nomu matavuvale me semati vei ira na nomu qase e liu? Ena rairai vinaka me marautaki na nodra siganisucu na tubumuni sa mate ena nomu vakarautaka na kedra kakana taleitaki, raica na kedra itaba, se tukuna na italanoa mai na nodra bula. Ke rawa, sa rawa mo tuvanaka talega me ciqomi na nodra cakacaka vakalotu na nomu qase e liu e valetabu (mo vukei, sikova na FamilySearch.org).

2 Pita 1:16–21.Ena veitikina oqo, e veivakananumi o Pita vei ira na Yalododonu ena veika a sotava ena Ulunivanua ni Veivakamataliataki (raica talega na Maciu 17:1–9). Na cava e rawa ni da vulica mai na veitikina oqo me baleta na nodra ivakavuvuli na parofita? (raica talega Vunau kei na Veiyalayalati 1:38). Na cava e solia vei keda na yalonuidei meda vakamuria na noda parofita ena siga nikua?

Me ikuri ni tukutuku ni vakavulici ni gone, raica na idusidusi ni macawa oqo ena Lako Mai, Mo Muri Au—Baleta na Lalai.

Sere vakaturi: “iTuvatuva ni Noqu Kawa—Au na Cakava,” iVolanisere ni Gonelalai,, 100.

Vakatorocaketaki Noda Veivakavulici

“Dau tu vakarau e veigauna.” Na gauna ni veivakatavulici e vale e rawa ni yaco mai ka rawa ni takali totolo talega yani, o koya sa bibi kina me vakayacori ena gauna ga e basika cake mai kina. Ena rawa vakacava mo dau “vakarau tiko” me vakavulici ira na lewe ni nomu matavuvale ena dina ni kosipeli ka wasea “na vu ni nuinui sa tu e na lomamudou” (1 Pita 3:15) ni yaco mai na gauna ni veivakavulici? (Raica na Veivakavulici ena iVakarau ni iVakabula, 16.)

E vunau tiko o Pita ki na dua na ilawalawa tamata

E dina ga ni sotava o Pita e vuqa na veivakacacani kei na veisaqasaqa, e tudei tiko ga ena nona ivakadinadina baleti Karisito.