Kune iDrodro Mai na Cagilaba ni Bula.
Jisu Karisito kei na Nona Veisorovaki me idrodro duadua eda gadreva, se na cagilaba cava ga e tukilaka tiko na noda bula.
Eliu ena loma ni 90 vakacaca, ena noqu veiyabaki ni vuli ena koliji, au a tiki tiko ni iKava ni Kabani ni Tabana ni Bokobuka e Santiago e Chile. Niu veiqaravi tiko e kea, au a vakaitikotiko ena siteseni ni bokobuka me tiki ni yadra ena bogi. Ena mua ni yabaki, ea tukuni vei au meu na tiko ena siteseni ni bokobuka ena yakavi ni Vakatawase baleta ni siga koya e dau vakawasoma sara ni dau yaco na leqa tubukoso. Ena kurabui, au a sauma, “E dina?”
Io, au nanuma noqu a wawa tiko kei ira na noqu itokani ea yaco, ena bogilevu tutu sa tekivu kacakacabote na rokete mai na ra ni koro ko Santiago. Keimami tekivu veimokomoko ka vakanuinui vinaka ni yabaki vou. Vakasauri ga ni sa tekivu tataqiriqiri na lali ni siteseni ni bokobuka me vakatakila ni sa dua na leqa tubukoso. Keimami vakasosolo ka lade yani ki na lori ni boko buka. Ena neimami sala ki na leqa tubukoso, ni keimami siviti ira tiko na tamata era marautaka tiko na yabaki vou, au raica ni ra sega soti sara ni kauwai ka wele ga. Era cegu voli ka marautaka na yakavi cagidonu ni vula ikatakata. Ia ena dua na vanua voleka, ko ira na tamata keimami kusa me laki vukea era leqa bibi tiko.
Na ka sotavi oqo e vukea meu kila ni dina ga ni so na gauna e dau cici malumu tu na noda bula, ena dau yaco mai na gauna vei keda yadua eda dau sotava kina na bolebole tawanamaki kei na cagilaba ka na biliga na iyalayala ni noda rawata me vosota. Na bolebole ni yago, vakasama, matavuvale, kei na cakacaka; leqa mai na ka bula; kei na veika tale eso ni bula kei na mate era so ga na ivakaraitaki ni cagilaba ka da na sotava ena bula oqo.
Ni da sotavi ira na cagilaba vaka oqo, e vakawasoma ni da dau vakila na taqaya se rere. E kaya o Peresitedi Russell M. Nelson ni, “Na iwali ni rere na vakabauta”—vakabauta na noda Turaga ko Jisu Karisito (“Let Your Faith Show,” Liaona, Me 2014, 29). Niu sa raica oti na cava ka vakayacoka ki na nodra bula na tamata, au sa mai kunea ni veitalia na mataqali cava vakacava e tukilaki keda tiko——veitalia mada ke dua na kena iwali se sa laurai na kena itinitini—e sa dua ga na kena idrodro, ka sa tautauvata ena mataqali cava kecega. Na idrodro duadua ka vakarautaki mai vua na Tamada Vakalomalagi oya na noda Turaga ko Jisu Karisito kei na Nona Veisorovaki.
E sega ni dua vei keda e vakuwai mai na sotavi ni cagilaba vaka oqori. O Ilamani, e dua na parofita ni iVola i Momani, e vakatavulici keda vakaoqo: “Moni nanuma moni tara na nomuni yavu ena uluvatu ni noda iVakabula, sa i koya na Karisito, na Luve ni Kalou, ia ni sa vakaliwava mai na tevoro na nona cagi kaukauwa kei na nona moto ena covulaca, ka sa yaviti kemuni ena nona uca cevata kei na nona cagilaba, ena sega ni rawai kemuni se dreti kemuni sobu ki na ikeli ni rarawa kei na yaluma tawamudu, ni sa dei sara na uluvatu ni sa tara kina, ia kevaka sa taracake na tamata ena yavu oqo, ena sega ni bale rawa” (Ilamani 5:12).
O Elder Robert D. Hales, ka a sotava vakavuqa na vosoti ni cagilaba, ea tukuna, “Eda sotava kece na rarawa; ia na noda ivukivuki ki na rarawa e ka ni tamatayadua. Na rarawa e yaco vei keda ena dua vei rau na rua na sala. Na ka sotavi e rawa ni veivaqaqacotaki ka veisavai ni semati kei na vakabauta, se e rawa ni kaukauwa veivakarusai ena noda bula ke sega ni tiko na noda vakabauta ena veisorovaki solibula ni Turaga” (“Ena Vuki na Nomudou Rarawa Me Marau,” Ensign, Nov. 1983, 66).
Me rawa ni da marautaka na idrodro ka solia ko Jisu Karisito kei na Nona Veisorovaki, e dodonu me tiko na noda vakabauti Koya—e dua na vakabauta ka na vakatara meda talave sivita na mosi kecega ni rai yalani, vakavuravura. E sa yalataka oti tu oKoya ni na vakamamadataka na noda icolacola ke da lako mai Vua ena ka kece eda cakava.
“Dou lako mai vei au,” kaya oKoya, “oi kemudou vakaaduaga sa oca ka colata na icolacola bibi, ia kau na vakacegui kemudou.
“Vakataqara vei kemudou na noqu ivua, ka vuli vei au; niu sa yalomalua ka yalomalumalumu: dou na kunea kina na vakacegu ni yalomudou.
“Ni sa rawarawa na noqu ivua ka sa mamada na noqu icolacola” (Maciu 11:28–30; raica talega na Mosaia 24:14–15).
E sa tukuni “vei koya sa vakabauta e sa sega tale ni yaga me dua na ivakamacala. Vei koya sa sega ni vakabauta, sa sega ni dua rawa vua na ivakamacala.” (Na tamonivosa oqo e wili me nei Thomas Aquinas ia e rairai beka ni dua na vosamoici malumu ni veika e vakavulica) Ia, e yalani na noda kilamatata ni veika e yaco eke ena vuravura, ka vakavuqa ni dau sega ni tu na isau ni taro na vuna. Cava na vuna e yaco tiko kina oqo? Na cava na vuna e yaco tiko kina oqo vei au? Na cava beka au rawa ni vulica? Ni dau levei keda na isaunitaro, oya na gauna e yaga taucoko kina na vosa ka a vakatakila na noda iVakabula vua na Parofita o Josefa Simici ena Valeniveivesu mai Li-pati:
“Ia, na luvequ me vakacegu na yalomu, raica sa lekaleka walega na gauna ni nomu rarawa kei na vutugu;
“Ia kevaka ko sa vosota rawa, ena laveti iko cake na Kalou” (Vunau kei na Veiyalayalat 121:7–8
E dina ni levu na tamata e vakabau ti Jisu Karisito sara ga, na taro levu oya eda vakabauti Koya se eda vakabauta na veika e vakatavulici keda kina oKoya ka kerea meda cakava. E rawa beka ni dua ena nanuma, “Na cava e kila o Jisu Karisito me baleta na ka e yaco tiko vei au? E kila vakacava oKoya na ka au gadreva meu marau kina?”. E dina, ni na noda Dauniveisereki kei na Dautataro ka a tukuna tiko na parofita o Aisea ni a kaya:
“Sa beci Koya ka biuta ko ira na tamata, sa tamata e dau rarawa na lomana, sa dau kila ka rarawa. …
“E dina sa colata ko koya na noda rarawa, ka sa colata na rarawa ni lomada:
Ia sa vakamavoataki ko Koya ena vuku ni noda talaidredre, ka sa qaqi ena vuku ni noda caka cala; sa tau vua na cudruvi sa vuni noda veivinakati tale; ia ena we ni kena kuita eda sa vakabulai kina” (Isaiah 53:3–5).
Ko Pita na iApositolo ea vakatavulici keda me baleta na iVakabula, ni a kaya, “Okoya ga vakai Koya ga ka colata na noda ivalavala ca ena yagona ena kauveilatai, meda mate tu ki na ivalavala ca, ka ia na ivalavala dodonu; ia sa we ni kena kuita dou sa vakabulai kina” (1 Pita 2:24).
E dina ga ni sa voleka tiko na bale ena lotu nei Pita, na nona vosa e sega ni tawana na rere se nuinuica; ia e vakatavulici ira na Yalododonu mera “marau,” e dina mada ni “dou sa vakararawataki ena dauvere e vuqa.” Ea vakasalataki keda o Pita ni “sa vakatovolei na [noda] vakabauta, …ni sa vakatovolei ena bukawaqa,” ena veimuataki ki na “vakavinavinaka, ka me dokai ka me vakacaucautaki, ni na rairai mai ko Jisu Karisito” kei na “bula ni yalo[da]” (1 Pita 1:6–7,9).
Ea kuria ko Pita:
A kaya na iApositolo o Pita: “Oi kemudou sa lomani, kakua ni kidacala ena vuku ni rarawa katakata sa yaco me vakatovolei kemudou, me vaka sa yacovi kemudou na ka tani.”
“Ia dou reki ga, ni dou sa vakaivotavota talega ena vakararawataki i Karisito; mo dou reki talega kina, ena reki vakaidina, ni na vakaraitaki ko koya ena iukuuku” (1 Peter 4:12–13).
Ea vakatavulica o Peresitedi Russell M. Nelson ni “Na yalododonu e rawa ni da marau tiko ena ituvaki ni bula kecega. … Ni vakanamata na noda bula ki na ituvatuva ni veivakabulai ni Kalou … vei Jisu Karisito kei na Nona kosipeli, eda na rawa ni vakila na reki veitalia na cava e yaco tiko—se sega ni yaco tiko—ena noda bula. Na reki e lako mai Vua vakakina ena Vukuna. Sai Koya na ivurevure ni reki kecega” (“Reki kei na Bulabula Vakayalo,” Liaona, Nove. 2016, 82).
E dina sara, ni rawarawa meda tukuna na ka oqo ni sega ni da tu ena lomadonu ni dua na cagilaba mai na noda rawa ni taurivaka e loma ni cagilaba. Ia me vaka niu tacimuni, au nuitaka ni o ni rawa ni vakila niu vinakata dina meu wasea kei kemuni na yaga nei Jisu Karisito kei na Nona Veisorovaki me idrodro duadua eda gadreva, se na cagilaba cava ga e tukilaka tiko na noda bula.
Au kila ni da sa luvena taucoko na Kalou, ka sa lomani keda oKoya, ka da sega ni tu taudua. Au sureti kemuni mo ni lako mai ka raica ni rawa ni vakamamadataka na nomuni icolacola oKoya ka me idrodro ko vakasaqara. Lako mai ka vukei ira na tani mera kunea na idrodro ka ra tagica dina voli. Lako mai ka mai tiko kei keimami ena idrodro oqo, ka na vukea mo vorata na cagilaba ni bula. E sega na vakatitiqa e lomaqu ni kevaka ko lako mai, ko na raica, ko na veivuke, ka ko na mai tiko.
Na parofita ko Alama e vakadinadinataka oqo vua na luvena ko Ilamani: “Ni’u sa kila ko ira kecega sa vakadinata na Kalou sa dau vukei ira ko koya ena nodra vakatovolei, kei na nodra leqa, kei na nodra vakararawataki, ia era na laveti cake ena siga mai muri” (Alama 36:3).
Na iVakabula vakataki Koya a kaya:
“O koya, me vakacegu kina na lomamudou … ; ena vukui Saioni; raica sa tu ena qeteqete ni ligaqu na nodra bula na tamata kecega; dou tiko lo, mo dou kila Ni’u sa Kalou. …
“O koya mo dou kakua kina ni rere, ni dou mate sara mada ga; ni sa sega ni taucoko na nomudou reki ena vuravura oqo, ia vei au sa taucoko sara na nomudou reki” (Vunau kei na Veiyalayalati 101:16, 36
Na serenilotu “Na Yaloqu Mo Vakanomodi,” ka dau tara na lomaqu ena vuqa na gauna, e tu kina e dua na itukutuku ni vakacegu ki yaloda. Na qaqana e vaqo:
Yaloqu tikolo: Na gauna sa toso
Me da tu kina kei na Turaga,
Yali kina na guce, tagi, na rere
Rarawa sa leca, lesu mai na reki dina.
Yaloqu tikolo: Veisau na tagi sa sivi,
Taqomaki, marau, da sota mai kea. (Sere ni Lotu, no. 68)
Ni da sota kei na cagilaba ni bula, au kila ni kevaka eda solia kece na noda igu ka vakararavi vei Jisu Karisito kei na Nona Veisorovaki me noda idrodro, eda na vakalougatataki ena sereki, vakacegu, kaukauwa, na ivalavala malua, kei na vakacegu ka da qara, ena veivakadeitaki ki yaloda ni sa oti na noda gauna ena vuravura oqo, eda na rogoca na vosa ni iVakavuvuli: “E vinaka, a tamata vinaka ka dina, ko sa dina ena ka e vica ga: curu ki na marau ni nomu turaga” (Maciu 25:21 Ena yaca i Jisu Karisito, emeni.