Masu ni Vakabauta
Ni da masu ena vakabauta, eda sa tiki bibi ena cakacaka ni Turaga me vakarautaki vuravura o Koya ki na iKarua ni Nona Lako Mai.
Na masu nei Elder Maynes ena itekivu ni imatai ni soqoni ni koniferedi raraba oqo sa saumi mai. Sa yaco vei keda na veivakauqeti mai na veitukutuku totoka kei na sereivakatagi rogo talei. Na yalayala nei Peresitedi Russell M. Nelson ni koniferedi oqo ena tawa guilecavi rawa sa tekivu me sa vakavotukana tiko mai.
Sa lesia oti tu o Peresitedi Nelson na yabaki oqo “me gauna ni kena vakananumi na yabaki 200 mai na gauna a rairai kina na Kalou na Tamada kei na Luvena Lomani, o Jisu Karisito ki vei Josefa Simici ena raivotu.” Sa sureti keda kina o Peresitedi Nelson meda dui lalawataka noda vakarautaki keda ki na koniferedi ni itukutuku ni veigauna oqo, ni kena vakananumi oqo a kaya o koya “sa na dua na igolegole cecere ni itukutuku ni Lotu, ka sa bibi sara kina na nomu itavi.”1
Me vakataki au, o a rairai rogoca beka na nona itukutuku ka tarogi iko, “Ena sala cava e bibi sara kina na noqu itavi?” O a rairai wilika se masulaka beka na veika a yaco ena Vakalesui Mai. E rairai beka, a levu cake mai na kena e liu, nomu a wilika na itukutuku ni veigauna o ya ena gauna a vakatakila kina na Kalou na Tamada na Luvena Daulomani. O a rairai wilika beka na veigauna a vosa kina na iVakabula vei ira na luve ni Tamada Vakalomalagi. Au kila niu a cakava kece oqori ka vuqa tale.
Au a raica na itukutuku eso niu wiliwili tiko baleta na matabete ni Kalou kei na dolavi na veitabagauna. Au a yalomalua niu kila ni noqu vakavakarau ki na koniferedi oqo sa igolegole cecere ki na noqu itukutuku ni bula. Au vakila na veisau ki na yaloqu. Au vakila niu sa vakavinavinaka vou. Au vakila niu sa vakasinaiti ena reki niu sa rawa meu sureti meu vakaitavi ena soqo ni marau oqo ni sa tomani tiko na Vakalesui Mai.
Au raitayalotaka nodra sa vakila tiko eso, baleta na vakavakarau matau, rekitaki vakalevu, nuidei vakalevu cake, ka yalodina me veiqaravi ena ituvaki cava ga e gadreva na Turaga.
Na soqo cecece sara eda sa rokova sa itekivu ni itabagauna sa oti a parofisaitaki, sa vakarautaka kina na Turaga na Nona Lotu kei ira na Nona tamata, o ira sa taura tu na Yacana, mera ciqomi Koya. Me tiki ni noda vakavakarau ki na Nona lako mai, ena laveti keda vakayadua o Koya meda tucake yani ki na noda ibolebole vakayalo kei na madigi e se bera vakadua ni laurai ena itukutuku ni vuravura oqo.
Ena Sepiteba, 1840, e ratou vakaraitaka na veika oqo na Parofita o Josefa Simici kei rau na nona daunivakasala ena Mataveiliutaki Taumada: “Na cakacaka ni Turaga ena ivakataotioti ni gauna, sa vakaitamera dina na kena levu ka voleka ni na sega ni rawa ni da vakila na kena titobu. Na kena lagilagi e sega ni tukuni rawa, kei na kena totoka e sega ni uasiviti rawa. Na kena ulutaga era sa bulataki tu e lomadra na parofita kei ira na tamata savasava vakatekivu mai na buli kei vuravura ka curuma yani na veitabatamata veitaravi ki na gauna oqo; ka sa itabagauna dina ni taucoko ni gauna, ni veika kece sa tu vei Karisito Jisu, e lomalagi se e vuravura, era na komuni vata mai Vua, ka ra vakalesui mai na veika kecega, me vaka era sa kaya tu mai na parofita savasava mai na vakatekivu kei vuravura; ni na yaco kina na veika lagilagi a yalataki tu vei ira na tamadra, vakakina na kena yaco me cecere, lagilagi, ka vakasakiti sara na kaukauwa nei Koya sa Cecere Sara. …
Me qai tukuni: “Eda vakila ni sa lomada sara meda gole yani ki liu ka cokota vata na noda igu ki na kena tarai cake na Matanitu, ka tauyavutaka na Matabete ena kena taucoko kei na kena lagilagi. Na cakacaka e dodonu me vakayacori rawa ena iotioti ni gauna oqo sa rui ka bibi sara, ka sa na kacivi kina na nodra igu, kila, taledi, kei na gugumatua na Yalododonu, me rawa kina ni toso ki liu ena kena lagilagi kei na cecere o ya a vakamacalataka o parofita [Taniela] [raica na Taniela 2:34–35, 44–45]; ka na gadrevi tikoga kina na nodra raicamatua tiko na Yalododonu, me vakayacori rawa na cakacaka e vakaitamera ka vakasakiti.”2
E vuqa na veika digitaki meda na cakava kei na gauna eda na cakava kina ena Vakalesui Mai sa cereki era se bera ni vakatakilai mai. Ia ena gauna mada ga e liu o ya e ratou sa kila tu na Mataveiliutaki Taumada eso na levu kei na titobu ni cakacaka ni Turaga sa tuvanaka tu e matada. Oqo e vica na ivakaraitaki ni veika eda sa kila tu ni na yaco:
Maivei ira na Nona Yalododonu, ena solia mai na Turaga na isolisoli ni Nona kosipeli “ki na veimatanitu, veimataqali, duivosavosa, kei ira na tamata.”3 Na tekinolaji kei na caka mana ena tomana tiko na nodrau itavi—vakakina na tamata yadua mera “gonedau ni tamata”4 era sa veiqaravi ena kaukauwa kei na vakabauta sa tubu cake tikoga.
Oi keda na tamata eda na duavata vakalevu cake ena gauna ni veisaqasaqa sa tubu cake tiko. Eda na soqoni vata ena kaukauwa vakayalo ni ilawalawa kei na vuvale era sa vakasinaiti tu ena rarama ni kosipeli.
Na vuravura tawavakabauta mada ga oqo ena kila Na Lotu i Jisu Karisito ni Yalododonu Edaidai ka kila na kaukauwa ni Kalou sa tiko kina. O ira na tisaipeli yalodina ka qaqa era na taura vei ira ena yaloqaqa, ena yalomalua, e matanalevu na yaca i Karisito ena nodra bula e veisiga.
Ena sala cava, meda qai vakaitavitaki keda yadua kina ena cakacaka oqo e vakaitamera ka vakasakiti? Sa vakatavulica oti o Peresitedi Nelson na sala meda tubu kina ena kaukauwa vakayalo. Ni da taura na veivutuni me madigi rekitaki ena vuku ni tubu ni noda vakabauti Jisu ni sa Karisito, ni da sa kila vinaka ka vakabauta ni Tamada Vakalomalagi sa dau rogoca na noda masu yadua, ni da sasagataka meda talairawarawa ka bulataka na ivakaro, eda na tubu ena noda kaukauwa meda ciqoma tikoga na ivakatakila. Na Yalo Tabu sa rawa me noda itokani voli tiko. Eda na vakila na rarama ni tiko kei keda ena gauna mada ga na vuravura voliti keda tu sa butobuto sara.
Sa ivakaraitaki o Josefa Simici baleta na sala meda tubu ena kaukauwa vakayalo vakaoqo. A vakaraitaka vei keda ni masu ni vakabauta sa idola ki na ivakatakila mai vua na Kalou. A masu o koya ena vakabauta, ka vakadinata ni Kalou na Tamada ena sauma na nona masu. A masu o koya ena vakabauta, ka vakadinata ni sa maivei Jisu Karisito duadua ga ena sereki kina o koya mai na nona kila ni sa ivalavala ca. Ka a masu o koya ena vakabauta, ka vakadinata ni sa gadreva sara me kunea na Lotu dina i Jisu Karisito me rawata kina na veivosoti.
Ena gauna taucoko ni nona cakacaka vakaparofita, a vakayagataka o Josefa Simici na masu ena vakabauta me rawata tikoga mai kina na ivakatakila. Ni da sotava tu nikua na kena ibolebole kei na kena ena yaco mai, eda na gadreva talega meda cakava na ivakarau vata oqo. A kaya o Peresitedi Brigham Young, “Au sega ni kila e dua tale na sala vei ira na Yalododonu Edaidai ia me sa yaco ga na nodra icegu yadua me sa na masu ga vua na Kalou me dusimaka ka tuvanaki ira na nona tamata.”5
Na qaqanimasu oqo ni sakaramede me sa matata tiko ena noda bula e veisiga: “Ka dau nanumi koya tiko ga.” Na “Koya” e tukuni Jisu Karisito tiko. Na vosa e tarava, “ka muria na nona ivakaro,” sa tukuna tiko vei keda na ibalebale ni daunanumi Koya tiko ga.6 Ni da sa daunanumi Jisu Karisito tiko ga, eda rawa ni taroga ena masumasu lo, “Na cava ena vinakata o Koya meu na cakava?”
Na masu vakaoqo, e cabori ni vakabauti tiko o Jisu Karisito, sa muataki tiko ena iotioti ni itabagauna oqo. Ka sa yaco me tiko e yaloda ni veitikida yadua me yavala tiko ena kena cereki tiko ga. Au sa raica, me vakataki kemuni, na ivakaraitaki totoka ni masu vakaoqo.
A kena isevu o Josefa Simici. A masu ena vakabauta vaka na gone baleta na ka e vinakata vua na Turaga me cakava. Na Nona isau a veisautaka na itukutuku kei vuravura.
Kivei au, sa lesoni bibi na ka a cakava o Josefa ni sa vesuki koya o Setani ni sa tekiduru o Josefa me masu.
Au kila mai na veika au sotava ni dau saga o Setani kei ira na nona italai meda dau nanuma meda kakua ni masu. Ena gauna sa saga kina ena nona kaukauwa taucoko o Josefa Simici me masu vua na Kalou me sereki koya mai na kaukauwa sa saga tiko me vesuki koya, sa saumi mai na nona masu me sereki ena nona sa rairai mai na Tamada Vakalomalagi kei Jisu Karisito.
Na sasaga nei Setani me tarova na kena tekivu na Vakalesui Mai a kaukauwa sara baleta ni sa ka bibi sara na masu nei Josefa. O iko kei au sa tiko na nodaru itavi lalai me caka ena Vakalesui Mai sa tomani tiko oqo. Ia na meca ni Vakalesui Mai ena saga me tarovi keda meda masu. Na ivakaraitaki ni vakabauta nei Josefa kei na nona yaloqaqa sa rawa me vaqaqacotaki keda ena noda cakacaka. Oqo e dua vei ira e vuqa na vuna sa dau oka ena noqu masu na vakavinavinaka vua na Tamada Vakalomalagi baleta na Parofita Josefa.
O Inosi ena iVola i Momani sa dua tale na ivakaraitaki qaqa ni noqu masu ni vakabauta niu saga meu cakava na noqu itavi ena kena tomani tiko na Vakalesui Mai. Se cava sara na nomu itavi, sa rawa mo tauri koya me sa nomu dauveituberi.
Me vakataki Josefa, a masu o Inosi ena vakabauta. A vakamacala vakaoqo na ka a yaco vua:
“Ka sa waloloi na yaloqu; ka’u tekiduru e matana na noqu Dauveibuli, kau a tagi vua ena masu kaukauwa kei na yalo ni vakatakekere me baleta na yaloqu; kau tagi tikoga vua ena siga taucoko; io, ni sa bogi mai au sa tabalaka cake tiko ga na domoqu me yaco ki lomalagi.
“Ka sa rogo mai vei au e dua na domo, ka kaya: Inosi, sa vosoti na nomu ivalavala ca, ka ko na vakalougatataki.
“Ia ko i au ko Inosi, au kila ni sega ni rawa ni lasu na Kalou; o koya, sa seyavu kina mai yaloqu na noqu kila na noqu cala.
“Kau sa kaya: Turaga, sa caka rawa vakacava?
“Ka sa kaya vei au ko koya: Ena vuku ni nomu vakabauti Karisito, o koya ko sa sega mada ni bau rogoca se raica. Ka na oti mada e vuqa na yabaki ena qai vakaraitaki Koya mai vakayago; o koya gona, mo lako yani, sa vakabulai iko na nomu vakabauta.”7
Na lesoni a vakalougatataki au sa tiko ena vosa oqo: “Ena vuku ni nomu vakabauti Karisito, o koya ko sa sega mada ni bau rogoca se raica.”
Ena nona vakabauti Karisito o Josefa a gole kina ki na veikau ka me masu talega me sereki mai na kaukauwa nei Setani. A sega mada ni se bau raica na Tamana kei na Luvena, ia a masu ena vakabauta ena kaukauwa taucoko ni yalona.
Na veika a sotava o Inosi sa vakavulica vei au na lesoni talei vata ga. Ni au dau masu ena vakabauta, sa yaco na noqu iVakabula me noqu dauveimeautaki vei Tamada kau rawa ni vakila na noqu masu ni sa yaco ki lomalagi. Sa yaco mai na isau ni masu. Sa ciqomi na veivakalougatataki. Sa dau yaco na vakacegu kei na reki ena veigauna dredre.
Au nanuma lesu, niu se lewe vou kina ni Kuoramu ni iApositolo Le Tinikarua, ena noqu a tekiduru meu masu vata kei Elder David B. Haight. Na nona yabaki ni bula ena gauna o ya sa noqu yabaki ni bula nikua, kei na ibolebole vata ga au sotava tiko nikua. Au nanuma lesu na voqa ni nona masu. Au a sega ni dolava na mataqu meu rai, ia niu rogoca a vaka me a dredre tiko. A vosa vua na Tamada Vakalomalagi ena domo ni reki.
Au a rawa ni rogoca ena noqu vakasama na nona marau ni sa kaya “Ena yaca i Jisu Karisito.” Noqu rogoca sa vaka me vakila o Elder Haight ni sa vakadeitaka na iVakabula ena gauna o ya na itukutuku sa masulaka tiko vei Tamada. Kau sa vakadeitaka ni na ciqomi ena mata dredredre.
Na noda gumatua meda cakava na noda itavi ki na tomani totoka tiko na Vakalesui Mai ena vakalevutaki me tubu cake na noda vakabauti Jisu Karisito ni sa noda iVakabula kei na Tamada Vakalomalagi sa Tamada. Ni da masu ena vakabauta, eda sa tiki bibi ena cakacaka ni Turaga me vakarautaki vuravura o Koya ki na iKarua ni Nona Lako Mai. Sa noqu masu ni da na kunea kece na reki ni da cakava na cakacaka sa sureti keda kina vakayadua o Koya meda vakayacora.
Au vakadinadinataka ni bula tiko o Jisu Karisito. Oqo na Nona Lotu kei na matanitu e vuravura. O Josefa Simici na parofita ni Vakalesui Mai. Sa parofita ni Turaga e vuravura nikua o Peresitedi Russell M. Nelson. Sa taura tu o koya na idola kece ni matabete ena Lotu i Jisu Karisito ni Yalododonu Edaidai. Ena yacai Jisu Karisito, emeni.