Raica me Dodonu na Lewa
Me vakatauci na lewa savasava, na veisorovaki ni noda iVakabula ena samaka na duka ni lecaika kei na rarawa era vakavuni na tani.
Na iVola i Momani e Vakavulica na iVakavuvuli nei Karisito.
Ena Okotova sa oti, a bolei keda o Peresitedi Russell M. Nelson me da vakasamataka mada se na duatani vakacava na noda bula kevaka e kau tani vakasauri vei keda na “kilaka eda rawata mai na iVola i Momani?”1 Au sa vakasamataka vakatitobu na nona taro, au vakabauta ni levu vei kemuni e vakakina. E dua na vakasama e votu tiko mai vakawasoma—kevaka e sega na iVola i Momani kei na kena ivunau matata vinaka baleti Karisito kei na Nona isoro ni veivakaduavatataki, evei meu na gole kina meu kunea na vakacegu?
Na ivunau i Karisito—ka koto kina na ivakavuvuli veivakabulai kei na cakacaka vakalotu ni vakabauti Karisito, veivutuni, papitaiso, na isolisoli ni Yalo Tabu, kei na vosota me yacova na ivakataotioti—sa dau vakavuvulitaki vakavuqa ena ivolanikalou taucoko ni Veivakalesui mai ia e duatani ena iVola i Momani.2 E tekivu na ivunau ena vakabauti Karisito, ka vakatau na kena veitikina matailalai ena Nona isoro ni veivakaduavatataki.
Me vaka e vakavuvulitaka o Peresitedi Nelson, “Na iVola i Momani e vakarautaka na kilaka taucoko ka vakadonui duadua ni Veisorovaki i Jisu Karisito e rawa ni kunei ena veivanua cava ga.”3 Na levu ni noda kilaka ena isolisoli vakalou ni iVakabula, na levu ni noda na kila, ena noda vakasama kei na yaloda,4 na dina ni nona veivakadeitaki o Peresitedi Nelson “na dina ni iVola i Momani e tu kina na kaukauwa me veivakabulai, veivakaloga vinakataki, vakalesuya, vakamareqeta, vaqaqacotaka, vakaceguya ka vakamarautaka na yaloda.”5
Na Veisorovaki ni iVakabula e Sotava Kece na Gagadre ni Lewa Dodonu
E dua na cau bibi sara ka veisaututaki ni iVola i Momani ki na noda kila na Veisorovaki ni noda iVakabula sai koya na ivakavuvuli, ni nona solibula cecere na Karisito sa sotava taucoko sara na gagadre ni lewa dodonu. Me vaka e vakamacalataka o Alama: “o koya e mai sorovaka kina na Kalou vakataki koya na ivalavala ca ni kai vuravura, me rawa kina ni yaco na ituvatuva ni loloma cecere, me rogoci kina na tagi ni lewa dodonu, ni Kalou e vinaka sara, e Kalou dodonu, e Kalou daulololoma talega.”6 Na ituvatuva ni loloma cecere ni Tamada7—e kilai talega ena ivolanikalou me ituvatuva ni marau8 se na ituvatuva ni veivakabulai9—ena sega ni rawati vakavo kevaka sa rogoci mada na tagi ni lewadodonu.
Ia na cava mada e “tagica tiko na lewadodonu”? Vakasamataka mada na veika a sotava o Alama. Nanuma tiko ni se cauravou o Alama, sa dau segata ko koya “me vakacacana na lotu.” 10 A tukuna o Alama vua na luvena ko Ilamani ni a “vakararawataki ena mosi” baleta ni a dau “labati ira e vuqa na luvena na [Kalou]” ena nona “kauti ira tani ki na rusa.”11
A vakamacalataka vei Ilamani o Alama ni a qai yaco mai vua na vakacegu ni sa qai “nanuma rawa” na ivakavuvuli nei tamana baleta na “nona lako mai …ko Jisu Karisito … me mai sorovaka na ivalavala ca ni vuravura.”12 A vakatakerea o Alama ena yalo veivutuni na loloma cecere i Karisito13 ka qai reki na yalona ka vakacegu ni sa qai kila ni a sorovaka na nona ivalavala ca na Karisito ka sauma na gagadre kece sara ni lewadodonu. Vakadua tale, na cava beka ena gadreva mai vei Alama na lewadodonu? Me vaka a qai vakavuvulitaka e muri o Alama, “ena sega ni dua na ka dukadukali me na taukena na matanitu ni Kalou.”14 Oqori sa dua kina na iwase ni vakacegu nei Alama sai koya, vakavo kevaka e curu mai na loloma cecere, ena tarova nona lesu tale me lai bula vata kei Tamada Vakalomalagi na lewadodonu.15
E Vaka Mamaca taka na iVakabula na Mavoa eda Sega ni Rawa ni da Vaka Mamaca taka
Ia a baleti koya vakatabakidua ga na reki nei Alama—ena nona sa levea beka na itotogi ka nona rawa me lesu tale vei Tamada? Eda kila talega ni a rarawa o Alama ena vukudra o ira a vagolei ira tani mai na dina.16 Ia a sega ni rawa vei Alama me vakabulai ira se vakalesui ira tale mai, a vagolei ira tani. A sega ni rawa ni vakadeitaka vakataki koya ni na rawa ni soli vei ira e dua na madigi savasava me ra vulica na ivunau i Karisito ka ra vakalougatataki me ra bulataka na kena ivakavuvuli rekitaki. Ena sega ni rawa ni vakalesui ira mai era sa mate ka ra se mataboko tu ga ena nona ivakavuvuli lasu.
Me vaka a vakavuvulitaka ena dua na gauna o Peresitedi Boyd K. Packer: “Oqo na vakanananu a vueti Alama: Me vakalesui mai na veika e sega ni rawa ni o vakalesuya mai, vakamamacataka na mavoa e sega ni rawa ni o vakamamacataka, vakavinakataka na veika o vakacacana ka sega ni rawa ni o vakavinakataka sai koya sara ga na inaki ni veisorovaki i Jisu Karisito.”17 Na dina rekitaki a “nanuma rawa” na vakasama nei Alama ni sega ni o koya ga e rawa ni vakasavasavataki ia o ira talega a vakamavoataka e rawa ni ra vakabulai ka vakataucokotaki.
Na Veisorovaki ni Vakabula e Vakavuna na Lewa Dodonu
Ena vica na yabaki ni se bera ni vueti o Alama ena ivunau veivakadeitaki oya, a vakavuvulitaka na Tui o Penijamini na rabailevu ni veivakabulai e cauraka na nona isoro ni veivakaduavatataki na iVakabula. A cavuta na Tui o Peniijamini ni a tukuna vua “e dua na agilosi ni Kalou” “na itukutuku marautaki ni reki levu.18 Ena itukutuku marautaki oqori sa koto kina na dina ni na mai vakararawataki na iVakabula ka vakamatei ena vuku ni noda ivalavala ca kei na cala me yaco mai kina “na lewa dodonu vei ira na luve ni tamata.”19
Na cava sara mada e gadreva e dua na “lewa dodonu”? Ena tikina ka tarava, e vakamacalataka kina na Tui o Penijamini, me yaco e dua na lewa dodonu, sa sorovaka kina na dra ni iVakabula “na nodra ivalavala ca o ira era lutu mai na talaidredre i Atama” vakakina “o ira era a mate ni ra se sega tu ni kila na loma ni Kalou me baleti ira, se o ira era ivalavala ca ena dela ni lecaika.”20 Sa gadrevi talega ena dua na lewa dodonu, e vakavuvulitaka ko koya, ni “dra i Karisito sa sorovaka” na nodra ivalavala ca na gonelalai.21
E vakavuvulitaki ena ivolanikalou eso oqo e dua na ivunau lagilagi—na nona isoro ni veivakaduavatataki na iVakabula e solia na veivakabulai, soli wale, vei ira era ivalavala ca ena dela ni lecaika, vei ira, me vaka e tukuna o Jekope, “a sega ni soli vei ira e dua na lawa.”22 Na isau ni ivalavala ca ena vakatau ena rarama sa soli vei keda kei na yalomatua ni vakatulewa.23 Eda qai kila walega na dina veivakabulai ka veivakacegui oqo baleta na iVola I Momani kei na so tale na ivolanikalou ni Veivakalesui mai.24
Sa dina sara, ni sa soli na lawa, ni da sega ni lecaika tu ena loma ni Kalou, eda na saumitaro. Me vaka e tukuna vakabibi na Tui o Penijamini: “Ia ena ca, ena ca vei koya sa kila tu ni sa saqata tiko na Kalou! Ni na sega ni yaco na veivakabulai vua e dua sa vakaoqo, ka vakavo ga ena veivutuni kei na vakabauta na Turaga ko Jisu Karisito.25
Oqo talega na itukutuku ni marau ni vunau i Karisito. E sega walega ni vakabulai ira ka vakalesui ira mai era ivalavala ca ena dela ni lecaika na iVakabula ia vei ira talega era vorata na rarama sa tu vei ira, sa tuvakarau me veivakabulai na iVakabula ni sa yaco na veivutuni ka vakabauti o Koya.26
A qai “nanuma rawa” beka o Alama na dina ruarua oqo. Ena vakila dina beka o Alama na ka e vakatoka me “marau … gasagasa”27 kevaka a nanuma ni sa vakabulai koya ko Karisito ia qai laiva me ra rarawa tu o ira a vagolei ira tani mai na dina o koya? E sega sara. Me vakila o Alama na taucoko ni vakacegu, era gadreva talega o ira a vagolei ira tani o koya na madigi me rawa ni ra vakataucokotaki kina.
Ia ena rawa sara mada vakacava, me ra vakataucokotaki o ira, se o ira era a vakacala? E dina ni da sega ni kila taucoko sara na veiwalewale tabu e veivakabulai ka veivakalesui mai kina na nona isoro ni veivakaduavatataki na iVakabula, eda kila kevaka me na yaco e dua na lewa dodonu, ena vagalalataka mada na iVakabula na domedome ni lecaika kei na voto mosimosi ni mavoa era vakavuna na tani.28 Ena ka oqo ena vakadeitaka o Koya me soli vei ira kece na luve ni Kalou na madigi, kei na rai matata, me ra digitaka me ra muri Koya ka ciqoma na ituvatuva cecere ni marau.29
Ena Vakavinakataka na iVakabula na Veika Kecega Eda Vakacacana
Na dina oqo sai koya e kauta mai na vakacegu vei Alama. Na dina talega oqo e dodonu me kauta mai vei keda na vakacegu cecere talega. Ni da tamata vakayago, eda dau sota, se so na gauna eda veicoqacoqa ka vakavuna na mavoa. E rawa ni ra vakadinadinataka na itubutubu kecega, na mosi e salavata kei na noda cala e sega ni o koya ga na rerevaki ni keda itotogi ia na nuuiqawaqawa ni da sa yalana beka na nodra marau na luveda se da vakalatia na nodra rai mai na nodra raica ka kila na dina. Na yalayala lagilagi ni nona isoro ni veivakaduavatataki na iVakabula sai koya, ena noda cala na itubutubu, ena sega ni taroga vei ira na luveda ka yalataka na veivakabulai ena vukudra.30 Kevaka sara mada ga era ivalavala ca ni ra sa kila tu—me vaka eda dau cakava kece—sa dodo tu na Ligana ni loloma cecere31ka na vueti ira o Koya, kevaka walega era na rai Vua me ra bula.32
E dina ni rawa vua na iVakabula me vakavinakataka na veika eda sega ni rawata, sa vakaroti keda o Koya me da vakavinakataka na veika kece eda rawata me tiki ni noda veivutuni.33 Na noda ivalavala ca kei na noda cala e sega walega ni vakayalia na keda isema vua na Kalou ia na keda isema talega vei ira na tani. Ena so na gauna ena taura wale beka ga e dua na kere veivosoti na noda sasaga me da vakamamacataka ka vakalesuya mai, ia ena so tale na gauna ena taura e vica na yabaki ni sasaga ena yalomalumalumu me vakavinakataki na veika eda vakacacana.34 Ia, ena vuqa na noda ivalavala ca kei na cala, eda sega ni rawa ni dau vakamamacataka sara vakavinaka na we ni mavoa eda vakavuna vei ira eso. Na yalayala vakasakiti, veivakacegui ni iVola i Momani kei na kosipeli vakalesui mai sai koya ni na vakavinakataka na iVakabula na veika eda sa voroka.35 Ka na vakavinakataki keda talega o Koya kevaka eda gole Vua ena vakabauta ka veivutunitaka na cala eda sa vakavuna.36 Sa solia tu o Koya na isolisoli kece oqo baleta ni lomani keda kece ena loloma vinaka sara37vakakina ni sa Nona inaki me vakayacora na lewa dodonu me rokovi kina na lewa dodonu kei na loloma cecere. Au vakadinadinataka ni dina na veika oqo ena yaca i Jisu Karisito, emeni.