E Dua na iVakadinadina Bula i Karisito sa Bula Tiko

Mai vei Bisopi Gérald Caussé

Bisopi Vakatulewa

Na ulu ni itukutuku ni iVola i Momani o ya na kena vakalesui mai na kila-ka dina baleta na ilesilesi bibi i Jisu Karisito ena nodra vakabulai ka bula vakacerecerei na kawatamata.

Ena dua na siga katakata ni vulaitubutubu ni 2017, sa vakacagau tiko na siga dolavi raraba ni Valetabu e Paris Varanise a gole sara e dua na turaga e mata rarawa tu vua e dua na dauveivakasarasarataki. A kaya ni tiko volekata ga na valetabu ka vakadeitaka ni dau saqata vakaukauwa na kena tara na valetabu oqo. A kaya ni dua na siga ni rai toka mai ena nona katubaleka, a raica sara ni sa vakatukuca sobu tiko mai cake na kereni levu e dua na ivakatakarakara i Jisu ka vakatikora malua sara ena rara ni valetabu. A kaya sara na turaga oqo ni ka a raica oqo a veisautaka sara ga vakadua na nona nanuma baleta na noda Lotu. A qai kila kina ni da sa daumuri Jisu Karisito ka sa kerea na noda veivosoti ena vuku ni veivakacacani taumada a rairai vakayacora.

Na ivakatakarakara e biu ena Valetabu e Parisi Varanise

Na ivakatakarakara i Karisito, e saunaka tu na rara ni Valetabu e Paris kei na itikotiko eso ni Lotu, era vakadinadinataka na noda lomana na iVakabula. Na ivakatakarakara mapolo taumada a cakava o Bertel Thorvaldsen na kai Denmark daunidroini, a ceuta ena 1820—na yabaki vata ga ni iMatai ni Raivotu. E duri tu na ivakatakarakara oqo ena kena duidui sara mai na vuqa na ivakatakarakara ena gauna o ya, ka vakatakarakarataka vakalevu na vakarawarawataki i Karisito ena kauveilatai. Na cakacaka nei Thorvaldsen e tukuna tiko na Karisito sa bula tiko, a rawata me qaqa mai na mate kei na nona dodoliga tu mai, e sureta tu na tamata kecega mera lako Vua. Na mawe walega ni ivako e ligana kei na yavana kei na mavoa e sarisarina sa vakadinadinataka na mosi rarawa sega ni vakamacalataki rawa a vosota me ra vakabulai na kawatamata kecega.

Na ligana na iVakabula me vaka e laurai ena Christus

E rairai dua beka na vuna vei keda na lewe ni Lotu i Jisu Karisito ni Yalododonu Edaidai eda taleitaka kina na ivakatakarakara oqo ni vakavotuya vei keda na ivakamacala e tiko ena iVola i Momani baleta na nona a rairai na iVakabula ena vanua o Amerika:

“Ka raica ni sa siro sobu mai lomalagi e dua na Tamata; sa vakaisulu ena icurucuru vulavula; a sa lako sobu mai ka tu ena kedra maliwa. …

“Ka sa yaco ni sa dodoka yani na ligana ka vosa vei ira na tamata ka kaya:

“Raica, koi Au ko Jisu Karisito, …

“… Kau sa gunu oti mai na bilo wiwi ka a solia vei au na Tamada, ena noqu colata na ivalavala ca ni vuravura me vakalagilagi kina ko Tamada.”¹

A qai sureta ira yadua na tagane, yalewa, kei na gone mera lako mai ka daramaka na ligadra e sarisarina ka tara na we ni ivako e ligana kei na yavana, mera vakadinadinataka vakai ira yadua ni sai Koya dina na Mesaia a waraki tu mai vakabalavu.²

Na irairai totoka oqo sai koya na usutu cececre ni iVola i Momani. Na “itukutuku vinaka” taucoko ni kosipeli sa umanaki tu ena ivakatakarakara ni iVakabula, ni sa dodoka tu mai vakavinaka na “liga ni Nona loloma cecere”³sa sureta tiko na tamata yadua mera lako mai Vua ka ciqoma na veivakalougatataki ni Nona Veisorovaki.

Na ulu ni itukutuku ni iVola i Momani o ya na kena vakalesui mai na kila-ka dina baleta na ilesilesi bibi i Jisu Karisito ena nodra vakabulai ka bula vakacerecerei na kawatamata. Na ulutaga oqo sa voqataki mai na draunipepa ni ivakamacala taumada me yacova sara na iotioti ni vosa ni iotioti ni kena wase. Ena veisenitiuri ni vukitani kei na veilecayaki vakayalo, sa mai yali se vakacacani kina na ibalebale titobu ni ka a cakava na Karisito mai Kecisemani vakakina e Kolikoca. A rairai marautaka sara o Josefa Simici, ena nona vakadewataka tiko na 1 Nifai, a raica kina na yalayala totoka oqo: “Na ivola e muri oqo [na iVola i Momani] … ena vakadeitaka na dina ni imatai [na iVola Tabu] … ka na tukuna na veika macala vinaka ka talei ka a kau tani mai kina; ka na tukuna vei ira na veimataqali duivosavosa, kei ira na tamata, ni sa Luve ni Tamada Tawamudu na Lami ni Kalou, ka sa iVakabula kei vuravura; ka sa dodonu me ra lako mai vua na tamata kecega, ke sega, era na sega ni rawa ni vakabulai.”⁴

Na veika dina e matata ka talei me baleta na Veisorovaki ni iVakabula sa robota tu na iVola i Momani Niu sa mai vola e vica na dina oqo, au sureti kemuni mo ni vakasamataka mada na kena sa veisautaka se rawa ni veisautaka na nomu bula.

Na Veisorovaki i Jisu Karisito sa isolisoli sega ni saumi sa soli kivei ira kece era sa bula oti mai era bula tiko ena gauna oqo vata kei ira era na mai bula voli ena vuravura oqo.⁵
Me ikuri ni nona sa mai colata na noda ivalavala ca, sa taura na Karisito kivei Koya na noda mosi, malumalumu, rarawa, tauvimate, kei na veivakararawataki sa kovuti tu ena bula vakayago ni tamata. Sa sega na vutugu, mosi, se rarawa a sega ni vakararawataki kina o Koya ena vukuda.⁶
Ena solibula veisorovaki ni iVakabula sa rawa kina meda qaqa mai na revurevu ca ni Lutu nei Atama, oka kina na mate vakayago. Ena vuku i Karisito, o ira kece na luve ni Kalou era a sucu ena vuravura oqo, se cava ga nodra ivalavala dodonu, ena yaco me vakaduavatataki kina na yalodra kei na yagodra ena kaukauwa ni Tucake Tale⁷ka lesu Vua me ra “lewai me vaka na nodra ivalavala.”⁸
Ni vakadutaitaki, na ciqomi ni veivakalougatataki kece ni Veisorovaki ni iVakabula sa na vakatau ki na noda gugumatua tiko⁹ ena kena bulataki na “ivakavuvuli i Karisito.”¹⁰ Ena nona tadra, a raica kina o Liai na “sala qiqo ka rabalailai”¹¹ e mua yani ki na vunikau ni bula. Na vuana, e vakatakarakarataka tiko na loloma ni Kalou mai na veivakalougatataki cecere ni Veisorovaki i Karisito, “sa talei ka gadrevi duadua … [ka sa] isolisoli levu duadua vei ira na isolisoli kecega ni Kalou.”¹² Ena kena gadrevi me tauri na vuanikau oqo, e dodonu meda na vakabauti Jisu Karisito, veivutuni, ka “rogoca na vosa ni Kalou,”¹³ ciqoma na cakacaka vakalotu bibi, ka maroroya na veiyalayalati tabu me yacova na iotioti ni noda bula.¹⁴
Ena Nona Veisorovaki, a sega walega ni vakasavasavataka laivi o Jisu Karisito na noda ivalavala ca, ia a vakarautaka talega na kaukauwa gugumatuame rawa vei ira na Nona tisaipeli mera “[biuta laivi] na tamata vakavuravura,”¹⁵tubu cake ena “vosa ena vosa,”¹⁶ka vakalevutaki nodra bula savasava¹⁷me rawa ni dua na siga mera tamata sa uasivi sara ena ituvaki i Karisito,¹⁸ ka rawata me ra bula vata tale kei na Kalou¹⁹ka me nodra na veivakalougatataki kece ni matanitu vakalomalagi.²⁰

E dua tale na dina veivakacegui e tiko ena iVola i Momani sai koya, ni dina ga sa tawamudu ka rabailevu na kena inaki, na Veisorovaki ni Turaga sa isolisoli ni loloma totoka yadua, e rauti keda na tamata yadua.²¹ Me vaka ga na veisureti i Jisu vei ira yadua na tisaipeli Nifaiti mera tara na Nona mavoa, a mate o Koya ena vukuda, yadua sara, me vaka ga o iko se o au a tamata duadua ga a tu e vuravura. Sa vakaraitaka mai na nona sureti keda vakayadua meda lako mai Vua ka taura na veivakalougatataki totoka ni Nona Veisorovaki.²²

Na ituvaki vakatamata ni Veisorovaki i Karisito sa ka dina sara ni da raica na nodra ivakaraitaki na tagane kei na yalewa qaqa ena iVola i Momani. Eso vei ira o ya o Inosi, Alama, Sisaromi, Tui Lamonai kei na watina, kei ira na tamata i Penijamini na Tui. Na kedra italanoa ni saumaki kei na ivakadinadina qaqa e vakarautaka e dua na ivakadinadina bula ni sala eso e rawa ni veisau kina na yaloda ka vakavoutaki na noda bula ena vinaka tawamudu kei na loloma veivueti ni Turaga.²³

E tarogi ira na nona tamata na parofita o Alama na taro oqo. “Kevaka ko ni sa sotava oti na veisau ni lomamuni, ka ko ni sa nanuma mo ni lagata na sere ni veisereki loloma, au na taroga, e rawa mo ni sa vakila ena gauna oqo?”²⁴ Sa ka bibi sara nikua na taro oqo, baleta ni da sa tisaipeli ni Turaga, e dodonu me noda itokani tiko na Nona kaukauwa veivueti, me vakauqeti keda, ka veisautaki keda e veisiga yadua kecega.

Na taro nei Alama sa rawa me moici ka tarogi vakaoqo: na iotioti ni gauna cava o a vakila kina na veivakayarayarataki kamica ni Veisorovaki ni iVakabula ena nomu bula? E dau yaco oqo ni ko vakila na “totoka kei na kena gasagasa” na reki²⁵ e yaco vei iko e vakadinadinataka tiko ki yalomu ni sa vosoti na nomu ivalavala ca; se ena gauna sa vakasauri ga na kena sa mamada na veivakatovolei rarawa; se ena gauna sa malumalumu kina na yalomu ka rawa mo vakaraitaka ni ko sa vosota e dua e vakamavoataka na yalomu. Se ena veigauna yadua o sa raica ni sa tubu cake nomu rawa mo lomana ka qaravi ira eso, se na cakacaka ni veivakasavasavataki sa vukica mo tamata vou, me vakataka na ivakaraitaki ni iVakabula.²⁶

Au sa vakadinadinataka ni veika kece sa sotavi oqo era sa ka dina ka sa ivakadinadina ni sa rawa me veisau na bula ena vakabauti Jisu Karisito kei na Nona Veisorovaki. Na iVola i Momani sa vakamatatataka ka vakarabailevutaka na noda kila baleta na isolisoli cecere oqo. Ni ko vulica na ivola oqo, o na rogoca na domo i Karisito sa bula tiko sa sureti iko tiko mo lako mai Vua. Au sa yalataka kevaka mo na ciqoma na veisureti oqo ka tuvanaka na nomu bula me vakataki Koya, ena yaco na Nona veivakauqeti veivueti ki na nomu bula. Ena kaukauwa ni Yalo Tabu, ena vakavoutaki iko na iVakabula ena veisiga yadua “me yacova na siga uasivi ko ya”²⁷ena gauna ni ko, ena Nona kaya, “Raica na mataqu ka kila ni sai au.”²⁸ Ena yacai Jisu Karisito, emeni.