iTinitini ni Vosa

Mai vei Peresitedi Russell M. Nelson

Na bula kilikili ni tamata yadua e gadrevi kina na taucoko ni saumaki mai, ni vakasama kei na uto me vaka taka na Turaga.

Oi kemuni na taciqu kei na ganequ, ni da sa rorova mai na icavacava ni koniferedi vakairogorogo oqo, au tomani kemuni ena vakavinavinaka vua na Turaga ena Nona veivakauqeti veilaveti kei na veitaqomaki. Eda sa marautaka dina e dua na kanamagiti vakayalo.

Eda kila ni na kauta mai na inuinui kei na reki na kosipeli vakalesui mai i Jisu Karisito vei ira na tamata era na rogoca ka muria na Nona ivunau. Eda kila talega ni rawa ni yaco me itikotiko dina ni vakabauta na vuvale yadua, ni sa vakaitikotiko kina na sautu, veilomani, kei na Yalo ni Turaga.

Ka dina sara, na ulu ni Veivakalesui mai vakaiukuuku na vale tabu. Na kena veicakacaka vakalotu tabu kei na veiyalayalati era sa itakele ni nodra vakarautaki na tamata era sa vakarau tu me ra kidavaka na iVakabula ena iKarua ni Nona Lako Mai. Ena gauna oqo sa 166 tu na noda valetabu vakatabui, ka levu tale era na yaco mai.

Ena dolavi raraba na vale ni vakarau me vakatabui e dua na valetabu tara vou se vakavoui. E levu na itokani era sega ni lewena noda vakabauta era na sarava na veivaletabu oqori ka ra vulica e dua na ka vou me baleta na veivakalougatataki ni valetabu. Eso vei ira na vulagi oqori era na vakauqeti me ra kila eso tale na ka. Eso era na taroga ena gagadre dina me ra na rawata vakacava na veivakalougatataki ni valetabu.

Ni da lewe ni Lotu, ena gadrevi me da vakarau tu me da sauma nodra taro. E rawa ni da vakamacalataka ni veivakalougatataki ni valetabu sa vakarautaki tu vei ira kecega era na vakarautaki ira. Ia ni se bera ni rawa ni ra curuma e dua na valetabu vakatabui, e dodonu me ra na vakadonui mada. E vinakata na Turaga me ra vakaivotavota na Luvena kece sara ena veivakalougatataki tawamudu sa vakarautaki tu ena Nona valetabu. Sa dusia o Koya na ka me na cakava e dua me vakadonui kina me curuma Nona vale tabu.

E dua na vanua vinaka me da tekivuna kina na madigi ni veivakavulici vakaoqo o ya me da vagolea na vakasama ki na vosa toka ena tautuba ni valetabu: “Me Ssavasava Vua na Turaga: na vale ni Turaga.” Na itukutuku nei Peresitedi Eyring nikua kei na vuqa tale sa vakauqeti keda me da savasava vakalevu cake. Na valetabu yadua e vanua savasava; na petereni yadua ni valetabu e tovolea me yaco me savasava vakalevu cake.

Na veika kece e gadrevi me rawa ni curumi kina na valetabu e baleta na savasava ni tamata yadua. Me rawati na tuvakarau oya, na tamata yadua e gadreva me marautaka na veivakalougatataki ni valetabu me na vakatarogi vakarua: taumada vata kei na bisopi, daunivakasala ena matabisopi, se peresitedi ni tabana; ikarua vata kei na peresitedi ni iteki se tabana ni kaulotu se dua vei rau nona daunivakasala. Ena veivakatarogi oqori, ena tarogi kina e vica na taro.

Eso na taro oqori sa veisau me matata kina. Au gadreva meu railesuva vata kei kemuni ena gauna oqo:

Ko vakabauta ka vakadinadinataka na Kalou, na Tamada Tawamudu; kei na Luvena, o Jisu Karisito; kei na Yalo Tabu?
E dua tiko li na nomu ivakadinadina ni Nona Veisorovaki o Jisu Karisito kei na Nona itavi vaka nomu iVakabula ka Dauveivueti?
E dua tiko li na nomu ivakadinadina ni kena Vakalesui mai na kosipeli i Jisu Karisito?
O tokona beka na Peresitedi ni Lotu i Jisu Karisito ni Yalododonu Edaidai ni parofita, daurairai, ka dauvakatakila ka sai koya duadua ga na tamata e vuravura e vakadonui me vakayagataka na idola kece sara ni matabete?

O tokoni ira na lewe ni Mataveiliutaki Taumada kei na Kuoramu ni iApositolo Le Tinikarua ni ra sa parofita, daurairai, ka daunivakatakila?

O tokoni ira li na Vakaitutu Raraba kei ira na iliuliu ni Lotu ena noda veivanua?
Sa kaya na Turaga na ka kecega me “caka vakasavasava” e Matana (Vunau kei na Veiyalayalati 42:41).

O dau segata beka na bula savasava vakayalo ena nomu vakanananu kei na itovo?

O bulataka tiko li na lawa ni tiko savasava?
O dau muria tiko beka na ivakavuvuli ni Lotu i Jisu Karisito ena nomu itovo sega ni laurai kei na itovo e matanalevu vei ira ena nomu matavuvale kei ira talega na tani?
O dau tokona se tutaka beka e dua na ivakavuvuli, ivalavala, se ivunau e veisaqasaqa kei na kena ena Lotu i Jisu Karisito ni Yalododonu Edaidai?
O dau segata beka mo vakatabuya na Siga ni Vakacecegu, mai vale vakakina ena lotu; lakova nomu soqoni, vakavakarau ka vakayagataka na sakaramede ena bula kilikili, ka bula muria na lawa kei na ivakaro ni kosipeli?
O dau segata beka mo dina ena ka kecega o cakava?
Ko sa sauma vakadodonu tiko na nomu ikatini?
O kila ka muria tiko li na Vosa ni Vuku?
E tiko beka na nomu icolacola vakailavo se so tale na ka vua e dua na watimu e liu se vei ira na gone?

Kevaka e io, sa taucoko tiko beka na nomu sotava na icolacola eso oqori?
O sa dau maroroya tiko beka na veiyalayalati o a cakava ena valetabu, oka kina na daramaki ni qameni ni valetabu me vaka e dusimaki ena edaumeni?
E se tu beka eso na ivalavala ca bibi ena nomu bula ka dodonu me tusanaki vei ira na matabete vakatulewa ena veivutuni?
O nanuma beka ni sa kilikili mo curu ki na vale ni Turaga ka vakaitavi ena veicakacaka vakalotu ni valetabu?

Ni mataka, sa na veisoliyaki na taro ni ivolatara ni valetabu vakavoui oqo vei ira na iliuliu ni Lotu e vuravura raraba.

Me ikuri ni kena saumi vakadodonu na taro eso oqori, sa matata tiko ni ra na dau daramaka na lewenilotu qase yadua na qameni tabu ena loma ni nodra isulu ni veisiga. Oqo na ivakatakarakara ni dua na yalayala e loma ni noda sasaga e veisiga me da vaka na Turaga vakalevu cake. Sa vakananuma talega vei keda me da yalodina tiko ki na noda yalayala dau caka e veisiga ka me da lakova na sala ni veiyalayalati e veisiga ena sala cecere ka savasava cake.

Au via vosa mada vakalailai vei ira na noda itabagone. Keimami vakayaloqaqataki kemuni mo ni vakadonui baleta na ivolatara yalani. Ena tarogi ga vei kemuni na taro e ganiti kemuni ena nomuni vakavakarau ki na cakacaka vakalotu ni papitaiso kei na veivakadeitaki veisosomitaki. Keimami sa vakavinavinaka vakalevu ena nomuni bula kilikili kei na lomasoli mo ni vakaitavi ena cakacaka tabu ni valetabu oya. Vinaka vakalevu!

Na bula kilikili ni tamata yadua me curuma na valetabu e gadrevi kina vakalevu na vakavakarau vakayalo ni tamata yadua. Ia, ena veivuke ni Kalou, e sega ni dua na ka e dredre. Ena so na kena vakasama, e rawarawa cake na kena tara e dua na valetabu mai na nodra vakarautaki e dua na matatamata ki na dua na valetabu. Na bula kilikili ni tamata yadua e gadrevi kina na saumaki e taucoko, ni vakasama kei na yalo me vaka na Turaga vakalevu cake, mo dua na lewenivanua dina, mo ivakaraitaki vinaka cake, ka mo tamata savasava cake.

Au vakadinadinataka ni cakacaka ni vakavakarau vaqori e kauta mai na veivakalougatataki sega ni wiliki rawa ena bula oqo kei na veivakalougatataki sega ni vakasamataki rawa ena bula sa bera mai, okati kina na vakavotukanataki ni nomu matavuvale ki na tawamudu ena itutu ni “tiko marau tawamudu.”

Au gadreva oqo meu goleva tale e dua na ulutaga—ituvatuva ni yabaki lako mai. Ena vulaitubutubu ni yabaki 2020, sa na 200 vinaka kina na yabaki na nona a ciqoma o Josefa Simici na ivakatakila Vakalou eda kila tu me iMatai ni Raivotu. Erau a rairai kina na Kalou na Tamada kei na Luvena Lomani, ko Jisu Karisito vei Josefa, e dua na cauravou yabaki 14. Na ka oqori sa itekitekivu ni kena Vakalesui mai na kosipeli i Jisu Karisito ena kena taucoko, me vaka saraga na kena sa tukuni rawa tu ena iVolatabu.

Oti qai yaco na nodra veisiko veitaravi mai na italai vakalomalagi, okati kina o Moronai, Joni na Dauveipapitaisotaki, kei iratou na iApositolo taumada o Pita, Jemesa, kei Joni. Era qai muri mai eso tale, okati kina o Mosese, Ilaisa, kei Ilaija. Era dui kauta mai na veivakadonui vakalou me ra vakalougatataki tale na luve ni Kalou e vuravura.

Ena cakamana, eda sa ciqoma talega na iVola I Momani: E Dua Tale na iVakadinadina kei Jisu Karisito, e dua tale na ivolanikalou veitokani ki na iVolatabu. Na ivakatakila e tabaki ena Vunau kei na Veiyalayalati kei na Mataniciva Talei era sa vakavutuniyautaka na noda kila na ivakaro kei na dina tawamudu ni Kalou.

Era sa vakalesui mai na idola kei na itutu ni matabete, okati kina na itutu vaka-iApositolo, Vitusagavulu, peteriaki, bete levu, italatala qase, bisopi, bete, ivakavuvuli, kei na dikoni. Ka ra veiqaravi na yalewa era dau lomana na Turaga ena iSoqosoqo ni Veivukei, Lalai, Goneyalewa, Wilivola ni Sigatabu, kei na veikacivi tale eso ni Lotu—era sa tiki bibi kece sara ni kena vakalesui mai na kosipeli i Jisu Karisito ena kena taucoko.

O koya, sa lesi kina na yabaki 2020 me ika 200 ni yabaki. Na koniferedi raraba ena Epereli mai oqo ena duatani mai na veikoniferedi sa oti. Ena ono na vula ka tarava, au nuitaka ni na vakavakarau na lewenilotu kei na matavuvale yadua me baleta e dua na koniferedi duatani ka na vakananumi kina na yavu ni kosipeli vakalesui mai.

E rawa ni o tekivutaka nomu vakavakarau ena nomu wilika vou tale na italanoa nei Josefa Simici ni iMatai ni Raivotu me vaka e volai ena Mataniciva Talei. Na noda lesoni ni vuli ena yabaki mai qo ena Lako Mai mo Muri Au na iVola i Momani. O na gadreva beka mo vakananuma vakatitobu na taro bibi me vaka, “Ena duatani vakacava noqu bula kevaka e kau tani vakasauri na veika au sa kila rawa mai na iVola i Momani?” se “E cava na veika a sala muria mai ena iMatai ni Rairai e vakavuna na veisau vei au kei ira au dau lomana?” Vakakina, ni ra sa tu ena gauna oqo na vidio ni iVola I Momani, o na gadreva beka mo vakayagataka ena nomu vuli yadua kei na vuli vakamatavuvale.

Digitaka na nomu taro. Bulia na nomu ituvatuva. Dromuci iko ena rarama lagilagi ni Veivakalesui mai. Ni o vakayacora vakakina, na koniferedi raraba ena Epereli ka tu mai ena sega walega ni dau nanumi tu, ena sega ni guilecavi rawa.

Meu tinia, au laiva vei kemuni na noqu iloloma kei na veivakalougatataki, mo ni yaco me tamata mamarau ka savasava cake e veisiga yadua. Au vakadeitaka ni ivakatakila sa yaco tikoga ena Lotu ka na tomani tiko me yacova “na inaki ni Kalou ena yaco kusarawa, ka kaya o Jiova sa Cecere sa vakayacori na cakacaka.”

Au sa vakalougatataki kemuni vakakina, ka vakadeitaka niu lomani kemuni, kei na noqu ivakadinadina ni bula na Kalou! Sai Jisu na Karisito! O Koya e noda Kalou ka eda sa Nona tamata. Ena yacana tabu o Jisu Karisito, emeni.