Na Rawaka Vakayalo
Me vaka ni ko tisaipeli yalodina i Jisu Karisito, e rawa ni ko ciqoma na veivauqeti yadua kei na ivakatakila ka veidonui kei na Nona ivunau ka a buli vei iko.
Niu sa biubiu tiko mai ena dua na keba ni Goneyalewa ena vulaikatakata oqo, e a solia vei au e dua na ivola lailai e dua na goneyalewa. E loma, e taroga o koya,“Au na kila vakacava ni via tukuna vei au na Kalou e dua na ka?” Au taleitaka nona taro. E tagica na yaloda me semati ki na noda itikotiko mai lomalagi. Eda vinakata meda vakila ni da gadrevi ka yaga vakalevu. Ia e vuqa na gauna eda dau guta meda kila na duidui ni ka eda vakasamataka tu ga kei na malumu ni veivakauqeti ni Yalotabu? O ira na parofita, eliu kei ira edaidai, era vakavulica ni “kevaka e dua na ka e veisureti ka veidreti me caka vinaka, e lako mai vei Karisito.”
Ea dulaka mai o Peresitedi Russell M. Nelson e dua na veisureti rawarawa, qaqa: “Kemuni na taciqu kei na ganequ lomani, au sa, masuti kemuni mo ni vakatubura nomuni rawaka vakayalo mo ni ciqoma rawa kina na ivakatakila. … Digia mo cakava na cakacaka vakayalo ka gadreva mo marautaka kina na isolisoli ni Yalo Tabu ka rogoca na domo ni Yalotabu me wasoma cake ka me makare cake.”
Sa noqu gagadre ena mataka nikua meu vosa vei kemuni mai utoqu ena va na sala me vakatubura na nomuni rawaka vakayalo mo ni rawata kina na ivakatakila.
1. Me Vu mai yalomu mo Cakava na Gauna kei na Vanua mo Rogoca kina na Domo ni Kalou
Ni ko digia mo vakatakilakilataka ka vakatabakiduataka na gauna e veisiga mo toro voleka ki na domo ni Kalou, vakabibi ena iVola i Momani, e na yaco na gauna, e sa na matata vinaka vei iko na Domona ko na kila vinaka talega.
Ena veibasai, na veivakasesei kei na kosakosa ka sinai tu e vuravura kei na noda veivale kei na noda bula e rawa nira vakadredretaka meda rogoca na Domona. Na gagadre ni bula e veisiga e rawa ni osota noda vakasama kei na lomada, ke sega ni da qaqarauni, ena sega na vanua me yaco kina na veivauqeti malumu ni Yalo Tabu.
Na Parofita o Josefa Simici ea vakatavulica ni dau vakavuqa me vakaraitaki Koya na Kalou “vei ira na tamata yadua ena gauna vakatikitiki, e nodra loqi; ena lekutu se iteitei, ia ka vakararaba ni sega ni rogovaki se mauwetaki.”
E vinakata me wasei keda tani mai na domo ni Kalou o Setani ena nona saga meda kua ni tiko ena veivanua vagagalu oqori. Kevaka e vosa na Kalou ena domo lailai, rogo malumu, e dodonu vei iko kei au me daru toro voleka me rogoci Koya. Raitayaloyalotaka mada na cava ena yaco kevaka eda guta sara meda sema tiko kei lomalagi me vaka na noda dau sema kei na Wi-Fi! Digia e dua na gauna kei na vanua mo vakarorogo kina ki na domo ni Kalou e veisiga. Ka mo kua sara ni vakacala na gauna bibi oqo, ni vuqa sara na ka ena vakatautaki kina!
2. Cakava kua ni Vakabera
Ni ko ciqoma na veivakauqeti ka cakava ena vu ni yalomu, e rawa ni vakayagataki iko na Turaga. Na kena levu ni nomu cakava, na levu ni kena matata cake tikoga vei iko na domo ni Yalotabu. Ena tubu cake na nomu kidava na veituberi ni Kalou ia o Koya ena “yalorawarawa me vakatakila na Nona nanuma kei na lewa.” Kevaka ko bera, ko na rawa ni guilecava na veivauqeti se ko na calata na madigi mo vukea kina e dua ena vukuna na Kalou.
3. Me Veitalai vei iko na Turaga
Na masu ka rairai dau guta me sauma na Tamada Vakalomalagi sa ikoya na noda vakatakekere meda tuberi yani vua e dua ka gadreva noda veivuke. E vakatavulici keda o Peresitedi Eyring meda vakasaqara na ivakatakila ka taroga na Kalou o cei eda rawa ni vukea ena vukuna. “Kevaka ko taroga na taro eso vakaoqo, na Yalo Tabu ena lako mai ka ko na vakila ni ko tosoi yani ki na veika ko rawa ni cakava e vukudra na tani. Ni ko lako yani mo cakava na veika oya, o sa lako tiko ena veitalai ni Turaga, ia ni ko sa lako ena veitalai ni Turaga, ko na rawata na isolisoli ni Yalo Tabu.”
E rawa ni ko masu ka kerea vua na Turaga e dua na ilesilesi. Ni o cakava oqo, e rawa ni vakayagataka o Koya na nomu kilaka me rawati kina na Nona cakacaka cecere.
Na tukaqu, o Fritz Hjalmar Lundgren, ea biuvanua mai Siwiteni ena yabaki 19. A yaco taudua mai ki Amerika o koya, kei na nona kato kei na ono walega na yabaki vakavuli. E sega ni rawa ni vosa vakavalagi, ka mua na nona ilakolako ki Oregon ka laki cakacaka kina vaka dautakau, ka ratou laki lewena kina na Lotu kei tubuqu vata kei tinaqu. A sega ni bau liutaka e dua na tabanalevu, ia a dua o koya na dauniveituberi yalodina ni vuvale, ea kauta lesu mai e sivia ni 50 na matavuvale duidui mera lesu tale mai ki na Lotu. E kitaka vakacava oya?
Ni sa mate oti ko Tukaqu, au a vakaraica tiko nona kato ni ivola kau raica sara e dua na ivola ka vola e dua na turaga a suka lesu mai ki lotu baleta na loloma nei Tukaqu. E wiliki ena ivola, “Na ivunivuni nei Brother Fritz, au vakabauta, ni o koya e dau cakava tiko ga na ilesilesi mai vua na Tamada Vakalomalagi.”
O ya na ivola mai vei Brother Wayne Simonis. E sikovi koya o Tukaqu ka laki kilai iratou yadudua na lewe ni matavuvale. Ni toso tiko na gauna ea tukuna vei iratou ko Tukaqu ni ratou gadrevi ka sureti iratou me ratou mai lotu. Ia ena Sigatabu oya, ea yadra o Brother Simonis kei na dua na lomaleqa—e se bera ni vadokana vou nona vale ka namaki na uca ena macawa koya. E nanuma o koya me lako ga ki valenilotu, ka laki lululu vei Tukaqu, ka lesu tale ki vale me laki vakaotia na doka ni vale. E rawa ni ratou tiko nona matavuvale ena sakaramede ke sega o koya.
A yaco kece me vaka nona ituvatuva, ia ni sa tiko e doka ni vale ea rogoca e dua ni kaba tiko yani ena ikabakaba. Ena ka e tukuna: “Niu rai cake yani … sa tu e tuvuka ni ikabakaba o Brother Fritz. Ea solia mai nona matadredredre levu. E liu, au a madua me vaka e dua na gonevuli ka tobo ni dro mai koronivuli. Oti ya … e qai tuburi au na cudru. [Ia a luvata ga o Brother Fritz] nona kote ni vunau ka liliga ena ikabakaba. Ni viviga cake tiko na liga ni nona sote vulavula, ea vuki mai vei au ka kaya, ‘Brother Simonis, e tiko beka e dua tale nomu ituki? Sa rui bibi beka na cakacaka qo ke sega ke na sega ni ko biuti ratou tu yani nomu matavuvale, ia ke sa vakaoya na kena bibi, au vinakata meu vukei iko.’ Niu raica yani na yaloka ni matana, au raica ga kina na yalovinaka kei na loloma va-Karisito. E yali vakadua noqu cudru. Au biuta sobu noqu iyaya ena Sigatabu koya kau muria sobu na ikabakaba kei na wekaqu vinaka oqo ka lesu tale ki valenilotu.”
E taura mai vua na Turaga ko Tukaqu nona ilesilesi ka kila ni gadrevi vua me vakasaqarai ira na sipi lako sese. Me vakai ratou ga na lewe va na turaga ka ratou kauta na wekadratou paralase ki na dela ni vale ka vakatukutukutaki koya sobu me vakabulai koya ko Jisu Karisito, e vaka talega kina na ilesilesi nei Tukaqu ni kauti koya ki na delavuvu ni vale. Na Turaga e solia na ivakatakila vei ira era vakasaqara tiko mera vukei na tani.
4. Vakabauta ka Vakararavi
Au a qai wilika walega, me baleta e dua tale na daukaulotu cecere ka taura nona ilesilesi mai vua na Turaga. A vakavulica tiko ko Eroni na nodra tui na Leimanaiti, ka lomatarotaro tiko se cava ka sega ni mai vakavulici koya talega kina ko Amoni na taci Eroni. “A sa kaya vua na tui ko Eroni: Raica, sa kacivi koya na Yalo ni Turaga ki na dua tale na sala.
E vosa ki lomaqu na Yalotabu: koi keda yadua e tu na itavi duidui meda vakayacora, ia ka so na gauna e rawa ni kacivi keda na Yalotabu ki na “dua tale na sala.” E vuqa tu na sala meda tara cake kina na matanitu ni Kalou me vaka ni da sa tisaipeli ni caka-veiyalayalati, ka dau muria- na veiyalayalati i Jisu Karisito. Me vaka ni ko Nona tisaipeli yalodina, e rawa ni ko ciqoma na veivauqeti yadua kei na ivakatakila ka veidonui kei na Nona ivunau ka a buli vei iko. E tu na itavi e vakatabakidua ga vei iko mo cakava ena bula qo ka na soli vakatabakidua mai na veituberi me rawati vakavinaka kina.
Ko Nifai, na taci Jereti, kei Mosese talega eratou donuya kece na wasawasa levu me ratou kosova—ka duidui na sala eratou cakava kina. Sa “cakacakataka na kau ena kedra icakacaka matai sara” o Nifai. E tara na taci Jereti na waqa me “sa dregati matua sara na nodra waqa me vaka na dari.” Me vaka sa “lako ena qele mamaca e loma ni wasawasa” ko Mosese.
Eratou dui ciqoma yadudua na veidusimaki, ka caka me nodratou yadudua, ka ratou vakanuinui kina ka cakacakataka. Na Turaga e nanumi ira era talairawarawa ia ena vosa i Nifai ena, “vakarautaka rawa mada e dua na sala [vei keda] meda rawata kina na ka sa vakarota vei keda ko koya.” Raica ni tukuna tiko ko Nifai, “e dua na sala”— sega ni “na sala.”
Eda dau calata beka se biliga na ilesilesi yadua mai vua na Turaga baleta ni a vakarautaka o Koya “e dua na sala” ka dua tani mai na ka eda namaka?
A kau yani ko tukaqu ki na dua na vanua sega ni namaki—vakasutu vinaka, ena delavuvu ni vale, ena Sigatabu. Vakararavi vua na Kalou me liutaki iko, kevaka mada ga e rairai duatani na sala mai na ka o namaka se duidui mai na kena vo.
O ira na Yalododonu eDaidai era yaco mai ena duidui ibulibuli kei na kedra levu, ia “era sa tautauvata vua na Kalou”—“na tamata loaloa kei na tamata vulavula, na bobula kei na galala, na tagane kei na yalewa,” dawai kei na vakawati, vutuniyau se dravudravua, gone se qase, lotu makawa kei na curuvou walega. Veitalia se o cei o iko se cava o sotava tiko, o sa sureti ki na teveli ni Turaga.
Ni sa yaco me serekali ni nomu bula e veisiga mo vakasaqara ka kitaka na lewa i Tamada, o na yaco, vakaidina sara, mo muataki ki na veisau kei na veivutuni.
Na parokaramu vou ni Lotu baleti ira na gone kei na itabagone e tara cake ena yavu ni vuli me vakasaqara na ivakatakila, me kilai kina na cava e vinakata na Turaga meda cakava, ka qai cakacaka ki na veidusimaki oya. Oi keda yadua, veitalia na yabaki se ituvaki e rawa ni da sasaga meda vakasaqara, ciqoma, ka cakacaka. Ni ko muria na ivakarau tawamudu oqo ka lesi mai me baleta noda gauna, ko na toro voleka sara kina vei Jisu Karisito—Nona loloma, Nona rarama, Nona veidusimaki, Nona vakacegu, kei na Nona kaukauwa me veivakabulai ka vakayaco ka. Ia ko na tubucake ena nomu rawaka vakayalo mo yaco mo dua na iyaragi ni veisiga e Ligana me vakavatukanataki kina na Nona cakacaka cecere. Ena yacai Jisu Karisito, emeni.