iYau Vakayalo
Ni o sa cakacakataka nomu vakabauta na Turaga kei na Nona mana ni matabete, ena kaukauwa cake na nomu idre ki na veiyau talei vakayalo sa vakarautaka tu na Turaga vei iko.
Vinaka vakalevu na sereivatagi totoka oya. Ni da tucake meda lagata na sere ni vakacegu na, “Turaga Keitou Vuabale,” e yaco mai vei au e rua na vakasama. E dua e baleta na Parofita o Josefa Simici, na parofita ni tabagauna oqo. Na noqu loloma kei na veidokai vua e tubu ga ena veisiga. Na ikarua ni vakasama e yaco mai vei au niu raici watiqu, iratou na luvequ yalewa, makubuqu yalewa kei ira na makubu yalewa vakarua. Au vakila niu vinakata meu wiliki kemuni kece mo ni lewe ni noqu matavuvale.
Ena vica na vula sa oti, ni oti e dua na soqoni ni edaumeni ni valetabu, au kaya vei na watiqu, “Au nuitaka ni ra sa kila tiko na marama na iyau talei vakayalo e nodra ena valetabu.” Kemuni na ganequ, au dau vakananumi kemuni vakalevu, oka kina ena rua na vula sa oti ni keirau a veisiko ki Harmony, Pennsylvania kei Wendy.
Oqo na ikarua ni neirau lako kina. Ena gauna ruarua oqori keirau a yavalati vakatitobu ni keirau taubale ena qele tabu oya. Mai Harmony a rairai kina o Joni na Dauveipapitaiso vei Josefa Simici ka vakalesuya mai na Matabete i Eroni.
Mai kea eratou a rairai kina na iApositolo e tolu o Pita, Jemesa, kei Joni me ratou vakalesuya mai na Matabete i Melikiseteki.
Mai Harmony a imatai kina ni dauvolavola vei watina o Emma Hale Smith ni vakadewataka tiko na Parofita o Josefa na iVola i Momani.
Mai Harmony talega a ciqoma kina o Josefa e dua na ivakatakila ka vakaraitaki mai kina na loma ni Turaga vei Emma. A vakaroti Emma na Turaga me vocia vakavudi na ivolanikalou, me veivakayaloqaqataki vagumatua ena Lotu, me ciqoma na Yalo Tabu, ka vakayagataka nona gauna me “vuli ka vakalevu.” A vakasalataki talega o Ema me “biuta vakatikitiki na veika ni vuravura ka segata na veika vinaka cake,” ka kukuva matua na nona veiyalayalati kei na Kalou. A tinia na Turaga na Nona ivakaro ena malanivosa veirawai oqo: “sa domoqu oqo vei ira na tamata kecega.”
Na veika kece a yaco mai Harmony sa bibi sara na kena yaga ena nomu bula. Na vakalesui mai ni matabete, kei na nona ivakasala na Turaga vei Emma, e rawa ni dusimaki kemuni ka vakalougatataki kemuni yadua. Sa gagadre levu sara ni yaloqu mo ni kila ni vakalesui mai ni matabete e tautauvata sara ga na kena yaga vei iko me vaka vua e dua na tagane. Ni sa vakalesui mai na Matabete i Melikiseteki, sa rawa kina ni ra yacova na yalewa kei na tagane dau rokova nona veiyalayalati na veivakalougatataki “kece sara vakayalo ni lotu” se, me da kaya beka, na iyau talei kece sara vakayalo e tu vua na Turaga baleti ira na Luvena.
Na yalewa kei na tagane kece sara e veiyalayalati kei na Kalou ka rokova na veiyalayalati oqori, ka vakaitavi kilikili ena veicakacaka vakalotu ni matabete, ena lutuki koya mai vakadodonu na mana ni Kalou. O ira era sa edaumeni ena vale ni Turaga era sa ciqoma na isolisoli ni mana ni nona matabete na Kalou ena vuku ni nodra veiyalayalati, vata kei na isolisoli ni kilaka me ra kila na ivakarau me ra rawa-ka kina mai na mana oqori.
Sa tadola tu ko lomalagi vua na yalewa sa vakaedaumeni ena nona mana ni matabete na Kalou ka drodro mai na nodra veiyalayalati ni matabete me vaka vua na tagane e taura tu na matabete. Au masuta me na vakoti ki yalomuni yadua na dina oya baleta au vakabauta ni na veisautaka nomu bula. Kemuni na ganequ, e nomu na dodonu mo rawaka ena yalogalala ena nona mana na iVakabula me vukea nomu matavuvale kei ira o dau lomana.
O na kaya beka e lomamu, “Totoka dina na kena rorogo, ia meu cakava vakacava? Meu yavia mai vakacava ki na noqu bula na nona mana na iVakabula?”
O na sega ni kunea na iwalewale oqo ena dua na ivolavakarau. Ena vakavulici iko na Yalo Tabu ni o segata mo ciqoma na veika e vinakata na Turaga mo kila ka cakava. Na iwalewale oqo e sega ni totolo se rawarawa, ia e veivaqaqacotaki vakayalo. Na cava beka ena veivakayaloqaqataki vakalevu cake mai na noda cakacaka vata kei na Yalo me da kila na mana ni matabete—na mana ni Kalou?
Na ka au rawa ni tukuna vei iko, na nomu rawata na mana ni Kalou ena nomu bula e gadrevi kina na veika vata a vakarota na Turaga vei Emma kei kemuni yadua me caka.
O koya, au sa sureti kemuni mo ni vuli ena masumasu wase 25 ni Vunau kei na Veiyalayalati ka raica na ka ena vakavulica vei iko na Yalo Tabu. Ena kauta mai vei iko na reki na nomu sasaga vakayalo yadua ni o sa rawata, kila, ka vakayagataka na mana o sa vakaedaumeni kina.
E na sasaga oqori ena gadrevi kina mo biuta vakatikitiki e vuqa na ka ni vuravura oqo. Ena so na gauna edau rawarawa noda tukuna na lako tani mai vuravura kei na kena veiqati, na veitemaki takalevu, kei na ivakavuvuli lasu. Ia na ka dina, me caka, ena gadrevi vei iko mo dau dikeva vakamatailalai e veigauna na nomu bula. Ni o kitaka vakakina ena uqeti iko na Yalo Tabu me baleta na veika sa sega tale ni gadrevi, na veika sa sega tale ni kilikili kaya na nomu gauna kei na kaukauwa.
Ni o vagoleya tani nomu vakasama mai na veika vakavuravura dau veivagolei tani, eso na ka e vaka me bibi tu vei iko ena gauna oqo sa na sega soti. Sa na gadrevi mo kaya sega ena so na ka, e dina ga ni ra sega ni ka ca. Ni bola na mua ka tomani na iwalewale ni bula taucoko oqo ena nomu vakatabuya nomu bula vua na Turaga, ena vakurabuitaki iko na nomu ivakarau ni rai, na veika o vakila, kei na igu vakayalo!
Ia me dua mada na ivakasala lailai ni qaqarauni. Era na tu eso era na beca na nomu kaukauwa mo kaciva na mana ni Kalou. Era na tu eso era na vakavuna mo lomalomaruataki iko ka vakalailaitaka nomu kaukauwa vakayalo vaka e dua na yalewa yalododonu.
Ka dina taucoko, o vunica e sega ni vinakata mo kila na veiyalayalati o a vakayacora ena papitaiso, se na edaumeni cecere ni kilaka kei na mana o sa ciqoma se o na qai ciqoma ena valetabu—na vale ni Turaga. E sega talega ni vinakata o Setani mo kila ni ena veigauna kece o veiqaravi se sokalou kilikili kina ena valetabu, ko na biuta mai ka vakaiyaragi tu ena mana ni Kalou ka ra “vakatawai” mai vei ira na Nona agilosi.
Era na dau tara bai o Setani kei ira nona ilawalawa me ra tarova nomu kila na isolisoli vakayalo o sa vakalougatataki se o na qai vakalougatataki kina. E kalouca, ni so na bai e rawa ni vu mai na nona baleca e dua tale. Au yalobibi niu vakasamataka ke so vei kemuni e dau beci se sega ni vakabauti mai vei ira na veiliutaki ni matabete, vakatotogani se vakawaleni mai vei watina, tamana, se dua o nanuma ni nomu itokani. Au rarawataka vakalevu ke so vei kemuni e vakila ni vakatikitikitaki, sega ni rokovi, se vakalewai vakaca. Na cala eso oqori e sega na kena tikina ena matanitu ni Kalou.
Kena veibasai, au dau marau niu rogoca nodra dau kerea nodra itavi na marama o ira na veiliutaki ni matabete, ena matabose ni iteki kei na tabanalevu. Dau uqeti au na tagane vakawati e vakaraitaka ni nona itavi bibi duadua ni matabete me kauwaitaka na watina. Au vakacaucautaka na tagane e dau rokova vakatitobu na nona rawata na watina me ciqoma na ivakatakila ka mareqeti koya ni rau itokani tautauvata ena nodrau vakawati.
Ni sa kila e dua na tagane na vakaturaga kei na mana ni dua na yalewa Yalododonu Edaidai ka segata me buladodonu sa edaumeni, ena vakabekataki beka nona nanuma me tucake ni curu mai ki na rumu?
Mai na itekivu ni gauna, o ni sa vakalougatataki ka kilai tani na marama ena idusidusi ni bula savasava—na kaukauwa mo ni kila na vinaka mai na ca. Sa vakavinakataki cake na isolisoli oqo vei ira era cakava ka rokova na veiyalayalati. Ka buwawa vei ira era digitaka me ra vakanadakuya na ivakaro ni Kalou.
Au vakuria vakatotolo niu sega ni vagalalataki ira vakalailai na tagane mai na nona gagadre na Kalou me ra kila talega na vinaka mai na ca. Ia kemuni na ganequ, na nomuni rawa ni kila na dina mai na cala, mo ni ivakatawa ni bula savasava ena kawatamata, sa ka bibi sara ena veigauna oqo. Keimami sa nuitaki kemuni mo ni vakavulici ira na kena vo me ra kitaka vakakina. Meu vakamatatataka mada oqo: kevaka ena yali e vuravura na savasava ni nodra bula na kena yalewa, ena sega sara ni bula.
O keda na Yalododonu Edaidai eda sega ni vakavuravura; o keda na Isireli ni veiyalayalati. Eda kacivi me da vakarautaka e dua na matatamata me baleta na iKarua ni nona Lako Mai na Turaga.
Meu vakamatatataka mada e vica na kena ikuri baleti ira na yalewa kei na matabete. Ni o sa vakatikori mo veiqaravi ena itavi cava ga ena nona veidusimaki e dua e taura tu na idola ni matabete—me vaka na nomu bisopi se peresitedi ni iteki—sa soli vei iko na lewa ni matabete mo yaga ena veikacivi oya.
Sa vakakina, ena loma ni valetabu, sa vakadonui mo vakaitavi ka veiliutaki ena cakacaka vakalotu ni matabete ena veigauna kece o tiko kina. Na nomu edaumeni ni valetabu e vakarautaki iko mo vakayacora vakakina.
Kevaka o sa edaumeni oti ka sega ni vakawati kei na dua na matabete qai kaya vei iko e dua, “Au lomani iko ni sega tu na matabete ena nomu vale,” yalovinaka ka kila ni sega ni dina na vosa oqori. E sega beka ni dua e tu vua na matabete ena nomu vale, ia o sa vakayacora na veiyalayalati tabu kei na Kalou ena Nona valetabu. Mai na veiyalayalati oqori sa drodro mai kina e dua na edaumeni ni Nona mana ni matabete vei iko. Ka nanuma tiko, kevaka e mate na watimu, o iko o na vakatulewa ena loma ni nomu vale.
Ni o yalewa Yalododonu Edaidai bula dodonu ka sa edaumeni oti, o na vosa ka veivakavulici ena mana kei na lewa ni Kalou. Ena veivakauqeti vagumatua se ena veivosaki, keimami gadreva na domomu mo vakavulica na ivakavuvuli kei na ivunau i Karisito. E gadrevi na nomuni cau ena matabose ni matavuvale, tabanalevu, kei na iteki. E gadrevi na nomuni vakaitavi ka sega ni isaluwaki walega!
Kemuni na ganequ, ena levu cake na mana mai vei kemuni ena nomuni veiqaravi vei ira na tani. Nomuni masu, lolo, gauna ena ivolanikalou, kei na veiqaravi ena valetabu kei na tuvakawa ena dolavi lomalagi vei kemuni.
Au kerei kemuni mo ni vulica ena masumasu na dina kece e rawa ni o ni kunea baleta na mana ni matabete. E rawa ni o tekivu ena Vunau kei na Veiyalayalati wase 84 kei na 107. Na iwase eso oqori ena kauti kemuni ki na veimalanivosa tale eso. E vakasinaiti tu ena veidina oqo na ivolanikalou kei na nodra ivakavuvuli na parofita, daurairai ka dauvakatakila ni gauna oqo. Ni sa levu cake nomu kilaka ka cakacakataka nomu vakabauta na Turaga kei na Nona mana ni matabete, ena kaukauwa cake na nomu idre ena veiyau talei vakayalo oqo sa vakarautaka tu na Turaga vei iko. Ni o vakayacora vakakina, o na kunea ni na rawa ni o veivuke vakavinaka cake ena tauyavu ni matavuvale tawamudu era sa duavata tu, vauci vata ena valetabu ni Turaga, ka sinai ena lomana na Tamada Vakalomalagi kei Jisu Karisito.
Noda sasaga kece me da veiqaravi, vunautaka na kosipeli, vakataucokotaki ira na Yalododonu, ka vueti ira na mate, era na laki sota kece ena valetabu. Sa tu oqo e 166 na valetabu e vuravura raraba, ka vuqa tale era se bera mai.
Me vaka o ni sa kila, na Valetabu e Salt Lake, Lomanibai ni Valetabu, kei na vale voleka ki na Valenivolavola ni Lotu era na vakavoui ena dua na cakacaka ka na tekivutaki ena mua ni yabaki oqo. Na valetabu bibi oqo me na vakavinakataki ka vakarautaki me vakauqeti ira na veitabatamata se bera mai, me vaka na kena sa vakayarayarataki keda ena itabatamata oqo.
Ni sa tubu tiko na Lotu, ena tara eso tale na valetabu me rawa ni ra yacova kina na veimatavuvale na veivakalougatataki cecere duadua oya, me baleta na bula tawamudu. Eda raica na valetabu me vale bibi duadua ena Lotu. Ni sa kacivaki na ituvatuva me tara e dua na valetabu vou, sa yaco me dua na tiki bibi ni keda itukutuku makawa. Me vaka eda sa veitalanoataka eke nikua, o kemuni na marama o ni sa rui ka bibi sara ki na cakacaka ni valetabu, na valetabu na vanua ko ni na ciqoma kina na nomuni iyau talei cecere duadua.
Yalovinaka ni vakarorogo sara vakavinaka ena vakarokoroko niu sa kacivaka yani na ituvatuva me tara e walu na valetabu vou. Kevaka au sa kacivaka yani e dua na valetabu ena dua na vanua e mareqeti vei iko, au na kerea mo cuvara na ulumu ka cavuta e dua na masu ni vakavinavinaka e yalomu. Keimami sa marautaka me kacivaka yani ni sa navuci tiko me tara na valetabu ena veivanua oqo: Freetown, Sierra Leone; Orem, Utah; Port Moresby, Papua New Guinea; Bentonville, Arkansas; Bacolod, Philippines; McAllen, Texas; Cobán, Guatemala; and Taylorsville, Utah. Vinaka vakalevu, kemuni na ganequ. Keimami sa vakavinavinakataka na nomuni veiciqomi ena ituvatuva oqo kei na nomuni vakaraitaki ena vakarokoroko.
Meu tinia, au vinakata meu laiva vei kemuni e dua na veivakalougatataki, me rawa ni o ni kila na mana ni matabete ko ni sa vakaedaumeni kina, ia ko ni na vakacerecerea na mana oqori ena nomuni cakacakataka nomuni vakabauta namana oqori.
Kemuni na ganequ, ena vakarokoroko titobu kei na vakavinavinaka, au vakaraitaka noqu lomani kemuni. Au vakadinadinataka ena yalomalumalumu ni bula tiko na Kalou! Sai Jisu na Karisito. Oqo na Nona Lotu. Au vakadinadinataka, ena yaca i Jisu Karisito, emeni.