Luvena Yalewa Daulomani
Ena uto ni ka kece keitou vakayacora ena Goneyalewa oya na neitou gagadre me keitou vukei iko ni rawata na vakabauta tawayavalati rawa kivua na Turaga o Jisu Karisito.
Kemuni na taciqu lomani, sa ka marautaki me’u mai tiko kei kemuni! Eda sa vakadinadinataka tiko na talaucaki ni vakatakila e vakadre yalo tu ka veivakamarautaki.
Ni da tekivu, au na via vakatakilai kemuni ki na so na itokani; na goneyalewa e maqosa tu na nodra taledi, itovo, kei na ituvaki vakayadua kei na matavuvale. O ira vakayadua, vakataki kemuni kece, e sa tara na utoqu.
Matai, raici Bella. E duri kaukauwa tu vaka goneyalewa duadua ga ena nona tabana e Iceland.
Raici Josephine mada mai Aferika, ka sa tomana tale me vulica na iVola i Momani ena veisiga. Sa dikeva tiko o koya na kaukauwa kei na veivakalougatataki e vakavotukana mai na qaravi tavi rawarawa, yalodina oqo.
Ka iotioti, raici Ashtyn na noqu itokani lomani, e dua na goneyalewa vakairogorogo ka sa leqa ni oti e ono na yabaki na valuti ni kenisa. E se voqa tu ga e lomaqu na nona ivakadinadina qaqa me baleta na Veisorovaki i Jisu Karisito.
Ko ni sa goneyalewa daumaka kece . Ko ni sa vakasakiti, ena nomuni dui solisoli kei na kila ka sa tautauvata tu ena dua na sala bibi ka tawamudu sara.
Ko sa luvena yalewa vakayalo dina sara ni iTubutubu Vakalomalagi, ka sega na ka ena tawasei iko mai na Nodrau loloma kei na loloma ni nomu iVakabula. Ni ko toro voleka Vua, ena tauri mada ga ni kalawa lalai vagone ki liu, o na raica na vakacegu levu e vakatawana na yalomu vaka e dua na tisaipeli yalodina ni noda iVakabula, o Jisu Karisito.
E sa kerei au na noda parofita daulomani, o Peresitedi Russell M. Nelson, me’u wasea eso na veisau veivakauqeti ena vukei iko ni “taracake na [nomu] rawaka tabu vakaiiko” ka vakuria nomu veivakayarayarataki yalododonu. Au na tukuna e va na wase ni veisau ena bogi edai.
iToko ni Goneyalewa
Matai, ena uto ni ka kece keitou cakava ena Goneyalewa oya na neitou gagadre me keitou vukei iko mo rawata na vakabauta tawayavalati rawa kivua na Turaga o Jisu Karisito kei na kilaka tudei ni nomu ivakatakilakila tabu vaka luvena yalewa na Kalou.
Na bogi edai, au na via tukuna e dua na veisau ki na itoko ni Goneyalewa. Sa noqu masu ni ko na vakila ni vakadinadinataka na Yalo Tabu na dina ni veivosa oqo ni’u tukuna na itoko vou:
O au e dua na luvena yalewa daulomani na itubutubu vakalomalagi, ena ituvaki vakalou kei na icavacava tawamudu.
Vaka e dua na tisaipeli i Jisu Karisito, au sa sasagataka me’u vakataki Koya. Au sa qara ka cakacakataka na noqu vakatakila ka qaravi ira na tani ena Yacana tabu.
Au na duri vaka ivakadinadina ni Kalou ena veigauna kecega kei na veika kecega kei na veivanua kecega.
Ni sasagataki me’u rawata na bula vakalou, au vakamareqeta na isolisoli ni veivutuni ka saga me’u vinaka tikoga ena veisiga. Ena vakabauta, au na vaqaqacotaka na noqu itikotiko kei na matavuvale, cakava ka muria na veiyalayalati tabu, ka ciqoma na vei cakacaka vakalotu kei na vei vakalougatataki ni valetabu.
Siqema na moici ni “keimami” ki na “au.” Sa vakaibalebaletaki vakayadua vei kemuni na dina oqo. O iko sa dua na luvena yalewa daulomani na iTubutubu Vakalomalagi. Ko sa dua na tisaipeli ni veiyalayalti ni noda iVakabula, o Jisu Karisito. Au sureti iko mo vulica ka vakasamataka vagumatua na veivosa oqo. Au kila ni ko sa kitaka, o na rawata e dua na ivakadinadina ni kena dina vakataucoko. Na kilai vakamatata ni veidina oqo ena veisautaka na ivakarau o sotavi bolebole kina. Na kilai ni nomu ivakatakilakila kei na inaki ena vukei iko ni vakaduavatataka na lomamu ki na loma ni iVakabula.
Na vakacegu kei na veituberi ena nomu ni ko muri Jisu Karisito.
Kalasi ni Goneyalewa
Na karua ni wase ni veisau e kovuta tu na kalasi eso ni Goneyalewa. A kaya o Elda Neal A. Maxwell, “Dau vakavuqa na ka era gadreva vakalevu na tamata oya mera vakarurugi mai na cava ni bula ena vanua taqomaki ka taukeni.” Na noda kalasi sa dodonu me vanua taqomaki mai na cava, na vanua e qaqaco kina na loloma kei na taukeni. Ena sasagataki ni kena taraicake na duavata levu sara, vaqaqacotaki na veitokani, kei na vakalevutaki ni vei vakataukenitaki oya ena Goneyalewa, keitou sa cakava eso na veisau ki na ituvatuva ni kalasi.
Sa sivia oqo e 100 na yabaki, na kena wase tolu tu na kalasi ni goneyalewa. Vakatekivu saraga oqo, keitou sa sureti ira na iliuliu ni Goneyalewa kei na bisopi mera navuca ena masumasu na gagadre ni goneyalewa yadua ka vakarautaki ira ki na ituvaki vakatabakidua ni tabanalevu. Oqo eso na ivakaraitaki ni kena irairai.
-
Ke tiko ga e vica na goneyalewa, sa rawa ni dua ga na kalasi ni Goneyalewa ka ra soqoni vata kece kina.
-
Rairai ena tiko beka e dua na ilawalawa levu ni goneyalewa yabaki 12 ka qai dua na ilala lailai ni goneyalewa ka ra qase cake. O na rairai navuca me rua na kalasi: Goneyalewa 12 kei na Goneyalewa 13–18.
-
Se ke tiko e dua na tabanalevu e lewena tu e 60 na goneyalewa, sa rawa me ono na kalasi, dua me baleta na yabaki yadua, me tuvalaki vakayabaki.
Se vakacava na tuvalaki ni nomu kalasi, sa ka bibi o kemuni na goneyalewa ena taraicake ni duavata. Mo dua na rarama vei ira era wavoliti iko tu. Mo na ivurevure ni loloma kei na kauwai o nuitaka tu mo ciqoma mai vei ira na tani. Ena masu vuni ni lomamu, tomana tiko mo sudra yani ka dua na ivakaraitaki vinaka. Ni o kitaka vakakina, ena vakatawani na nomu bula ena yalovinaka. Ena vinaka na nomu veimaliwai kei ira na tani ka tekivu mo raica lesu na nodra cakavinaka.
Yaca ni Kalasi ni Goneyalewa
Katolu, ena tuvalaki ni kalasi vou oqo, na kalasi taucoko ena vakatakilai ena yaca vakatautauvata ni “Goneyalewa.” Sa na vakatikitikitaki na yaca “Maqusa,” “Leba,” kei na “iSakisaki.”
Vaqaqacotaka na Mataveiliutaki ni Kalasi
Na iotioti ni veika au via tukuna oya na vakabibitaki ni mataveiliutaki ni kalasi. Se vakacava na ivakarau ni tuvalaki ni veikalasi, sa dodonu me tiko na mataveiliutaki ni kalasi yadua! E sa ka vakalou na nodra kacivi na goneyalewa mera liutaka na nodra itabagone.
E sa vaqaqacotaki na itavi kei na inaki ni mataveiliutaki ni kalasi ka sa vakamatatataki vakavinaka. Na cakacaka ni veivakabulai sa dua vei ira na itavi kilai tani oqo, vakabibi ena tabana ni veiqaravi, cakacaka ni kaulotu, veivakabulabulataki, kei na cakacaka ni valetabu kei na tuva kawa. Io, oqo na sala eda vakasokomuni Isireli kina—e dua na cakacaka lagilagi vei ira kece na goneyalewa vaka lewe ni mataivalu itabagone ni Turaga.
Me vaka o sa kila, ena ivakatagedegede kecega ni Lotu, sa kacivi ira na mataveiliutaki na Turaga me liutaki na Nona tamata. Kemuni na goneyalewa, na lewe ni mataveiliutaki ni kalasi sa na rairai matai ni nomu madigi mo vakaitavi kina ena ituvatuva veivakauqeti oqo ni veiliutaki. Kemuni na iliuliu qase, me vakabibitaki na kacivi ni mataveiliutaki ni kalasi ka qai lako veitivi toka kei ira, ena nodra liutaki ka dusimaki mera rawaka kina. Se cava ga na ivakatagedegede ni kila vakaveiliutaki ni dua na mataveiliutaki ni kalasi, mera tekivu rawa ga ka vukei ira ni taracake na kila maqosa kei na yalodei ena vakalougatataki ira vaka iliuliu. Toka volekati ira, ia kakua ni siova. Ena tuberi iko na Yalotabu ena nomu tuberi ira.
Me vakamatatataki na itavi bibi ni tubutubu kei na iliuliu vaka veiliutaki, me’u tukuna mada e dua na italanoa. O Chloe a kacivi me veiqaravi vaka peresitedi ni dua na kalasi. A vakauqeti koya na nona iliuliu ni matabete vuku me qara na veivuke ni Turaga ena vakaturi ni yaca eso ki na nona mataveiliutaki. A masu o Chloe ka ciqoma vakatotolo sara na veivakauqeti o cei me na vakaturi me nona daunivakasala. Ni tomana tu me vakasamataka ka masulaka e dua na sekeriteri, a vagolea veitaravi na Yalotabu na nona rai ki na dua na goneyalewa e vakurabuitaki koya—e dua ka sega ni dau lako mai ki lotu se na itaviqaravi eso.
Ni sega ni dei tu na lomana ena veivakauqeti, a vosa o Chloe vei tinana, ka vakamacalataka ni dua na sala eda rawa ni ciqoma kina na ivakatakila oya mai na vakanananu yaco veitaravi. Ena vakavoui ni lomana, a nanuma o Chloe me sa vakatura na goneyalewa oqo. A dolea na veikacivi o bisopi, ka vakadonuya na goneyalewa. Ni oti na veivakadeitaki, a kaya na sekeriteri talei oqo, “Kila na cava, au sega tu ni vakila ni tiko e dua na tikina vei au se au gadrevi tu ena dua na vanua. Au sega ni vakila ni ganiti au. Ia ena veikacivi oqo, au vakila ni sa tiko e dua na inaki kei na vanua vua na Tamada Vakalomalagi me baleti au.” Ni rau biubiu mai na soqoni o Chloe kei tinana, a vuki vei tinana o Chloe ka kaya, ena mata tagitagi, “Sa ka dina na ivakatakila! Sa cakacaka vakaidina na ivakatakila!”
Kemuni na mataveiliutaki ni kalasi, ko ni sa kacivi mai vua na Kalou ka nuitaki mo ni liutaka e dua na ilawalawa ni Luvena yalewa. “Sa kilai iko na Turaga. … Sa digitaki iko o Koya.” Ko sa mai vakadeitaki vua e dua ka tiko vua na dodonu ni lewa ni matabete; e kena ibalebale ni ko qarava voli na itavi ni nomu veikacivi, o sa cakacakataka tiko na dodonu ni lewa ni matabete. Sa tiko e dua na cakacaka bibi mo kitaka. Vakilaiyalomu tu ka cakacakataka na veivakauqeti ni Yalo Tabu. Ni ko kitaka vakakina, sa rawa ni o veiqaravi ena yalodei, ni ko sa sega ni veiqaravi duadua!
Kemuni na peresitedi ni kalasi, keitou sa gadreva na yalomatua, domomuni, kei na igu ena matabose vou ni itabagone ena tabanalevu a kacivaka o Elder Quentin L. Cook nikua. Ko sa dua na tiki veiganiti ni iwali ena sotavi ni nodra gagadre na ganemuni kei na tacimuni.
Sa na tekivutaki na veisau oqo ena tuvalaki kei na liutaki ni kalasi ena gauna ga sa vakarau kina na tabanalevu kei na tabana ka sa dodonu me tavoci ena 1 ni Janueri, 2020.
Kemuni na taciqu lomani, au vakadinadinataka ni veisau oqo au sa tukuna nikua sa ituvatuva veivakauqeti mai vua na Turaga. Ni da vakayacora vagumatua na veisau oqo, meda sa kakua ni raibaleta na noda inaki: meda vaqaqacotaka na noda vakatulewa ni muri Jisu Karisito ka vukei ira na tani mera lako mai Vua. Au vakadinadinataka ni oqo na Nona Lotu. Au vakavinavinakataka ni sa vakatarai keda o Koya meda dua tu na tiki bibi sara ni Nona cakacaka tabu.
Sa noqu masu ni Yalo vata ga e sa tubera na veisau oqo ena tuberi iko ena nomu toso ki liu ena salatu ni veiyalayalati. Au sa vakadinadinataka oqo ena yaca i Jisu Karisito, emeni.