Kakua ni mai Vakatovolei Au
Ni da talairawarawa ki na Nona ivakaro, eda na tuberi tikoga ena sala dodonu ka na sega ni rawai.
Nikua, au cavuta na ivakasala vei keda kece, ia vakauasivi vei kemuni na itabatamata o ni tubucake tiko mai—gone ena Lalai, cauravou, kei na goneyalewa. E lomani kemuni vakalevu sara ka vakatitobu na nona parofita na Turaga ena noda gauna, o Peresitedi Russell M. Nelson—ka vosa kina vei kemuni ena dua na lotu kaburaki ni itabagone ena yabaki sa oti, kena iulutaga “iNuinui kei Isireli.” Eda dau rogoci Peresitedi Nelson vakalevu ni kacivi kemuni ena yaca oya—na “inuinui kei Isireli,” na itabatamata tubucake tiko mai kei na isakisaki ni mataka ni Lotu vakalesui mai i Jisu Karisito.
Kemuni noqu itokani gone, au na tekivu ena noqu wasea e rua na italanoa ni vuvale.
Na ika 102 ni Koli Tavutonotono
Ena vicavata na yabaki sa oti, au lesu mai vale ena cakacaka, kidacala niu raica na tasova ni iboro vulavula e veivanua kecega—ena qele, katuba ni qaraji, kei na neitou vale simede damudamu. Au vakaraica malua ka kunea ni se suasua na iboro. E gole ki na neitou lomanibai e muri na tasova ni iboro kau mani vakamuria. E kea, au raica kina na luvequ tagana yabaki lima ni taura tu e dua na barasi ni boroboro e ligana, ka cemuria tiko neitou koli. Sa boro vulavula tu na veimama ni neitou koli Labrado loaloa!
Na cava o cakava tiko? Au taro ena domo nanamaki.
A tuvakadua na luvequ, raici au, raica na koli, raica na barasi ni iboro se turu tu kina na iboro vulavula, ka kaya, “Au vinakata ga me tautauvata na kena irairai kei na koli tavutonotono loaloa ena iyaloyalo—kila, koya e 101 na koli tavutonotono.”
Au taleitaka neitou koli. Au nanuma sara ni sa taucoko, ia ena siga oya e duatani na nona nanuma na luvequ.
Na Luve ni Vusi Oriori
Na ikarua ni noqu italanoa e baleti neitou momo-levu Grover, e tiko sara vakayawa, ena dua na vale e loma ni veikau, yawa sara mai na tauni. Sa qase sara tiko o Momo Grover. Keirau nanuma me rau sotavi koya na neirau cauravou ni se bera ni mate. Ena dua na yakavi, keitou mani draiva vakabalavu ki na nona vale vakaciriloloma. Keitou dabe veitalanoa ka vakaveikilaitki koya vei rau na neirau cauravou. Sega ni dede na veitalanoa, rau sa vinakata neirau cauravou, rauta na yabaki lima kei na ono, me rau lai qito i tuba.
Ni rogoca o Momo Grover nodrau kerekere, a cuva sobu raici rau vakadodonu. E rau rere vakalailai na cauravou ni sa qase ka wale na kena irairai. E kaya vei rau ena domo sega ni veiwali, “Drau qarauna—e levu tu na sikaki i tuba qori.” Neirau rogoca na veika oqo, keirau kidroa kei Lesa; keirau loma leqa ni na vekaci rau mai na sikaki! Rau sa mani lako i tuba na cauravou me rau qito ni keitou veitalanoa tiko.
E muri ni keitou sa vodo lesu i vale, au tarogi rau na cauravou, “Drau raica e dua na sikaki?” A sauma e dua vei rau, “Sega, keirau sega ni raica e dua na sikaki, keirau raica ga e dua na luveni vusi loaloa oriori vulavula na dakuna!”
Na Dauveitemaki Levu
Na italanoa oqo baleti ira na gone yalowai se qai kila vakadua e dua na ka dina baleta na bula eda na dredrevaka beka, ia era vakaraitaka talega e dua na vakasama bibi.
Ena imatai ni talanoa, e dua na nona itoko na luvei keirau e dua na koli totoka; e taura mai na qaloni iboro ka, taura na barasi ni boroboro, me sa bulia e dua na ka sa vakanananutaki tiko mai.
Ena ikarua ni italanoa, erau sega sara ga ni kila na cauravou na rerevaki ni ka erau rawa ni sotava ke rau raica e dua na sikaki. Ni rau sega ni kila na ka erau sotava, a rawa ni yaco vei rau eso na kena revurevu ca sara. Era italanoa ni kilaleca—sega ni kila na ka dina ka nanuma ni dua tale na ka. Ena italanoa ruarua, e sega soti ni vakacaca vakalevu na ka a yaco.
Ia, ena gauna nikua e vuqa vei keda eda sotava na ka vata oqo ka levu cake sara. Era sega ni dau rawa ni raica na ka ena kena ituvaki dina se era sega ni dau taleitaka na dina. E vuqa sara na iwalewale sa vakayagataki tu nikua me muataki keda tani mai na veika e dina. Na ilawaki kei na lasu oqo era bibi cake sara mai na kilalecavi vakayalowai ga ni ivakatakilakila ka sega ni dau mamada wale se rawarawa na kena revurevu.
Na tama ni lasu kecega o Setani ka dauveitemaki levu, ena vakavuna me da taroga na ituvaki dina ni veika, ka vakawalena na dina tawamudu se veisautaka ki na dua na ka taleitaki vei keda ka marautaki cake na kena irairai. “Ia, sa valuti ira na yalododonu ni Kalou” ka sa vakatovotovotaka tiko mai ena udolu na yabaki na iwalewale me vakauqeti ira kina na luve ni Kalou me ra vakabauta ni ca na vinaka ka vinaka na ca.
Sa vakaitovotaki koya me dau lasutaki keda na tamata ni sikaki ga na luve ni vusi se, ni o boroya sa rawa ni o veisautaka na Labarado me koli Tavutonotono!
Me da goleva mada e dua na ivakaraitaki ni ivakavuvuli oqo e kune ena ivolanikalou, ena gauna e sotava kina e dua na parofita ni Turaga o Mosese ka sotava na mataqali leqa vata oqo. “ Ena gauna a kau cake kina ko Mosese ki na dua na ulunivanua cecere sara, … ka sa raica na Kalou ena matana votu, ka rau sa veivosaki kaya.” A tukuna na Kalou vei Mosese na kena ivakatakilakila tawamudu. E kaya o Koya ni dina ga ni tamata ga o Mosese ka sega ni uasivi sara, ia ko sa “tautauvata kei koya na noqu Le Duabau ga; ia na noqu Le Duabau ga sai koya na iVakabula.”
Ena raivotu talei oqo, e raica o Mosese na Kalou, ka vulica talega o koya e dua na ka bibi me baleti koya: e dina ni tamata vakayago e luve ni Kalou.
Rogoca vinaka na ka a yaco ni mai cava na raivotu vakasakiti oqo. “Ka sa yaco ni sa cavuta oti na veivosa oqo ko Mosese, raica, sa lako mai ko Setani ka vakatovolei koya, ka kaya: I Mosese na luve ni tamata mo qaravi au!” A sauma ena yaloqaqa ko Mosese: “Ko cei ko iko? Raica koi au oqo e dua na luve ni Kalou, ka’u sa tautauvata kei koya na nona Le Duabau ga; evei na nomu lagilagi, meu qaravi iko kina?”
Ena dua tale na kena vosa, a kaya vaqo ko Mosese, “Kakua ni mai vakatovolei au, au kilai au tiko. Au a buli meu ucuya na Kalou. E sega vei iko na Nona rarama kei na lagilagi. A cava meu qaravi iko kina se meu rawai ena nomu veitemaki?”
Rogoca vakavinaka na ikuri ni vosa nei Mosese. Qai kaya o koya, “Mo lako tani vei au Setani; kakua ni mai vakatovolei au.”
E levu na ka eda rawa ni vulica mai na nona sauma ena yaloqaqa o Mosese na veitemaki ni vunica. Au sureti kemuni mo ni sauma vakakina ena gauna o vakila kina na veivakayarayarataki ni veitemaki. Vakarota na meca ni yalomu ena nomu kaya, “Lako tani! E sega nomu lagilagi. Kakua ni mai temaki au se lasutaki au! Niu kilai au tu—e dua na luve ni Kalou. Au na dau kaciva na noqu Kalou me vukei au.”
Na vu ni ca, e sega ni dau viritaka vakarawarawa na itawelu ni nona sasaga me veivakarusai me temaki keda ka vakaisini keda. A sega ni kitaka vakakina vei Mosese, e gadreva me guilecava o Mosese o cei o koya ena gauna tawamudu.
Me vaka e dua na gonelailai tagikaila tiko, sa qolou vakadomoilevu ko Setani, ka karalaki e vuravura, ka veivakaroti, ka kaya: Sai au na Le Duabau Ga, qaravi au.”
Me da railesuva mada. O rogoca beka na ka se qai tukuna o koya? “O au na Le Duabau Ga. Qaravi au!”
E kaya na dauveitemaki levu, “Kua ni leqa; au na sega ni vakamavoataki iko—au sega ni sikaki; o au e dua ga na luve ni vusi oriori loaloa vulavula yalowai.”
Sa qai kaciva na Kalou o Mosese ka ciqoma Nona kaukauwa vakalou. E dina ga ni sautaninini ko Setani ka sakure ko vuravura, e sega ni yavalati ko Mosese. E dei na domona ka matata. “Mo lako tani vei au, Setani,” a kaya ko koya, “ni sai koya ga na Kalou oqo au na qarava, ko koya na Kalou ni lagilagi.”
Oti, “a sa lako tani sara mai kea … ko Setani … mai na iserau kei Mosese.”
Ni oti nona rairai mai na Turaga ka vakalougatataki Mosese ena nona talairawarawa, a kaya na Turaga:
“Ko sa kalougata Mosese, … ko na kaukauwa cake ka malumalumu na wai e vuqa. …
Ia raica, au na tiko vata kei iko, io me yacova ni sa cava na nomu veisiga.”
Nona vorati Setani o Mosese e dua na ivakaraitaki matata veivakararamataki vei keda yadua, se cava ga noda itutu ni bula. E dua na itukutuku qaqa vei iko—mo kila na ka me caka ni tovolea o Setani me temaki iko. Vei iko, me vakataki Mosese, o sa vakalougatataki ena isolisoli ni veivuke vakalomalagi.
iVakaro kei na Veivakalougatataki
Mo na kunea vakacava na veivuke vakalomalagi, me vaka a vakayacora o Mosese, ka sega ni lawakitaki se lutu ki na veitemaki? Ena dua na sala matata ni veivuke vakalou a vakadeitaki tale ena itabagauna oqo mai vua na Turaga Vakataki Koya ka kaya kina o Koya: “Raica koi au na Turaga, au sa kila tu na veika rarawa ena yaco vei ira na kai vuravura, a ka oqo au sa kacivi Josefa Simici, lailai, kina na noqu tamata ka vosa vua mai lomalagi, ka solia vua na vunau.” Ni vakayagataki na malanivosa rawarawa, eda na kaya beka na Turaga o koya e kila “na icavacava mai na itekitekivu,” e kila na dredre ka baleta vakatabakidua noda gauna. O koya, sa vakarautaka kina e dua na sala me da vorata na bolebole kei na veitemaki, e vuqa e yaco mai ena nona veivakayarayataki lawaki ca na meca kei na nona ivadi.
E rawarawa tu ga na kena sala. Mai vei ira na Nona italai, sa dau vosa vei keda na Kalou, o keda na Luvena, ka vakaroti keda. E rawa ni da moica na veitikina au se qai cavuta ka reki, na Kalou sa “kaciva na [Nona] italai [Peresitedi Russell M. Nelson], ka vosa vua mai lomalagi, ka vakaroti koya.” E sega beka ni dua na dina lagilagi oya?
Au vakadinadinataka ni a vosa dina mai lomalagi vei Josefa Simici na Turaga, ka tekivu mai na iMatai ni Raivotu cecere. E vosa talega vei Peresitedi Nelson o Koya ena noda gauna. Au vakadinadinataka ni dau veivosaki na Kalou kei ira na parofita ena veitabagauna sa sivi ka solia vei ira na ivakaro ka kedra inaki me tuberi ira na Luvena ki na marau ena bula oqo ka vakalagilagi ena kena ka tarava.
E tomana tiko na Kalou na nona solia tiko na ivakaro vua na noda parofita bula nikua. Oka kina na iVakaraitaki—na ivakarau ni vakalevutaki cake na idusidusi me iusutu ni vuvale ka tokoni ena Lotu; na isosomi ni veisiko vuvale ki na veiqaravi; na veisau ki na lawatu kei na cakacaka vakalotu ni valetabu; kei na parokaramu vou ni Gone kei na iTabagone. Au qoroya na nona vinaka kei na yalololoma na Tamada Vakalomalagi dauloloma kei na Luvena, ko Jisu Karisito, o koya sa vakalesuya mai na Nona Lotu ki vuravura ka sa kaciva e dua na parofita ena noda gauna. Na Vakalesui mai ni kosipeli i Jisu Karisito sa sosomitaka na veigauna ca ena taucoko ni gauna.
Ena Sega na Marau ena iValavala Ca
Na talairawarawa ki na ivakaro e soli vua na noda parofita sa idola sega walega ena kena levei na veivakayarayarataki kei na ilawaki ni vunica ia me sotavi talega na reki kei na marau tudei. E rawarawa sara na isau vakalou oqo: yalododonu, se talairawarawa ki na ivunau, me kauta mai na veivakalougatataki, na kalougata e kauta mai na marau, se reki, ki na noda bula.
Ia, ena sala vata ga a tovolea kina o Setani me temaki Mosese, sa segata kina ko koya me lawakitaki iko. Sa dau vakamatavulotaki koya ena dua na ka e sega ni o koya. E dau tovolea me vunia o cei dina o koya. E kaya ni talairawarawa eda na logalogaca kina ka na butakoca noda marau.
E rawa beka ni o vakasamataka eso na nona ivadi ni veitemaki? Taura mada, dau vakamamadataka o koya na ca ni gunu kei na wainimate gaga ka kaya ni na kauta mai na vakacegu. E luvuci keda tu o koya ena veika e sega soti ni vinaka e tiko ena tabana ni veimaliwai raraba, oka kina na veivakatautauvatataki dau vakamalumalutaki keda kei na ituvaki vinaka duadua sega ni dina. Me kena ikuri, e kauti keda o koya ki na veika e veivakacacani ena initaneti ka sa cakacakataki tu me vakavuna na mavoa se na mosi, me vaka na yaloyalo vakasisila, na veivakacacani vei ira na tani ena biaulivaliva, kei na itukutuku veivakacalai eso me vakavuna na vakatitiqa kei na rere ena lomada kei na noda vakasama. Dau vakasolokakana vakailawaki, “Muri au ga mai, ko na marau dina.”
Na vosa a vola e dua na parofita ni iVola i Momani ena vica na senijiuri sa oti sa baleta sara talega na noda gauna oqo: “A sega vakadua ni vu ni marau na ivalavala ca.” Me da rawa ni kila na ivadi nei Setani ni da raica. Me da vorata ka raibasikata na lasu kei na veivakayarayarataki i koya e gadreva tu me rusa na yaloda ka butakoca noda reki ena gauna oqo kei na lagilagi ni veisiga ni mataka.
Kemuni na taciqu kei na ganequ, me da yalodina tikoga ka yadra, ni sai koya ga oqori na sala me da kila kina na dina ka rogoca na domo ni Turaga mai vei ira Nona italai. ni sa tukuna na ka dina na Yalo ka sega ni dau lasu. Sa vakatakila mai kina vakamatata vei keda na veika kece oqo, me vakabulai kina na yaloda. Ni a vosa talega kina na Kalou vei ira na parofita ni gauna makawa.” Eda Yalododonu ni Kalou sa Cecere sara, na inuinui kei Isireli! Me bale li? “Me da vakadrukai tu? Kua! … Dei kei na dina mo tudei tu.”
Au wasea na noqu ivakadinadina me baleta na Yalosavasava ni Isireli—io na yaca i Jisu Karisito. Au vakadinadinataka na Nona loloma, dina kei na bulamarau tudei ka vakavotukanataki ena Nona isoro sega ni vakaiyalayala ka tawamudu. Ni da talairawarawa ki na Nona ivakaro, eda na tuberi tikoga ena sala dodonu ka na sega ni rawai. Ena yaca tabu ni noda iVakabula, ko Jisu Karisito, emeni.