13–19 ni Noveba

Jemesa

“Ia Dou Muria na Vosa, ka Kakua ni Rogoca Walega”

Na iVola i Jemesa e levu tu kina na ka dina e rawa ni vakalougatataka nodra bula na gone o vakavulica. Vakamuria na Yalotabu mo navuca na dina cava so o na wasea vei ira. Na vakasama eso ena ituvatuva oqo sa rawa ni veivuke.

Sureta na Veiwasei

Sureta na gone me ra wasea na ivakavuvuli ni kosipeli era nanuma ni vulica tu kei na nodra matavuvale ena macawa sa oti se ena kalasi ni Lalai ena Sigatabu sa oti. Ni sa veiwasei oti na gone yadua, sureta e dua tale na gone ena kalasi me vakalekalekataka na ka a wasei.

Vakavulica na iVunau: Gone Sobu

Jemesa 1:5–6

Au rawa ni kerea na Tamada Vakalomalagi me vukei au ni vulica na ka dina.

Vukea na gone o vakavulica me ra kila matua ni sa rawa ni ra gole vua na Tamada Vakalomalagi ena vuku ni yalomatua. Na kena vakayacori ena vakalougatataki ira vakalevu sara ni ra sotava na taro dredre eso.

iTaviqaravi e Rawa ni Caka

• Vukea na gone me ra tokaruataka na malanivosa “Ia kevaka sa lailai na vuku vua e dua vei kemudou, me kerea vua na Kalou” (Jemesa 1:5). Me da na vakataroga vakacava na Kalou? E dau sausaumi vakacava vei keda?

• Vakaraitaka na yaloyalo ni Matai ni Raivotu (iVola ni iYaloyalo Vakosipeli, naba 90), se vakaraitaka na vidio “Joseph Smith‘s First Vision” (ChurchofJesusChrist.org). Vakamacalataka ni a vakauqeti Josefa Simici na wiliki ni Jemesa 1:5 me kerea na Tamada Vakalomalagi me vukei koya ena dua na taro (raica na Josefa Simici—Ai Tukutuku 1:1–20). Wasea na nomu vakadinadina ni sa dau sauma na masu na Kalou, ka vakadinadinataka ni rawa ni masuti Koya o ira na gone ni ra lomatarotaro tu. Me ra qai droinitaka na gone na nodra dui yaloyalo i Josefa Simici ena wiliki ni Jemesa 1:5 ka masuta tu na Tamada Vakalomalagi.

Jemesa 3:1–13

Au rawa ni vosa ena yalovinaka.

Me vaka a vakadinadinataka o Jemesa, na vulici ni veivosa vinaka duadua ga vei ira na tani ena vukei keda ni vakataki Jisu Karisito tu (raica na Jemesa 3:2).

iTaviqaravi e Rawa ni Caka

• Vakaraitaka na yaloyalo eso ni ka kamikamica kei na ka wiwi. Vukea na gone me ra kila matua ni sa kerei keda na Tamada Vakalomalagi me da vakayagataka na yameda ni tukuna na veika kamica (se yalovinaka) ka sega ni veika wiwi (se yaloca) (raica na Jemesa 3:10). Vukei ira ni vakasamataka na ivakaraitaki ni veika vinaka eda rawa ni tukuna vei ira na tani.

• Solia ki na gone yadua na droini rawarawa ni dua na tamata e vosa tiko. Sureta na gone me ra taura cake ni o tukuna na ka vinaka eda rawa ni cakava ena noda vosa (vaka na vosa dina tu, veivakacaucautaki, kei na vukei ni dua na tamata) ka biuta sobu ni o tukuna na ka e sega ni dodonu me da cakava ena yameda (vaka na vosa lasu, vosa vakacacani ira na tani, kei na talaidredre vua na itubutubu).

• Tokona na itukutuku i Jemesa 3:1–13 ena lagati vata ni sere ni yalovinaka, vaka na “Me Tekivu Vei Au” (iVolanisere ni Gonelalai, 83).

Jemesa 5:7–11

Na ciqomi ni veivakalougatataki ni Kalou sa gadreva na vosota.

Na vosota e sega ni dau yaco ga mai vakataki koya, vakabibi vei ira na gone. Navuca na sala o rawa ni vakayagataka kina na vakasala i Jemesa mo vukea kina na gone o vakavulica me ra vulica na vosota.

iTaviqaravi e Rawa ni Caka

• Vukea na gone me ra vakasamataka na gauna eso era a waraka tu kina e dua na ka era a vinakata saraga. Wasea na gauna o a wawa tu kina. Vakamacalataka na waraki ni dua na ka eda vinakata e sega ni vosakudrukudrutaki sa vakatokai na vosota.

• Vakalekalekataka na Jemesa 5:7 ena nomu vosa ga, ka vakaraitaka na yaloyalo ni sorenikau se itei. Cava na vuna eda gadreva kina na vosota ni da tea na kau eso? Na cava ena yaco ke da via dreta tu na itei me totolo kina na kena tubu? O rawa talega ni veitalanoataka kei ira na gone na ibalebale ni nodra vosoti tu na tani kei keda vakaikeda. Vakadinadinataka ni sa rawa ni vukei keda na Kalou ni vulica tu na vosota.

• Wasea na talanoa kei Jope, ka tukuni ena Jemesa 5:11 me ivakaraitaki ni vosota (raica na “Jope,” ena iTalanoa ni Veiyalayalati Makawa, se na kena vidio ena ChurchofJesusChrist.org). A vakalougatataki vakacava o Jope ni vosota tu?

Vakavulica na Vunau: Gone Qase Cake

Jemesa 1:5–6

Ena vukei au na Tamada Vakalomalagi ni vulica na ka dina keu qara na Nona veivuke.

O ira na gone o vakavulica sa lailai sobu ga ena vica na yabaki vei Josefa Simici ni wilika tu na Jemesa 1:5 ka sa vakauqeti me torova na Tamada Vakalomalagi ena masu. Navuca na sala o rawa ni vukea kina na gone o vakavulica ni tara cake na nodra vakabauta ni na vukei ira na Kalou ni lailai vei ira na vuku.

iTaviqaravi e Rawa ni Caka

• Kerea na gone me ra tukuna vei iko na talanoa ni Matai ni Raivotu i Josefa Simici ena nodra vosa ga (raica na Josefa Simici—Ai Tukutuku 1:5–20; raica talega na vidio “Joseph Smith’s First Vision” ena ChurchofJesusChrist.org). A vukei Josefa vakacava na wiliki ni Jemesa 1:5? Vukea na gone me ra vakasamataka na ivakaraitaki ni tamata tale eso ena ivolanikalou ka ciqoma na isau ni nodra masu, vakataki Nifai (raica na 1 Nifai 11:1–6) kei na tuakai Jereti (raica na Ica 2:18–3:9). Na cava na ka eso eda rawa ni kerea vua na Tamada Vakalomalagi ena masu?

• Wilika kei ira na gone na Josefa Simici—Ai Tukutuku 1:10–14. Sureta na gone me ra vaqara na veika a cakava o Josefa Simici me ciqoma kina na isau ni nona vakatataro. E rawa vakacava ni da muria na ivakaraitaki i Josefa ni da lomatarotaro tu?

Jemesa 1:22–27; 2:14–26

“Sa mate ga na vakabauta ni sa sega na cakacaka.”

O na vukei ira vakacava na gone ni raica na isema ni ka era vakabauta kei na ka era cakava?

iTaviqaravi e Rawa ni Caka

• Vakaraitaka vei ira na gone e dua na cinalivaliva sega ni vakabatiri, dua na penikau sega ni vakamatana, se dua tale na ka tawayaga se ka “mate.” Kerea na gone me ra wilika na Jemesa 2:14–17. Era vakatakila vakacava na ka dina na veiyaya oqo ena veitikina oqori?

• Sureta eso na gone me wilika lo na Jemesa 1:22–27 ka so tale me wilika na 2:14–18. Qai sureta me ra wasea na ka era rawa ni cakava me vakaraitaka ni ra sa muria na vosa. Vakaoqo, era sa maroroya tiko vakacava na nodra veiyalayalati ni papitaiso? Era kila li e dua ka tauvimate se galili tu era rawa ni sikova? E rawa vakacava ni ra qarava vakalevu cake na nodra matavuvale? O rawa talega ni vakananumi ira ena vosa eso era rairai rogoca tu ena soqoni ni sakaramede nikua. E rawa vakacava meda muria tu na vosa oqo?

“Sa vakabauta na Kalou ko Eparaama” (Jemesa 2:23). Eparaama ena Buca o Mamire, mai vei Grant Romney Clawson

Jemesa 3:1–13

Au rawa ni digitaka meu vosa ena yalovinaka.

Na vosa eda tukuna vakaikeda ena rairai sega ni bibi, ia me vaka a vakadinadinataka o Jemesa, sa rawa ni veivakayarayarataki vakalevu sara, me vinaka se ca.

iTaviqaravi e Rawa ni Caka

• E tiko li e dua ena tabanalevu, de dua na gone o vakavulica, ka kila tu na nodra qaravi na ose se kila e dua na ka baleta na waqa? O rawa ni sureti koya me vakarautaka na raiyawa eso ni vakavuvuli i Jemesa ena Jemesa 3:3–4 ena vakayagataki ni vosa vinaka. Se vakarautaka eso na nomu raiyawa vakai iko. Na cava eda vulica baleta na qarauni ni yameda mai na ivakaraitaki eso oqo?

• Sureta na gone me ra wilika na Jemesa 3:1–13 ka droinitaka na yaloyalo ni dua na ka era raica ni vakavulica tu na qarauni ni yameda. Solia na gauna me ra wasea na nodra yaloyalo kei na ka era sa vulica. Lagata vata e dua na sere ena vakayagataki ni vosa vinaka, vaka na “Me da Dau Veivakacaucautaki” (Serenilotu, naba 139).

• Ni sa railesuvi oti vata tu na Jemesa 3:1–13 , railesuva na ivakatagedegede ni vosavosa ena Me iSakisaki ni iTabagone ([ivolalailai, 2022], 12). Vukea na gone me ra tuva e dua na takete me vakavinakataka na sala era veivosaki vakai ira kina, ka vakauqeta me ra kerea na Tamada Vakalomalagi me vukei ira ena takete oqo.

Vakauqeta na Vuli e Vale

Sureta na gone me ra cakava e dua na ka ena macawa oqo me tutaki kina na ka era sa vulica ena kalasi, vaka na masuti ni Tamada Vakalomalagi ena dua na taro se tovolei ni vosota vakalevu tu. Kerea me ra wasea na ka era sotava ena kalasi ka tarava.

Vakatorocaketaki Noda Veivakavulici

Vukea na gone me ra yamekemeke. “Ni o vakavulica na gone, vakatara me ra tara, droinitaka, rokataka, vola, ka bulia. Na ka oqo sa ra levu cake mai na itaviqaravi lasa eso—era sa yaga sara ki na vuli” (Veivakavulici ena iVakarau ni iVakabula, 25).