“6–12 ni Noveba. Iperiu 7–13: ‘A Sa Bete Levu ena Ka Vinaka ena Muri Mai,’” Lako Mai, Mo Muri Au—Me Baleti Ira na Lalai: Veiyalayalati Vou 2023 (2021)
“6–12 ni Noveba. Iperiu 7–13,” Lako Mai, Mo Muri Au—Me Baleti Ira na Lalai: 2023
Sa Vakalougatataki Eparama o Melikiseteki, mai vei Walter Rane. iSolisoli ni daudroini
6–12 ni Noveba
Iperiu 7–13
“A Sa Bete Levu ena Ka Vinaka ena Muri Mai”
Ni o railesuva ka vakananuma vakatitobu na ituvatuva oqo, vakarogoca matua na veivakauqeti o ciqoma baleti ira na gone o vakavulica. Ena vukei iko na Yalotabu mo kunea na itukutuku eso me baleti ira ena Iperiu 7–13.
Sureta na Veiwasei
Kerei ira na gone me ra wasea na veika era dau cakava kei na nodra matavuvale me ra vulica na kosipeli e vale. Sureti ira me ra wasea eso na ka taleitaki era sotava ena vulici ni kosipeli vata kei na nodra matavuvale.
Vakavulica na iVunau: Gone Sobu
Na matabete e rawa ni vukei keda ena vuqa na sala.
Na Iperiu 7:1–6 e rawa ni vakarautaka e dua na madigi me veikilaitaki kina vei ira na gone na veivakalougatataki ni matabete.
iTaviqaravi e Rawa ni Caka
-
Vakamacalataka vakalekaleka o cei o Eparaama, ka qai vakayagataka na Iperiu 7:1–6 mo vakavulica ni a sauma o Eparaama na ikatini vei Melikiseteki (raica talega na iVakadewa nei Josefa Simici, iVakatekivu 14:36–40 [ena iDusidusi ki na iVolanikalou]). Vakamacalataka ni a tu vei Melikiseteki na matabete, sa ikoya na kaukauwa ni Kalou, ka a vakayagataka o koya me vakalougatataki Eparaama kina. Era na marautaka beka na gone me ra matanataka na italanoa oqo ena iyaya rawarawa eso, me vaka na isala ni tui kei na waqanivola ni katini.
-
Sureta mai e dua na lewe ni Matabete i Eroni kei na dua mai na Matabete i Melikiseteki me sikova na kalasi ka tukuna vei ira na gone na ivakarau erau sa vakayagataka kina na matabete me vakalougatataki ira kina na tani. Qai vakaraitaka vei ira na gone na iyaloyalo ni veicakacaka vakalotu duidui ni matabete (me ivakaraitaki, raica na iyaloyalo 103–8 ena iVola ni Yaloyalo Vakosipeli). Vukei ira na gone me ra tukuna na matabete cava e gadrevi ena cakacaka vakalotu yadua ka solia na iyaloyalo oya vua na lewe ni matabete veiganiti me taura.
Na vakabauta sa ikoya noda vakadinata na veika eda sega ni raica rawa.
E dina ga ni da sega ni rawa ni raica na Tamada Vakalomalagi kei Jisu Karisito, e rawa ni da taracake na vakabauti Rau kei na Nodrau yalayala, ena vakamuri ni nodra ivakaraitaki na tamata yalodina e vakamacalataki ena Iperiu 11.
iTaviqaravi e Rawa ni Caka
-
Vakaraitaka e dua na iyaloyalo kei Jisu. Biuta wavoki ena rumu eso na iyaya me matataka na “ivakaraitaki eso” ni tiko dina o Koya e dina ga eda sega ni rawa ni raici Koya (me vaka na ivolanikalou, dua na iyaloyalo ni Matai ni Raivotu, kei na dua na iyaloyalo ni vuravura). Sureti ira na gone me ra vaqara na iyaya oqori, qai wasea vei ira na ivakarau e vukei keda kina na iyaya yadua me da vakabauta ni bula tiko o Jisu.
-
Kauta mai e dua na iri pepa, ka me ra qai veivukevuke na gone ni vakila na irivaki ni cagi e matadra. Vakavulica vei ira ni da sega ni rawa ni raica na cagi, ia eda rawa ni vakila. Sa vakakina, eda sega ni rawa ni raica na Tamada Vakalomalagi kei Jisu Karisito, ia eda rawa ni vakila na Nodrau loloma ka vakabauta ni Rau tiko dina.
-
Wasea na italanoa ni dua se levu na tamata e tukuni ena Iperiu 11:4–32. E rawa talega ni o kunea na italanoa baleti ira na tamata oqo ena iTalanoa eso mai na Veiyalayalati Makawa. Na cava era a cakava na tamata oqo me vakaraitaka ni ra vakabauta e dua na ka era sega ni raica rawa? Wasea eso na veivakalougatataki o sa ciqoma ena vuku ni nomu vakabauta.
Ena vukei keda na Tamada Vakalomalagi kei Jisu Karisito ka sega ni laivi keda.
Na veivakatovolei cava beka era sotava tiko na gone? Ena vukei ira beka vakacava na itukutuku ena Iperiu 13:5–6?
iTaviqaravi e Rawa ni Caka
-
Railesuva eso na italanoa ni Veiyalayalati Vou era sa vulica na gone ena yabaki oqo ka vukei ira kina na tani na iVakabula, me vaka Nona vakabula na tamata tauvi‑paralasi (raica na Luke 5:18–26) se vakania na 5,000 (raica na Maciu 14:15–21). Vukei ira na gone me ra vulica na malanivosa “A noqu ivukevuke ko Jiova” (Iperiu 13:6).
-
Sureti ira na gone me ra droinitaka e dua na iyaloyalo ni gauna a vakacegui ira kina e dua ni ra a rere voli. Wilika vei ira na Iperiu 13:5–6 ka vakadinadinataka ni na vukei keda na Tamada Vakalomalagi ka sega ni laivi keda. Vukei ira na gone me ra kotiva na ate pepa lelevu eso me rawa ni ubia na droini. Na cava eso na ka ena vukei keda me da voleka yani vua na Tamada Vakalomalagi? Vola eso na ka oqo ena uto.
-
Vakavulica vei ira na gone e dua na sere me baleta na ivakarau dau lomani keda ka vukei keda kina na Tamada Vakalomalagi kei Jisu, me vaka na “Ni Vosa Mai” (iVolanisere ni Gonelalai, 75). Eda na kila vakacava ni sa voleka vei keda na Tamada Vakalomalagi kei Jisu Karisito? Veitalanoataka e dua na gauna o a vakila kina ni “a [nomu] ivukevuke ko Jiova.”
Vakavulica na iVunau: Gone Qase Cake
Era dau muria na iVakabula o ira na iliuliu ni Lotu.
O na vakayagataka vakacava na veitikina oqo mo vukei ira na gone me kila ni o ira era sa kacivi me veiqaravi ena Lotu ni Turaga me ra yalodina ka qaravi ira na tani me vakataki Koya?
iTaviqaravi e Rawa ni Caka
-
Vukei ira na gone me ra vola na veika era kila baleti rau e rua na iliuliu cecere o Eparaama kei Melikiseteki. E rawa ni ra vukei ena Iperiu 7:1–4; Eparaama 1:1–2; kei na iVakadewa nei Josefa Simici ni iVakatekivu 14:25–40 (ena ikuri ni veivuke ni iVolatabu). Na itovonibula va-Karisito cava soti a tu vei rau na turaga oqo ka vukei rau me rokova na matabete?
-
Kerei ira na gone me ra wilika na Iperiu 7:1–2 ka vaqara na itutu eso a vakayagataki me vakamacalataki Melikiseteki. E vakananumi keda vakacava na itutu eso oqo me baleti Jisu Karisito? Vukei ira me ra vakasamataka na sala eso a “Tui ni veivakacegui” kina o Jisu. Sureti ira me ra tukuna baleta eso tale na matabete ka ra sa dua talega na ivakaraitaki ni muria na iVakabula.
-
Wasea e dua na gauna a vaqaqacotaki kina na nomu vakabauta na iVakabula ena vuku ni nona veiqaravi e dua na lewe ni matabete buladodonu. Vukei ira na gone mera vakasamataka na sala eso sa vakalougatataki ira kina na matabete.
Na Tamada Vakalomalagi sa dau vakalougatataki ira era sa vakabauta.
Na Iperiu 11 e tiko kina e vuqa na ivakaraitaki ni tamata era a vakalougatataki ni ra a cakacaka ena vakabauta. Na italanoa cava ena veivakauqeti vakalevu se veivuke vei ira na gone o vakavulica?
iTaviqaravi e Rawa ni Caka
-
Sureti ira na gone me ra vola ena papa na veika era sa vulica me baleta na vakabauta ena Iperiu 11:1–3, 6. Solia vei ira yadua na gone na yacana e dua e cavuti ena Iperiu 11, ka sureti ira me ra wilika na veitikina e baleta na tamata oya. Kerei ira me ra wasea eso na ka me baleta na tamata oya me rawa ni ra vakilakila na gone tale eso se o cei oya. Era a vakaraitaka vakacava na vakabauta na tamata oqo, ka vakalougatataki ira vakacava na Tamada Vakalomalagi? (Me baleta na kedra iyaloyalo na tamata oqo, raica na iwasewase ni Veiyalayalati Makawa ena iVola ni Yaloyalo Vakosipeli.)
-
Ni oti na wiliki ni so na ivakaraitaki yalodina ena Iperiu 11, kerei ira na gone me ra vola baleta e dua na tamata era kila a vakaraitaka na vakabauta. Sureta e vica na gone me ra wasea na nodra ivakaraitaki ki na kalasi.
Na Turaga sa dau vunauci ira e lomana o Koya.
Na veitikina oqo e rawa ni vukei ira na gone me ra kila ni sa dau vakadodonutaki ira na Tamada Vakalomalagi, nodra itubutubu, kei na so tale baleta ni ra lomani ira ka vinakata me ra vuli mai na nodra cala.
iTaviqaravi e Rawa ni Caka
-
Wilika vata na Iperiu 12:5–11, ka kerei ira na gone me ra vaqara na vuna e dau vunauci keda (vakadodonutaki se vakavulici keda) kina na Tamada Vakalomalagi. Na cava e vakavulica vei keda oqo baleta na vuna era dau vakadodonutaki ira talega kina na luvedra na itubutubu vakavuravura? Me da na dolea beka vakacava na veivakadodonutaki ena loloma?
-
Wasea na nodra ivakaraitaki na tamata ena ivolanikalou era a vunauci mai vua na Turaga ka veivutuni (kena ivakaraitaki, raica na 1 Nifai 16:25–27; Ica 2:13–15). Era sa ivakaraitaki vinaka vakacava ni ivakavuvuli ena Iperiu 12:5–11?
-
Ni wiliki oti na Iperiu 12:5–11, sureti ira na gone me ra vola e vica na ka era na tovolea me nanuma ni ra sa vakadodonutaki ena vuku ni nodra cala.
Vakauqeta na Vuli e Vale
Sureti ira na gone me ra vola se droinitaka e dua na iyaloyalo ni dua na ka era sa vulica ena kalasi. Vakauqeti ira me ra wasea na ka era sa vulica ki na nodra matavuvale.
Vakatorocaketaki Noda Veivakavulici
Vakayagataka na tabana ni itaviqaravi. Ni ra sa vakacavara voli na gone na tabana ni itaviqaravi ena gauna ni kalasi, vakayagataka na gauna oqori mo railesuva kina na ivakavuvuli eso mai na lesoni.