A‘oa‘o Atu o Tamaiti Laiti

Afai e i ai sau fanau laiti i lou aiga, o nai gaoioiga nei e mafai ona fesoasoani latou te a‘oa‘o ai:

• Pepese. Viiga ma pese mai le Tusipese a Tamaiti e a‘oa‘o atu ai ma le mamana ia a‘oa‘oga faavae. Faaaoga le faasino autu o i tua o le Tusipese a Tamaiti e su‘e ai ni pese e fetaui ma mataupu faavae o le talalelei o loo e a‘oa‘o atu. Fesoasoani i lau fanau e faafetaui le savali o pese i o latou olaga. (Tagai foi “Faaaofiaga o Musika Paia i Lou A‘oa‘oina o le Talalelei” o loo i lenei puna‘oa.)

• Faalogologo i le, pe faatino foi se tala. E fiafia lava tamaiti laiti i tala—mai tusitusiga paia, mai lou olaga, mai le talafaasolopito o le Ekalesia po o talafaasolopito o lou aiga, pe mai mekasini a le Ekalesia. Vaavaai mo auala e faaaofia ai i latou i le faamatalaina o tala. E mafai ona latou uuina ata po o meafaitino, tusi ata o mea latou te faalogo i ai, faatino le tala, pe fesoasoani foi i le faamatalaina o le tala. Fesoasoani i lau fanau ia iloa upumoni o le talalelei i tala o loo e faasoa atu.

• Faitau se mau. Atonu e tau le mafai e tamaiti laiti ona faitau, ae e mafai lava ona e faagalulue i latou e a‘oa‘o mai tusitusiga paia. E te ono manaomia le taulai atu i se fuaiupu se tasi, fasi fuaitau autu, po o upu. Atonu foi e mafai e tamaiti ona latou taulotoina ni fasifuaitau pupuu mai mau pe a latou faia faafia. A o latou faalogo i le upu a le Atua, o le a latou lagonaina le Agaga.

• Tilotilo i se ata pe matamata se vitio. A e faaali atu i lau fanau laiti se ata po o se vitio e faatatau i se mataupu faavae o le talalelei po o se tala mai le tusi paia, fesili i ai ni fesili e fesoasoani latou te aoao ai mai mea latou te vaai i ai. Mo se faataitaiga, e mafai ona e fesili, “O le a le mea lea e tupu i le ata lea po o le vitio? O a ni ou lagona ua maua ai?” O le polokalama o le Gospel Media, MediaLibrary.ChurchofJesusChrist.org, ma le children.ChurchofJesusChrist.org o ni nofoaga lelei ia e su‘e ai ata ma ni vitio.

• Fatufatu. E mafai e tamaiti ona fau, tusi se ata, pe valivali se mea e faatatau i le tala po o se mataupu faavae o loo latou aoaoina.

• Auai i le faatinoina o lesona faitino. E mafai ona fesoasoani se lesona faitino faigofie i lau fanau e malamalama ai i se mataupu faavae o le talalelei e faigata ona malamalama ai. A faaaoga lesona faitino, vaai ni auala e faaauai ai lau fanau i le faatinoina. O le a tele mea latou te aoaoina i se aafiaga latou te faatinoina nai lo le na o le matamata i se faataitaiga.

• Faatino i Taga. A faatino e tamaiti taga o se tulaga latou te ono oo i ai i le olaga moni, o le a sili ona latou malamalama i le ala e faatatau ai se mataupu faavae o le talalelei i o latou olaga.

• Fai ma toe fai ia gaoioiga. Atonu e moomia e tamaiti laiti ifo ona faalogo faafia i manatu faavae ina ia malamalama ai. Aua e te fefe e fai faafia tala pe faifai soo ia gaoioiga. Mo se faataitaiga, e mafai ona faatele ona e faasoa atu se tala o tusitusiga paia i ni auala eseese—e ala i le faitau mai tusitusiga paia, aotele i au lava upu, faaali se vitio, tuu atu i tamaiti e fesoasoani ia te oe i le faamatalaina o le tala, valaaulia i latou e faatino le tala, ma isi mea faapena.

o le aiga o loo suesue i tusitusiga paia