Chan ru roksinkil Kim, Taaqehin—Choq’ reheb’ li komon ut li junkab’al

Ani aj-e li hu a’in?

Li hu a’in, a’an choq’ reheb’ chixjunil li komon ut li junkab’al sa’ li Iglees. Yiib’anb’il re aatenq’ankil chixtzolb’al li evangelio—maak’a’ naxye wi aajunes malaj rik’in laa junkab’al. Wi ink’a’ ak nakatzol li evangelio chi kok’ aj xsa’, li hu a’in tatxtenq’a chixtikib’ankil. Wi ak yookat chixtzolb’al li evangelio, li hu a’in tatxtenq’a chixtawb’al chik aana’leb’ sa’ xb’aanunkil.

Chan ru naq tinwoksi li hu a’in?

Taawoksi li hu a’in yalaq chan ru nakak’oxla naq tatxtenq’a. Naru nakatxtenq’a jo’ jun aj k’amol b’e re xtzolb’aleb’ li loq’laj hu aajunes ut rik’in laa junkab’al. Naru ajwi’ taawoksi choq’ re li q’ojyin re junkab’al. Eb’ li tusleb’ aatin neke’xk’ut junjunq li xninqal ru na’leb’ neke’tawman sa’ li Najter Chaq’rab’, ut naxye resil li tzolok ut li k’a’ chik ru naru neke’xb’aanu li komon ut li junkab’al, ut wan ajwi’ chi sa’ li na’ajej re taatz’iib’a li k’a’ru nakak’oxla.

Kim, Taaqehin—Choq’ reheb’ li komon ut li junkab’al ink’a’ tixk’ul xna’aj malaj tixram li k’a’ru chaab’il ak yookat chixb’aanunkil. Kanab’ li Musiq’ej chixk’amb’al aab’e re xnawb’al chan ru naq taatzol li raatin li Dios.

jun winq ut ixq neke’ril li loq’laj hu sa’ rochocheb’

Chan ru nak’anjelak li hu a’in sa’ li k’a’ru na’uxman sa’ li Iglees?

Eb’ li tusleb’ aatin sa’ li hu a’in wankeb’ chi tustu re taatzolmanq jun jachal rajlal xamaan. Junta’qeet lix tusub’ankileb’ li hu Kim, Taaqehin choq’ re li Tzoleb’aal reheb’ li Kok’al, li Dominkil Tzoleb’aal, ut eb’ li molam sa’ li Tijonelil re Aaron ut lix tzoleb’aaleb’ li Saaj Ixq. Re aatenq’ankil chixtzolb’al ut chixyu’aminkil li evangelio sa’ laa wochoch, eb’ laa k’utunel sa’ li iglees tate’xkanab’ chixwotzb’al li k’a’ru xak’ul ut xak’oxla, ut eb’ laa patz’om chirixeb’ li raqal reheb’ li loq’laj hu li yookat chixtzolb’al sa’ laa wochoch.

Xb’aan naq taa’uxmanq li Dominkil Tzoleb’aal yal wiib’ sut chiru li po, eb’ laj k’utunel sa’ li Dominkil Tzoleb’aal naru te’xsik’ xjunajinkil wiib’ li tusleb’ aatin malaj ink’a’ te’xk’ut jun reheb’ re naq ink’a’ te’xsach xna’ajeb’ sa’ li tusleb’ kutan. Wan naq tento xb’aanunkil ajwi’ a’in (sa’ li Dominkil Tzoleb’aal jo’ ajwi’ sa’ li Tzoleb’aal reheb’ li Kok’al) sa’eb’ li xamaan naq ink’a’ na’uxman li Dominkil Tzoleb’aal sa’ Iglees xb’aan naq wanq li ch’utub’aj-ib’ re oqech malaj k’a’ruhaq chik. Chiruheb’ li xamaan a’an, toj b’oqb’ilat chixtzolb’al li Najter Chaq’rab’ sa’ ochoch.

Ma aajel ru naq tintaaqe li tusleb’ kutan?

Li tusleb’ kutan tatxtenq’a chixchoyb’al rilb’aleb’ ru li taqatzol sa’ li Najter Chaq’rab’ ut li Q’ol Nim Xtz’aq sa’ xraqik li chihab’. Jo’kan ajwi’, xtaaqenkil li tusleb’ kutan jo’ yookeb’ chixb’aanunkil aakomon naru tixchaab’ilob’resi li tzolok sa’ li ochoch, li iglees, ut yalaq b’ar chik. A’b’an, maak’oxla naq tento xtaaqenkil chi tz’aqal tz’aqal malaj rilb’al ru chixjunileb’ li raqal; a’an yal jun aj k’amol b’e re aatenq’ankil chi tzolok sa’ xyaalalil chiru li chihab’. Li k’a’ru aajel ru a’an naq yookat chixtzolb’al li evangelio aajunes ut aawochb’een laa junkab’al.

Jun na’leb’ chirix li tusleb’ kutan choq’ re li Najter Chaq’rab’

Moko napatz’man ta sa’ li tusleb’ kutan re Kim, Taaqehin choq’ re 2022 naq te’ilmanq ru chixjunileb’ li ch’ol sa’ li Najter Chaq’rab’. Jwal nim wi’chik li Najter Chaq’rab’ chiru jalaneb’ chik li loq’laj hu, jo’kan naq wankeb’ li ch’ol ut li hu li ink’a’ te’tzolmanq re aatenq’ankil laa’at ut laa junkab’al chixchoyb’al li tzolok.

Ke’isiman li ch’ol ut li hu b’ar wi’ ak k’utb’il li na’leb’ sa’ jalan chik, ut re naq te’ilmanq li neke’xch’olob’ xyaalal li Jesukristo, neke’xk’ut li tzol’leb’, ut li naru toohe’xtenq’a sa’ li qakutankil. Li tusleb’ kutan ink’a’ naxpatz’ naq taa’ilmanq 1 ut 2 Kronikas xb’aan naq lix k’ihal li na’leb’ li wan aran natawman ajwi’ sa’ 1 ut 2 Reyes. Jo’kan ajwi’, moko wan ta li hu Cantares, xb’aan naq laj Jose Smith kixk’ut naq moko musiq’anb’il na’leb’ ta li hu a’an (chi’ilmanq K’utul Raqal reheb’ li Loq’laj Hu, “Cantares (Xchaq’alil ru b’ich) ”). A’ut, chijultiko’q aawe naq moko taqlanb’il ta li tento xtzolb’al. Li tzolok teeb’aanu sa’ junesal ut jo’ junkab’al tento b’eresinb’ilaq xb’aan li k’utb’esinb’il na’leb’.