Ngaahi Fakataha Alēlea ʻo e Sāpate ʻUluakí

ʻI he Sāpate ʻuluaki ʻo e māhina takitaha, he ʻikai akoʻi ai ha lēsoni ʻe ha faiako ʻi he fakataha ʻa e kulupú, kōlomú mo e Fineʻofá. Ka ʻe tataki ai ʻe he kau palesitenisií pe kau taki ʻo e kulupú, ha fakataha alēlea. ʻE fealēleaʻaki fakataha ʻa e kōlomu mo e kulupu takitaha, pe Fineʻofá ʻo fekauʻaki mo e ngaahi fatongiá, faingamālié, mo e ngaahi faingataʻa fakafeituʻú; feakoʻaki mei he ngaahi fakakaukaú mo e ngaahi aʻusia ʻa e niʻihi kehé; mo palani ha ngaahi founga ke nau ngāueʻi ai e ngaahi ueʻi ne nau maʻu mei he Laumālié.

“ʻOku lahi e ngaahi fakahaá ʻi hotau lotolotongá.”¹

ʻEletā Neil L. Andersen

Kimuʻa ʻi he Fakataha Alēleá

• ʻOku feinga e kau takí ke ʻiloʻi e ngaahi fatongia, ngaahi faingamālie mo e ngaahi faingataʻa fakalotofonuá pea nau fili ʻi he faʻa lotu ha tefito ke aleaʻi.

• ʻOku fekumi e taha kotoa ki he fakahinohino ʻa e Laumālié.

• ʻOku teuteu e taha kotoa ke vahevahe ʻenau ngaahi fakakaukaú mo e aʻusiá.

Lolotonga e Fakataha Alēleá

• ‘Oku fakaafeʻi ʻe he kau takí e kau mēmipá ke nau vahevahe ha ngaahi aʻusia mei heʻenau ngāue ki ha ngaahi ueʻi ne nau maʻu mei he ngaahi fakataha kimuʻá.

• ʻOku fealēleaʻaki fakataha e tokotaha kotoa ʻo fekauʻaki mo e tefitó, fefakafanongoʻaki, mo feinga ke maʻu e fakahinohino ʻa e Laumālié.

• ʻOku fakamāʻopoʻopo ʻe he kau takí ʻa e ngaahi meʻa mahuʻinga ne aleaʻí pea fai mo ha ngaahi fakaafe ke ngāue.

Hili ʻa e Fakataha Alēleá

• ʻOku ngāue e tokotaha kotoa ki he ngaahi ueʻi mo e fakaafe ne nau maʻú, fakataha mo fakafoʻituitui.

• ʻOku teuteu e taha kotoa ke vahevahe ʻenau ngaahi aʻusiá ʻi he ngaahi fakataha he kahaʻú.

“Ko Hono Toʻukupú Kitautolu.”²

Palesiteni Dieter F. Uchtdorf

ʻAta ʻo e lotu mei he Getty Images

Ngaahi Tefitoʻi Moʻoni ʻo e Fealēleaʻaki Fakatahá

ʻOku ʻikai tatau ʻa e fakataha alēlea kotoa pē. Tuku ke akoʻi kimoutolu ʻe he ʻEikí. Ko ha ngaahi tefitoʻi moʻoni ʻeni ke mou kamata ai:

1. Ko e taumuʻa ʻo e fakataha alēleá ke fealēleaʻaki fakataha ʻa e kōlomu mo e kulupu takitaha, pe Fineʻofá ʻo fekauʻaki mo e ngaahi fatongia, faingamālié, mo e ngaahi faingataʻa fakalotofonuá; feakoʻaki mei he ngaahi fakakaukaú mo e ngaahi aʻusia ʻa e niʻihi kehé; mo palani ha ngaahi founga ke nau ngāueʻi ai e ngaahi ueʻi ne nau maʻu mei he Laumālié.

2. ʻOku totonu ke fakaiku e fakataha alēleá ki he ngāue—palani fakafoʻituitui mo fakakulupu, naʻe ueʻi ʻe he Laumālié, ke ngāue ʻi tuʻa mei he fakatahá, ke fakahoko e ngāue ʻa e ʻEikí (vakai, T&F 43:8–9).

3. ʻOku totonu ke hanga ʻe he ngaahi fakataha alēleá ʻo fakaʻaongaʻi e folofolá mo e ngaahi lea ʻa e kau palōfita mo e ʻaposetolo ʻo e ngaahi ʻaho kimui ní, toenga ʻo e kau Taki Māʻolungá mo e Kau Takí ke tataki ʻaki mo poupou ki he fealēleaʻakí. ʻI he founga ko ʻení, ʻe tokoni ʻa e ngaahi lea ʻa e kau taki ʻo e Siasí ki he ngaahi kōlomú, kulupú, mo e Fineʻofá ke tokangaekina ʻaki e ngaahi fie maʻu mahuʻingá.

4. ʻOku ʻikai totonu ke kau he fealēleaʻakí ha ngaahi meʻa ʻoku ʻikai fakahāhāholo mo pelepelengesi fekauʻaki mo e mēmipa fakafoʻituituí pe ngaahi fāmilí.

5. Neongo ʻoku tataki e fakataha alēleá ʻe ha mēmipa ʻo e kau palesitenisií pe kau taki ʻo e kulupú, ka ʻoku ʻikai pule fakaaoao ia ki he ngaahi vahevahé. ʻOku fakafeʻiloaki ʻe he takí ha palopalema ke aleaʻi peá ne fakaafeʻi e taha kotoa ke nau vahevahe mai ʻenau ngaahi fakakaukaú mo e aʻusiá, ʻo fakatatau mo e tataki ʻa e Laumālié.

6. Neongo ʻoku ʻikai totonu ke ongoʻi mafasia ha taha ke kau mai, ka ʻoku totonu ke ongoʻi malu e taha kotoa ke lea mo vahevahe taʻeilifia mo ʻikai fakaangaʻi ʻenau fakakaukaú.

7. Kapau ʻe lava, ʻe tokoni e tangutu fuopotopotó ke fakatupulaki ha laumālie ʻo e fevahevaheʻakí mo ha fealeaʻaki loto tauʻatāina.

Ngaahi Tefito ʻe Malava Ngāue ʻaki ki he Fakataha Alēlea ʻo e Sāpate ʻUluakí

ʻE lava ke maʻu e ngaahi fakakaukau ki he ngaahi tefito ke aleaʻi ʻi he fakataha alēleá mei he fakataha alēlea ʻa e uōtí, fakataha fakapalesitenisií, palani fakaʻēliá, ngaahi ongo ʻoku maʻu ʻe he kau takí he tokoni ki he kāingalotú, pea mo e ngaahi ueʻi ʻa e Laumālie Māʻoniʻoní. Ko e ngaahi tefito ʻi laló ko ha ngaahi fokotuʻu fakakaukau pē. Mahalo ʻoku ʻosi ʻiloʻi ʻe he kau takí ia ha ngaahi fie maʻu kehe ʻoku nau ongoʻi ke tokangaekina.

• Ko e hā ha founga te tau fokotuʻutuʻu lelei ange ai e ngaahi meʻa ke fakamuʻomuʻá, ʻi hotau ngaahi fatongia kehekehé?

• Ko e hā ha founga te tau toe ofi ange ai ki he ʻOtuá mo maʻu ha fakahinohino lahi ange mei he Laumālié ki heʻetau moʻuí mo hotau ngaahi ʻapí?

• Ko e hā ha founga te tau vahevahe ai e ongoongoleleí ki hotau kaungāmeʻá mo e kaungāʻapí? (vakai, ʻAlamā 17).

• Ko e hā ha founga te tau maluʻi ai kitautolu mo hotau fāmilí mei he mītia ʻoku taʻefeʻungá mo e ponokālafí? (Vakai, T&F 42:22-23)

• Ko e hā te tau lava ʻo fai ke tokoni ke akoʻi mo fakamālohia ʻetau fānaú mo e toʻu tupu ʻi hotau uōtí?

• Te tau fakatupulaki fēfē ha uouangataha ʻi heʻetau kōlomú, kulupú pe Fineʻofá? (Vakai, Mōsaia 18:19–22

• Ko e hā ha founga te tau kau lahi ange ai ki he ngāue hisitōlia fakafāmilí mo e mōihū ʻi he temipalé?

• Ko e hā ha founga ʻoku tau fakaafeʻi mai ai e tokoni ʻa e ʻEikí, ʻi heʻetau fekumi ki ha ngaahi tali ki heʻetau ngaahi fehuʻí, mo ha mahino lahi ange ki he ongoongoleleí?

• Ko e hā ha founga ʻe lava ke hoko ai e ngaahi mātuʻá ko ha kau taki lelei ange ʻi ʻapi?

• Ko e hā ha ngaahi founga ʻe lava ke tau fakamālohia ai ʻetau fakamoʻoni ki he ʻEikí mo ʻEne ongoongoleleí, mo tokoniʻi hotau ngaahi fāmilí ke nau moʻui fakafalala fakalaumālie pē kiate kinautolú?

• ʻOku ʻuhinga ki he hā ʻa e ngāue fakatauhí? Ko e hā ha founga ʻoku tau ngāue fakatauhi ai ki he niʻihi ʻoku tau feohí? (vakai, 1 Pita 4:11).

Kapau ʻe lava, mahalo naʻa loto e kau takí ke ʻiloʻi kimuʻa ʻe he kāingalotú e tefitó, ke nau haʻu mateuteu ki hono aleaʻí.

Maʻuʻanga Fakamatalá

1. Neil L. Andersen, ʻi he Adam C. Olson, “Handbook Training Emphasizes Work of Salvation,” Ensign pe Liahona, Apr. 2011, 76.

2. Dieter F. Uchtdorf, “Ko Hoku Ongo Nimá Kimoutolu,” Ensign pe Liahona, Mē 2010, 68.