« ’Rurura’a nō te maha o te sābati », Mai, pe’e mai—nō te autahu’ara’a a Melehizedeka ’e te Sōtaiete Tauturu (2017)
Rurura’a nō te maha o te sābati
Rurura’a nō te maha o te sābati
I te maha o te sābati i te ’āva’e tāta’itahi, e paraparau te mau pupu autahu’ara’a ’e te Sōtaiete Tauturu i te tumu parau i mā’itihia e te Peresidenira’a Mātāmua ’e te pupu nō te Tino ’Ahuru Ma Piti ’āpōsetolo. E fa’a’āpīhia te reira mau tumu parau i te taime nō te ’āmuira’a rahi tāta’itahi. Te tumu parau ē tae roa atu i te ’āmuira’a rahi nō ’ēperēra, ’o te mahana sābati ïa. E nehenehe te mau feiā fa’atere ’e te mau ’orometua e mā’iti’iti i roto i te mau ha’api’ira’a tumu ’e te mau ’ohipa ha’api’ira’a i raro nei, ’aore rā e tāhō’ē te tahi o rātou, ’aore rā i fa’aineine i tā rātou iho mai te au i te mau hina’aro o te mau melo.
’Ua riro te mahana sābati ’ei mahana nō te ha’amana’o i tā te Atua i rave nō tātou.
I roto i te tua’ā’ai, ’ua fa’aau te Atua i te tahi mau ’ohipa mana rahi i te Sābati. I roto i teie mau ’ohipa mana rahi, tē vai ra te Poietera’a (hi’o Genese 2:1–3), te reva-’ē-ra’a te mau tamari’i nō ’Īserā’ela mai ’Aiphiti (hi’o Deuteronomi 5:15), ’e te ti’a-fa’ahou-ra’a te Fa’aora (hi’o Ioane 20:1–19; ’Ohipa 20:7). E ani i te mau melo ’ia hi’o fa’ahou i te reira mau ’īrava ’a paraparau atu ai nāhea te ha’amana’ora’a i teie mau ’ohipa i tupu e nehenehe e tauturu ia tātou ’ia fa’atura i te mahana sābati. E aha te tahi mau ’ohipa mana rahi tā te Atua i rave nō tātou ? Nāhea e ti’a ai ia tātou ’ia ha’amana’o i teie mau mea i te mahana sābati ? Mai te peu e nehenehe e rave, e ani i te mau melo ’ia paraparau i te mau uira’a mai teie i roto i tō rātou ’utuāfare.
’O Iesu Mesia te Fatu o te Sābati.
Tē parau-ato’a-hia nei te Sābati te mahana o te Fatu (hi’o Apokalupo 1:10). I tō ’outou mana’o, nō te aha Iesu Mesia i parauhia ai te Fatu o te Sābati ? (hi’o Mataio 12:8). E hi’o ’āmui i te tahi mau ’īrava e nehenehe e fa’auru i te mau melo nō ni’a i te mau rāve’a e fa’atumu i tā rātou ’ohipa i te Sābati i ni’a ia Iesu Mesia (’ei hi’ora’a, Helamana 5:12; Etera 12:41; Moroni 10:32; ’e PH&PF 6:36–37). E aha te tahi atu ā mau ’īrava tā te mau melo e nehenehe e fa’a’ite mai ’o te tauturu ia rātou ’ia fa’atupu rahi a’e i te Sābati i ni’a i te Mesia ? E aha te mau fā e nehenehe e ha’amau nō te tauturura’a ia tātou ’ia rōtahi i ni’a i te Fa’aora i te roara’a o te mahana sābati ?
’O Iesu Mesia tō tātou hi’ora’a nō te fa’aturara’a i te Sābati.
I te tau nō tāna tāvinira’a i te tāhuti nei, ’ua rave ’oia i te taime nō te ha’api’ira’a nō ni’a i te mahana sābati. E ani i te mau melo ’ia tai’o i te mau fa’ati’ara’a i muri nei ’e ’ia fa’ati’a i te hō’ē tāpura nō te mau mea tā Iesu i rave i te mahana sābati, ’e te mau parau tumu tāna i ha’api’i : Luka 6:1–11; 13:11–17; Ioane 5:1–20; 9:1–16. E aha te tahi atu ā mau parau tumu nō ni’a i te Sābati tā tātou e ha’api’i i roto i te mau ’īrava i muri nei ? Exodo 20:8–11; 31:12–18; Isaia 58:13–14; and PH&PF 59:9–19. E ani i te mau melo ’ia parau mai i tā rātou e nehenehe e rave nō te pe’e i te hi’ora’a o te Fa’aora.
Hi’o ato’a Russell M. Nelson, « Te sābati e mahana hina’arohia », Ensign ’aore rā Liahona, Mē 2015, 129–32.
’Ua riro te Sābati ’ei mahana ha’amorira’a.
E pāpa’i i te ta’o ha’amori i ni’a i te ’iri ’ere’ere ’e e ani i te mau pīahi ’ia pāpa’i i pīha’i iho i te reira i te tahi mau parau e au i te reira. ’Ei reira e huti e toru rēni haere raro ’ei tātuha’ara’a i te mau parau nā mua a’e, i roto, ’e i muri iho, pāpa’i i ni’a i te tuha’a tāta’itahi. E aha tā tātou e nehenehe e rave nā mu’a a’e, i roto ’e i muri iho i te purera’a nō te ha’amori i te Fatu i tōna mahana mo’a ? E nehenehe te mau pīahi e tai’o ’āmui i te Mosia 18:17–29 ’e te Moroni 6 nō te tahi mana’o. E ani i te mau melo ’ia feruri māite nāhea tō rātou huru ’e tā rātou mau ’ohipa i te mahana sābati e tauturu nei ia rātou ’ia ha’amori i te Fatu i terā mahana (hi’o Exodo 31:16–17). E aha tā tātou e nehenehe e rave ’ei tauturura’a i te ha’amaita’ira’a i te ha’amorira’a o tō tātou ’utuāfare ’e o te mau melo o te pāroita i roto i te mau rurura’a a te ’Ēkālesia ?
E fa’ati’a te ravera’a i te ’ōro’a ’ia vai noa mai te Vārua ia tātou nei.
Pāpa’i i teie uira’a i muri nei i ni’a i te ’iri ’ere’ere : E aha tā te purera’a ’ōro’a e fa’atupu nei i ni’a i tō’u orara’a ? Nō te pāhono i teie uira’a, e ani i te mau melo ’ia ’ohipa piti piti nō te mā’iti ’e nō te paraparau nō ni’a i te hō’ē parau o te pure ’ōro’a i roto i te Parau Ha’api’ira’a ’e te mau Parau Fafau 20:77, 79 ’e nō ni’a i te parau a’o i roto i te Parau Ha’api’ira’a ’e te mau Parau Fafau 59:9. E hōro’a i te mau pupu i te taime nō te ’imi i te tahi mau ’īrava e tauturu ia rāua ’ia māramarama maita’i a’e i terā parau, ’e nō te paraparau e nāhea rāua e pāhono i te uira’a i ni’a i te ’iri ’ere’ere. E nehenehe ato’a e ani i te mau pīahi ’ia mā’iti mai i tā rāua hīmene ’ōro’a au roa a’e nō te hīmene mai.
Hi’o ato’a Cheryl A. Esplin, « Te ’ōro’a mo’a—e fa’a’āpīra’a nō te vārua », Ensign ’aore rā Liahona, Nov. 2014, 12–14.
’Ua riro te Sābati ’ei mahana tāvinira’a i te ta’ata.
E aha tā tātou e nehenehe e ha’api’i mai nō ni’a i te tāvinira’a i te ta’ata i te Sābati mai roto mai i te ravera’a a te Fa’aora nō te tāvini ’e nō te ha’amaita’i i te ta’ata ’ati a’e iāna ? E fa’aitoito i te mau melo ’ia hi’o ’e ’ia paraparau i te Mataio 9:10–13; Luka 19:1–9; Ioane 11:32–46; 13:1–5, 12–17; ’e 3 Nephi 17:5–10. E ani i te mau melo ’ia feruri i teie mau ’īrava ’a feruri ato’a ai rātou nāhea tā rātou e nehenehe e tāvini i te Sābati. ’Ei hi’ora’a, e nehenehe tā rātou e tāvini i te mau melo o te ’utuāfare, e toro i te rima i te tahi ta’ata ’e i te tahi ’utuāfare tā rātou e tāvini ’ei taea’e hāhaere ’e ’ei tuahine hāhaere, e rave i te ’ā’amu ’utuāfare, e hāhaere i te feiā ma’i ’aore rā e fa’a’ite i te ’evanelia. Penei a’e e nehenehe te mau melo e fa’atupu i te ’āpo’ora’a ’utuāfare nō te fa’anaho i te mau rāve’a nō rātou nō te tāvini i te ta’ata i te Sābati.