Panangusar iti Umaykayo, Sumurot Kaniak—Para iti Primary

Panagsagana a Mangisuro iti Primary

Ti bukod ken sangapamiliaan a panagadal iti pagtaengan ti nasken a sentro a pagsursuruan iti ebanghelio. Pudno daytoy para kenka ken para kadagiti ubbing a sursuruam. Bayat ti panagsaganam a mangisuro, rugiam babaen ti kaadda dagiti bukodmo a padas kadagiti nasantuan a kasuratan. Mapasamakto ti kapatgan a panagsaganam bayat ti panagsukisokmo kadagiti nasantuan a kasuratan ken panagkalikagummo a manggun-od iti inspirasion ti Espiritu Santo.

TiUmaykayo, Sumurot Kaniak—Para kadagiti Indibidual ken Pamilia ket maysa pay a napateg a paset ti bukodmo a panagadal ken panagsaganam a mangisuro. Makatulong daytoy kenka a manggun-od iti naun-uneg a pannakaawat kadagiti pagbatayan iti doktrina a masarakan kadagiti nasantuan a kasuratan.

Bayat ti panagsaganam, umayto kenka dagiti kapanunotan ken impresion maipapan kadagiti ubbing a sursuruam. Umawatkanto kadagiti nalawag a pannakaammo ken pannakaawat maipapan iti no kasano a mangbendisionto iti biagda dagiti pagbatayan iti nasantuan a kasuratan. Maiwanwankanto a mangparegta kadakuada a mangtakuat kadagita a pagbatayan bayat ti panagsursuroda manipud kadagiti nasantuan a kasuratan para iti bagbagida ken iti pamiliada. Laglagipem ti agbalin a managrikna kadagiti ubbing a dagiti kasasaad iti pamiliada ket saan a makasuporta iti masansan a sangapamiliaan a panagadal iti nasantuan a kasuratan ken family home evening.

Dagiti Kapanunotan iti Panangisuro

Bayat ti panagsaganam a mangisuro, mabalin a magun-odmo ti nayon a pammaregta babaen ti panagsukisok kadagiti balabala iti panangisuro iti daytoy a resource. Saanmo a panunoten dagitoy a kapanunotan a kas nagsasaruno nga addang a pangiturong no di ketdi kas singsingasing tapno mangpataud iti bukodmo nga inspirasion. Am-ammom dagitoy nga ubbing—ken maam-ammomto ida a nasaysayaat pay bayat iti panakipulapolmo kadakuada iti klase. Am-ammo met ida ti Apo, paregtaennakanto kadagiti kasayaatan a wagas a pangisuruam ken pangbendisionam kadakuada.

Adu a dadduma pay a pagadawan a sidadaan a magun-od nga aramatem bayat ti panagsaganam, pakairamanan dagiti kapanunotan iti Umaykayo, Sumurot Kaniak—Para kadagiti Indibidual ken Pamilia ken dagiti magasin iti Simbaan. Para iti ad-adu pay nga impormasion maipapan kadagitoy ken dadduma pay a resources, kitaen iti “Dagiti Nainayon a Resources para iti Panangisuro kadagiti Ubbing.” iti daytoy a resource.

Dagiti Sumagmamano a Banag a Laglagipen

• Addaan dagiti nagannak ti kangrunaan a responsibilidad a mangisuro kadagiti annakda. Kas maysa a mannursuro, addaanka iti napateg a responsibilidad a mangsuporta, mangparegta, ken mangpasayaat iti panangisuro iti ebanghelio iti pagtaengan. Agbalinka a managrikna kadagiti ubbing a dagiti nagannak kadakuada ket saan a mangisursuro iti ebanghelio iti pagtaenganda. Iraman dagiti amin nga ubbing iti panaglilinnawag iti ebanghelio, ania man dagiti kasasaadda iti pagtaengan.

• Makasursuro dagiti ubbing babaen iti panangibinglayda no ania ti ammoda. No dadduma ti kabilgan a kanito ti panagisuro ket mapasamak no agsisinnuro dagiti ubbing iti maysa a banag a nasursuroda manipud kadagiti nasantuan a kasuratan. Mangted ti adu a gundaway para kadagiti ubbing nga agibinglay.

• Nalaklaka a maawatan dagiti ubbing dagiti pannursuro iti Doktina ken Katulagan no ammoda ti konteksto ti pakasaritaan para kadagitoy a pannursuro. Masarakan dagitoy a konteksto ti pakasaritaan iti Umaykayo, Sumurot Kaniak—Para kadagiti Indibidual ken Pamilia ken Doctrine and Covenants Stories.

• Nasayaat ti panangulit. Nasamsamay ti panagsursuro dagiti ubbing iti kinapudno ti ebanghelio no maulit a maisuro dagitoy a kinapudno babaen iti nadumaduma nga aktibidad. No maammuam a nasamay ti aktibidad iti panagsursuro para kadagiti ubbing, ibilangmo nga uliten daytoy, nangnangruna no mangisursuroka kadagiti in-inaudi nga ubbing. Mabalin pay nga irebyum ti maysa nga aktibidad manipud iti kallabes nga adalen.

• Kayat ti Nailangitan nga Ama nga agballigika kas maysa a mannursuro. Impaayannaka iti adu a resources a makatulong kenka, a pakairamanan dagiti teacher council meeting. Kadagitoy a miting mabalinmo ti makiinnuman kadagiti dadduma pay a mannursuro maipapan kadagiti ania man a karit a pakaipasanguam. Mabalinmo pay nga ilawlawag ken yaplikar dagiti pagbatayan iti panangisuro a kas ken ni Cristo.

• No sursuruam dagiti in-inaudi nga ubbing ken agkasapulan iti nayon a tulong, kitaen iti “Panangipaay Kadagiti Kasapulan dagiti In-inaudi nga Ubbing” iti daytoy a resource.

• Nairaman iti daytoy a resource dagiti balabala para iti tunggal lawas ti tawen. Kadagiti Domingo no saan a maangay ti Primary gapu iti sapasap a komperensia, komperensia ti stake wenno ania man a dadduma pay a rason, nasken nga itultuloy dagiti pamilia ti panagbasa iti Doktrina ken Katulagan iti pagtaengan maibatay iti nabalabala nga iskediul. Saanka a madanagan maipapan kadagiti adalen a nalibtawam; isurom ti naituding a linawas a balabala.