Oktubre 14–20

Mga Taga-Filipos; Mga Taga-Colosas

“Mahimo Ko ang Tanang Butang pinaagi kang Kristo Nga Nagapalig-on Kanako”

Basaha ang Mga Taga-Filipos ug Mga Taga-Colosas, nga maghunahuna sa mga bata nga imong tudloan. Pagtinguha og inspirasyon kon unsaon sa pagtudlo kanila sa mga baruganan niini nga mga sulat.

Irekord ang Imong mga Impresyon

Awhaga ang Pagpaambit

Pangutan-a ang mga bata unsay ilang gibuhat niining milabay nga semana sa pagtabang og tawo nga nagkinahanglan og higala, sama sa gihisgutan sa klase sa miaging semana.

Itudlo ang Doktrina

Mas Gagmay nga mga Bata

Mga Taga-Filipos 1:3–4; Mga Taga-Colosas 1:3, 9

Ang mga lider sa Simbahan nahigugma kanako ug nag-ampo alang kanako.

Kanunay nga gisugdan ni Pablo ang iyang mga sulat pinaagi sa pagpahayag og gugma alang sa mga miyembro sa Simbahan ug sa pagsulti kanila nga nag-ampo siya alang kanila. Ikonsiderar kon sa unsang paagi nimo matabangan ang mga bata nga makasabut nga ang ilang mga lider sa Simbahan nahigugma kanila.

Posible nga mga Kalihokan

• Basaha og kusog ang Mga Taga-Filipos 1:3–4 ug ang Mga Taga-Colosas 1:3, 9, ug hangyoa ang mga bata sa pagkyugpos sa ilang mga bukton ug sa pagduko sa ilang ulo matag higayon nga makadungog sila sa pulong nga mag-ampo, nag-ampo, ug pag-ampo. Ipasabut nga si Apostol Pablo nag-ampo alang sa mga miyembro sa Simbahan, sama nga ang atong mga lider sa Simbahan nag-ampo alang kanato karon.

• Pagpakita og hulagway ni Jesukristo, ug pagpaambit og mga ehemplo nga nag-ampo Siya alang sa usa ka tawo (tan-awa sa Lucas 22:32; 3 Nephi 19:21, 23). Unsa ang gipangayo ni Jesus sa dihang nag-ampo Siya alang sa uban?

• Tabangi ang mga bata sa paghingalan og pipila sa ilang mga lider sa Simbahan, sama sa presidente sa Primary, sa bishop, ug sa Presidente sa Simbahan. Ipasabut nga kini nga mga lider mohangyo sa Langitnong Amahan sa pagpanalangin sa mga bata ug sa pagtabang kanila sa pagpuyo nga matarung. Ikonsiderar ang pagsulti sa mga bata kon unsay imong isulti kon mag-ampo ka alang kanila.

Mga Taga-Filipos 4:4, 8

Mahimo akong maglipay diha sa Ginoo.

Giawhag ni Pablo ang mga Santos sa paglipay—bisan og nag-atubang sila og lisud nga mga pagsulay ug si Pablo mismo nabihag. Unsaon nimo pagtabang sa mga bata nga makasabut nga ang pagsunod sa ebanghelyo magdala og kalipay?

Posible nga mga Kalihokan

• Hangyoa ang mga bata sa pagpaminaw og gibalik nga pulong samtang imong basahon ang Mga Taga-Filipo 4:4. Hangyoa ang mga bata sa pagpakita kanimo kon unsay ilang buhaton kon maglipay sila. Tabangi sila nga makasabut nga ang “pagkalipay … diha sa Ginoo” nagpasabut nga mobati og kalipay tungod kay anaa kanato ang ebanghelyo ug tungod kay si Jesukristo nagmahal kanato.

• Pagdala og mga butang o mga hulagway nga nagrepresentar sa mga butang nga makatabang kanimo sa “pagkalipay … diha sa Ginoo.” Mahimo kang magdala og maanindot nga nilalang sa Dios o usa ka hulagway sa templo, sa nabanhaw nga Manluluwas, o usa ka pamilya. Papuli-puliha ang mga bata sa pagpili og usa ka litrato o mga butang, ug dayon sultihi sila nganong makalipay kini kanimo. Dapita sila sa pagpaambit og mga butang nga makatabang kanila nga maglipay diha sa Ginoo.

• Basaha og dungan ang Mga Taga-Filipos 4:8, ug tabangi ang mga bata sa paghunahuna og mga butang nga mohaum sa mga deskripsyon diha sa bersikulo (tan-awa usab ang Mga Artikulo sa Hugot nga Pagtuo 1:13). Hatagi ang mga bata og mga piraso sa papel ug padrowinga sila og mga hulagway niining mga butanga aron sa pagtabang kanila sa pagpamalandong sa mga butang nga gihulagway ni Pablo.

Mga Taga-Colosas 1:23; 2:6–7

Ang akong pagtuo kinahanglang “[naka]gamut” diha ni Jesukristo.

Kon ang mga bata makatukod sa ilang kinabuhi ug sa ilang pagtuo diha sa Manluluwas, makahimo sila sa pagsugakod sa mga unos sa kinabuhi.

Posible nga mga Kalihokan

• Ipakita ang litrato sa usa ka punoan sa kahoy gikan sa outline niini nga semana diha sa Dali, Sunod Kanako—Alang sa mga Indibidwal ug mga Pamilya samtang imong basahon ang importanting mga pulong gikan sa Taga-Colosas 1:23; 2:6–7. Unsa ang mahitabo niining kahoya kon dunay moabut nga unos ug ang kahoy walay lig-ong mga gamot? Pabaruga ang mga bata ug magpakaaron-ingnon nga usa ka kahoy nga dunay huyang nga mga gamot panahon sa unos ug dayon usa ka kahoy nga dunay lig-ong mga gamot. Sa unsang paagi ang pagtuo diha sa Manluluwas makatabang kanato nga mahisama sa kahoy nga dunay lig-ong mga gamot?

• Pagdapit og usa ka bata sa pagdrowing og kahoy diha sa pisara. Hangyoa ang mga bata sa paghingalan og pipila ka mga butang nga ilang mabuhat aron mahimong “[naka]gamut” diha ni Jesukristo. Matag higayon nga ang usa ka bata mohingalan og usa ka butang, dapita siya sa pagdugang og usa ka gamut diha sa gidrowing.

Itudlo ang Doktrina

Mas Dagko nga mga Bata

Mga Taga-Filipos 4:4–13

Kon duna akoy pagtuo kang Jesukristo, mahimo akong malipayon bisan sa lisud nga mga panahon.

Si Pablo nag-antus og daghang mga pagsulay, apan nagmalipayon siya tungod kay aduna siyay pagtuo diha ni Jesukristo.

Posible nga mga Kalihokan

• Hangyoa ang mga bata sa paghanduraw nga anaa sila sa bilanggoan, sama ni Apostol Pablo sa dihang mihimo siya sa sulat ngadto sa mga taga-Filipos. Basaha ang Mga Taga-Filipos 4:4–13 uban sa mga bata ug hangyoa sila sa pagpangita sa mga pulong nga: pagkalipay, kalinaw, pagpahaigo sa kaugalingon [content]. Nganong nakahimo man si Pablo nga maglipay ug mobati og kalinaw bisan sa bilanggoan? Tabangi ang mga bata sa pagpangita sa mga pulong nga Ginoo, Dios, ug Kristo diha sa mga bersikulo. Tabangi sila nga makasabut nga ang pagtuo ni Pablo diha ni Jesukristo nakahimong posible aron maglipay siya.

• Dapita ang mga bata sa pagtabang nimo sa pagkompleto sa mga sentence sama sa mosunod: Mahimong maanaa ako sa kangitngit ug makakita gihapon kon ako adunay . Mahimong maanaa ako sa gawas sa usa ka init nga adlaw ug mobati gihapon og kabugnaw kon ako adunay . Mahimong maanaa ako sa lisud nga mga panahon ug makakaplag gihapon og kalipay kon ako . Tabangi ang mga bata sa paghunahuna og mga paagi nga makakaplag sila og kalipay diha ni Jesukristo kon anaa sila sa lisud nga mga panahon. Mahimo silang mokanta og himno, mobasa og paborito nga kasulatan, moserbisyo og tawo, o mag-ampo nga magpasalamat. Unsa ang gisugyot sa Mga Taga-Filipos 4:4–13? Pagpaambit sa mga bata og pipila ka mga himno o mga kasulatan nga nakatabang kanimo sa pagkakaplag og kalipay sa mga panahon sa kalisud.

Mga Taga-Filipos 4:8

Makapamalandong ko sa mga butang nga tinuod, dungganon, ug putli.

Ang mga bata kasagaran mabantang sa mga butang nga dautan ug law-ay. Makatabang ka kanila sa pagtinguha sa mga butang nga makapadasig ug mahiyason.

Posible nga mga Kalihokan

• Hangyoa ang usa ka bata sa pagbasa og kusog sa Mga Taga-Filipos 4:8 samtang ang uban mangita og mga pulong sa Mga Artikulo sa Hugot nga Pagtuo 1:13 nga pareha o susama. Pagdapit og usa ka estudyante sa pagsulat niini nga mga pulong diha sa pisara. Paghatag og yano nga mga kahulugan niini nga mga pulong ug ipapares sa mga bata ang mga kahulugan ngadto sa mga pulong. Nganong kinahanglan man nga atong “pamalandungan” kining mga butanga? Sa unsang paagi kita “maninguha sa pagpangita” niini?

• Hangyoa ang mga bata sa paghingalan og mga butang nga mohaum sa mga deskripsyon diha sa Mga Taga-Filipos 4:8. Dapita sila sa paghimo og lista niining semanaha sa bisan unsa nga ilang nabantayan nga mohaum niini nga mga deskripsyon. Awhaga sila sa pagdala sa ilang mga lista ngadto sa Primary sa sunod semana ug sa pagpaambit kon unsay ilang nakit-an.

Mga Taga-Colosas 1:23; 2:6–7

Ang akong pagtuo kinahanglang “[naka]gamut” diha ni Jesukristo.

Mosulay si Satanas sa pagpahuyang sa pagtuo sa mga bata pinaagi sa mga tintasyon ug sayop nga mga doktrina. Unsaon nimo sa pagdasig ang mga bata sa paglig-on sa ilang pagtuo sa Manluluwas aron sila “dili mobulag sa paglaum sa ebanghelyo”?

Posible nga mga Kalihokan

• Dapita ang mga bata sa pagdrowing og mga hulagway nga nagrepresentar sa mga kamatuoran nga ilang nakit-an diha sa Mga Taga-Colosas 1:23; 2:6–7. Sugoa sila sa pagpaambit sa ilang mga hulagway diha sa klase ug sa pagpasabut sa mga kamatuoran nga girepresentaran sa ilang mga hulagway.

• Unsa ang pipila ka mga tintasyon ug sayop nga mga doktrina sa kalibutan karon nga makapahuyang sa atong pagtuo? Unsay atong mabuhat aron sa paglig-on sa atong pagtuo aron “[maka]gamut” kita diha kang Jesukristo?

Awhaga ang Pagkat-on diha sa Panimalay

Dapita ang mga bata sa pagpaambit ngadto sa ilang mga pamilya sa unsay ilang nakat-unan mahitungod sa “[pagka]gamut” diha kang Kristo. Mahimo nilang gamiton ang pahina sa kalihokan niining semanaha o usa ka kasulatan nga ilang nabasa panahon sa klase karon.

Pagpalambo sa Atong Pagtudlo

Ang mga bata kuryuso ug makat-on pinaagi sa bag-o ug lain-lain nga mga kasinatian. Gamita ang mga kalihokan nga makatabang sa mga bata nga maglihok-lihok, mogamit sa tanan nilang mga balatian, magsusi-susi, ug mosulay og bag-ong mga butang. Ang mga sugyot diha sa “Pagtubag sa mga Panginahanglan sa Mas Gagmay nga mga Bata” sa sinugdanan niini nga kapanguhaan makatabang. (Tan-awa usab sa Pagtudlo sumala sa Pamaagi sa Manluluwas, 25–26.)