Si Melchizedek Mipanalangin ni Abram, ni Walter Rane

Nobyembre 11–17

Mga Hebreohanon 7–13

“Labawng Sacerdote sa mga Maayong Butang nga Nanagpangabut”

Samtang moribyu ug mamalandong ka niini nga outline, pagmatngun sa mga pag-aghat nga imong nadawat mahitungod sa mga bata nga imong tudloan. Ang Espiritu motabang kanimo sa pagpangita og mga mensahe nga alang kanila diha sa Mga Hebreohanon 7–13.

Irekord ang Imong mga Impresyon

Awhaga ang Pagpaambit

Hangyoa ang mga bata sa pagpaambit og mga butang nga gibuhat nila ug sa ilang pamilya aron magkat-on sa ebanghelyo diha sa panimalay. Dapita sila sa pagpaambit sa ilang paborito nga mga kasinatian sa pagkat-on sa ebanghelyo uban sa ilang mga pamilya.

Itudlo ang Doktrina

Mas Gagmay nga mga Bata

Mga Hebreohanon 7:1–6

Ang priesthood makatabang kanato sa daghang paagi.

Ang Mga Hebreohanon 7:1–6 makahatag og oportunidad nga mapahibalo sa mga bata ang mga panalangin sa priesthood.

Posible nga mga Kalihokan

• Ipasabut sa daklit kon kinsa si Abraham, ug dayon gamita ang Mga Hebreohanon 7:1–6 ug ang Hubad ni Joseph Smith, Genesis 14:36–40 sa Giya ngadto sa mga Kasulatan aron sa pagtudlo nga si Abraham mibayad og ikapulo ngadto ni Melchizedek. Ipasabut nga si Melchizedek naghupot sa mas taas nga priesthood, nga mao ang gahum sa Dios nga gihatag ngadto sa mga tawo dinhi sa yuta, ug gigamit niya kini sa pagpanalangin ni Abraham. Ang mga bata malingaw tingali nga i-aksyon ang istorya gamit ang yanong mga props, sama sa korona ug sobre sa ikapulo.

• Pagdapit og usa ka naghupot sa Aaronic Preisthood ug usa ka naghupot sa Melchizedek Priesthood sa pagbisita sa klase ug pagsulti sa mga bata kon giunsa nila paggamit ang priesthood sa pagpanalangin sa uban. Dayon pakit-a ang mga bata og mga hulagway sa lain-lain nga mga ordinansa sa priesthood (pananglitan, tan-awa sa mga hulagway 103–8 diha sa Libro sa mga Hulagway sa Ebanghelyo). Tabangi ang mga bata sa pagtino kon unsa nga priesthood ang gikinahanglan alang sa matag ordinansa ug sa paghatag niana nga hulagway ngadto sa angay nga naghupot sa priesthood aron pagunitan.

Mga Hebreohanon 11:1–32

Ang hugot nga pagtuo mao ang pagtuo sa mga butang nga dili nato makita.

Bisan og dili sila makakita sa Langitnong Amahan ug ni Jesukristo o makasinati sa tanang mga panalangin sa ebanghelyo, ang mga bata nga imong gitudloan makapalambo og pagtuo pinaagi sa pagkat-on gikan sa mga ehemplo sa Mga Hebreohanon 11.

Posible nga mga Kalihokan

• Pagpakita og hulagway ni Jesus. Pagbutang libut sa kwarto og pipila ka mga butang nga nagrepresentar sa “mga ebidensya” nga tinuod Siya bisan tuod dili kita makakita Kaniya (sama sa mga kasulatan, usa ka hulagway sa Unang Panan-awon, ug hulagway sa kalibutan). Dapita ang mga bata sa pagpangita sa mga butang, ug dayon ipaambit kanila kon sa unsang paagi ang kada butang makatabang kanato nga makabaton og pagtuo nga buhi si Jesus.

• Pagdala og paypay, ug papuli-puliha ang mga bata nga bation ang huyop sa hangin sa ilang mga nawong. Tudloi sila nga dili nato makita ang hangin, apan mabati nato kini. Sa samang paagi, dili kita makakita sa Langitnong Amahan ug ni Jesukristo, apan atong mabati ang Ilang gugma ug makabaton og pagtuo nga tinuod Sila.

• Ipaambit ang mga istorya sa usa o sobra pa nga mga tawo nga gihisgutan diha sa Mga Hebreohanon 11:4–32. Ikonsiderar ang paggamit sa Mga Istorya sa Daang Tugon (tan-awa sa mga kapitulo 4–6, 8–10, 15–17, 23, ug 28). Unsa ang gibuhat niini nga mga tawo aron mapakita nga sila adunay pagtuo sa usa ka butang nga dili nila makita? Ipaambit ang pipila ka mga panalangin nga inyong nadawat tungod sa inyong pagtuo.

Mga Hebreohanon 13:5–6

Ang Langitnong Amahan ug si Jesukristo motabang kanato ug dili mobiya kanato.

Unsa nga mga pagsulay kaha ang gisinati sa mga bata? Sa unsang paagi kaha ang mensahe sa Mga Hebreohanon 13:5–6 makatabang kanila?

Posible nga mga Kalihokan

• Ribyuha ang pipila ka mga istorya sa Bag-ong Tugon nga nakat-unan sa mga bata karong tuiga diin ang Manluluwas mitabang sa uban, sama niadtong giayo Niya ang tawo nga paralitiko (tan-awa sa Lucas 5:18–26) o mipakaon sa 5,000 (tan-awa sa Mateo 14:15–21). Tabangi ang mga bata nga makakat-on sa mga pulong nga “Ang Ginoo mao ang akong magtatabang” (Mga Hebreohanon 13:6).

• Dapita ang mga bata sa pagdrowing sa higayon dihang mibati sila og kahadlok. Basaha ang Mga Hebreohanon 13:5–6 ngadto kanila, ug pagpamatuod nga ang Langitnong Amahan motabang kanato ug dili gayud mobiya kanato. Tabangi ang mga bata sa paggunting og mga papel nga kasingkasing nga igo ang gidak-on aron motabon sa mga drowing. Unsa ang pipila ka mga butang nga makatabang kanato nga mobati nga mas duol sa Langitnong Amahan? Isulat ang pipila niining mga butanga diha sa mga kasingkasing.

• Tudloi ang mga bata sa ikaduhang bersikulo sa “Sultihi Ko, Mahal nga Ginoo” (Songbook sa mga Bata, 75). Sumala sa kanta, unsa nga tabang ang atong madawat kon ang Langitnong Amahan ug si Jesukristo duol kanato? Hisguti ang panahon sa dihang ang Langitnong Amahan duol kanimo ug mitabang kanimo.

Itudlo ang Doktrina

Mas Dagko nga mga Bata

Mga Hebreohanon 7:1–4

Ang takus nga mga naghupot sa priesthood mosunod sa Manluluwas.

Unsaon nimo paggamit niini nga mga bersikulo aron matabangan ang mga bata sa pagsabut nga kadtong naghupot sa priesthood kinahanglan nga magmatinud-anon ug moserbisyo sa uban sama sa gibuhat sa Manluluwas?

Posible nga mga Kalihokan

• Tabangi ang mga bata sa paglista sa ilang nahibaloan mahitungod sa duha ka talagsaon nga mga naghupot sa priesthood nga si Abraham ug Melchizedek. Makakita sila og tabang sa Mga Hebreohanon 7:1–4; Abraham 1:1–2; ug sa Hubad ni Joseph Smith, Genesis 14:25–40 diha sa Giya ngadto sa mga Kasulatan. Unsa nga mga Kristohanong hiyas ang anaa niining mga tawhana nga nakatabang kanila sa pagtahud sa priesthood?

• Hangyoa ang mga bata sa pagbasa sa Mga Hebreohanon 7:1–2 ug sa pagpangita sa mga titulo nga gigamit sa paghulagway kang Melchizedek. Sa unsang paagi kini nga mga titulo nagpahinumdom kanato ni Jesukristo? Tabangi sila sa paghunahuna og mga paagi diin si Jesus mao ang “Hari sa kadaitan.” Nasayud ba sila og uban pa nga mga naghupot sa priesthood kinsa mga ehemplo usab sa pagsunod sa Manluluwas?

• Pagpaambit og kasinatian diin ang usa ka matarung nga naghupot sa priesthood mitabang nimo nga mas mapaduol sa Manluluwas. Tabangi ang mga bata sa paghunahuna og mga paagi nga ang priesthood nga pagserbisyo mipanalangin kanila.

Mga Hebreohanon 11

Ang Langitnong Amahan moganti niadtong adunay pagtuo.

Ang Mga Hebreohanon 11 naglangkub og daghang mga ehemplo sa mga tawo kinsa napanalanginan sa dihang milihok sila uban sa pagtuo. Hain sa mga istorya ang labing makadasig o makatabang sa mga bata nga imong gitudloan?

Posible nga mga Kalihokan

• Dapita ang mga bata sa paghimo og lista diha sa pisara sa mga butang nga ilang nakat-unan mahitungod sa pagtuo diha sa Mga Hebreohanon 11:1–3, 6. Hatagi ang matag bata sa ngalan sa usa ka tawo nga gihisgutan diha sa Mga Hebreohanon 11, ug dapita sila sa pagbasa sa mga bersikulo nga may kalabutan niana nga tawo. Hangyoa sila sa pagpaambit og mga timailhan mahitungod sa tawo aron ang ubang mga bata makatag-an kon si kinsa kini. Giunsa niini nga mga tawo sa pagpakita og pagtuo, ug sa unsang paagi ang Langitnong Amahan miganti kanila? (Alang sa mga hulagway niining mga tawhana, tan-awa ang seksyon sa Daang Tugon diha sa Libro sa mga Hulagway sa Ebanghelyo).

• Human mobasa kabahin sa pipila sa matinud-anong mga ehemplo diha sa Mga Hebreohanon 11, hangyoa ang mga bata sa pagsulat mahitungod sa usa ka tawo nga ilang nailhan kinsa mipakita og pagtuo. Pagdapit og pipila ka mga estudyante nga mopaambit sa ilang mga ehemplo diha sa klase.

Mga Hebreohanon 12:5–11

Ang Ginoo mopanton niadtong Iyang gihigugma.

Kini nga mga bersikulo makatabang sa mga bata nga makasabut nga ang Langitnong Amahan, ang ilang mga ginikanan, ug ang uban mokorihir kanila tungod kay sila nahigugma kanila ug gusto nga makat-on sila gikan sa ilang mga sayop.

Posible nga mga Kalihokan

• Basaha og dungan ang Mga Hebreohanon 12:5–11, ug hangyoa ang mga bata sa pagpangita og mga rason nganong ang Langitnong Amahan mopanton kanato (mokorihir o modisiplina kanato). Unsa ang gitudlo niini kanato kon nganong ang yutan-ong mga ginikanan mokorihir usab sa ilang mga anak? Unsaon nato pagtubag ang mahigugmaon nga pagkorihir?

• Pagpaambit og mga ehemplo sa mga tawo diha sa mga kasulatan kinsa gipanton sa Ginoo ug naghinulsol (pananglitan, tan-awa sa 1 Nephi 16:25–27; Ether 2:13–15). Sa unsang paagi sila maayo nga mga ehemplo sa mga baruganan diha sa Mga Hebreohanon 12:5–11?

• Human og basa sa Mga Hebreohanon 12:5–11, dapita ang mga bata sa pagsulat og pipila ka butang nga paningkamutan nilang hinumduman kon korihian sila sa ilang mga sayop.

Awhaga ang Pagkat-on diha sa Panimalay

Dapita ang mga bata sa pagsulat o pagdrowing og hulagway sa unsay ilang gibati nga mao ang labing importante nga butang nga ilang nakat-unan sa klase. Awhaga sila sa pagpaambit sa ilang nakat-unan ngadto sa ilang mga pamilya.

Pagpalambo sa Atong Pagtudlo

Gamita ang mga pahina sa kalihokan. Samtang kompletuhon sa mga bata ang mga pahina sa kalihokan panahon sa klase, gamita ang panahon sa pagribyu sa mga baruganan gikan sa leksyon.