8–14 Me

Mataio 19–20; Mareko 10; Luka 18

“Se A se Mea o Toe Ou Te Lei Faia?”

Faitau le Mataio 19–20; Mareko 10; ma le Luka 18, ma mafaufau i tamaiti o loo e aoaoina. Tusifaamaumau soo se lagona uunai e te maua. O lau tapenaga o le a fesoasoani ia te oe e aoao ai tamaiti i mea latou te manaomia ona iloa mai nei mataupu.

Valaaulia le Fefaasoaai

Valaaulia tamaiti e faasoa mai se mea latou te manatuaina mai le lesona o le vaiaso ua tea. Faaali atu ata e fesoasoani latou te manatua ai.

Aoao atu le Aoaoga Faavae: Tamaiti Laiti

Mareko 10:6–8

E finagalo le Tama Faalelagi ia tatou faaipoipo i totonu o le malumalu ma maua ni aiga e faavavau.

E mafai faapefea ona manuia tamaiti o loo e faiaoga ai mai le aoaoina e uiga i le aoaoga faavae o le faaipoipoga e faavavau? Atonu e aoga mo oe le iloiloina o upumoni e uiga i le faaipoipoga i le “O Le Aiga: O Se Folafolaga i le Lalolagi” (ChurchofJesusChrist.org).

Gaoioiga e Mafai Ona Fai

• Faitau le Mareko 10:6–8 i tamaiti, ma faaali atu se ata o se ulugalii faaipoipo. Fai i tamaiti e faasino i le tamaloa ma le fafine pe a latou faalogo ua faitau upu alii ma le tamaitai. Faamalamalama atu ua faamoemoe le Tama Faalelagi mo le tamaloa ma le fafine ia faaipoipo le tasi i le isi (tagai Kenese 1:27–28).

• Faaali ia ata o se aiga ma se malumalu. Valaaulia tamaiti e talanoa i mea ua latou vaaia i ata. Faamalamalama atu e finagalo le Tama Faalelagi ia faamauina i tatou i o tatou aiga i le malumalu ina ia mafai ai ona tatou faatasi ma i latou e faavavau. Ia nofouta i tamaiti e lei faamauina o latou matua.

• Usu faatasi se pese e faatatau i aiga, e pei o le “O Se Aiga Fiafia” (Tusipese a Tamaiti, 104). Mafaufau e usu usu soo le pese. Valaaulia tamaiti e faasoa ni mea malie sa latou faia ma o latou aiga. Aisea latou te faafetaia ai o latou aiga?

• Usu se pese e faatatau i le malumalu, e pei o le “Ou te Fia Vaai i le Malumalu” po o le “E Mafai Na Faavavau Aiga” (Tusipese a Tamaiti, 99, 98). Tuu i tamaiti e uu ata o malumalu po o aiga, ma valaaulia i latou e tuu i luga latou ata pe a latou usuina le “malumalu” po o le “aiga.” Fesoasoani i tamaiti e mafaufau i mafuaaga e taua ai le faaipoipo i le malumalu.

E alofa Iesu i tamaiti, aua “e faapei o i latou nei o e o i le malo o le Atua” (Mareko 10:14).

Mareko 10:13–16

E manao Iesu i tamaiti laiti e o mai ia te Ia ina ia mafai ai ona Ia faamanuia i latou.

O lenei tala ua saunia ai se avanoa e fesoasoani ai i tamaiti ia lagonaina le tele o le alofa o Iesu ia i latou.

Gaoioiga e Mafai Ona Fai

• I au lava upu, faasoa atu le tala o i le Mareko 10:13–16. E mafai foi ona e faaali atu le vitio “Suffer the Little Children to Come unto Me” (ChurchofJesusChrist.org). Fesoasoani i tamaiti e mafaufau i taimi na latou lagonaina ai le alofa o Iesu mo i latou. Tuu atu lau molimau i tamaiti e alofa Iesu ia i latou ma e finagalo e faamanuia i latou.

• Faaali atu le ata o Keriso ma Tamaiti (Tusi Ata o le Talalelei, nu. 47). Fesoasoani i tamaiti e vaai faalemafaufau pe faape‘i le avea ai ma se tasi o tamaiti o loo nofo i autafa o Iesu i le ata. Valaaulia tamaiti e faasoa atu o latou lagona e uiga ia Iesu Keriso.

• Tuu i tamaiti e tusi ni ata o i latou lava ua faamanuiaina e Iesu (tagai Mareko 10:16 ma le itulau o gaoioiga o lenei vaiaso).

Mareko 10:17–22

Afai ou te usitai i poloaiga, e mafai ona ou maua le ola e faavavau.

Na aoao e Iesu le alii talavou mauoa ina ia maua le ola e faavavau—o se olaga e pei ona i ai le Tama Faalelagi— e tatau ona ia usitai i poloaiga.

Gaoioiga e Mafai Ona Fai

• Faamatala le tala i le taulealea mauoa i le Mareko 10:17–22 i tamaiti. (Tagai foi “Mataupu 42: O Le Taulealea Mauoa,” i le Tala o le Feagaiga Fou, 105–6, po o le vitio talafeagai o loo i luga o le ChurchofJesusChrist.org.) Fai i ai e faalogologo mo mea na ta’u atu e Iesu i le taulealea e fai, ma pe na faapefea ona tali atu le taulealea.

• Faamatala se tala se tasi pe sili atu e uiga i tamaiti sa fesili atu mo se fautuaga po o se taitaiga mai o latou matua ae lei mulimuli ai pe usitai. O a ni nai mea ua poloaiina ai i tatou e le Tama Faalelagi e fai? O a ni o tatou lagona pe a tatou usitai i Ana poloaiga?

• Faasoa atu ni aafiaga ina ua e maua ni uunaiga patino e fai se mea ia e lelei atili atu.

Aoao atu le Aoaoga Faavae: Tamaiti Matutua

Mareko 10:6–8

E finagalo le Tama Faalelagi ia tatou faaipoipo i totonu o le malumalu ma maua ni aiga e faavavau.

O mea na aoao mai e Iesu e uiga i le faaipoipoga e mafai ona fesoasoani i tamaiti e tulimatai atu ai i le faaipoipo i le malumalu ma tausia se aiga e faavavau.

Gaoioiga e Mafai Ona Fai

• Fai i se tasi o tamaiti e faitau leotele le Mareko 10:6–8 . Faamalamalama atu o le faatasi o lona uiga ia “mau ai” po o le “taofi mau i” se mea. Aisea e taua ai le faatasi o tane ma ava, alofa le tasi i le isi, ma galulue o ni paaga?

• Fai i tamaiti e fesoasoani atu ia oe e mafaufau i tali o fesili e pei o le “Aisea e taua ai aiga i le Ekalesia?” po o le “Aisea e taua ai mo oe le faaipoipo i totonu o le malumalu?” Fesoasoani ia i latou e sue tali i punaoa e pei o le Mareko 10:6–8; 1 Korinito 11:11; Mataupu Faavae ma Feagaiga 42:22; 131:1–4; Mose 3:18, 21–24; ma le “O Le Aiga: O Se Folafolaga i le Lalolagi.”

• Usu faatasi se pese e faatatau i aiga, e pei o le “E Mafai Ona Faavavau Aiga” (Tusipese a Tamaiti, 98). Faasoa atu i tamaiti lau molimau i le faaipoipoga e faavavau ma le aiga faatasi ma tamaiti. Valaaulia tamaiti e faasoa mai foi a latou molimau.

Mareko 10:17–22

E mafai ona fesoasoani mai Iesu ia te au ia ou iloa le mea e tatau ona ou faia ina ia alualu ai i luma.

Na saili e le taulealea mauoa ia Iesu ma mauaina ai le faatonuga patino lea na patino lava mo ia. E mafai faapefea ona e musuia tamaiti e saili se taitaiga faapena i o latou lava olaga?

Gaoioiga e Mafai Ona Fai

• Fai i tamaiti e sue se fuaiupu i le Mareko 10:17–22 o loo faamatala mai ai le ata o i le otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga. Faamalamalama atu o le fautuaga na tuu atu e Iesu i le taulealea sa patino, ma e mafai ona tatou maua uma se taitaiga patino mai le Alii e ala mai i le Agaga.

• Faitau faatasi le Mareko 10:17–22. Valaaulia tamaiti e tusi i le laupapa ia poloaiga na ta’u atu e le Faaola i le taulealea mauoa e usitai i ai (tagai fuaiupu 19). O le a se isi mea na fai atu Iesu ia te ia e fai? (tagai fuaiupu 21). Fautuaina tamaiti e mafaufau i mea latou te moomia ona amata ona fai pe tuu le faia ina ia mulimuli atili ai ia Iesu. O a ni nai auala e mafai ona tatou iloa ai mea e manao Iesu tatou te faia

Uunaia le Aoaoina i le Aiga

Valaaulia tamaiti e faaali atu i o latou aiga latou te alolofa ia i latou, atonu e ala i le tusia o se tusi puupuu po o le faia o se galuega agalelei o le auauna atu.

Faaleleia o Lo Tatou Aoao Atu

Mata’itu tamaiti. O faapefea ona tali atu tamaiti o lau vasega i gaoioiga e aoao ai? Afai e foliga mai e le o gauai tele atu, atonu ua oo i le taimi e taumafai ai se isi gaoioiga pe o foi e fai sina savalivaliga puupuu ma le migao. I se isi itu, afai o e mataua o loo gauai atu tamaiti ma aoao mai se vaega patino o le lesona, aua nei e taumafai e faagasolo pea ina ia tau lava ina uma anomea o le lesona.