O Le Nuu e Faavavau, saunia e Keith Larson

25–31 Tesema

Faaaliga 15–22

“O Lē Manumalo e Maua e Ia Mea Uma”

A o e tapena e aoao atu, mafaufau i ou aafiaga i le suesueina o le Faaaliga 15-22 e oe lava ia pe ma lou aiga. O le a se mea na taua ia te oe? O a ni uunaiga na e maua? Manatua o gaoioiga o loo fautuaina atu iinei e mafai ona fetuutuunai mo tamaiti o soo se vaitausaga.

Valaaulia le Fefaasoaai

Valaaulia ia tamaiti e faasoa mai pe aisea latou te mananao ai e toe nonofo ma le Tama Faalelagi. I le lesona atoa, fesoasoani ia i latou e vaavaai mo mea e mafai ona latou faia e sauniuni ai e toe foi atu ia te Ia.

Aoao atu le Aoaoga Faavae: Tamaiti Laiti

Faaaliga 15:2–4

E mafai ona ou vivii atu i le Atua e ala i le pese.

O le Au Paia lea sa faamatalaina e Ioane i le Faaaliga 15:2–4 na lagiina viiga i le Atua mo Lona agalelei. O a pese o viiga e mafai ona fesoasoani i tamaiti e faailoa atu ai lo latou alolofa mo le Tama Faalelagi ma Iesu Keriso?

Gaoioiga e Mafai Ona Fai

• A o e faitauina leotele vaega o le Faaaliga 15:2–4, fai atu i tamaiti e fai taga e pei o le faafoliga o loo taina se kitara pe taitai se aufaipese. O a ni o tatou lagona pe a tatou pepese e uiga ia Iesu?

• Fai atu i tamaiti e faasoa mai nisi o a latou pese e fiafia i ai e uiga i le Tama Faalelagi ma Iesu Keriso. Usu faatasi ni nai pese, ma fesoasoani i tamaiti ia malamalama i mea o loo aoao mai e pese ia i tatou e uiga i le Tama Faalelagi ma le Faaola.

Faaaliga 19:7

E mafai ona ou sauniuni mo le Afio Mai Faalua o Iesu, e ala i le filifili o le mea tonu.

E mafai faapefea ona e fesoasoani i tamaiti ia malamalama o le Afio Mai Faalua o se mea fiafia mo i tatou pe afai tatou te mulimuli i poloaiga a Iesu?

Gaoioiga e Mafai Ona Fai

• Fesili atu i tamaiti pe na auai muamua i se faaipoipoga. Na faape’ī? Aisea e fiafia ai tagata i se faaipoipoga? Faaali atu le ata o le Afio Mai Faalua o le Faaola i le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga, ma faitau le Faaaliga 19:7. Faamalamalama atu o le “faaipoipoga a le Tamai Mamoe” e faatusa i le Afio Mai Faalua o Iesu Keriso. Aisea o le a tatou olioli ai pe a toe afio mai le Faaola? Fesoasoani i tamaiti e faatusatusa le olioli i se faaipoipoga i le olioli i le toe foi mai o le Faaola.

• Faasoa atu i tamaiti pe aisea ua e sagisagi atu ai i le Afio Mai Faalua o Iesu. E mafai foi ona outou usuina faatasi se pese e faatatau i le Afio Mai Faalua, e pei o le “Pe A Ia Toe Afio Mai” (Tusipese a Tamaiti, 46--47).

• Valaaulia ia tamaiti e faasoa mai a latou mea e fai e sauniuni ai mo le lotu i le Aso Sa. Aisea tatou te faia ai nei mea ae tatou te lei o mai i le lotu? Aisea e tatau ai ona tatou saunia mo le Afio Mai Faalua o Keriso? I le itulau o gaoioiga o lenei vaiaso, tuu i tamaiti e tusi ata o mea e mafai ona latou fai e sauniuni ai mo le Afio Mai Faalua.

Faaaliga 21:1, 3–4, 22–27; 22:1–2

E finagalo le Tama Faalelagi ia ou nofo faatasi ma Ia i le malo selesitila.

I mataupu mulimuli e lua o le Faaaliga, na faaaogaina ai e Ioane se gagana matagofie e faamatala ai le mamalu selesitila lea o le a olioli ai e faamaoni.

Gaoioiga e Mafai Ona Fai

• Fesoasoani i tamaiti e tusi le laau o loo faamatalaina i le Faaaliga 22:2 i luga le laupapa. Faamalamalama atu o le laau lenei o le laau o le ola, ma o ona fua ua faatusa i le alofa o le Atua (tagai 1 Nifae 11:21–22). Avatu i tamaiti ni fasipepa e foliga i fua, ma valaaulia i latou e tusi se ata i luga o le pepa o se mea e fesoasoani ia i latou e lagonaina ai le alofa o le Tama Faalelagi. Faamalamalama atu o i latou o e alolofa ma usiusitai i le Tama Faalelagi o le a nonofo faatasi ma Ia i le malo selesitila.

• Faasoa atu i tamaiti ni nai ata po o faamatalaga sa faaaoga e Ioane e faamatala ai le mamalu selesitila (tagai Faaaliga 21:1, 3–4, 22–27; 22:1–2), ma valaaulia ia tamaiti e tusi ia ata o mea nei.

• Usu faatasi se pese o aoao mai ai pe faapefea ona tatou saunia e toe foi atu i le afioaga o le Atua, e pei o le “O Le a Ou Mulimuli I Le Fuafuaga a le Atua” (Tusipese a Tamaiti, 86-87). Valaaulia ia tamaiti e faailoa mai mea e mafai ona latou faia ia toe nonofo faatasi ai ma le Tama Faalelagi.

Aoao atu le Aoaoga Faavae: Tamaiti Matutua

Faaaliga 19:7--8

E mafai ona ou sauniuni mo le Afio Mai Faalua o Iesu, e ala i le filifili o le mea tonu.

E mafai faapefea ona e fesoasoani i tamaiti o loo e faiaoga ai ia malamalama o le Afio Mai Faalua o Iesu Keriso o se mea fiafia o le a tupu mo e amiotonu?

Gaoioiga e Mafai Ona Fai

• Faitau faatasi le Faaaliga 19:7–8, ma fesoasoani ia malamalama ia tamaiti i faatusa o i nei fuaiupu---o le faaipoipoga o le Afio Mai Faalua o le Faaola, o le Tamai Mamoe o le Faaola, ma Lona faletua o le Ekalesia (po o i tatou uma). O a mea atonu tatou te faia e sauniuni ai mo le Faaola e toe afio mai?

• Toe faamanatu faatasi ma tamaiti ma tauloto le Mataupu Faavae o le Faatuatua 1:10 . Faamalamalama atu o lenei mataupu faavae o le faatuatua o loo faamatala mai ai mea ofoofogia, ma le mamalu o le a tutupu pe a toe afio mai Iesu. Faaali le ata o le Afio Mai Faalua o Iesu i le Sau, Mulimuli Mai ia te A’u—Mo Tagata Taitoatasi ma Aiga, ma valaaulia ia tamaiti e tusi ni ata o mea ua latou manatu o le a foliga i ai le Afio Mai Faalua o Iesu.

Faaaliga 20:12–13

O le a faamasinoina a’u e le Atua.

O le a i ai se aso o le a tatou tutu uma ai i luma o le Atua ina ia faamasinoina. E mafai ona e fesoasoani i tamaiti ia malamalama o Lana faamasinoga o le a tonu, talafeagai, ma alofa mutimutivale.

Gaoioiga e Mafai Ona Fai

• Tusi i luga o le laupapa O le a faape‘i le Aso Faamasino? Valaaulia tamaiti e vaavaai mo tali i le fesili i le Faaaliga 20:12–13 ma i le “Faamasinoga, o le Mulimuli” i le Taiala i Tusitusiga Paia (scriptures.ChurchofJesusChrist.org). O le a le mea na faia e le Faaola ina ia mafai ai ona avea le Aso Faamasino o se aso fiafia? (Tagai i le Mataupu Faavae o le Faatuatua 1:3–4). O le a se mea e mafai ona tatou faia ina ia avea o se aso fiafia mo i tatou?

  

  O Le Faamasinoga Mulimuli, saunia e John Scott

• Aumai i le vasega se api e faatusa i le “tusi o le ola” (Faaaliga 20:12), lea na e tusia ai nisi o uiga faaKeriso ma galuega lelei a tamaiti o lau vasega. Faitau atu i tamaiti mea na e tusia, ma valaaulia i latou e talanoa e faatatau i uiga faaKeriso sa latou vaaia i le tasi ma le isi. Faasoa atu lau molimau e fesoasoani Iesu Keriso ia i tatou ia avea atili e faapei o Ia ma saunia se ala mo i tatou e salamo ai ma faatoilalo le agasala.

Faaaliga 21:1, 3–4, 22–27; 22:1–2, 17

E finagalo le Tama Faalelagi ia ou nofo faatasi ma Ia i le malo selesitila.

A o e faitau i le faamatalaga a Ioane e uiga i le mamalu selesitila i le Faaaliga 21–22, o le a se mea e tulaga ese ia te oe? O le a se mea ua musuia ai oe e faasoa atu i tamaiti o loo e aoaoina?

Gaoioiga e Mafai Ona Fai

• Valaaulia tamaiti e sue i fuaiupu nei mo upu po o fuaitau na faaaoga e Ioane e faamatala ai le mamalu selesitila: .Faaaliga 21:1, 3–4, 22–27; 22:1–2. Tuu atu ia i latou e filifili se mea mai fuaiupu nei latou te mananao e tusi le ata. Ona mafai lea ona latou talanoa mai e uiga ia latou ata na tusi i le vasega. Fautuaina i latou e faasoa atu a latou ata i o latou aiga i le fale.

• Faitau faatasi le Faaaliga 22:17, ma faamalamalama atu o le faatoanofotane o le ua faapea mai “Ina sau ia” o le Ekalesia. O ai, i le avea ai ma tagata o le Ekalesia, tatou te mananao e valaaulia isi e “o mai” i ai? (tagai i le Moronae 10:30–33). O le a se mea e ono “fia inu” ai i latou o siomia i tatou? O a ni auala lelei e valaaulia ai tagata e “o mai”?

Uunaia le Aoaoina i le Aiga

Fesoasoani i tamaiti e sauniuni e faitau le Tusi a Mamona i le tausaga a sau e ala i le valaaulia o i latou e fai i se tagata o le aiga po o se uo e faasoa mai se fuaiupu e fiafia i ai po o se tala mai le Tusi a Mamona.

Faaleleia o Lo Tatou Aoao Atu

Aoao atu tamaiti ia tusifaamaumau o latou lagona uunai. Afai e mafai e tamaiti ona aoao le mausa o le tusifaamaumau o lagona uunai, o le a fesoasoani ia i latou e iloa ai ma mulimuli i le Agaga. E mafai ona tusifaamaumau e tamaiti ia lagona uunai i le makaina lea o mau, tusi ia ata, pe fai ni faamatalaga faigofie i a latou apitalaaga. (Tagai i le Aoao Atu i le Ala a le Faaola,30.)