Dugang nga mga Kapanguhaan alang sa Pagtudlo sa mga Bata

Kini nga mga kapanguhaan makita diha sa Gospel Library nga app ug sa ChurchofJesusChrist.org.

Dali, Sunod Kanako—Alang sa mga Indibidwal ug mga Pamilya

Mahimo nimong ipahiangay ang mga kalihokan gikan sa Dali, Sunod Kanako—Alang sa mga Indibidwal ug mga Pamilya aron magamit sa imong klase sa Primary. Ayaw kabalaka kon ang mga bata nakahimo na niini nga mga kalihokan uban sa ilang mga pamilya sa panimalay; ang pagbalik-balik makatabang sa mga bata nga makat-on. Ang mga bata mahimong gusto nga mosulti kanimo kon giunsa nila pagbuhat ang mga kalihokan uban sa ilang mga pamilya ug unsay ilang nakat-onan.

Mga Himno ug Songbook sa mga Bata

Ang sagrado nga musika modapit sa Espiritu, motabang kanato nga mobati sa gugma sa Dios, ug motudlo sa doktrina sa halandomon nga paagi. Agig dugang sa paggamit sa giimprinta nga mga bersiyon sa Mga Himno ug sa Songbook sa mga Bata, makakita ka og bidyo ug audio nga mga rekording sa daghang himno ug mga awit sa mga bata sa music.ChurchofJesusChrist.org ug diha sa Sacred Music ug Gospel Media nga mga app.

Alang sa mga ideya, tan-awa sa “Paggamit og Musika sa Pagtudlo sa Doktrina” ug “Pagtabang sa mga Bata nga Makakat-on ug Mahinumdom sa mga Awit sa Primary ug mga Himno” sa apendiks niini nga manwal.

Tan-awa Ang Inyong Gagmay nga mga Bata

Daghan sa mga hilisgotan nga gitudlo diha sa Tan-awa Ang Inyong Gagmay nga mga Bata: Manwal sa Nursery susama ra niadtong imong itudlo sa Primary. Ilabi na kon magtudlo ka og mas gagmay nga mga bata, ikonsiderar ang pagtan-aw diha sa manwal sa nursery alang sa dugang nga mga awit, mga istorya, mga kalihokan, ug pagpanghimo og mga produkto gamit ang kamot [crafts].

Higala

Ang Higala nga magasin maghatag og mga istorya ug mga kalihokan nga makadugang sa mga baroganan nga imong gitudlo gikan sa Dali, Sunod Kanako—Alang sa Primary.

Mga Istorya sa Bag-ong Tugon

Ang Mga Istorya sa Bag-ong Tugon makatabang sa mga bata nga makakat-on sa doktrina ug mga istorya nga makita diha sa Bag-ong Tugon. Makakita usab ka og mga bidyo niini nga mga istorya diha sa Gospel Library nga app ug diha sa GospelMedia.ChurchofJesusChrist.org.

Koloranan nga Libro sa mga Istorya sa Kasulatan—Bag-ong Tugon

Kini nga kapanguhaan naglangkob og makalingaw nga mga pahina sa koloranan nga kalihokan nga gidesinyo aron sa pagpalambo sa pagkat-on sa mga bata gikan sa Bag-ong Tugon.

Mga Bidyo ug Art

Ang artwork, mga bidyo, ug ubang media makatabang sa mga bata nga imong gitudloan nga makasabot sa doktrina ug makahulagway sa mga istorya nga may kalabotan sa mga kasulatan. Bisitaha ang Gospel Media sa GospelMedia.ChurchofJesusChrist.org aron sa pag-browse sa koleksiyon sa Simbahan sa mga kapanguhaan sa media. Ang Gospel Media anaa usab isip usa ka mobile nga app. Daghang hulagway nga mahimo nimong gamiton sa klase makita diha sa Libro sa mga Hulagway sa Ebanghelyo.

Pagtudlo sumala sa Pamaagi sa Manluluwas

Ang Pagtudlo sumala sa Pamaagi sa Manluluwas makatabang kanimo sa pagkat-on ug sa paggamit sa mga baroganan sa Kristohanon nga pagtudlo. Kini nga mga baroganan hisgotan ug buhaton diha sa mga miting sa konseho sa magtutudlo.