O Se Mamanu mo le Aoao Atu

I lenei punaoa, o le a e maua ai laasaga nei e tolu o le mamanu lea ua faifaafia i otootoga taitasi: valaaulia le fefaasoaai, aoao atu aoaoga faavae, ma faamalosia le aoaoina i le aiga. I le tele o tulaga, a o e aoao atu, o elemene o lenei mamanu e ono fesopoa’i pe tulai mai foi i se faasologa e ese. Mo se faataitaiga, mafaufau o le fefaasoaai o se avanoa lea e aoao atu ai le aoaoga faavae, ma o le aoaoina atu o le aoaoga faavae e tatau ona aofia ai le valaaulia e faasoa. E faapena foi, o le fautuaina o le aoaoina i le fale e mafai ona fai i le gasologa atoa o se talanoaga a le vasega. Faataga suiga i le mamanu lenei ia tupu lava ia, ma mulimuli i uunaiga a le Agaga e taulima ai manaoga o tamaiti e te faiaoga ai.

Valaaulia le Fefaasoaai

I le avea o se vaega o vasega taitasi, valaaulia tamaiti e faasoa mai o latou lagona, malamalamaaga ma aafiaga e uiga i mataupu faavae o loo e aoaoina. O a latou faamatalaga e ono aofia ai aafiaga sa latou maua a o aoao i le fale. E te ono toe faamanatu foi mea sa latou aoaoina i le vaiaso ua te’a ma fesili pe na faapefea ona aafia ai o latou olaga.

Aoao Atu le Aoaoga Faavae

E mafai ona fesoasoani leSau, Mulimuli Mai ia te A’u—Mo Tagata Taitoatasi ma Aiga ia te oe e malamalama atili ai i le aoaoga faavae o le a e aoao atu i tamaiti. Fuafua pe o a fuaiupu o mau, upusii, aafiaga, fesili, ma isi punaoa e te manao e faasoa atu e fesoasoani ai i tamaiti ia malamalama ma faatino i luga o mataupu faavae o le talalelei latou te aoaoina. Fesoasoani ia latou iloa le faatosinaga a le Agaga Paia a o Ia molimauina le upumoni. Vaavaai mo auala fatufatuai ma musuia e fesoasoani ai ia i latou e sagisagi fiafia ai i mea latou te aoaoina.

Mo manatu e uiga i le auala e faaaoga ai musika e aoao atu ai le aoaoga faavae, tagai i vaega “Faaaogaina o Musika e Aoao Atu ai Aoaoga Faavae” ma le “Fesoasoani i Tamaiti e Aoao ma Manatua Pese o le Peraimeri ma Viiga” i le faaopoopoga o lenei tusi lesona.

Fautuaina le Aoaoina i le Aiga

Talu ai o le aiga o le totonugalemu lea o le aoaoina o le talalelei, o se tasi o ou faamoemoega i le avea ai o se faiaoga o le Peraimeri o le uunaia lea o le aoao i le aiga. E mafai faapefea ona e fesoasoani i tamaiti e faasoa atu i o latou aiga mea sa latou aoaoina i le vasega? E mafai faapefea ona e fautuaina tamaiti ma o latou aiga e faaauau ona aoao mai le Feagaiga Fou i le fale?