Dagiti ubbing iti Primary nga agkankanta a kagiddan ti panaggaraw dagiti imada

Dagiti Pangiturong para iti Oras ti Panagkanta ken Pabuya dagiti Ubbing iti Miting iti Sakramento

Patpatgenmi a Dagiti Panguluen iti Primary ken Lider iti Musika,

Dagiti kanta iti Primary ti nabileg a ramit a makatulong kadagiti ubbing a masursuruan maipapan iti plano ti Nailangitan nga Ama iti ragsak ken dagiti pundasion iti kinapudno ti ebanghelio ni Jesucristo. Kabayatan ti panagkanta dagiti ubbing maipapan kadagiti pagbatayan ti ebanghelio, paneknekanto ti Espiritu Santo maipapan iti kinapudno dagitoy. Agtalinaedto dagiti balikas ken musika iti pampanunot ken puspuso dagiti ubbing iti unos ti panagbiagda.

Ikarigatam a gun-oden ti tulong ti Espiritu bayat ti panagsaganam a mangisuro iti ebanghelio babaen iti musika. Ibinglaymo ti pammaneknekmo maipapan kadagiti kinapudno a kantaenyo. Tulongam dagiti ubbing a mangkita no kasano a mainaig ti musika iti no ania dagiti masursuro ken mapadpadasanda iti pagtaengan ken kadagiti klase iti Primary. Maparaburanto dagiti ubbing ken dagiti pamiliada babaen kadagiti napasnek a panagkagumaanmo a mangtulong kadagiti ubbing nga agkanta iti sagrado a musika.

Ay-ayatendakayo ket agyamankami iti naanep a panagserbiyo tapno mapapigsa ken masaluadan dagiti napapateg nga annaktayo.

Ti Sapasap a Panguluen ti Primary

Dagiti Pangiturong para iti Oras ti Panagkanta

5 minuto (Panguluen iti Primary): Panglukat a kararag, nasantuan a kasuratan wenno pagannurotan ti pammati, ken maysa a bitla [talk]

20 minuto (lider iti musika): Oras ti panagkanta

Pumili ti panguluen iti Primary ken lider iti musika kadagiti kanta para iti tunggal bulan tapno mapatibker dagiti pagbatayan ti ebanghelio a sursuruen dagiti ubbing kadagiti klaseda ken iti pagtaengan. Dagiti listaan dagiti kanta a mangpabileg kadagitoy a pagbatayan ket nairaman iti daytoy a pangiwanwan. Naisingasing pay kadagitoy a kanta kadagiti balabala iti Umaykayo, Sumurot Kaniak—Para iti Primary ken Umaykayo, Sumurot Kaniak—Para kadagiti Indibidual ken Pamilia.

No isurom dagiti kanta kadagiti ubbing, awisem ida a mangibinglay no ania ti nasursurodan maipapan kadagiti estoria ken pagbatayan iti doktrina iti kanta nga isurom. Mabalin a kayatmo nga irebyu dagiti balabala iti Umaykayo, Sumurot Kaniak—Para iti Primary nga ad-adalen dagiti ubbing kadagiti klaseda. Daytoy ti mangtulongto kenka nga agbalin a mannakaammo kadagiti estoria ken pagbatayan a sursuruenda tapno maibilangmo no kasano a masuportaran ti panagsursuroda iti musika.

Kabayatan ti oras ti panagkanta, mabalinmo met nga irebyu dagiti kanta a nasursuron dagiti ubbing iti kallabes ken dagiti kanta a paggugustoda a kankantaen. Kabayatan ti panangrebyum, awisem dagiti ubbing a mangibinglay kadagiti kapanunotan ken riknada maipapan kadagiti kinapudno a masarakan kadagiti kanta.

Ti Children’s Songbook isu ti pangrugian a resource para iti musika iti Primary. Dagiti himno manipud iti hymnbook ken dagiti kanta manipud iti Friend wenno Liahona ket maitutop pay. Sagpaminsan a mabalin a kantaen dagiti ubbing dagiti kanta a mainaig iti kinabannuar wenno piesta opisial a mayannatup para iti Domingo ken maibagay iti tawen dagiti ubbing. Ti panangusar iti sabali pay a musika iti Primary ket nasken nga aprobaran ti bishopric (kitaen iti Sapasap a Hanbuk: Panagserbi iti Ti Simbaan ni Jesucristo dagiti Santo iti Ud-udina nga Aldaw, 12.3.4, ChurchofJesusChrist.org).

Pakagupgopan ti Primary

Tunggal lawas, iraman ti Primary ti:

Oras ti panagkanta:25 a minuto

Transision:5 a minuto

Dagiti klase:20 a minuto

Mabalin a bingayen dagiti lider ti daddadakkel a Primary dagiti ubbing iti dua a grupo ket adda ti maysa a grupo kadagiti klase ti Primary idinto nga adda ti sabali pay a grupo iti oras ti panagkanta. Kalpasanna agsinnukat dagiti dua a grupo iti lugarda. Kadagiti kasta a kasasaad, mabalin a kasapulan dagiti lider ti Primary ti mangbalbaliw kadagiti oras a naipakita iti ngato tapno maibagay kadagiti kasasaadda.

Ubbing iti Primary nga agig-iggem iti ladawan ni Jesus

Naisingasing a Musika para iti Oras ti Panagkanta

Enero

• “Come, Follow Me,” Hymns, no. 116

• “A Child’s Prayer,” Children’s Songbook, 12–13

• “Jesus Once Was a Little Child,” Children’s Songbook, 55

Pebrero

• “Baptism,” Children’s Songbook, 100–101

• “I Will Follow God’s Plan,” Children’s Songbook, 164–65

• “He Sent His Son,” Children’s Songbook, 34–35

Marso

• “I’m Trying to Be like Jesus,” Children’s Songbook, 78–79

• “Did You Think to Pray?,” Hymns, no. 140

• “Tell Me the Stories of Jesus,” Children’s Songbook, 57

Abril

• “Faith,” Children’s Songbook, 96–97

• “I Feel My Savior’s Love,” Children’s Songbook, 74–75

• “Jesus Has Risen,” Children’s Songbook, 70

Mayo

• “Keep the Commandments,” Children’s Songbook, 146–47

• “Families Can Be Together Forever,” Children’s Songbook, 188

• “I Am a Child of God,” Children’s Songbook, 2–3

Hunio

• “Love One Another,” Children’s Songbook, 136–37

• “Behold the Great Redeemer Die,” Hymns, no. 191

• “Did Jesus Really Live Again?,” Children’s Songbook, 64

Hulio

• “Stand for the Right,” Children’s Songbook, 159

• “I’ll Walk with You,” Children’s Songbook, 140–41

• “I Know My Father Lives,” Children’s Songbook, 5

Agosto

• “When I Am Baptized,” Children’s Songbook, 103

• “The Holy Ghost,” Children’s Songbook, 105

• “The Lord Gave Me a Temple,” Children’s Songbook, 153

Septiembre

• “When We’re Helping,” Children’s Songbook, 198

• “A Child’s Prayer,” Children’s Songbook, 12–13

• “I Know That My Redeemer Lives,” Hymns, no. 136

Oktubre

• “When He Comes Again,” Children’s Songbook, 82–83

• “The Church of Jesus Christ,” Children’s Songbook, 77

• “I Love to See the Temple,” Children’s Songbook, 95

Nobiembre

• “Search, Ponder, and Pray,” Children’s Songbook, 109

• “Tell Me, Dear Lord,” Children’s Songbook, 176

• “Kindness Begins with Me,” Children’s Songbook, 145

Disiembre

• “My Heavenly Father Loves Me,” Children’s Songbook, 228–29

• “Choose the Right Way,” Children’s Songbook, 160–61

• “When I Am Baptized,” Children’s Songbook, 103

Panangusar iti Musika a Mangisuro iti Doktrina

Naisangrat ti oras ti panagkanta a mangtulong kadagiti ubbing a makarikna iti impluensia ti Espiritu Santo bayat ti panagsursuroda kadagiti kinapudno ti ebanghelio. Makatulong dagiti sumaganad a kapanunotan.

Punnuen ti blangko. Mangisurat iti maysa a berso ti kanta iti pisarra nga awan dagiti sumagmamano a kangrunaan a balikas [key words]. Kalpasanna kiddawen kadagiti ubbing nga agkansion iti kanta, a dumdumngeg kadagiti balikas a mangpunno kadagiti blangko. Bayat ti panangpunnoda iti tunggal blangko, awisem dagiti ubbing a mangibinglay no ania dagiti pagbatayan ti ebanghelio a masursuroda manipud kadagiti awan a balikas.

Usarem dagiti adaw manipud kadagiti lider iti Simbaan. Awisem dagiti ubbing a dumngeg iti maysa nga adaw manipud iti maysa a lider ti Simbaan a mangisuro iti isu met laeng a pagbatayan ti ebanghelio a kas iti kanta iti Primary. Idawatmo kadakuada a mangingato iti imada no mangngeganda ti maysa a banag a mangtulong kadakuada a makaawat iti kinapudno a kankantaenda. Idawatmo kadakuada a mangibinglay no ania ti nangngeganda.

Agpaneknek. Mangiburay iti ababa a pammaneknek kadagiti ubbing maipapan kadagiti kinapudno ti ebanghelio a masarakan iti kanta iti Primary. Tulongam dagiti ubbing a makaawat a ti panagkanta ket maysa a wagas a mabalin a pangiburayanda iti pammaneknek ken pakariknaanda iti Espiritu.

Agusar kadagiti ladawan. Kiddawem kadagiti ubbing a tulongandaka nga agsapul wenno agaramid kadagiti ladawan a maikadua kadagiti napapateg a balikas wenno ragup ti balikas iti kanta. Awisem ida a mangibinglay no kasano a mainaig dagiti ladawan iti kanta ken no ania ti isuro ti kanta. Kas pagarigan, no isursurom ti kanta nga “I Will Follow God’s Plan” (Children’s Songbook, 164–65), mabalinmo nga ikabil dagiti ladawan iti aglawlaw ti siled a mangiladawan kadagiti napapateg a balikas manipud iti kanta (kas iti gift [sagut], heaven [langit], home [pagtaengan], earth [daga], ken birth [pannakayanak]). Kiddawem kadagiti ubbing a mangummong kadagiti ladawan ken mangingato kadagitoy iti husto nga urnos bayat ti aggigiddan a panagkantayo.

Ibinglay ti maysa a banag. Mabalinmo nga usaren ti maysa a banag a mainaig iti maysa a kanta. Kas pagarigan, dakamaten ti kanta a “Faith” (Children’s Songbook, 96–97), ti maysa a bassit a bukel [seed]. Mabalinmo nga ipakita kadagiti ubbing ti maysa a bukel a mangtulong kadakuada a makaawat a ti bassit a dagup ti pammati ken ni Jesucristo mabalin a dumakkel iti panaglabas ti panawen.

Inaig ti kanta kadagiti bukod a padas. Tulongam dagiti ubbing a manginaig kadagiti pagbatayan a maisursuro iti kanta kadagiti padasda kadagita a pagbatayan. Kas pagarigan, sakbay iti panangkanta iti “I Love to See the Temple” (Children’s Songbook, 95), mabalinmo a kiddawen kadagiti ubbing a mangingato kadagiti imada no nakakitadan iti maysa a templo. Awisem ida nga agpanunot bayat ti panagkantada maipapan iti no kasano ti mariknada no makitada ti maysa a templo.

Agdamag kadagiti saludsod. Adu dagiti saludsod a mabalinmo a damagen no agkansionkayo kadagiti kanta. Kas pagarigan, mabalinmo a saludsoden kadagiti ubbing no ania ti masursuroda manipud iti tunggal berso iti kanta. Mabalinmo pay a kiddawem kadakuada nga agpanunot kadagiti saludsod a sungbatan dayta a kanta.

Dumngeg kadagiti sungbat. Kiddawen kadagiti ubbing a dumngegda kadagiti sungbat dagiti saludsod kas iti “asino?” “ania?” “sadino?” “kaano?” wenno “apay?” Kas pagarigan, iti kanta a “Baptism” (Children’s Songbook, 100–101), mabalinda a denggen no asino ti nangbuniag ken ni Jesus ken no sadino, no kasano, ken no apay a nabuniagan Isuna. Mabalin pay a kiddawem kadagiti ubbing a dumngegda kadagiti kangrunaan a balikas wenno bilangenda dagiti ramayda no mamin-ano a kantaenda ti maysa a balikas.

dagiti ubbing nga agkankanta iti miting ti sakramento

Panangtulong kadagiti Ubbing a Mangsursuro ken Manglagip kadagiti Kanta iti Primary ken Himno

Masursuro dagiti ubbing ti maysa a kanta babaen ti panangdengngeg ken panangulit a panangkanta manen iti daytoy. Kanayonmo a kantaen dagiti balikas ti maysa a baro a kanta kadagiti ubbing—saan laeng a basaem wenno isaom dagitoy. Daytoy ti mangtulong kadagiti ubbing a manginaig iti ayug [melody] kadagiti balikas. Kalpasan a naisuro ti maysa a kanta, irebyum daytoy iti nadumaduma a naragsak a wagas iti unos ti makatawen. Iti baba ti sumagmamano a kapanunotan a mangtulong kadagiti ubbing a makasursuro ken mangrebyu kadagiti kanta.

Agpartuat kadagiti poster. Ipakitam dagiti poster nga addaan kadagiti balikas manipud iti tunggal berso wenno ladawan a mangibagi kadagiti balikas. Kabayatan ti panagkanta dagiti ubbing, abbongam ti sumagmamano kadagiti balikas wenno ladawan agingga a makansionda ti sibubukel a berso nga awan ti poster. Mabalinmo pay nga awisen dagiti ubbing a tumulong kenka nga agaramid kadagiti poster.

Ipakitam ti tono. Tapno masursuro dagiti ubbing ti ayug ti maysa a kanta, ipuestom ti imam iti posision a paidda, ken bayat ti panagkantam kadagiti balikas, ingatom ti imam tapno mangipakita iti nangato a tono ken ibabam ti imam tapno mangipakita iti nababa a tono.

Aweng. Awisem dagiti ubbing nga agbalin nga awengmo babaen ti panangulitda iti no aania ti kantaem. Kantaam dagiti ubbing iti ababa a ragup ti balikas wenno linia, ket kalpasanna ipakantam kadakuada kenka daytoy.

Agusar iti panagduduma. Agkansion kadagiti kanta iti agduduma a wagas, kas iti panagarasaas, panagdayyeng, panagsipat iti beat, panagduduma iti tempo, wenno panagkanta kabayatan ti panagtugaw wenno panagtakder.

Agkanta iti kada grupo. Ikkam ti tunggal klase wenno tunggal tao iti maysa a ragup ti balikas a kantaen bayat ti panagtakderda, ken kalpasanna pagsisinnukatem ida kadagiti ragup ti balikas agingga a naaddaan ti tunggal klase wenno tunggal maysa iti batang nga agkanta iti tunggal ragup ti balikas.

Agusar kadagiti garaw ti ima. Awisem dagiti ubbing a mangpanunot kadagiti simple a garaw ti ima a mangtulong kadakuada a manglagip kadagiti balikas ken mensahe ti maysa a kanta. Kas pagarigan, no agkantakayo iti “Reverently, Quietly” (Children’s Songbook, 26), mabalinmo nga awisen dagiti ubbing nga agdalikepkep kadagiti imada, agdumogda, ken sagidenda ti pusoda no agkantada kadagiti mainaig a linia ti kanta.

Agkanta dagiti ubbing a babbai, agkanta dagiti ubbing a lallaki. Mangidrowing iti ladawan ti maysa nga ubing a lalaki ken ladawan ti maysa nga ubing a babai, ket ipigket wenno i-tape dagiti ladawan iti agsina a stick. Kabayatan ti panangrebyum iti maysa a kanta, ingatom ti maysa kadagiti ladawan tapno ipakita no asino ti nasken a mangkanta iti dayta a paset ti kanta.

Iparis ti maysa a ladawan iti maysa a ragup ti balikas. Isuratmo ti tunggal linia ti maysa a kanta iti sabali pay a papel, ket sapulem ti ladawan a mangibagi iti tunggal linia. Ikabilmo dagiti ladawan iti maysa a bangir ti siled ken ikabilmo dagiti papel iti sabali pay a bangir. Agkansion iti maysa a kanta, ken kiddawem kadagiti ubbing nga iparisda dagiti ladawan kadagiti balikas.

Dagiti Pangiwanwan para iti Pabuya [Presentation] dagiti Ubbing iti Miting iti Sakramento

Babaen ti panangiturong ti bishop, gagangay a maang-angay ti pabuya dagiti ubbing iti miting iti sakramento kabayatan ti maikapat a kuarter ti tawen. Kas panguluen ti Primary ken lider iti musika, makipagurnos a makimiting a nasapsapa iti tawen iti mamagbaga [counselor] iti bishopric a mangimaton iti Primary tapno marugian a pagsasaritaan dagiti plano para iti pabuya wenno presentasion. No nakumpletoyon dagiti plano, gun-odenyo ti pananganamongna para kadagitoy.

Nasken a ti pabuya [presentation] ket mangipalubos kadagiti ubbing a mangidatag wenno mangipabuya no ania dagiti nasursuroda ken ti pamiliada manipud iti Baro a Tulag iti pagtaengan ken iti Primary, agraman dagiti kanta iti Primary a kinantada kabayatan ti tawen. Nainkararagan nga ibilangmo no ania dagiti pagbatayan ti ebanghelio ken kanta a mangsuporta no ania ti nasursuroda. Iti unos ti tawen, isuratmo dagiti bitla ken bukod a padas dagiti ubbing para iti mabalin a pangusaran iti pabuya. Awisem dagiti ubbing a mangibinglay kadagiti nasantuan a kasuratan, estoria, ken pammaneknekda iti pabuya. Kabayatan ti panagplanoyo iti pabuya, panunoten dagiti wagas a makatulong iti kongregasion a mangipamaysa iti Nailangitan nga Ama ken ti Mangisalakan ken dagiti pannursuroda.

Dagiti yunit nga addaan iti bassit a bilang dagiti ubbing ket mabalinda nga ibilang dagiti wagas a mabalin a makiraman dagiti miembro ti pamilia a kadua dagiti annakda. Mabalin nga igibus ti maysa a miembro ti bishopric ti miting iti ababa a panagsaritana.

Kabayatan ti panangisaganayo iti pabuya, laglagipen dagiti sumaganad a pangiwanwan:

• Nasken a saan a mangala iti saan a kasapulan nga oras dagiti panagpraktis manipud kadagiti klase ti Primary wenno pamilia.

• Saan a maitutop para iti miting iti sakramento dagiti ladawan [visuals], kawes [costumes], ken dagiti presentasion iti media.

Kitaen iti General Handbook: Serving in The Church of Jesus Christ of Latter-day Saints, 12.2.1.2, ChurchofJesusChrist.org.