Ti Siudad nga Agnanayon, ni Keith Larson

Disiembre 25–31

Apocalipsis 15–22

“Ti Agballiginto Tawidennanto Amin Dagitoy a Bambanag”

Bayat ti panagsaganam a mangisuro, mabalin nga usarem ti padasmo iti panagadal iti Apocalipsis 15–22 iti bukodmo wenno kaduam dagiti pamiliam. Ania ti makitam a napateg kenka? Ania dagiti impresion a naawatmo? Panunotem nga amin nga aktibidad a naisingasing iti daytoy a balabala ket mabalin nga ibagay iti uray ania a tawen dagiti ubbing.

Yawis ti Panagbibinninglay

Awisem dagiti ubbing a mangibinglay no apay a kayatda a makipagnaed manen iti Nailangitan nga Ama. Iti intero nga adalen, tulongam ida a mangsapul kadagiti banag a mabalinda nga aramiden nga agsagana nga agsubli Kenkuana.

Isuro ti Doktrina: In-inaudi nga Ubbing

Apocalipsis 15:2–4

Makapagdaydayawak iti Dios babaen iti panagkanta.

Nagkanta ti pagdaydayaw dagiti Santo nga inladawan ni Juan iti Apocalipsis15:2–4 iti Dios gapu iti kinaimbagna. Ania dagiti kanta a pagdaydayaw a makatulong kadagiti ubbing a mangipeksa iti ayatda para iti Nailangitan nga Ama ken ni Jesucristo?

Dagiti Mabalin nga Aktibidad

• Bayat ti napigsa a panangbasam iti Apocalipsis 15:2–4, kiddawen kadagiti ubbing nga agaramid kadagiti tignay kas iti panagpammarang nga agtoktokar iti arpa wenno mangidaulo iti maysa a koro. Kasano ti mariknatayo no agkantatayo iti maipapan ken ni Jesus?

• Idawat dagiti ubbing a mangibinglay iti sumagmamano kadagiti paggugustoda a kanta maipapan iti Nailangitan nga Ama ken ni Jesucristo. Aggigiddan nga agkansion iti sumagmamano a kanta, ken tulongam dagiti ubbing a makaawat no ania ti isuro dagiti kanta kadatayo maipapan iti Nailangitan nga Ama ken iti Mangisalakan.

Apocalipsis 19:7

Makapagsaganaak para iti Maikadua a Yaay ni Jesucristo babaen ti panagpilik iti umno.

Kasano a matulongam dagiti ubbing a makaawat nga agbalinto ti Maikadua a Yaay a naragsak a pasamak para kadatayo no surotentayo dagiti bilin ni Jesus?

Dagiti Mabalin nga Aktibidad

• Saludsodem kadagiti ubbing no nakapandan iti maysa a kallaysa. Ania ti kayarigan daytoy? Apay a naragsak dagiti tao iti maysa a kallaysa? I-display ti ladawan ti maikadua a Yaay ti Mangisalakan iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia, ken basaen ti Apocalipsis 19:7. Ilawlawag a ti “kallaysa ti Kordero” ket mangibagi iti Maikadua a Yaay ni Jesucristo. Apay nga agrag-otayonto intono umay manen ti Mangisalakan? Tulongam dagiti ubbing a mangidilig iti rag-o ti maysa a kallaysa iti rag-o ti panagsubli ti Mangisalakan.

• Ibinglaymo kadagiti ubbing no apay a paspasungadam ti Maikadua a Yaay ni Jesus. Mabalinyo pay ti aggigiddan a mangkansion iti kanta maipapan iti Maikadua a Yaay, kas iti “When He Comes Again” (Children’s Songbook, 82–83).

• Awisem dagiti ubbing a mangibinglay no ania ti aramidenda a makapagsagana a mapan iti simbaan iti Domingo. Apay nga aramidentayo dagitoy a banag sakbay a mapan iti simbaan? Apay nga agsaganatayo para iti Maikadua a Yaay ni Cristo? Iti panid ti aktibidad iti daytoy a lawas, pagdrowingem dagiti ubbing iti no ania ti mabalinda nga aramiden tapno makapagsagana para iti Maikadua a Yaay.

Apocalipsis 21:1, 3–4, 22–27; 22:1–2

Kayat ti Nailangitan nga Ama a makipagnaedak Kenkuana iti celestial a pagarian.

Iti maudi a dua a kapitulo ti Apocalipsis, nagusar ni Juan iti napintas a pagsasao a mangiladawan iti celestial a gloria a pagragsakanto dagiti napudno a tao.

Dagiti Mabalin nga Aktibidad

• Tulongam dagiti ubbing a mangidrowing iti kayo a nailadawan iti Apocalipsis 22:2 iti pisarra. Ilawlawag a daytoy a kayo ti kayo ti biag, ket ti bungana ti mangibagi iti ayat ti Dios (kitaen iti 1 Nephi 11:21–22). Mangtedka kadagiti ubbing kadagiti panid ti papel a sinan-prutas ti sukogna, ket awisem ida a mangidrowing iti maysa a banag a makatulong a mariknada ti ayat ti Nailangitan nga Ama. Ilawlawag a dagiti agayat ken agtungpal iti Nailangitan nga Ama ti makipagnaedto Kenkuana iti celestial a pagarian.

• Ibinglaymo kadagiti ubbing ti sumagmamano a ladawan wenno detalye nga inusar ni Juan a pangiladawan iti celestial a gloria (kitaen iti Apocalipsis 21:1, 3–4, 22–27; 22:1–2), ket awisem dagiti ubbing a mangidrowing kadagiti ladawan dagitoy a banag.

• Aggigiddan nga agkansion iti maysa a kanta a mangisuro no kasano a makapagsaganatayo nga agsubli iti sidong ti Dios, kas iti “I Will Follow God’s Plan” (Children’s Songbook, 164–65). Awisem dagiti ubbing a mangilasin no ania ti maaramidda tapno agnaedda manen iti sidong ti Nailangitan nga Ama.

Isuro ti Doktrina: In-inauna nga Ubbing

Apocalipsis 12:7–8

Makapagsaganaak para iti Maikadua a Yaay ni Jesucristo babaen ti panagpilik iti umno.

Kasano a matulongam dagiti ubbing a sursuruam a makaawat nga agbalinto a naragsak a pasamak para kadagiti nalinteg ti Maikadua a Yaay ni Jesucristo?

Dagiti Mabalin nga Aktibidad

• Aggigiddan a mangbasa iti Apocalipsis 19:7–8, ken tulongam dagiti ubbing a makaawat iti simbolismo dagitoy a bersikulo—ti kallaysa ket ti Maikadua a Yaay ti Mangisalakan, ti Kordero ket ti Mangisalakan, ken ti asawana ket ti Simbaan (wenno datayo amin). Ania dagiti banag a maaramidtayo tapno agsagana para iti yaay manen ti Mangisalakan?

• Irebyu ken yulo ti Pagannurotan ti Pammati 1:10 kadagiti ubbing. Ilawlawag nga iladawan daytoy a pagannurotan ti pammati dagiti naragsak ken nagloriaan a pasamak a maaramidto iti yaay manen ni Jesus. I-display ti ladawan ti Maikadua a Yaay ni Jesus iti Umaykayo, Sumurot Kaniak—Para kadagiti Indibidual ken Pamilia, ken awisem dagiti ubbing a mangidrowing iti no ania iti panagkunada ti kayariganto ti Maikadua a Yaay ni Jesus.

Apocalipsis 20:12–13

Ukomennakto ti Dios.

Iti maysa nga aldaw agtakdertayonto amin iti sanguanan ti Dios tapno maukom. Matulongam dagiti ubbing a makaawat a ti panangukomna ket agbalinto a nalinteg, saan a mangidumduma, ken naasi.

Dagiti Mabalin nga Aktibidad

• Isurat iti pisarra ti Anianto ti kayarigan ti Aldaw a Panangukom? Awisem dagiti ubbing a mangsapul iti sungbat iti saludsod iti Apocalipsis 20:12–13 ken iti “Panangukom, ti Maudi a” iti Pangiwanwan iti Nasantuan a Kasuratan (scriptures.ChurchofJesusChrist.org). Ania ti inaramid ti Mangisalakan tapno agbalin a naragsak nga aldaw ti Aldaw ti Panangukom? (Kitaen iti Pagannurotan ti Pammati 1:3–4). Ania ti maaramidtayo tapno maysa a naragsak nga aldaw daytoy para kadatayo?

  

  Ti Maudi a Panangukom, ni John Scott

• Mangitugot iti klase iti maysa a kuaderno a mangibagi iti “libro ti biag” (Apocalipsis 20:12), a nagisuratam iti sumagmamano kadagiti kababalin a kas ken ni Cristo ken nasayaat nga aramid dagiti ubbing iti klasem. Ibasam kadagiti ubbing dagiti banag nga insuratmo, ket awisem ida a mangisarita maipapan kadagiti kababalin a kas ken ni Cristo a nakitadan iti tunggal maysa. Ibinglaymo ti pammaneknekmo a tulongannatayo ni Jesucristo nga agbalin nga ad-adda a kas Kenkuana ken mangipaay iti maysa a wagas a makapagbabawitayo ken maparmek ti basol.

Apocalipsis 21:1, 3–4, 22–27; 22:1–2,17

Kayat ti Nailangitan nga Ama a makipagnaedak Kenkuana iti celestial a pagarian.

Bayat ti panangbasam iti panangiladawan ti Juan iti celestial a gloria iti Apocalipsis 21–22, ania ti napateg kenka? Ania ti mariknam a makaparegta nga ibinglay kadagiti ubbing a sursuruam?

Dagiti Mabalin nga Aktibidad

• Awisem dagiti ubbing nga agsukisok kadagiti sumaganad a bersikulo para kadagiti balikas wenno ragup ti balikas nga inusar ni Juan a mangiladawan iti celestial a gloria: Apocalipsis 21:1, 3–4, 22–27; 22:1–2. Pagpiliem ida iti maysa a banag kadagitoy a bersikulo a kayatda nga idrowing. Kalpasanna mabalinda nga isarita iti klase maipapan kadagiti drowingda. Allukoyem ida a mangipakita iti drowingda kadagiti pamiliada iti pagtaengan.

• Aggigiddan a basaen ti Apocalipsis 22:17, ket ilawlawag a ti nobia nga agkuna iti “Umayka” ket ti Simbaan. Kas miembro ti Simbaan, asino ti kayattayo a yawis kadagiti dadduma nga “umayanda”? (kitaen iti Moroni 10:30–33). Ania ti mabalin a “pakawawan” dagiti adda iti aglawlawtayo? Ania dagiti sumagmamano a nasayaat a wagas a pangawisan kadagiti tao nga “umay”?

Yallukoy ti Panagsursuro iti Pagtaengan

Tulongam dagiti ubbing nga agsagana a mangbasa iti Libro ni Mormon iti sumaruno a tawen babaen ti panangawis kadakuada a mangidawat iti maysa a miembro ti pamilia wenno gayyem tapno mangibinglay iti paggugustoda a bersikulo wenno estoria manipud iti Libro ni Mormon.

Panangpadur-as iti Panangisurotayo

Suruam dagiti ubbing a mangisurat kadagiti impresion. No masursuruan dagiti ubbing iti ugali a mangisurat kadagiti impresion, daytoy ti mangtulongto kadakuada a mangilasin ken mangsurot iti Espiritu. Mabalin nga isurat dagiti ubbing dagiti impresion babaen ti panangmarka kadagiti nasantuan a kasuratan, panangidrowing kadagiti ladawan, wenno panagsurat kadagiti simple a serrek iti diurnal. (Kitaen iti Panangisuro iti Wagas ti Mangisalakan,30.)