Composite art ni Eric Johnsen: Ti Dakkel a Konseho, ni Robert T. Barrett; star cluster pammadayaw ti European Space Agency

Disiembre 11–17

Apocalipsis 6–14

“Pinarmekda … babaen ti dara ti Kordero”

Bayat ti panangbasam iti Apocalipsis 6–14, panunotem dagiti ubbing a sursuruam. Makatulong kenka ti Espiritu Santo a mangilasin kadagiti kinapudno a napategto kadakuada.

Yawis ti Panagbibinninglay

Ipakitam ti sumagmamano a ladawan a mangtulongto kadagiti ubbing a manglagip kadagiti banag a nasursuroda itay nabiit iti pagtaengan wenno iti Primary. Awisem dagiti ubbing a mangibinglay no ania ti ammoda maipapan kadagiti ladawan.

Isuro ti Doktrina: In-inaudi nga Ubbing

Apocalipsis 7:9, 13–14

Tulongannak ni Jesucristo nga agbalin a nadalus.

Nakita ni Juan ti adu a tao a nakakawes iti roba “pinapudaw … iti dara ti Kordero” (bersikulo 14). Ibilangmo no kasano a makatulong daytoy a parmata kadagiti ubbing a makaawat iti kinapateg ti panagbalin a nadalus babaen ti Pannubbot ni Jesucristo.

Dagiti Mabalin nga Aktibidad

• Ipakitam kadagiti ubbing dagiti sumagmamano a puraw a kawes (wenno ladawan ti sumagmamano) ken ti maysa a ladawan ni Jesus. Ibasam ti Apocalipsis 7:9, 13–14 kadagiti ubbing, ken kiddawem kadakuada nga itudoda ti ladawan ken dagiti kawes iti tunggal mangngeganda ti balikas a puraw. Ilawlawag a dagiti puraw a kawes ti mangibagi iti kinadalus ken mangipalagip kadatayo a maaramidnatayo a nadalus ni Jesucristo manipud kadagiti bidduttayo.

• Ipakitam kadagiti ubbing ti maysa a pedaso ti puraw a lupot wenno panid ti papel, ken parugitam daytoy babaen ti panangsuratda daytoy iti bolpen wenno panangikabilda iti rugit iti daytoy. Ilawlawag a no agsukirtayo kadagiti bilin, mariknatayo nga adda rugit iti badbadotayo. Ipakitam ti maysa a ladawan ni Jesus iti Getsemani (kas iti Libro ti Arte ti Ebanghelio, num. 56), ipaknim ti narugit a lupot wenno papel, ket ipakitam kadakuada ti maysa a nadalus a lupot. Paneknekam a makatulong kadatayo ni Jesucristo nga agbalin a nadalus.

• Agkansion iti kanta maipapan iti panagbuniag, kas iti “When I Am Baptized” (Children’s Songbook, 103), ket paneknekan no kasano a matulongannatayo ni Jesus nga agbalin a nadalus no mabuniagantayo.

Apocalipsis 12:7–11

Impakitak ti pammati ken ni Jesucristo iti biag sakbay daytoy a biag.

Iti Gubat idiay Langit, pinarmek dagiti napudno nga annak ti Dios ni Satanas babaen iti “sao ti pammaneknekda” ken babaen ti panangipakita iti pammati ken ni Jesucristo (Apocalipsis 12:11). Ituloyda nga aramiden ti kastoy iti agdama.

Dagiti Mabalin nga Aktibidad

• Tapno matulongam dagiti ubbing a maawatanda no ania ti kaipapanan ti sumurot iti pagwadan ti maysa a tao, pumilika iti maysa nga ubing nga agbalin a maysa a “lider,” ket kiddawem kadagiti dadduma pay a sumurotda kenkuana babaen ti panangaramidda ti ania man nga aramidenna. Kalpasanna aramidem a lider dagiti dadduma pay nga ubbing. Ibasam ti Apocalipsis 12:7–11 kadagiti ubbing ket ilawlawagmo a sakbay a nayanaktayo, pinilitayo a sinurot ni Jesus ket saan a ni Satanas.

• Aggigiddan nga agkansion iti kanta maipapan iti biag sakbay daytoy a biag, kas iti “I Lived in Heaven” or “I Will Follow God’s Plan” (Children’s Songbook, 4, 164–65). Agdamag kadagiti saludsod a kas, Ania ti napasamak idiay langit sakbay a nayanaktayo?” ken “Ania ti pinilitayo nga aramiden?” (Kitaen iti “Pakauna: Plano ti Nailangitan nga Amatayo” iti Dagiti Estoria iti Baro a Tulag, 1–5, wenno ti maitutop a video iti ChurchofJesusChrist.org.)

Apocalipsis 14:6–7

Naisubli ti ebanghelio iti aldawtayo.

Insurat ni Juan maipapan iti maysa nga anghel a mangyeg iti agnanayon nga ebanghelio” (Apocalipsis 14:6). Ti panangilawlawag iti Apocalipsis 14:6–7 ti mangted kenka iti gundaway nga agpaneknek maipapan iti Pannakaisubli ti ebanghelio ni Jesucristo iti panawentayo.

Dagiti Mabalin nga Aktibidad

• Ipakitam ti ladawan ni Moroni a makisarsarita ken ni Joseph Smith bayat ti panangbasam iti Apocalipsis 14:6 (kitaen iti Libro ti Arte ti Ebanghelio, num. 91). Awisem dagiti ubbing a mangitudo iti anghel iti ladawan. Isaritam kadakuada ti pakaammuan ti isasarungkar ni Moroni (kitaen iti “Kapitulo 3: Ni Anghel Moroni ken dagiti Pinanid a Balitok,” iti Dagiti Estoria iti Doktrina ken Katulagan, 13–17, wenno ti maitutop a video iti ChurchofJesusChrist.org).

• Payakem kadagiti ubbing ti estoria ni Moroni a sumarsarungkar ken ni Joseph Smith (kitaen iti Joseph Smith—Pakasaritaan 1:29–35). Tulongam ida a manginagan iti sumagmamano kadagiti bendision a nanamentayo gapu ta naisubli ti ebanghelio ni Jesucristo. Ibinglaymo ti pamaneknekmo maipapan iti Pannakaisubli.

Isuro ti Doktrina: In-inauna nga Ubbing

Apocalipsis 9:1–2

Makatulong kaniak ti ebanghelio a mangparmek iti sulisog.

Mabalin a mayarig ti asuk a nangpasipnget iti tangatang iti Apocalipsis 9:2 kadagiti pannulisog (kitaen iti 1 Nephi 12:17).

Dagiti Mabalin nga Aktibidad

• Mangidrowing ti ladawan ti maysa nga init ken maysa a nangisit nga ulep, ket gettengen dagitoy. Awisem dagiti ubbing a mangbasa iti Apocalipsis 9:2 ken 1 Nephi 12:17 ket isuratda iti nasipnget nga ulep no ania ti ibagi ti asuk wenno dagiti angep kadagitoy a bersikulo. Ikabil ti nasipnget nga ulep iti pisarra, ket awisem dagiti ubbing a mangilista kadagiti sulisog a pakaipasanguan dagiti ubbing a katawtawenda. Kalpasanna ikabil ti init iti pisarra ket kiddawem kadakuada a mangilista kadagiti ramit nga inted ti Nailangitan nga Ama kadatayo a mangparmek iti kinasipnget iti lubong.

• Kasano a matulongantayo dagiti dadduma nga adda iti naespirituan a sipnget? Tapno matulongan dagiti ubbing maipapan iti daytoy a saludsod, ipabuyam ti paset ti video “Choose the Light” (ChurchofJesusChrist.org), nangnangruna iti kagudua a maudi a paset ti video. Kasano a makapagbalintayo a kas iti tao a nagtulong iti agbisbisikleta iti tunnel?

Apocalipsis 12:7–11

Impakitak ti pammati ken ni Jesucristo iti biag sakbay daytoy a biag.

Adda iti daga dagiti ubbing a sursuruam gapu ta adda pammatida ken ni Jesucristo iti biag sakbay daytoy a biag ket pinilida ti sumurot Kenkuana.

Dagiti Mabalin nga Aktibidad

• Aggigiddan a mangbasa iti Apocalipsis 12:7–11, ken isurat iti pisarra dagiti balikas a dragon, Gubat idiay Langit, papanawen, pammaneknek, ken Kordero. Kiddawen kadagiti ubbing a manggupgop kadagitoy a bersikulo nga usarenda dagiti balikas iti pisarra. Ania ti masursurotayo maipapan ken ni Jesucristo (ti Kordero) manipud kadagitoy a bersikulo? Ania ti masursurotayo maipapan kadagiti pili nga inaramidtayo iti biag sakbay daytoy a biag?

• Iti pisarra, agaramid iti tallo a dasig ken ikkam iti label dagitoy Sakbay daytoy a biag, Kabayatan daytoy a biag, ken Agpada. Mangisagana kadagiti panid ti papel a nasuratan kadagiti kinapudno maipapan iti biag sakbay daytoy a biag ken maipapan iti biag iti daga, a kas kadagiti Addaantayo iti bagi, Awanantayo iti bagi, Agbiagtayo iti sidong ti Dios, Makigubgubattayo ken ni Satanas, Aramatentayo ti pammati ken ni Jesucristo, ken Surotentayo ti plano ti Dios. Pagsisinnublatem dagiti ubbing a mangpidut ti maysa a panid ti papel ket mangikeddeng no ania a dasig ti pakaibilangan daytoy. Ibinglaymo ti panagtalekmo a mabalin nga ituloy dagiti ubbing ti mangipakita iti pammatida ken ni Cristo.

Apocalipsis 14:6–7

Kas paset ti Pannakaisubli, maikasabanto ti ebanghelio iti intero a lubong.

Makatulong dagiti ubbing a sursuruam a mangikasaba iti ebanghelio iti “amin a pagpagarian, ken kaputotan, ken pagsasao, ken il-ili” (Apocalipsis 14:6).

Dagiti Mabalin nga Aktibidad

• Idawat kadagiti ubbing a mangbasa iti Apocalipsis 14:6–7 ken mangisurat iti pisarra kadagiti balikas ken ragup ti balikas manipud kadagitoy a bersikulo a napateg kadakuada. Idawatmo kadakuada a mangibinglay no apay a pilienda dagita a balikas wenno ragup ti balikas. Ilawlawag nga iladawan dagitoy a bersikulo ti Pannakaisubli ti ebanghelio iti panawentayo. Saludsodem ida no kasano a mabalinda a mairaman iti aramid ti pannakaikasaba ti ebenghelio iti lubong.

• Awisem dagiti ubbing a mangbasa iti Apocalipsis 14:7 ken mangulit iti pannakaisao iti bukodda a balikas ti mensahe ti anghel para iti lubong. Wenno awisem ida a mangidrowing iti maysa a ladawan a mangibagbagi iti mensahe ti anghel. Ania ti maibinglaytayo iti dadduma maipapan iti ebanghelio ni Jesucristo?

Yallukoy ti Panagsursuro iti Pagtaengan

Tulongam dagiti ubbing a mangisurat iti maysa a balikas wenno ragup ti balikas a mangtulongto kadakuada a manglagip iti maysa a banag a nasursuroda iti klase ita nga aldaw. Awisem ida a mangipakita no ania ti insuratda iti maysa a tao iti pagtaengan ket ibinglayda no ania ti nasursuroda.

Panangpadur-as iti Panangisurotayo

Isuro ti doktrina babaen iti musika. Ti pannakipagkanta kadagiti ubbing ket mangpatibker iti doktrina nga isursurom manipud kadagiti nasantuan a kasuratan. Para kadagiti kapanunotan, kitaen iti “Panangusar iti Musika a Mangisuro iti Doktrina” ken iti benneg a napauluan iti “Dagiti Pangiturong para iti Oras ti Panagkanta ken Pabuya dagiti Ubbing iti Musika iti Sakramento” iti daytoy a manual.