“Disiembre 4–10. Apocalipsis 1–5: ‘Dayag, ken Pannakabalin, ti Adda Koma … iti Cordero iti Awan Inggana,” Umaykayo, Sumurot Kaniak—Para iti Primary: Baro a Tulag 2023 (2021)
“Disiembre 4–10. Apocalipsis 1–5,” Umaykayo, Sumurot Kaniak—Para iti Primary: 2023
Disiembre 4–10
Apocalipsis 1–5
“Dayag, ken Pannakabalin ti Adda Koma … iti Kordero iti Awan Inggana”
Mabalin a narigat a maawatan dagiti ubbing ti libro ti Apocalipsis ngem naglaon daytoy iti napateg a doktrina a napintas ken simple.
Yawis ti Panagbibinninglay
Awisem dagiti ubbing a mangibinglay iti no kasano ti mariknada no makitada ni Jesucristo iti maysa a parmata. Idawatmo kadakuada a mangibinglay iti ania man a banag nga ammoda maipapan iti pannirigan ni Juan ken ni Jesus iti libro ti Apocalipsis.
Isuro ti Doktrina: In-inaudi nga Ubbing
Mapagraniagko ti silaw ti Mangisalakan.
Iti Apocalipsis 1:20, indilig ti Mangisalakan ti Simbaan kadagiti kandela. Tulongam dagiti ubbing a makaawat a mapagraniagda ti silawda ti silaw ti Mangisalakan babaen ti panagtungpal kadagiti pannursurona.
Dagiti Mabalin nga Aktibidad
-
Ipakitam kadagiti ubbing dagiti ladawan ti agduduma a pagtaudan ti lawag, kas iti maysa a bombilia, maysa a kandela, ken ti init. Bayat ti panagbasam iti “Ti pito a pagsilawan a nakitam ket dagiti pito a simbaan” (Apocalipsis 1:20), awisem dagiti ubbing a mangitudo iti ladawan ti lawag a nadakamat iti daytoy a bersikulo. Tulongam dagiti ubbing a mangilawlawag no kasano a datayo, kas miembro ti Simbaan ni Jesus, makapagbalintayo a kas iti lawag ti maysa a kandela—kas pagarigan, no agaramidtayo iti nasayaat a banag para iti dadduma.
-
Agkansion iti maysa a kanta maipapan iti panagbalin a maysa a lawag iti dadduma, kas iti “Jesus Wants Me for a SunbeamChildren’s Songbook, 60–61). Ibinglay dagiti wagas a nakitamon dagiti ubbing nga agbibiag iti ebanghelio ni Jesucristo ken agbalin a maysa a lawag kadagiti adda iti aglawlawda. Ibinglay no kasano a natulongannaka ti panagbalin a maysa a lawag a makarikna nga as-asidegka iti Nailangitan nga Ama ken ni Jesucristo.
Maawisko ni Jesucristo iti biagko.
Makatulong kadagiti ubbing ti metapora maipapan ken ni Jesus a nakatakder iti ridaw ken agtuktuktok tapno maawatanda a kayatna ti umasideg kadakuada.
Dagiti Mabalin nga Aktibidad
-
Bayat ti panangbasam iti Apocalipsis 3:20, ipakitam ti ladawan ti Mangisalakan iti ruangan manipud iti balabala iti daytoy a lawas iti Umaykayo—Sumurot Kaniak—Para kadagiti Indibidual ken Pamilia. Awisem dagiti ubbing nga ipapanda a nagtuktuktok ni Jesus iti ridaw kadagiti pagtaenganda. Paisaritam kadakuada no ania koma ti aramidenda.
-
Awisem dagiti ubbing a mangibaga kenka maipapan kadagiti panawen idi nagurayda iti maysa a tao a sumarungkar iti pagtaenganda a naragsakanda a makita. Ania ngata ti rikna ti agur-uray iti dayta a tao nga agtuktok iti ridaw? Ania ngata no ditayo pastreken ti tao iti uneg? Basaem ti Apocalipsis 3:20, ket pagsisinnublatem dagiti ubbing a mangiggem iti maysa a ladawan ni Jesus ket agpampammarang nga agtuktok iti maysa a ridaw. Mabalin nga agpammarang dagiti dadduma a miembro ti klase a manglukat iti ridaw. Ania ti mabalintayo nga aramiden tapno mayasideg kadatayo ni Jesus, nupay saantayo a makita Isuna?
Ni Jesuscristo ti agmaymaysa laeng a maikari nga agbalin a Mangisalakanko.
Naammuan ni Juan iti parmatana a ni Jesucristo laeng ti (ibagi ti maysa a kordero) mabalin a Mangisalakantayo ken mangipatungpal ti plano ti Ama (ibagi ti nakaserra a libro).
Dagiti Mabalin nga Aktibidad
-
Sakbay ti klase, mangbungon iti maysa a kopia ti Libro ti Arte ti Ebanghelio nga usaren ti papel wenno tali. Babaen ti panangusar iti sumagmamano a kangrunaan a ragup ti balikas manipud iti Apocalipsis 5:1–10, iladawam ti parmata a nakita ni Juan. Ipakitam kadagiti ubbing ti libro, ket ibagam kadakuada a ti laeng wagas a manglukat iti libro ket ti mangsapul iti ladawan ni Jesus nga inlemmengmo iti siled. No masarakanda ti ladawan, luktan ti libro ket ibinglay kadagiti ubbing ti sumagmamano a ladawan iti libro a mangibagi kadagiti bendision a sidadaan a magun-od gapu iti Pannubbot ni Jesucristo (kas iti maysa a templo, panagbuniag, ken dagiti pamilia. Paneknekam a ti Mangisalakan ti agmaymaysa laeng a mangaramid a posible dagita a banag.
-
Gupgopem ti parmata a nailadawan iti Apocalipsis 5:1–10, ket awisem dagiti ubbing a mangyakem no kasano ti narikna ni Juan ken dagiti dadduma pay kabayatan ti nadumaduma a paset ti parmata. Kas pagarigan, mabalin nga agpammarangda nga agsangit no awan ti makalukat ti libro, wenno maragsakanda idi linuktan ti Mangisalakan daytoy.
Isuro ti Doktrina: In-inauna nga Ubbing
No nagkumitak iti ebanghelio ti Mangisalakan, umawatakto iti dadakkel a bendision iti langit.
Ania ti kayatna a sawen kenka ti agbalin a “saan a nalamiis wenno saan a napudot [lukewarm]”? Ibilang dagiti wagas a pakatulongan kadagiti ubbing nga agbalin a kasupadi ti lukewarm—agbalin a naregget iti panagkumitda iti Mangisalakan ken iti ebangheliona.
Dagiti Mabalin nga Aktibidad
-
Basaen ti Apocalipsis 3:5, 12, 21, ken ilawlawag dagiti ania man a balikas a mabalin a saan nga ammo dagiti ubbing. Ania ti kaipapanan ti “agballigi”? Awisem dagiti ubbing a mangidrowing iti maysa kadagiti bendision a naikari kadagitoy a bersikulo ket ibinglayda daytoy iti klase.
-
Aggigiddan a basaen ti Apocalipsis 3:15–16. Kiddawem kadagiti ubbing a mangisarita kadagiti banag a kangrunaan a maaramat wenno pakaragsakan unay no napudotda (kas iti sopas) wenno nalamiis (kas iti sorbetes). Kasano a ti panagbalin a lukewarm maipapan iti Mangisalakan lapdannatayo kadagiti bendision a naikari kadagitoy a bersikulo 5, 12, ken 21?
-
Iti pisarra, isurat ti lukewarm, kasta met dagiti sumagmamano a kaipapananna, kas iti awan ganaygayna, awan essemna, wenno kasual. Usaren dagitoy a balikas a pangtulong kadagiti ubbing a makaawat no apay a saan a kayat ti Apo nga agbalintayo a lukewarm. Ania dagiti balikas a mapanunottayo a mangiladawan iti wagas a kayatna a pagbalinantayo? Ibinglaymo no apay a kayatmo ti naan-anay nga agkumit iti Mangisalakan, ket awisem dagiti ubbing a mangibinglay pay kadagiti kapanunotanda.
Mapilik ti agbalin a paset ti biagko ni Jesucristo.
Kasano a matulongam dagiti ubbing a sursuruam a manglukat iti puspuso ken biagda iti bileg ken impluensia ni Jesucristo?
Dagiti Mabalin nga Aktibidad
-
Bayat ti panangbasam iti Apocalipsis 3:20, ipakitam ti ladawan ti Mangisalakan iti ruangan manipud iti balabala iti daytoy a lawas iti Umaykayo—Sumurot Kaniak—Para kadagiti Indibidual ken Pamilia. Tapno matulongan dagiti ubbing nga agbalin a napateg ti ladawan kadakuada, awisem ida iti kada paris nga agtitinnulong a mangsungbat iti saludsod a kas kadagitoy: Apay nga agtuktuktok ni Jesus iti ridaw? Apay nga awan ti doorknob iti ruar ti ridaw? Ania ti kaipapanan ti panangipalubos a sumrek ni Jesus iti biagtayo?
-
Kiddawen kadagiti ubbing a mangisurat iti pisarra ti nadumaduma a wagas a “manglukat ti ridaw” ken ni Jesus. Mabalin nga iraman ti sumagmamano a pagarigan iti panagserbi kadagiti dadduma, panagbasa kadagiti nasantuan a kasuratan, ken pannakiranud iti sakramento.
Ni Jesuscristo ti agmaymaysa laeng a maikari nga agbalin a Mangisalakanko.
Isuro ti parmata a nailadawan iti Apocalipsis 5 a ni laeng Jesucristo ti maikari ken makabael a mangaramid iti Pannubbot ken mangisalakan kadatayo manipud iti basol.
Dagiti Mabalin nga Aktibidad
-
Awisem dagiti ubbing nga agsarita maipapan kadagiti panawen idi kasapulanda ti maysa a tao nga agaramid iti maysa a banag a saanda a kabaelan nga aramiden para iti bagbagida. Kiddawem kadakuada a basaenda ti Apocalipsis 5:1–10 ket sarakenda dagiti kasapulan a maaramid a maysa laeng a tao ti makaaramid (ilawlawag a ni Jesucristo ti Cordero ket ti libro ti mangibagi iti plano ti Dios). Ania ti inaramid ni Jesus para kadatayo nga awan ti asino man a makaaramid?
-
Kiddawem kadagiti ubbing a mangsapul ti maysa a himno wenno kanta dagiti ubbing a mangipaneknek maipapan ken ni Jesucristo (kas iti “Beautiful Savior,” Children’s Songbook, 62–63). Ania ti isuro dagiti balikas ti kanta maipapan ken ni Jesucristo? Kasano a maipada daytoy a kanta iti himno a pagdaydayaw a nakansion maipapan ken ni Jesucristo iti Apocalipsis 5:9–10?
Yallukoy ti Panagsursuro iti Pagtaengan
Awisem dagiti ubbing nga ibinglayda kadagiti pamiliada dagiti wagas a pakaawisanda ti impluensia ti Mangisalakan iti pagtaenganda.
Panangpadur-as iti Panangisurotayo
Yallukoy ti panagraem. Ti panangpanunot maipapan iti Nailangitan nga Ama ken ni Jesucristo ti napateg nga aspekto ti panagraem. Mabalin nga ipalagipmo kadagiti ubbing nga agbalinda a managraem babaen ti siuulimek a panangkansion wenno panangdayyeng iti maysa a kanta wenno panangi-display iti maysa a ladawan ni Jesus.